Энгийн дадал хэвшүүлж, улирлын чанартай өвчлөлөөс сэргийлэхийг зөвлөв

М.Одгэрэл
Сэтгүүлч
Энгийн дадал хэвшүүлж, улирлын чанартай өвчлөлөөс сэргийлэхийг зөвлөв

     Корона вируст халдвар, томуу, томуу төст өвчний улирлын чанартай дэгдэлт нэмэгдэж байгаатай холбогдуулан “Эрдэнэт” сувиллын цогцолбороос Эрдэнэт үйлдвэрийн бүтцийн нэгжүүд, ажилтнуудад зөвлөмж хүргүүллээ. Эрдэнэт үйлдвэрийн хэмжээнд өнгөрсөн долоо хоногт корона вируст халдварын 17 тохиолдол бүртгэгдсэн байна. Энэ нь өмнөх долоо хоногтой харьцуулахад 22 тохиолдлоор буурсан үзүүлэлт юм. Гэсэн ч цех, нэгжүүд уурхайчдадаа мэдээ мэдээлэл тогтмол хүргэх, нийтийг хамарсан үйл ажиллагааг хязгаарлах, зайлшгүй шаардлагаар олон хүн цугласан тохиолдолд халдвар хамгааллын энгийн дэглэм барьж ажиллах, хувь хүмүүс амны хаалтаа зүүж хэвших, хүн хоорондын зай барих, гараа ариутгах, ажил амралтаа сайн зохицуулж, дархлаагаа дэмжих зэрэг энгийн дадлыг хэвшүүлэхийг зөвлөмж болголоо. 

     “Эрдэнэт” сувиллын цогцолборын эмч нар энэ долоо хоногт үйлдвэрийн бүсэд ажилладаг 600 гаруй хүнд шинжилгээ хийхэд эерэг сорьц гараагүй байна. Харин шинж тэмдэгт суурилсан шинжилгээг 66 хүнд хийхэд дөрвөн тохиолдол эерэг гарчээ. Тэд хөнгөн хэлбэрээр өвчилж, гэрээр эмчилгээ хийлгэж байна. Түүнээс гадна амбулаториор 1205 хүн үзүүлсний 48 нь томуу төст өвчний болон амьсгалын замын цочмог халдварын шалтгаант өвчтэй болох нь тогтоогджээ. 

Эрдэнэт үйлдвэрийн ажилчид сайн дурын үндсэн дээр томуугийн вакцинд хамрагдсаар байна. Өнгөрсөн долоо хоногт 49 ажилтан хамрагдсан бол энэ долоо хоногт 35 хүн томуугийн вакцин хийлгэжээ. Орхон аймгийн хэмжээнд томуугийн дархлаажуулалт 91,7 хувьтай явна. 
 

Б.Баттөгс
Зурагчин

Сэтгэгдэл бичих

Уншигчдын бичсэн сэтгэгдэлд erdenettoday.mn хариуцлага хүлээхгүй болно. Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.