Жилийн бүрийн 6 сарын 1-нд дэлхий нийтээр тэмдэглэдэг Олон улсын Хүүхдийн эрхийг хамгаалах өдрийг энэ жил “Хүүхэд бүхэн аз жаргалтай байг” утга санаан дор зохион байгууллаа. Хүүхэд бүхэн аз жаргалтай бол улс орны ирээдүй гэрэл гэгээтэй байх учиртай. Чухам энэ утга агуулгыг дэвшүүлж, Эрдэнэтчүүд хотынхоо төв талбайд хүүхэд багачуудаа баярлуулж, дуу хуур, инээд хөөр цалгисан баяр баясалтай нэгэн өдрийг хамтдаа өнгөрүүлэв.
“Сүүлийн жилүүдэд “ковид” цар тахлын улмаас олон нийтийн төвлөрсөн үйл ажиллагаа, тэр тусмаа хүүхдийн баярын арга хэмжээ хязгаарлагдмал байв. Харин цар тахлын аюул харьцангуй алсарсан тул энэ жил хүүхдийн баярын үйл ажиллагааг Орхон аймаг, Эрдэнэт үйлдвэр хамтран өргөн хүрээнд зохион байгуулахаар шийдвэрлэсэн” гэж уг арга хэмжээг тэмдэглэн өнгөрүүлэх Эрдэнэт үйлдвэрийн Ажлын хэсгийн ахлагч, Хамтын ажиллагаа, нийгмийн харилцааны газрын албаны дарга Д.Эрдэнэбат онцлов.
Эрдэнэт үйлдвэр “Хүүхэд бүхэн аз жаргалтай байг” баярын үйл ажиллагаанд зориулан дөрвөн хэсэгт тоглолтын тайз засчээ. А.Амарын талбай, хотын төв зам дагуу Орхон аймгийн Номын төв, Эрдэнэт үйлдвэрийн Ерөнхий захиргааны 2-р байрны чанх урд эдгээр тайз байрлав. Тайз тус бүрд Соёл урлагийн цогцолборын ажилтнууд болон хамтран зохион байгуулагч Эрдэнэт үйлдвэрийн Залуучуудын холбооны тэргүүлэгч залуус дуу бүжиг, шүлгийн уралдаанд оролцох хүүхэд багачуудыг насны ангиллаар бүртгэж, уралдааны зохион байгуулалтыг хариуцсан. Энэ зохион байгуулалт нь баярын үйл ажиллагаанд олон хүүхэд багачуудыг оролцуулах, хүүхэд бүрийг баярлуулах өргөн боломж нээсэн тааламжтай шийдэл болсныг аав ээжүүд онцлон ярьж байсан юм.
Эрдэнэт үйлдвэрийн баярын хөтөлбөрийн хүрээнд Соёл урлагийн цогцолборынхон дуу, бүжиг, шүлэг, гар зурагийн уралдаан, Спорт цогцолбороос талбайд ирсэн хүүхдүүдийн дунд дугуй, корнхолл, хөл бөмбөг, сагсан бөмбөг, бадминтон зэрэг 8 төрлийн тэмцээнийг зохион байгуулж, нас насны аваргуудад медаль өргөмжлөл, бэлэг гардуулсан. Түүнчлэн Эрдэнэт үйлдвэрийн дэргэдэх “Энэрэл” төв, 19 дүгээр сургууль, Орос цэцэрлэг, Соёл урлагийн цогцолборын дугуйлангийн авьяаслаг хүүхдүүдийн нэгдсэн урлагийн тоглолт боллоо. Соёл урлагийн цогцолборын уран бүтээлчид, аав ээж, ах эгч, найз нөхөдтэйгөө шинэ дурсамж бүтээхээр ирсэн хүүхэд багачуудынхаа баяр дээр баяр нэмж, уран бүтээлийн дээжээс өргөн толилуулав. Эрдэнэтийн багачууд энэ жилийн хүүхдийн баяраа ийнхүү хамтдаа, хөгжилтэй, дурсамжтай тэмдэглэлээ.
Нар 06:52 минутад мандаж 18:31 минутад жаргана.
Үс засуулвал: Эд малын гарлагатай
Суудал: Уул
