Эрдэнэт үйлдвэрийн нийгмийн хөгжил, хамгааллын бодлого хөтөлбөр болон Захиргаа, ҮЭ-ийн холбооны хооронд байгуулан хэрэгжүүлж буй “Хамтын гэрээ”-ний хүрээнд орон сууц шинээр худалдан авч буй ажилтнууддаа 13 САЯ төгрөгийн санхүүгийн дэмжлэг олгодог.
2023 оны нэгдүгээр улиралд нийт 121 АЖИЛТАН энэхүү дэмжлэгт хамрагдсан байна. Харин хоёрдугаар улиралд хамрагдах 140 ажилтны материалыг өнгөрсөн 5 сард хүлээн авсан боловч үйлдвэрийн газрын Дотоод хяналт, мониторингийн хэлтсээс хийсэн хяналт шалгалттай холбоотойгоор түр хугацаанд зогсоосон байв.
Тэгвэл 2,3 дугаар улирлын орон сууцны дэмжлэг 13 сая төгрөгийг ирэх 10 САРД багтаан олгох юм байна. Өөрөөр хэлбэл, орон сууцны санхүүгийн дэмжлэг олгох үйл ажиллагаанд хийгдсэн шалгалтын эцсийн дүгнэлт хараахан гараагүй байгаа ч ажилтнуудын зүгээс олон удаагийн хүсэлт ирж буйг шийдвэрлэх зорилгоор Хамтын ажиллагаа, нийгмийн харилцааны газар, Дотоод хяналт, мониторингийн хэлтэстэй зөвшилцөн, орон сууцны дэмжлэг 13 сая төгрөгийг үргэлжлүүлэн олгохоор болжээ.
“Одоогоор хоёрдугаар улиралд санхүүгийн дэмжлэг авах ажилтнуудын материалтай бүрэн танилцаж дууссан бол гуравдугаар улиралд хамрагдах ажилтны материалыг 10 сарын эхний долоо хоногт хүлээн авахаар цех нэгжийн нийгмийн тусламж дэмжлэгийн ажлын хэсгүүдтэй хамтран ажиллаж байна” гэж Хамтын ажиллагаа, нийгмийн харилцааны газрын тэргүүлэх мэргэжилтэн Г.Дөлгөөн мэдээллээ. Ингэснээр 2,3 дугаар улирлын орон сууцны дэмжлэг 10 САРД бүрэн олгогдох ажээ.
Нар 08:29 минутад мандаж 16:59 минутад жаргана.
Үс засуулвал: Өлзийтэй сайн
Суудал: Шороо
