“ISO-9001 бидний ойлголт, миний оролцоо” аяны шилдгүүд тодорлоо

     Засвар, механикийн заводын хамт олон Чанарын менежментийн тогтолцоо-Шаардлага MNS ISO 9001:2016 стандарт нэвтрүүлж, хэрэгжүүлэх ажлыг үйлдвэрийн газрын хэмжээнд түүчээлэн эхлүүлсэн юм. Энэхүү стандартын хэрэгжилтийн тасралтгүй, үр дүнтэй байдлыг хангах, гүйцэтгэл, үр нөлөөг сайжруулах зорилгоор заводын инженер техникийн ажилтнуудын дунд мэдлэг бататгах, бүтээлч ажлын аян өрнүүлж, шилдгүүдээ тодрууллаа.

Аяны хүрээнд нийт инженер техникийн ажилтнууд найман баг болон Чанарын менежментийн тогтолцоо стандартын тухай асуулт, үл тохирлыг тодорхойлох дасгал ажил, үйл ажиллагааг сайжруулах төсөлт болон бүтээлч ажлуудыг гүйцэтгэж өрсөлдсөн. Энэ оны гуравдугаар сараас эхлэн хоёр сарын хугацаатай явагдсан уг аянд З.Рэнцэндаш ахлагчтай “Кайзен” баг тэргүүлж, Д.Галбямба ахлагчтай “Хамтдаа” баг дэд байрт шалгарлаа. Шүүгчээр Засвар, механикийн заводын дарга Б.Баасансүрэн, Чанарын хяналтын хэлтсийн Стандарт, чанарын товчооны Чанарын мэргэжилтэн П.Баянмөнх, Засвар, механикийн заводын Чанарын тэргүүлэх мэргэжилтэн Б.Баянжаргал нар ажилласан. 

“Манай завод “Эрдэнэт үйлдвэр” ТӨҮГ-ын тогтвортой хөгжлийн бодлого, 2031 он хүртэлх хөгжлийн үндсэн чиглэл зэрэг бодлогын баримт бичгүүдэд дэвшүүлсэн зорилго, зорилтуудтай уялдуулан байгууллагын чанарын менежментийн болон нэгдсэн менежментийн тогтолцооны стандартыг хэрэгжүүлэх ажлыг шат дараатай зохион байгуулан ажиллаж байна. Тухайлбал 2020 онд нийт ажилтнуудад стандартуудыг таниулах, хэрэгжүүлэх модульчилсан сургалтууд зохион байгуулсан. Мөн өндөр насжилттай металл боловсруулах суурь машинуудын техникийн үзүүлэлт, хэмжээний хазайлт, нарийвчлалын алдаа зэргийг тогтоох техникийн аудит хийсэн. 2021 онд “Эрсдэлийн менежментийн журам” боловсруулан хэрэгжүүлсэн. 2022 онд эрсдэлийн үнэлгээний болон дотоод аудитын баг байгуулан Чанарын менежментийн тогтолцооны MNS ISO 9001:2015, Эрсдэлийн менежментийн MNS ISO 31000:2015 стандартуудын хэрэгжилтийг хангах, тасралтгүй сайжруулах ажил хийж байна” гэж заводын Чанарын тэргүүлэх мэргэжилтэн Б.Баянжаргал ярилаа.