Эрдэнэт үйлдвэрийн дэргэдэх Орос эмнэлэг нь хүүхдийг осол, гэмтлээс урьдчилан сэргийлэх сургалтыг тогтмол зохион байгуулдаг. Энэ удаа зуны улирал эхэлж, сурагчдын амралт эхэлж байгаатай холбогдуулан 5 дугаар сарын 23-н өдөр тус эмнэлгийн Мэс засал-гэмтлийн их эмч Доржиев Ч.С. Орос 19-р сургуулийн 9-р ангийн сурагчдад зөвлөгөө өгч ажиллалаа.
Тэрээр, зуны амралтын үеэр хүүхдүүд гадаа гудамж талбайд насанд хүрэгчдийн хараа хяналтгүй явж байхдаа бэртэж гэмтэх эрсдэл 20%-иар нэмэгддэг. Тухайлбал, хүүхдийн гэмтлийн шалтгаан нь ердийн зан үйлээс, насанд хүрэгчдийн өдөр тутам хүүхдэд тавих хараа хяналт сулрах, хүүхдийн гэнэн болгоомжгүй байдлаас үүдэлтэй тохиолдол их байдаг. Ялангуяа хөдөлгөөн ихтэй хөвгүүд гэмтэлд өртөх эрсдэл охидоос 2-3 дахин их байдаг гэсэн судалгаа бий. Тиймээс зуны амралтын үеэр эцэг эх, асран хамгаалагчид хүүхдийг болзошгүй эрсдэлээс хамгаалах, түүнээс урьдчилан сэргийлэх үүргээ сулруулахгүй байх нь чухал. Юуны өмнө гэмтэж бэртэх орчны эрсдэлийг бууруулж, гэмтлээс урьдчилан сэргийлэх аргыг хүүхдэд зааж, таниулах хэрэгтэй гэдгийг жишээ, тайлбартай хэлж, зөвлөлөө.
Мөн, зуны улиралд хүүхдүүд хагарсан шилээр тоглож хөл, гараа зүсэх, эсвэл хатсан мөчир, мод, бут сөөг, саваа, модон тоглоом, хүрзээр тоглох үед, дугуй унах, скутер, савлуураас унах, замын зорчих хэсгийн ойролцоо тоглож автын осолд өртөх, гадаа тоглоомын талбайн эвдэрсэн хөдөлгөөнт тоглоом, модны намхан хожуул, түүнчлэн ухсан нүхэнд унах, гулсуураас унах, авирдаг хананаас унах, цахилгаан эд зүйлс болон хамгаалалт бэхэлгээгүй сул тавилганаас гэмтэл авах гэх мэт тохиолдлууд элбэг. Эцэг эх, насанд хүрэгчид өөрийн үйлдлээр жишээ үзүүлж хүүхдийг зөв үйлд сургах нь чухал байдаг. Хүүхдэд бидний үйлдэл ихэд нөлөөтэй гэдгийг бид мартаж болохгүй гэдгийг сануулсан юм.
Нийгмийн цехүүд үйл ажиллагаагаа сурталчлах аяны хүрээнд Орос эмнэлгийн эмч, мэргэжилтнүүд өдөр тутмын үйл ажиллагаагаа сурталчлан таниулах ажлыг төлөвлөн амжилттай зохион байгуулж байна. Үүний хүрээнд өнгөрөгч баасан гарагт 5-р сарын 26-ны өдөр тус эмнэлгийн Хүүхдийн их эмч Маганова Елена Геннадьевна нь ажилтнуудынхаа дунд “Гепатит вирусийн өвчнөөс урьдчилан сэргийлэх нь” сэдэвт лекц уншсан. Уг сэдвийн хүрээнд гепатит A, B, C, D, E вирусийн төрлүүд, тэдгээрийн халдвар дамжих зам, урьдчилан сэргийлэх арга, эмчилгээ, үр дагаврын талаар ярьсан. Гепатит В, С вирус нь "Зөөлөн алуурчид" гэж нэрлэгддэг бөгөөд уг 2 вирусийг илүү онцолж тайлбарлалаа.
Гепатит вирус нь элэгний үрэвсэлт өвчин бөгөөд цочмог ба архаг гэж ангилна. Архаг гепатит вирусийн нууцлаг үед шинж тэмдэг илэрдэггүй бөгөөд хүн энэ хугацаанд өвдсөн гэдгээ мэдэрдэггүй. Элэгний үрэвслийг мэдэхгүйгээр удсан тохиолдолд элэгний хатуурал, элэгний хорт хавдар үүсэж болно.
Урьдчилан сэргийлэх арга хэмжээг дагаж мөрдвөл өвчин тусахгүй байх өндөр магадлалтай. Одоогийн байдлаар гепатит А, В вирусийн эсрэг үр дүнтэй вакцинууд байдаг бөгөөд бага наснаас нь эхлээд вакцин хийлгэсээр эдгээр вирусээс хамгаалах боломжийг олгодог. Харин гепатит С вирус нь тодорхой хэлбэлзэлтэй байдаг тул С вирусийн эсрэг вакцин одоогоор хийгдээгүй байна.
Гепатит А ба Е вирус нь хувийн эрүүл ахуйн ариун цэврээс шалтгаалдаг тул бохир ус, хоол хүнсээр дамждаг. Гепатит В, С, D вирус нь цусаар дамждаг бөгөөд, ариутгагдаагүй эмнэлгийн хэрэгсэл, бэлгийн зам, халдвартай гэр ахуйн эд зүйлсээр (сахлын хутга, шүдний сойз, маникюрын хэрэгсэл) вирус халдварлагддаг.
Гепатит С вирусийн эсрэг тусгай курс эмчилгээг хийлгэснээр хүний биеэс вирусийг бүрэн устдаг. Энэхүү эмчилгээг зөвхөн мэргэжлийн эмчийн хяналт дор хийлгэснээр Гепатит С вирусийг үр дүнтэй эмчлэх боломжтой юм.
Нар минутад мандаж минутад жаргана.
Үс засуулвал: 
Суудал: 
