Г.ЦОГТГЭРЭЛ: Тээрмийг хугацаанаас нь өмнө сольсон нь том амжилт юм

Баяжуулах үйлдвэрийн Ерөнхий инженер Г.Цогтгэрэлээс тоног төхөөрөмжийн шинэчлэлт хийгээд үйлдвэрлэлийн төлөвлөгөөний биелэлтийн талаар тодрууллаа.

-Баяжуулах үйлдвэрийн тухайд оны эхний найман сарын үйлдвэрлэлийн үндсэн үзүүлэлтүүд бүрэн биелээд явж байна. Энд онцлон дурдахад гуравдугаар улиралд солих ёстой  1А тээрмийг хоёрдугаар улиралд сольж ашиглалтад орууллаа. Үүнийг бид өөрсдийн дотоод нөөц боломжоо ашиглан хийлээ. Өөрөөр хэлбэл үндсэн төлөвлөгөөт ажлынхаа зэрэгцээ тээрмийг хугацаанаас нь өмнө сольсон нь том амжилт юм. Ингэснээр гуравдугаар улиралд төлөвлөгөөнөөс илүү хүдэр боловсруулах нөхцөл бүрдээд байна. 
-Үндсэн тоног төхөөрөмжийг шинэчлэх ажил хэр явагдаж байна вэ? 
-1А болон ММС-1 тээрмийн давтамж хувиргагч, хөдөлгүүрийг солилоо. Шүүн хатаах хэсгийн хоёрдугаар прессфилтьрийг сольсон, тохируулах ажил хийгдээд явж байна. Энэ нь томоохон ажлуудын нэг.  Хаягдлын аж ахуйд цагт 15 мянган м3 булинга шахдаг нэгдүгээр насосыг цагт 18 мянган м3 булинга шахах хүчин чадалтай насосоор солих шинэчлэлийн ажлууд хийгдлээ. Уг насос өвлийн цагт ажиллах ёстой. Одоогоор нөөцөд байна. Эдгээр үндсэн тоног төхөөрөмжүүдийн шинэчлэлээс гадна хөрөнгө оруулалт, өргөтгөл шинэчлэлтийн бэлтгэл ажлууд нэлээн эрчимтэй явагдаж байна.  Тухайлбал, хүдэр бэлтгэлийн  нэгдүгээр шугамын ТЭЗҮ-ийг боловсруулах ажлыг сонгон шалгаруулалтад шалгарсан компанитай хамтран гүйцэтгэлээ. Энэ ажлыг УУЯ-ны Эрдэс баялгийн мэргэжлийн зөвлөлд хэлэлцүүлэхээр шилжүүлсэн. Хаягдал өтгөрүүлэх технологи нэвтрүүлэх ажлын бэлтгэл буюу инженер геологи, зураг төслийн ажил эрчимтэй явж байна.  
-Олон жил ашигласан Хаягдлын аж ахуйн санг шинэчлэх ажил яригдаж байгаа. Энэ талаар...?
-Хаягдлын аж ахуйн санд олон улсын хөндлөнгийн аудит хийлгэсэн. Энэ ажлын тайлан удахгүй гарна. Тайлангийн үр дүнгээс хамаарч  одоо ашиглаж буй хаягдлын сангаа хэдэн жилийн хугацаанд цаашид хэрхэн ашиглах талаар ажлын төлөвлөгөө гаргаж ажиллана. Тэгэхээр 45 жилийн хугацаанд 900 орчим сая тонн хаягдал элс хуримтлуулсан энэ сангийн багтаамж нэлээн өндөр түвшинд хүрсэн. Ер нь бидний тооцоогоор 10 орчим жил ашиглах боломжтой байгаа. Үүний дараа өөр хаягдлын сан  байгуулах шаардлага гарна. Тэгэхээр шинэ хаягдлын сан байгуулах бэлтгэл ажил давхар хийгдэж байна гэсэн үг. Энэ нь хаягдлын сангийн газрыг олох, инженер геологийн судалгаа явуулах, ямар технологиор элс хураах вэ гэсэн техник технологийн шийдлүүдийг гаргах ажлууд хийгдэж байна.
-Цаг гарган ярилцсанд барлалаа.