Зэс наадмын бахархал нь Эрдэнэт үйлдвэр байв

Орхон аймаг аялал жуулчлалыг хөгжүүлэх, уул уурхайн салбарыг сурталчлах зорилгоор “Зэс фестиваль”-ийг Монголд анх удаа зохион байгууллаа. Энэхүү наадам Монгол Улсын баатар “Эрдэнэт үйлдвэр” ТӨҮГ, түүнийг дагасан зэсийн үйлдвэр, аж ахуйн нэгж, уурхайчдын баярын жагсаалаар эхэлж, зэсээр урласан бүтээлийн “Copper art” үзэсгэлэн худалдаагаар үргэлжлэв. Мөн Эрдэнэт хотын төв хэсэг болох Амарын талбайд зэс эдлэлийн гэр музей ажиллаж, гэрэл зургийн үзэсгэлэн дэлгэгджээ. 

“Зэс фестиваль”-ийн нээлтийн үйл ажиллагаанд УИХ-ын гишүүн Д.Батлут, Байгаль орчин, аялал жуулчлалын яамны сайд Б.Бат-Эрдэнэ, Орхон аймгийн Засаг даргын орлогч А.Түвшинжаргал, ИТХ-ын дарга Д.Мөнхбат, “Эрдэнэт үйлдвэр” ТӨҮГ-ын Ерөнхий захирал Г.Ёндон, Ерөнхий инженер Т.Батмөнх, “Ачит Ихт”, “Эрдмин”, “Зэс Эрдэнийн хувь”, “Ган сэнтий”, “Оюутолгой” компанийн удирдлагууд, уурхайчдын төлөөлөл оролцсон юм.  

Энэ үеэр “Эрдэнэт үйлдвэр” ТӨҮГ-ын Ерөнхий захирал Г.Ёндон Монгол Чехийн геологичид анх Эрдэнэтийн Овоо ордыг нээсэн нь Монгол зэс дэлхийд гарах эхлэл болсныг онцлоод Эрдэнэт үйлдвэрийг байгуулах анхны хэлэлцээр байгуулагдсаны 50 жил, анхны баяжмалаа экспортод ачиж, үйл ажиллагаагаа эхэлсний 45 жилийн түүхэн ойгоо уурхайчид их хөдөлмөр, өндөр бүтээлээр угтахаар шамдаж байгаагаа илэрхийлэв. Мөн эх орныхоо газрын баялгийг хаягдалгүй бүрэн ашиглаж, нэмүү өртөг шингэсэн эцсийн бүтээгдэхүүн үйлдвэрлэхийн төлөө уурхайчин хамт олон хичээн ажиллаж байна гээд өнгөт металлургийн томоохон “мод”-ыг Эрдэнэт үйлдвэрт тарина. Энэ мод олон салаа мөчиртэй Үйлдвэрлэл, технологийн парк болон хөгжинө гэдэгт итгэл төгс байгаагаа илэрхийлсэн юм. 
Уг наадам зэс олборлох, зэсээр бүтээгдэхүүн үйлдвэрлэдэг томоохон үйлдвэр, аж ахуйн нэгжүүдтэй танилцах, зэс эдлэлийн дуудлага худалдаанд оролцох боломжийг иргэдэд олгов.   
Монгол улсын Засгийн газраас 2023-2025 оныг Монголд зочлох жил болгон зарласантай холбогдуулан орон нутаг өөрийн бренд бүтээгдэхүүнийг нэрлэн сурталчлах үйл ажиллагаа зохион байгуулж байгаа бөгөөд Эрдэнэтийн нэрийн хуудас, өнгө нь зэс болохыг ийнхүү тодотголоо.