М.ОТГОН: Бид 45 жилийн ойгоо их хөдөлмөр, бүтээлээр угтахаар ажиллаж байна

Энэ жил “Эрдэнэт үйлдвэр” ТӨҮГ-ын 45 жилийн ой тохиож байна. Ууган цехийн нэг Баяжуулах үйлдвэрт түүхэн ойн жилд онцлох ямар ажлууд хийгдэж, бүтээн байгуулалт хэрхэн өрнөж буй талаар тус цехийн дарга М.Отгоноос тодрууллаа. 
-Түүхэн ойн жилд танай цехэд онцлох ямар ажлууд өрнөж байна? 
-Баяжуулах үйлдвэрийн хамт олон 45 жилийн ойгоо хөдөлмөр, бүтээлээр угтахаар төлөвлөн ажиллаж байна. Бид төлөвлөсөн гол томоохон ажлуудаа эхний хагас жилд нилээн сайн нугалж авсан. Тухайлбал, төв корпус дээр 1А тээрэм солих, Шүүн хатаах хэсэг дээр даралтат шүүлтүүр суурилуулах, Өөрөө нунтаглах хэсэг дээр цахилгаан хөдөлгүүрийг давтамж хувиргагчтай хамт солих гэх мэтчилэн томоохон ажлуудаа хийлээ. Хаягдлын аж ахуй дээр гэхэд 18000-ын хүчин чадалтай том насос суурилууллаа. Бид ирээдүйд хийх ажлуудаа нилээн сайн төлөвлөж байгаа. Хүдэр бэлтгэлийн нэгдүгээр шугамыг шинэчлэх ажлын техник эдийн засгийн үндэслэл боловсруулагдаад дууссан. Захиалагчийн зүгээс томилсон Ажлын хэсэг хүлээж авсан. Техникийн зөвлөл хуралдаад дэмжсэн. Одоо Уул уурхай, хүнд үйлдвэрийн яам руу хүргэгдээд, Эрдэс баялгийн мэргэжлийн зөвлөлөөр хэлэлцэхээр хүлээгдэж байна. 
-Энэ ажил хийгдсэнээр ямар боломж нээгдэх вэ? 
-Энэ ажил хийгдсэнээр Эрдэнэт үйлдвэрийн хүдрийн дээж дээр судалгаа шинжилгээ хийж, хүдрийн хатуулгийг тодорхойлсноор ирээдүйд ажиллах технологио боловсронгуй болгож байгаа юм. Хэдийгээр дэлхийд нэвтрээд 30 орчим жил болж байгаа ч Монгол Улсын хувьд шинэ технологи учраас бид үүнд нилээн ул суурьтай, судалгаа шинжилгээтэй ажиллаж байна. Мөн хаягдал өтгөрүүлэх технологи нэвтрүүлэх ажлын нарийвчилсан зураг төсөл хийгдээд явж байна. Ажлын гүйцэтгэл 50 орчим хувьтай. Бид энэ жилдээ багтааж дуусгаад, ирэх жилээс бүтээн байгуулалтыг эхлүүлэхээр төлөвлөж байна. 
-Шинэ хаягдлын сан барих ажил ямар шатанд яваа вэ? 
-Техник, эдийн засгийн үндэслэл, нарийвчилсан зураг төсөл боловсруулах ажилд олон улсын хэмжээний тендер зарласан. Гүйцэтгэгч шалгарсан. Эндээс бид гаднын мэргэжилтнүүдтэй том далангийн олон улсын стандартын хэмжээнд шинэ хаягдлын санг төлөвлөх, байгуулах зэрэг ажлыг ирэх жилээс бичиг баримтын хэмжээнд боловсруулалт хийж эхэлнэ. Энэ мэт ирээдүйд чиглэсэн олон ажил хийгээд явж байна. Төлөвлөсөн ажлууд ямар нэгэн саадгүй явагдаж байна.  
-Баярлалаа.