Эрдэнэт үйлдвэрийн удирдлагуудын даваа гаригийн ээлжит шуурхай зөвлөгөөн тус үйлдвэрийн зэс молибдений чанарт олон улсын стандарт нэвтрүүлсэн батламж гардуулснаар эхэллээ. Эрдэнэт үйлдвэр, Чанарын менежментийн тогтолцооны ISO 9001: 2015 стандартын шаардлагын дагуу буюу чанарын менежментийн тогтолцооны хамрах хүрээ, зэс молибдений баяжмалын үйлдвэрлэл, салбар нэгжийн үйл ажиллагааны хүрээнд чанарын менежментийн тогтолцоог бүрэн хэрэгжүүлсэн тул эл батламжийг олгосон байна. Тус үйлдвэр олон улсын энэхүү стандартыг бүхий л ажлын байрандаа нэвтрүүлэх зорилт тавьж, зөвлөх үйлчилгээний компанитай хамтран ажилласан юм. Энэ үйл явцад Стандарт хэмжил зүйн газраас аудит хийсний үр дүнд Эрдэнэт үйлдвэрийг чанарын тогтолцооны менежментийн стандарт хэрэгжүүлсэн байгууллагаар батламжлан, гэрчилгээг гардуулсан байна. Гурван жилийн хугацаанд хүчин төгөлдөр байх уг батламжийг цаашид үргэлжлүүлэн хадгалах үүрэг үйлдвэрийн бүхий л бүтцийн нэгжийн өмнө тавигдаж буйг Ерөнхий инженер Т.Батмөнх энэ үеэр онцлов.
Өнгөрсөн 7 хоногт ХАБЭА-н чиглэлээр хэвийн ажиллаж, өндөр эрсдэлтэй 62 ажил хийгдсэн байна. Урьдчилан сэргийлэх чиглэлээр 167 ажил гүйцэтгэсэн бол хувийн хамгаалах хэрэгсэл, ажлын хувцсыг хуваарийн дагуу олгож байгааг ХАБЭА-н хэлтсийн дарга Д.Мөнхболд мэдээллээ. Ил уурхайд хөдөлмөрийн аюулгүй байдлын 4 дүгээр шатны үзлэг хийгдэж, холбогдох акт шаардлагыг хүргүүлсэн байна. Байгаль орчин, ногоон хөгжлийн хэлтсээс цагаан тоосны нөлөөллийн бүсэд амьдарч буй иргэдийн эрүүл мэндийн үзлэгийн төсөл, төсвийг Эрдэнэт медикал эмнэлэгтэй хамтран гаргажээ. Иргэдийн эрүүл мэндэд цагаан тоосноос үзүүлж байгаа сөрөг нөлөөллийг оношлох тодорхойлох, энэ онд хийх ажлын талаар чиглэл авахаар Эрүүл мэндийн яаманд албан тоот хүргүүлжээ. Түүнчлэн Сэлэнгэ аймгийн Ерөө суманд хийгдэж буй техникийн нөхөн сэргээлтийн талаар Байгаль орчин, аялал жуулчлалын яам, Эрдэнэт үйлдвэр, Сэлэнгэ аймаг хамтран ажиллах гэрээ байгуулахаар ажиллаж буйг тус хэлтэс мэдээлэлдээ онцлов.
Шуурхайн зөвлөгөөнд Үйлдвэрлэлийн хэлтэс дэлгэрэнгүй мэдээлэл хийж, өнгөрсөн 9 сард уулын цул гаргалт, хөрс хуулалт, ачаа эргэлт, хүдэр дэх металлын агуулга зэрэг дөрвөн үзүүлэлтийн төлөвлөгөө биелээгүйг онцолсон. Он дуусах хүртэл үлдэж буй хугацаанд эдгээр үзүүлэлтийн төлөвлөгөөг биелүүлэх, ирэх жилийн үйлдвэрлэлийн төлөвлөлтөд онцгой анхаарч, бодит дүгнэлт гаргаж ажиллах үүрэг даалгавар удирдлагын зүгээс өглөө.
Мөн Ерөнхий захирлын 9 сарын 22-ны 02 тоот албан даалгавар гарсантай холбогдуулан Ерөнхий инженер мэдээлэл хийв. Энэхүү албан даалгаврыг хэрэгжүүлэх ажлын ерөнхий төлөвлөгөөг боловсруулж, энэ хүрээнд үйлдвэрлэлийн төлөвлөгөөг бүх үзүүлэлтээр биелүүлэх техник зохион байгуулалтын арга хэмжээг авах, он дуусталх хугацаанд хөрөнгө оруулалт, бүтээн байгуулалтын төлөвлөгөөний хэрэгжилтийг хэрхэн хангах, 2024 оны төлөвлөгөөний бэлтгэл ажил, худалдан авах ажиллагааг сайжруулах чиглэлээр авч хэрэгжүүлэх арга хэмжээ, ажлууд тусгагдсан байна. Энэ албан даалгаврыг хэрэгжүүлэхэд цех нэгж бүр идэвх санаачилгатай, үр бүтээл гаргаж ажиллахыг шуурхай зөвлөгөөн дээр онцлон санууллаа.
Нар 08:29 минутад мандаж 16:59 минутад жаргана.
Үс засуулвал: Өлзийтэй сайн
Суудал: Шороо
