“Эрдэнэт үйлдвэрийн хөрөнгө оруулалтаар хийж буй томоохон ажлын нэг болох Эмульсийн тэсрэх бодисын үйлдвэр зургадугаар сарын 30 гэхэд ашиглалтад орно”, гэж Ил уурхайн дарга Д.Нямдорж мэдээллээ. Одоогоор тоног төхөөрөмжөө суурилуулж дуусаад, дулааны шугамаа холбож, цахилгааны монтаж, барилгын дотоод засал хийж байна. Энэхүү үйлдвэрийг барьж байгуулах гүйцэтгэгчээр “МИК” компани ажиллаж байгаа бөгөөд тавдугаар сарын нэгэн гэхэд үйлдвэрийг хүлээлгэн өгөх юм. Бүтээн байгуулалтын ажил эрчимжиж, гүйцэтгэгч, захиалагч талууд долоо хоног бүр хуралдаж, ажлын үр дүнгээ хэлэлцэж байгаа аж. Өмнөх үйлдвэр жилд 13 мянган тонн тэсрэх бодис үйлдвэрлэж байсан бол шинэ үйлдвэр 15 мянган тонныг үйлдвэрлэх юм. Орчин үеийн шинэ тоног төхөөрөмж суурилуулснаар амиакийн ууршилт багасаж, ажлын орчин сайжрах юм. Өмнө нь тэсрэх бодисоо үйлдвэрлээд, шууд машинд ачдаг байсан бол одоо 20м3-ийн багтаамжтай хоёр савтай болсноор үйлдвэрлэсэн бодисоо хадгалж ачуулах боломжтой болжээ. Ингэснээр хөдөлмөрийн бүтээмж дээшлэх юм. Ийнхүү Эрдэнэт үйлдвэрийн уурхайн болон үйлдвэрлэлийн өсөн нэмэгдэж буй хэрэгцээг чанартай тэсрэх бодисоор тасралтгүй хангах зориулалттай шинэ үйлдвэр удахгүй үүдээ нээх нь ээ.
2023-06-03
Билгийн тооллын 14
Нар 04:56 минутад мандаж 20:44 минутад жаргана.
Үс засуулвал: Эд мал арвидна.
Суудал: Ус
