• Шилдэг бүтээлийн эзэд ирэх сард тодорно

      Монгол Улсын эрчим хүчний сайд өнгөрсөн оныг “Ухаалаг эрчим хүч”-ний жил болгон зарласантай холдогдуулан Эрдэнэт үйлдвэрийн Ерөнхий захирал “Эрчим хүч-математик загварчлал” сэдвийн дор бүтээлийн уралдаан зарласан. Үйлдвэрийн газрын бүтцийн нэгжүүдэд шинийг санаачлан нэвтрүүлэх боломжтой болон нэвтрүүлж буй арга шийдэл, техник технологи, тоног төхөөрөмжийг таниулах, ажилтнуудын техникийн болон шинжлэх ухааны боловсролыг хөгжүүлэх, туршлага судлуулах, идэвх санаачилгыг өрнүүлэх, бүтээлч, шинийг эрэлхийлэгч ажилтнуудыг урамшуулах зорилго бүхий энэхүү уралдааны нэгдүгээр шатны шалгаруулалт өнгөрсөн долоо хоногт боллоо. Инновацийн сангийн найман сая төгрөгийн санхүүжилттэй уг уралдааныг өргөн хүрээнд, өндөр зохион байгуулалттай хийхээр төлөвлөсөн ч “ковид-19” халдварын үеийн нөхцөл байдлаас  шалтгаалан цомхон бүрэлдэхүүнтэй, хэсэгчилсэн байдлаар зохиогдов. Эрдэнэт үйлдвэрийн бүтцийн нэгж, хэсгүүдэд ашиглагдаж буй тоног төхөөрөмж, шугам сүлжээний оролтын параметрүүдийг математик загварчлал, компьютер симуляцийн аргаар боловсруулж дүн шинжилгээ хийх, ажилчдад орчин үеийн техникийн хөгжлийн чиг хандлагыг таниулах, тэдгээрийг үйлдвэрлэлд ашиглаж сурах идэвх санаачилга өрнүүлэх зорилготой уг уралдаанд хувь хүн, хамт олны 18 бүтээл иржээ. Ихэвчлэн, тоног төхөөрөмжийн гэмтэл саатлыг багасгах, найдваржилтыг өсгөх, хийц болон ажиллагааг оновчилсон, технологийн горим, түүний үзүүлэлтүүдэд чанарын өөрчлөлт оруулахыг эрмэлзсэн бүтээлүүд байв. Тэд бүтээлүүдийнхээ загвар, танилцуулга, үзүүлэнг видео бичлэг, гэрэл зураг, бодит үр ашгийн судалгаа ашиглан хийсэн байгаа нь сонирхол татсан. Нэгдүгээр шатны шалгаруулалтаас Дулааны цахилгаан станцын “ДЦС-ын хөрөнгө оруулалтын үнэлгээний DCF загвар”, мөн “ДЦС-ын үйлдвэрлэлийн ерөнхий ажиллагааг математик загвар ашиглан тооцоолол хийх симуляци программ”, Ус хангамжийн цехийн “Эргэлтийн усны горим”, мөн “Ус хангамжийн цехийн ус өргөх станцуудын насосны ажиллах горимыг оновчлох”, “Тоног төхөөрөмжийн ашиглалт, засвар үйлчилгээний бүртгэлийн программ”, Ил уурхайн “Цахилгаан эрчим хүчний чанарын хэмжилт, динамик загварчлал” гэсэн зургаан бүтээл дараагийн шатанд шалгарлаа. Ирэх сард эцсийн шалгаруулалт хийгдэж, түрүүлсэн бүтээлийн эзэд гурван сая, дэд байрт шалгарсан баг хоёр сая, гутгаар байр эзэлсэн хамт олон 1,5 сая төгрөгийн шагнал хүртэх юм. Харин тусгай байранд гурван бүтээл тунаж 500 мянган төгрөгийн урамшуулал хүртэнэ.     Мөн шинэ санаа, оновчтой бүтээлд тодорхойлох боломжтой бүтээлүүдийн эрхийг хамгаалах, зохиогчидтой хамтран ажиллах, үлгэрчлэн бусад газар нэвтрүүлэх асуудалд үйлдвэрийн газрын зүгээс анхаарч ажиллана гэж шүүгчид онцолсон. Уралдааны шүүгчдийн бүрэлдэхүүнд “Эрдэнэт үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер Т.Батмөнх, Эрчим хүчний хэлтсийн дарга Ш.Төрбат, цахилгааны тэргүүлэх инженер Д.Энхтөгс тэргүүтэй удирдлагын багаас гадна ШУТИС-ийн багш, дэд профессор П.Ариунболор урилгаар ирж, шүүгчээр ажилласан юм. Тэд “Эрчим хүч-математик загварчлал” уралдаанд шинжлэх ухаанд суурилсан бүтээл түлхүү ирэх болов уу, гэж хүсэж хүлээсэн ч сайн саналын хэлбэрийн танилцуулга дийлэнх нь байсан учир дараагийн шатны шалгаруулалт хийхээр шийджээ. Бүтээл нь шалгарсан багийнхан дараагийн шатанд нарийн мэргэжлийн түвшинд ярилцлага өрнүүлж өрсөлдөнө. Ингээд ШУТИС-ийн багш, дэд профессор П.Ариунболортой цөөн хором ярилцлаа.      П.АРИУНБОЛОР: Эрдэнэт үйлдвэрт хиймэл оюун ухааны сүлжээ үүсэх боломжтой   -“Эрчим хүч-математик загварчлал” уралдаанд ирсэн бүтээлүүдийн чанар чансааны талаар та юу хэлэх вэ? -Юуны өмнө намайг чухал ач холбогдолтой энэ уралдааны шүүгчээр урьсанд баярлалаа. Уралдаанд ирсэн 18 бүтээл шинжлэх ухааны түвшинд хийгдсэн сайн ажлууд ч байна, зарим нь хөдөлмөр хөнгөвчилсөн, сайн санал санаачилга хэлбэрийнх ч байна. Бид шинжлэх ухааны үндэстэй, математик загвараар эрчим хүч хэмнэх, үйлдвэрлэлд эдийн засгийн ямар үр ашиг авчрах вэ, гэдэгт илүү төвлөрч авч үзлээ. Сайн бүтээл олон ирсэн болохоор шууд байр эзлүүлэхэд хэцүү байна. Тиймээс нэгдүгээр шатанд шалгарсан ажлуудыг дахин хэлэлцэж, мөн чанарыг нь илүү нарийн тодотгох хоёр дахь хэлэлцүүлэг хийхээр шийдвэрлэсэн. Би Эрдэнэт үйлдвэрийн инженерүүдээр маш их бахархаж байна. Эндээс Монгол Улсын хэмжээнд мөрдөх стандартууд гарах төлөвтэй. Мөн маш сайн докторууд төрж мэдэхээр байна. Залуус үйлдвэрлэлийнхээ горимыг, асуудлыг маш сайн мэдэж байгаа нь бахархал төрүүлсэн. Эрдэнэт үйлдвэрийг аж үйлдвэрийн дөрөвдүгээр хувьсгалд бэлтгэхэд математик аргачлал, тооцоолол сайн эзэмшсэн эдгээр залуусын хүч хөдөлмөр маш их гэдгийг өнөөдөр олж харлаа. Шинэ үеийн залуус сайн бэлтгэгдэж байгаа юм байна. Үйлдвэрлэлийн туршлага сайтай, ихэнх нь магистрын зэрэгтэй, судалгааны арга барил хэдийнээ эзэмшсэн залуус уралдаанд оролцлоо. Шүүгчийн хувьд Эрдэнэт үйлдвэрийн хэтийн зорилго- Үйлдвэрлэл, шинжлэх ухааны парк байгуулахад залуусын хувь нэмэр их, тэдэнд итгэж болно гэж хэлмээр байна.     -Эрдэнэт үйлдвэрийн Эрчим хүчний чиглэлийг авч яваа мэргэжилтнүүдийн ур чадвар, залгамж халааг та хэрхэн үнэлэв?  -Ер нь Эрдэнэт үйлдвэр залгамж чанар сайтай. Үйлдвэрлэлийн гол бодлогыг барьж яваа тулхтай мэргэжилтнүүдийнхээ удирдлага дор залуу үе нь хүмүүждэг, арга барилыг авдаг, уламжлал шинэчлэлийг хослуулсан залгамж холбоо үүссэн газар. Нэгэнт бий болсон уламжлалт холбоонд үндэслэн үйлдвэрийг цаашид улам автоматжуулаад, технологийг нь оновчтой горим руу шилжүүлээд ухаалаг болгох, яваандаа хиймэл оюун ухаан ажиллахад бололцоотой. Учир нь 40 гаруй жил ажилласан энэ үйлдвэрт өөрийн “бодит дата”-нууд бэлэн байгаа. Бүх өгөгдлүүдээ   ашиглаад, залгамж холбоогоо үргэлжлүүлээд, залуучуудаа боловсруулаад явахад дараагийн 10 жилд хиймэл оюун ухааны сүлжээ үүснэ гэдэгт итгэлтэй байна.  -Манай үйлдвэрийн газар эрчим хүчний асуудлаа хэр оновчтой шийдвэрлэсэн гэж үзэж байна?  -Эрдэнэт үйлдвэр дэлхийн хэмжээний уурхайн хувьд эрчим хүчний бодлого барьж байгаа хүмүүс нь монголд төдийгүй дэлхийд өндөр үнэлэгдэх мэргэжилтнүүд гэдэгт би огтхон ч эргэлзэхгүй. Сүүлийн үед цахилгаан эрчим хүч хэрэглэгчээс үйлдвэрлэгч болох том алхам хийсэн нь маш зөв шийдвэр байсан. Дээрээс нь янз бүрийн сэргээгдэх эрчим хүч яригдаж байна. Маш олон мэргэжилтэн доктор хамгаалчихсан судалгааны ажил хийж байна. Өөрөөр хэлбэл эрдмийн бүхэл бүтэн бүтээн байгуулалт өрнөж байгаа газар шинжлэх ухаан, технологийн тал дээр асуудал гарахгүй, Монгол улсын хэмжээнд тэргүүлэх байр сууриа алдахгүй болов уу.   -Сүүлийн үед Монголын эрчим хүчний салбарт ямар өөрчлөлт шинэчлэлт хийгдэж байгааг та ажиглаж байна?  -Бид Улаанбаатар, цаашлаад Монгол улсын эрчим хүчний өнөөгийн байдал, хэтийн төлөвийг байнга сонирхож байдаг. Жил ирэх тусам эрчим хүчний хэрэглээ асар их өсөж байна. Энэ нөхцөлд хэмнэлт маш чухал. Эрчим хүчний оновчтой төлөвлөлтүүд хийх ёстой. Хувьсах гүйдлээр эрчим хүч дамжуулж байсан бол одоо тогтмол гүйдлийн шугам сүлжээ, өндөр хүчдэл, смарт, кредит гээд ухаалаг сүлжээ бий болж байна. Үүнээс гадна энэ их үйлдвэрлэл, хорт хийн ялгарал дэлхийг туйлдуулж байгаа энэ үед бид эко орчин, сэргээгдэх эрчим хүчийг илүү түлхүү ашиглах ёстой. Монгол орны сэргээгдэх эрчим хүчний нөөц бололцоог харахад нар, салхины эрчим хүчний асар их нөөцтэй. Харин усны эрчим хүчний нөөц хомс. Яагаад гэхээр Монгол улс Азийн усны яг хагалбар дээр оршдог. Тэгэхээр бид цэнгэг усаа гамнах ёстой. Би бол мэргэжлийн хүн биш. Сонирхогчийн хувьд усан цахилгаан станц барих шийдвэрийг зөв гэж боддоггүй. Хамгийн ээлтэй хөгжих нь нар болон салхины эрчим хүч. Яваандаа био химийн эрчим хүчийг гаргах хэрэгцээ бий. Энэ их хог хаягдал байнга дулаан ялгаруулж байдаг шүү дээ. Хүмүүсийн хоолны үлдэгдэл, хаягдал энэ бүхнээр био химийн сэргээгдэх эрчим хүч гаргах боломжтой. Гэхдээ дулааны цахилгаан станц тэргүүлэх байр суурийг эзэлсээр байх болно. Түүнийг сэргээгдэх эрчим хүчээр тэжээж оновчлох асуудал нэн чухал.   -Манай уншигчдад, уралдаанд оролцсон залууст хандаж юу хэлэх вэ? -Өнөөдөр бол сурах эрин үе. Дээхэн үед бидэнд сурах бичиг олддоггүй байсан бол интернет хөгжсөн энэ цаг үед бүх хүмүүст шинжлэх ухааны хаалга нээлттэй. Хүн өөрөө хичээвэл ямар ч амжилтад хүрэх боломж нөхцөл бүрдсэн. Янз бүрийн программ хангамж бий болчихлоо. Залуу хүмүүс амжилтад хүрэх хоёр л зам бий. Англи хэлтэй байх, үндсэн мэргэжлээ маш сайн мэдэж, өөрийн болгох. Цаашид эрдмийн ажилтан болох гэж байгаа бол математик суурьтай байх ёстой. Түүнээс гадна дэлхий нийтэд эмэгтэй инженерүүдийг илүү дэмжих болсон. Учир нь эмэгтэй хүмүүс шинжлэх ухаан, технологийн салбарт орж ирснээр дэлхий ертөнц өөрөөр хөгжиж эхэлсэн. Дан эрчүүд байсан бол дэлхий хогондоо дарагдаж, дайн тулаан түлхүү болох байсан байх. Гэтэл эмэгтэйчүүд шинжлэх ухаан, технологийн салбарт хүч түрэн орж ирснээр илүү их инновацийг бий болгосон. Хүн нэг хэрэглэсэн бол тэр ая тухтай, ашигтай шинж чанарыг мэдээд буцаад тэр хэрэглээнээсээ гарч чадахгүй мөнгө төлдөг бүтээгдэхүүнийг инноваци гээд байгаа шүү дээ. Тэгвэл  инновацийг ихэвчлэн эмэгтэйчүүд гаргаж байна. Яагаад гэхээр эмэгтэйчүүд хүүхдээ асарч байна, эмнэлэгт өвчтөн асарч байна. Өөрсдийн мэдэрч байгаа зовлонг техникээр дамжуулан хүнд хүртээж байгаа учраас инноваци бий болоод байгаа юм. Сүүлийн үед эрүүл мэндийн салбарт маш ихээр инноваци бий болсон. Тэгэхээр охидыг инженерчлэлийн чиглэлээр суралцаасай гэж хүсдэг. Тэгвэл монгол сайхан хөгжих боломж бий. Дэлхийн технологи ороод ирлээ, интернет нээлттэй байна, хөгжихөд хязгаар үгүй боллоо. Хүн хэдий чинээ зүтгэнэ төдий чинээ сайхан амьдрах боломж нээгдсэн. Тийм учраас бүү залхуур, суралц гэж хэлмээр байна. -Баярлалаа.     М.Одгэрэл Фото: Б.Баттөгс   Дэлгэрэнгүй...
  • О.ОТГОНБАЯР: Хүндрэлийг даван туулах нэгдсэн хөтөлбөрийн хэрэгжилт үр дүнтэй байна

      Эрдэнэт үйлдвэрийн Захиргаа, хүний нөөцийн бодлогын газрын дарга О.Отгонбаяраас шинэ коронавирусын тархалтаас урьдчилан сэргийлэх, үүсээд буй хүндрэлийг даван туулах зорилгоор байгуулагдсан Төв штабын ажлын хэрэгжилтийн талаар тодрууллаа.    -Эрдэнэт үйлдвэрийн хэмжээнд шинэ коронавирусын тархалттай холбоотойгоор үүсээд буй хүндрэлийг даван туулах, сөрөг үр дагавраас урьдчилан сэргийлэх, эрсдэлээс хамгаалах зохих арга хэмжээг шуурхай зохион байгуулах зорилгоор Төв штаб болон Чиглэл хариуцсан штабуудыг Ерөнхий захирлын А/139 тоот тушаалаар байгуулсан. “Эрдэнэт үйлдвэр” ТӨҮГ нь уурхайчдын ажлын байр, цалин хөлс, урамшууллыг тогтвортой хадгалж, уурхайчдынхаа  гэр бүлийг эрсдэлээс хамгаалах, улс, орон нутгийн  эдийн засагт оруулж буй хувь нэмрийг бууруулах-гүй байх гэсэн үндсэн зорилго-тойгоор ажиллаж байна. Энэ нь уурхайчдын хамтын хөдөлмөр юм. Мөн “Шинэ коронавирусын тархалтаас урьдчилан сэргийлэх, үүсээд буй хүндрэлийг даван туулах арга хэмжээний нэгдсэн хөтөлбөр”, үүний хавсралт “Хүндрэлийг даван туулах арга хэмжээний нэгдсэн төлөвлөгөө”, “Үнийн хэлбэлзлийг тооцсон үйлдвэрлэл, эдийн засгийн арга хэмжээний төлөвлөгөө”, “Хөдөлмөр зохион байгуулалт, цалин хөлсний чиглэлээр хэрэгжүүлэх арга хэмжээний төлөвлөгөө”-г баталсан.  “Үйлдвэрлэлийн тасралтгүй үйл ажиллагааг хангах”, “Санхүү, эдийн засгийн үйл ажиллагааг эрчимжүүлэх”, “Нийгмийн харилцаа хамтын ажиллагааны асуудлыг зохицуулах”, “Томоохон төсөл, хөтөлбөрийг хэрэгжүүлэх”-д чиглэл хариуцсан штабууд арга хэмжээний төлөвлөгөө боловсруулж, батлуулан, хэрэгжилтийг ханган ажиллаж байна. Ажлын төлөвлөгөөний биелэлт 46,4 хувьтай байна. Эдгээр штабууд долоо, 14 хоног тутам хуралдаж, Төв штабын хуралдаанаас шийдвэр гаргаж, ажлын явцтай танилцаж, үүрэг өгч ажиллаж байгаа. Үйл ажиллагааны нэгдсэн хөтөлбөр 42,5 хувийн биелэлттэй байна. Нийт 50 үүрэг даалгаврыг чиглэл хариуцсан штабуудад хүргүүлж, хэрэгжилтийг нь ханган ажиллаж байна. -Хөтөлбөр, төлөвлөгөөний дагуу ямар ажлууд хийгдээд байна вэ?  -Зэсийн баяжмалын үйлдвэрлэлийг 2,244.3 тн-оор, молибдены баяжмалын үйлдвэрлэлийг 152.4 тн-оор нэмэгдүүлж ажилласнаар зэс, молибдены баяжмал ачилтын төлөвлөгөөг 101-112,6 хувиар биелүүлж, 3,8 тэрбум төгрөгийн нэмэлт орлого олох боломж бүрдээд байна.   -Үйлдвэрийн газрын хэмжээнд өртөг, зардал бууруулах арга хэмжээг хэрэгжүүлж, зэсийн үнийн эрсдэлийн түвшинтэй уялдуулан, гүйцэтгэлд хяналт тавьж ажилласнаар батлагдсан төлөвлөгөөт нийт зардлыг эхний дөрвөн сарын байдлаар 23.8 тэрбум төгрөгөөр бууруулан ажиллалаа. -Үйлдвэрлэлийн үндсэн тоног төхөөрөмж, технологийн горимыг цахилгааны үнийн гурван тарифт системд тохируулан ажилласнаар 185.0 сая төгрөгийн цахилгаан эрчим хүчний зардал хэмнэсэн. -“Сархиа” байгалийн чийрэгжүүлэлтийн төвд агч, голт бор, хайлаас зэрэг 2650 мод, бут, Баяжуулах үйлдвэрийн Хаягдлын аж ахуйн 4М далангийн баруун урд талд 530 мод тарьж хүлээлгэн өглөө.  -“Уурхайчин-1” орон сууцны хорооллын барилгын угсралтын ажил, Соёл, спортын “Эрдэнэт цогцолбор“-ын барилгын ажил, “Сэлэнгэ” амралт, аялал жуулчлалын цогцолборын Ногоон хөгжлийн төвийн барилгын ажил хуваарийн дагуу явагдаж байна.  -Засвар механикийн заводын Цутгуурын цехэд хүйтнээр хатуурах холимгоор хэв бэлтгэх хагас автомат шугам суурилуулах шинэчлэлийн ажлын явц 98 хувийн гүйцэтгэлтэй, тоног төхөөрөмжийн туршилт хийгдэж байна. Төв штабын өмнөх хуралдаанаар Эрдэнэт үйлдвэрт хэрэгжиж буй таван бодлогыг авч хэлэлцсэн. Цаашид энэ ажлыг эрчимжүүлнэ.  -Үйлдвэрийн газрын гэмт хэрэг, зөрчлийг арилгах, хариуцлага тооцох системийг боловсронгуй болгох ажлын хүрээнд Ерөнхий захирлын “Гэмт хэрэг, зөрчлөөс урьдчилан сэргийлэх, сахилга бат, хариуцлага, дэг журмыг сайжруулах ажлыг эрчимжүүлэх тухай”  А/203 тоот тушаалын хэрэгжилтийг ханган ажиллаж байна.  -Баярлалаа. Т.Батчулуун Фото: Б.Баттөгс Дэлгэрэнгүй...
  • Өнөөдөр 05 дугаар сарын 26

    Өнөөдөр 05 дугаар сарын 26 Мэдүүштэй... 1. Өнөөдөр жилийн 147дахь өдөр. Он дуусахад 218 хоног үлдлээ. 2. Эрдэнэт хотод агаарын хэм өдөртөө +24 градус, шөнөдөө +7 градус дулаан, үүлшинэ, салхины хурд 5-6 м/сек байна. 3. Аргын тооллын 5 дугаар сарын 26.Ангараг гараг. Билгийн тооллын шинийн 4. Шарагчин могой өдөр. Өдрийн наран 5 цаг 02 минутад мандан, 20 цаг 37 минутад жаргана. Энэ өдөр үхэр, могой, морь жилтнээ аливаа үйлийг хийхэд эерэг сайн. Харин гахай, бич, тахиа жилтнээ сөрөг муу тул элдэв үйлд хянамгай хандаж, биеэ энхрийлүүштэй.  Аливаа үйлд муу бөгөөд өдрийн сайн цаг нь гахай (21:40-23:40), үхэр (01:40-03:40), луу (07:40-09:40), морь (11:40-13:40), хонь (13:40-15:40), нохой (19:40-21:40) болой. Хол газар явагсад баруун хойд зүгт мөрөө гаргавал зохистой. Үс шинээр үргээлгэх буюу засуулахад модон хохимой өдөр тул цээрлэвэл зохилтой. 4.Дэлхийн зах зээл дээр нэг тонн зэс 5242 ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2801, евро 3054, БНХАУ-ын юань 392, ОХУ-ын рубль 38, Японы иен 26, БНСУ-ын вон 2.2 төгрөгтэй тэнцэж байна. (Эх сурвалж: www.gogo.mn)   Эрдэнэт үйлдвэрийн түүхэнд энэ сард... Асуулт: -Эрдэнэт үйлдвэр хөдөлмөрчдийн хэрэгцээнд зориулан өргөн хэрэгцээний ямар бараа таваар үйлдвэрлэж байна вэ? Хариулт:- Эрдэнэт үйлдвэрээс хөдөлмөрчдийн өргөн хэрэглээнд зориулан жилд 10 гаруй нэрийн 300 гаруй мянган төгрөгийн бараа үйлдвэрлэн нийлүүлж байна. Үүнд, спортын хэрэглэл, орон сууцны сантехникийн зориулалттай резинээр хийсэн сэлбэг, малчид, хөдөлмөрчдийн гэр ахуйн хэрэгцээний зарим нэрийн бараа үйлдвэрлэж худалдааны байгууллагаар дамжуулан борлуулж байна. Цаашид нийт ажиллагсдын цалингийн фондын нэг төгрөг тутамд таван мөнгөний бүтээгдэхүүн үйлдвэрлэх нормативыг үндэслэн өргөн хэрэгцээний бараа үйлдвэрлэлийг нэмэгдүүлж, нэр төрлийг өргөтгөх чиглэлээр тодорхой программ боловсруулж байна. Ийм боломж ч үйлдвэрт байгаа юм.  (Эх сурвалж: “Монгол, Зөвлөлтийн хамтарсан уул уурхайн баяжуулах “Эрдэнэт” үйлдвэр: 100 асуулт, хариулт” номноос...)   Дэлгэрэнгүй...
  • Бутлуурын удирдлага, хяналтын схемийг шинэчилж байна

      Баяжуулах үйлдвэрт хүдэр хүлээн авах анхан шатны бутлуурын удирдлагын шкабыг солих ажил ид үргэлжилж байна. Үйлдвэр байгуулагдах үед тавигдсан цахилгаан схемтэй удирдлагын шкаб нь сул зогсолт үүсгэх, гэмтэл их гарах болж ашиглалтын шаардлага хангахгүй хэмжээнд хүрчээ. Иймээс програмчлагдсан, мэдрэгч бүхий дэлгэцтэй Siemens фирмийн орчин үеийн удирдлага, хяналтын шкаб шинээр суурилуулж байна. Ингэснээр удирдлага хяналт оновчтой, шуурхай болохоос гадна мэдээллийн сан бүрдэх, түүнд тулгуурлан дүгнэлт хийх боломжтой болж, орчин үеийн программ хангамжийн ололтыг үйлдвэрлэлд нэвтрүүлж байгаагаар давуу юм. Энэ жил бутлуурын удирдлагын хуучин таван шкабыг S7-300, S7-400 загварын шинэ төрлийн удирдлага, хяналтын шкабаар солих бөгөөд эхний ажлын туршилтыг өнгөрсөн лхагва гарагт амжилттай хийлээ. Өнгөрсөн хоёрдугаар сараас эхэлсэн уг ажлыг “Анд энерги” компани үйлдвэрлэлийн үйл ажиллагааг тасалдуулахгүй гүйцэтгэж, “их зогсолт”-ын өмнө хүлээлгэн өгөхөөр шамдаж байна.   М.Одгэрэл Фото: Б.Баттөгс Дэлгэрэнгүй...
  • Өнөөдөр 05 дугаар сарын 25

    Мэдүүштэй... 1. Өнөөдөр жилийн 146 дахь өдөр. Он дуусахад 219 хоног үлдлээ. 2. Эрдэнэт хотод агаарын хэм өдөртөө +21 градус, шөнөдөө +6 градус дулаан, бага зэргийн бороотой, салхины хурд 5-7 м/сек байна. 3. Аргын тооллын 5 дугаар сарын 25. Сумьяа гараг. Билгийн тооллын шинийн 3. Балжиннямтай шар луу өдөр. Өдрийн наран 5 цаг 03 минутад мандан, 20 цаг 36 минутад жаргана. Энэ өдөр хулгана, бич, луу жилтнээ аливаа үйлийг хийхэд эерэг сайн. Харин нохой жилтнээ сөрөг муу тул элдэв үйлд хянамгай хандаж, биеэ энхрийлүүштэй.  Цог буяны өдөр тул аливаа үйлд маш сайн. Буяны үйл, үйлс эхлэн, хишиг даллага авах, гэр байшин барих, бэр буулгах, хуврага тойн болох, эд мал авах зэрэгт буян хишиг нэмэх нэн сайн. Өдрийн сайн цагнь луу (07:40-09:40), могой (09:40-11:40), бич (15:40-17:40), тахиа (17:40-19:40), гахай (21:40-23:40), бар (03:40-05:40) болой. Хол газар явагсад зүүн зүгт мөрөө гаргавал зохистой. Үс шинээр үргээлгэх буюу засуулахад эд, мал баялаг төгөлдөр баясгалан болох сайн. 4.Дэлхийн зах зээл дээр нэг тонн зэс 5242 ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2801, евро 3072, БНХАУ-ын юань 394, ОХУ-ын рубль 39, Японы иен 25, БНСУ-ын вон 2.2 төгрөгтэй тэнцэж байна. (Эх сурвалж: www.gogo.mn)   Эрдэнэт үйлдвэрийн түүхэнд энэ сард... Асуулт: -Эрдэнэт үйлдвэрээс улс даяар дэлгэрсэн үүсгэл санаачилга, туршлага бий юу? Хариулт:-Уулын баяжуулах Эрдэнэт үйлдвэрийн интернационалч хамт олны үүсгэл санаачилгаар бий болж, улс даяар дэлгэрч, үр ашгаа өгсөн, одоо ч өгсөөр байгаа дараах тэргүүн туршлага бий. Үүнд: Халамжлан хүмүүжүүлэх хөдөлгөөний туршлага. Энэ туршлагыг дэлгэрүүлэх тухай 1981 оны 09 дүгээр сарын 05-ны өдөр МХЗЭ-ийн Төв хороо, БНМАУ-ын Хөдөлмөр, нийгэм хангамжийн улсын хороо тогтоол гаргасан. Хөдөлмөр хамгаалал, аюулгүй ажиллагааны нэгдсэн системийн туршлага. Энэ туршлагыг дэлгэрүүлэх тухай 1980 оны нэгдүгээр сарын 30-ны өдөр Аж үйлдвэр, барилгын ажилчдын ҮЭ-ийн төв хорооны тэргүүлэгчдийн тогтоол гаргасан. Боловсон хүчинтэй ажилладаг туршлага. Энэ туршлагыг дэлгэрүүлэх тухай Геологи уул уурхайн үйлдвэрийн яам албан даалгавар гаргасан. (Эх сурвалж: “Монгол, Зөвлөлтийн хамтарсан уул уурхайн баяжуулах “Эрдэнэт” үйлдвэр: 100 асуулт, хариулт” номноос...)   Дэлгэрэнгүй...
  • ДЦС-ын “Бүтээлч” бүлгийнхэн эргэх механизмын аюулыг мэдрүүлэх төхөөрөмж бүтээжээ

    Эрдэнэт үйлдвэрийн Дулааны цахилгаан станцынхан ХАБЭА-н хэлтсээс зарласан “Аюулыг аюулгүйгээр мэдрүүлэх” сургалт, дадлагын төхөөрөмж бүтээх уралдаанд ирүүлсэн аюул эрсдэлийг мэдрүүлэх төхөөрөмжөө танилцуулав. Тус станцын ажилтнууд үйлдвэрлэлийн ажлын байранд түгээмэл гарах эрсдэлтэй аюул буюу эргэлдэх механизмтай харьцаж буй үед тохиолддог осол аваарыг бодитойгоор мэдрүүлэх зориулалттай төхөөрөмж бүтээжээ. Эргэлдэх машин механизм дээр ажиллахдаа тухайн ажилтан ямар аюул эрсдэлтэй тулгарч болох, түүнээс сэргийлэхийн тулд хэрхэн сонор сэрэмжтэй ажиллах ёстойг уг төхөөрөмж дээр сургах юм байна. “Аюулыг аюулгүйгээр мэдрүүлэх” уралдаанд тус цехийнхэн өндөр ач холбогдол өгч, төхөөрөмж бүтээх ажилтнуудаа нэгтгэн “Бүтээлч” бүлэг байгуулан оролцож байгаа аж. Тэд уралдааны төхөөрөмж бүтээх ажлаа 3 дугаар сарын сүүлээр эхэлсэн бол одоо сүүлийн шатны тохируулгыг хийж буйгаа ХАБЭА-н инженер С.Бадрах ярив. “Бүтээлч” бүлгийнхний хийсэн “Эргэлдэх механизмын аюулыг мэдрүүлэх” төхөөрөмж нь автомат удирдлагатай төдийгүй олон үйлдлийг нэг зэрэг харуулах боломжтой. Гар утасны аппликейшн ашиглан, хамгийн бага 12 вольтын хүчдэлээр хөдөлгүүрүүд ажиллахаар зохион бүтээсэн нь инженерийн ур ухаан шингэсэн онцлогтой бүтээл болжээ. Мөн аккумляторт цэнэглэдэг тул хаана ч зөөвөрлөн ашиглаж болох зэрэг олон давуу талтай юм. М.Балжинням Фото: Б.Баттөгс   Дэлгэрэнгүй...
  • ТОП 100 аж ахуйн нэгжийн жагсаалтыг тэргүүлсэн Эрдэнэт үйлдвэрийн хамт олондоо баяр хүргэв

    Монгол Улсын Засгийн газар, Монголын Үндэсний Худалдаа Аж үйлдвэрийн танхимаас хамтран аж ахуйн нэгжүүдийн тухайн жилийн орлого, нийгмийн даатгал төлөлт, ашиг, хөрөнгийн хэмжээ болон ажилтнуудын тоо гэсэн үндсэн таван үзүүлэлтээр эрэмбэлдэг ТОП 100 шалгаруулалтын манлайлагчаар “Эрдэнэт үйлдвэр” ТӨҮГ тодорсон. Энэхүү амжилт, ололтод  гар сэтгэл нийлж,  хамтын хүчээр хүрсэн уурхайчин хамт олондоо тус үйлдвэрийн Ерөнхий захирлын нэгдүгээр орлогч бөгөөд Ерөнхий инженер Т.Батмөнх баяр хүргэв.  “Эрдэнэт үйлдвэр” ТӨҮГ, 2019 оны ТОП 100 жагсаалтын тэргүүнд бичигдсэнээрээ Монгол Улсын шилдэг аж ахуйн нэгжүүдийн шалгаруулалтыг 18 дахь удаагаа манлайлж буй. Улс, орон нутгийн төсөвт төвлөрүүлж буй татвар, цэвэр ашиг, борлуулалтын орлогын хэмжээгээр нь харьцуулан эрэмбэлдэг, “ТОП 100” шалгаруулалтын 2019 оны жагсаалтыг “Эрдэнэт үйлдвэр” ТӨҮГ, 961.7 тэрбум төгрөгийн татвар төвлөрүүлэлт, 561.8 тэрбум төгрөгийн ашиг, 2.2 их наяд төгрөгийн борлуулалтын орлого олсон зэрэг амжилтаараа тэргүүлжээ. Өнгөрсөн оны эдгээр үзүүлэлт нь тус үйлдвэрийн 42 жилийн түүхэн дэх хамгийн дээд амжилт болж, “шилдэг 100” жагсаалтын түрүү байрыг авчирсан байна.  Эрдэнэт үйлдвэрийн хамт олон 2020 оны эхний дөрвөн сарын үйлдвэрлэлийн төлөвлөгөөт бүх үзүүлэлтээ 100 хувиас дээш биелүүллээ. Дэлхий нийтээр ковид-19 цар тахлын улмаас эдийн засгийн нөхцөл байдал хүндэрч буй энэ үед тус үйлдвэрийнхэн гадаад дотоод ямар нэг өр төлбөргүй, өөрсдийн хүчээр мөнгөн хуримтлал бий болгож, үйлдвэрлэлийн зайлшгүй шаардлагатай материал, сэлбэг хэрэгслээ нөөцөлж авах зэрэг зорилт хэрэгжүүлж байна. Өөрөөр хэлбэл, хүндрэлийг эрсдэл багатай даван туулах арга хэмжээний төлөвлөгөө боловсруулан, Ерөнхий захирал, түүний чиглэл хариуцсан орлогч нараар  ахлуулсан төв штаб болон дэд штабын зохион байгуулалттай өндөржүүлсэн бэлэн байдлын горимд шилжсэн. Үүний хүрээнд бүтээгдэхүүн үйлдвэрлэлийг нэмэгдүүлж, нэмэлт бүтээгдэхүүн үйлдвэрлэх, нэмэлт орлого олох, өртөг зардал бууруулах чиглэлээр тухайлбал, төлөвлөгөөт хэмжээнээс гадна 300 мянган тонн хүдэр нэмж боловсруулах, зэсийн металл авалтыг 0.4 хувиар, молибдены металл авалтыг 3.5 хувиар өсгөх даалгавартай ажиллаж байна. Ингэж ажилласны  үр дүнд оны эцэст 25.8 тэрбум төгрөгийн нэмэлт бүтээгдэхүүн үйлдвэрлэж, 17 тэрбум төгрөгийн зардал хэмнэхээр зорилт дэвшүүлжээ. Энэ зорилт эхний 4 сарын байдлаар амжилттай хэрэгжиж, Эрдэнэт үйлдвэрийн уурхайчид 3 орчим тэрбум төгрөгийн нэмэлт бүтээгдэхүүн үйлдвэрлэж, 1.6 тэрбум төгрөгийн хэмнэлттэй ажилласан байна.  М.Балжинням Фото: Б.Баттөгс   Дэлгэрэнгүй...
  • Үйлдвэрлэлийн төлөвлөгөөний бүх үзүүлэлт 100-аас дээш хувиар биеллээ

    Эрдэнэт үйлдвэрийн уурхайчид 5 сарын эхний 20 хоногт үйлдвэрлэлийн төлөвлөгөөг бүх үзүүлэлтээр нь 100-аас дээш хувиар биелүүлсэн амжилттай байна.  Энэ хугацаанд уулын цул гаргалтын төлөвлөгөөг 103.7 хувиар, хөрс хуулалтын төлөвлөгөөг 104.2 хувиар тус тус биелүүлэв. Тодруулбал, 1427.4 мянган метр куб уулын цул гаргаж, 573.5 мянган метр куб хөрс хуулалтын ажил гүйцэтгэсэн байна. Ил уурхайнхан 2174.5 мянган тонн хүдэр олборлож, төлөвлөгөөг 103.2 хувиар биелүүлсэн бол баяжуулагчид 1820.5 мянган тонн хүдэр боловсруулж, төлөвлөгөөг 101.1 хувиар биелүүлжээ. Хүдэр дэх зэс болон молибдены агуулгын төлөвлөгөөний биелэлт 101.1-118.7 хувьтай байна. Харин зэсийн металл авалт 87.5 хувийн гүйцэтгэлтэй буюу төлөвлөгөө 100.2 хувиар, молибдены металл авалт 50.01 хувь буюу төлөвлөгөө 103.1 хувиар биелсэн дүн гарчээ. Баяжмал дахь зэсийн металл 7430 тонн, молибдены металл 167.5 тонны гүйцэтгэлтэй, төлөвлөгөөний биелэлт 110.7-133.7 хувьтай байгаа бол баяжмал дахь зэс молибдены агуулгын төлөвлөгөө 102.2-102.4 хувиар биелсэн үзүүлэлттэй байна. Энэ хугацаанд 33245 тонн зэсийн баяжмал ачигдаж, чанарын үзүүлэлт 102.2 хувиар, 281.1 тонн молибдены баяжмал ачигдаж, чанарын төлөвлөгөө 102.4 хувиар тус тус биелжээ. М.Балжинням Фото: Б.Баттөгс Дэлгэрэнгүй...
  • Сэтгэлийн хүч-Зүтгэлийн илч

      Та бидний сайн мэдэх газрын нэг бол Судалгаа шинжилгээний хүрээлэн. Цаг нартай уралдсан тэдний нарийн чимхлүүр ажлын үр дүнгээр баяжуулалтын технологи зөв голдрилоор явж, дэлхийд танигдсан бүтээгдэхүүний чанар сайн гардаг. Тэр ч утгаар нь Судалгаа шинжилгээнийхнийг Эрдэнэт үйлдвэрийн “судас баригч” гэж нэрлэх нь бий. Энд тодорхой ажилтай тунгалаг төрхтэй олон сайхан бүсгүй мэргэжил чадвараараа манлайлан ажилладаг. Тэдний нэг нь баяжуулагч Норзонгийн Лхамбаяр.  Ховд аймгийн Булган сумын харьяат энэ эмэгтэй багын л хичээл сургуульдаа мэрийлттэй, хичээнгүй сүрхий охин явжээ. Дунд сургуулиа төгсөөд Улаанбаатар хотын Худалдааны техникумд элсэн суралцаж, нягтлан бодогчийн мэргэжил эзэмшихэд аавынх нь нөлөө их байсан болов уу. Түүний аав Худалдаа бэлтгэлийн ангийн даргаар нутагтаа 40 шахам жил ажилласан, олны дунд нэр хүндтэй эрхэм байлаа. Аав нь арван хүүхдэдээ: “худал хэлж, хулгай хийж болохгүй, улсын ажлыг унагаж, хүний итгэл алдаж болохгүй” гэж захидаг байсан нь бяцхан охины ой тойнд тод сийлэгдэн үлдэж, хожим ажил, амьдралдаа мөрдөх гол “дүрэм” болжээ. Н.Лхамбаяр Ховд аймгийнхаа Худалдааны трестэд нягтлангаар ажиллаж байхдаа дадлагын оюутан залуутай танилцаж дотноссон нь тэдний гайхам сайхан хайрын эхлэл байв. Тэд гурван хүүхдийн эцэг, эх бололцон, хүнээс дутуугүй амьдарч байсан ч үрсийнхээ ирээдүйн сайн сайхны төлөө залуусыг соронз мэт татсан Эрдэнэсийн хотыг зорьсон. Гэсэн ч санаснаар болдоггүй хорвоо түүнд хатуурхаж, магнайн толионд нь зурвас тодроогүй, толгойн үсэнд нь мөнгөн хяруу унаагүй байхад хань нь тэнгэрийн орноо одож, ангаахай адил гурван хөөрхөн үртэйгээ л үлдсэн. Хадмууд нь хэдий ойр байвч хүний нутагт бүсгүй хүн ажилгүй, өөрийн талын ах дүүгүй, өдөр шөнийн эргэлтэд аавыгаа нэхэн уйлагнах гурван хүүхдээс өөр ханьгүй амьдарна гэдэг ёстой л амьдын там санагдаж байсан нь мэдээж. Н.Лхамбаяр нутаг буцахаар шийдсэнээ хадам ах Ж.Баатархүүдээ хэлбэл, “Чи залуу хүн дахин сурч, Эрдэнэт үйлдвэрт хэрэгтэй мэргэжил эзэмш. Олны дунд  ажиллаж, хамт олонтойгоо ханьсаж амьдрах хэрэгтэй. Хүүхдүүдийнхээ ирээдүйг бодсон ч төв газраа үлдсэн нь дээр” гэж зөвлөснөөр ачаа бараагаа буцааж задалсан гэдэг. Тухайн үед хэлсэн болгоныг нь ухаарч ойлгох сэхээ байгаагүй ч, “Ах нь ажилд ороход нь тус дэм болъё” гэсэн ганц өгүүлбэр Эрдэнэтэд амьдрах итгэл төрүүлж байлаа. Ингэж л тэр, зоргоор болдоггүй тавилан заяаг зоригоороо туулахаар сэтгэл шулуудсан юм.  Н.Лхамбаяр Эрдэнэт үйлдвэрийн дэргэдэх Технологийн сургууль дүүргэж, баяжуулагч мэргэжил эзэмшин одоогийн Судалгаа шинжилгээний хүрээлэнд 2003 онд баяжуулагчаар ажилд орсон. Эхний жилүүдэд ажилдаа тэнцэхгүй гологдох вий, алдаа гаргаж хүмүүст түвэг удах вий гэхээс эмээж, дахин дахин нягтлан шалгаж хичээдэг байжээ. Түүний анхны мэргэжил болох нягтлангийн мэдлэг чадвар нь судалгаа шинжилгээний ажилд ихэд хэрэг болно. Тооцоолол буруу хийвэл олон хүний оюун сэтгэлгээ, хүч хөдөлмөрөө зориулсан судалгааны ажил гажуудах аюултай тул маш няхуур, нямбай хандах хэрэгтэй гэх. Тэрээр Судалгаа шинжилгээний хүрээлэнд 17 жил ажиллах хугацаандаа үйлдвэрлэлийн болон хагас үйлдвэрлэл, лабораторийн туршилтын ажилд биечлэн оролцож, технологийн процесст нэвтрүүлж буй шинэ тоног төхөөрөмж, урвалжуудад туршилт, сорьцлолт, ширхэглэлийн шинжилгээ хийх ажлыг өндөр үр дүнтэй гүйцэтгэж ирснийг журмын нөхөд нь  бахархан ярьсан. Үйлдвэрлэлийн технологийн хүндрэл гарахад мэргэшсэн, шуурхай, найдвартай учраас түүнд түрүүлж үүрэг өгч, илүү ачаалал үүрүүлнэ. Гэсэн ч хамт олныхоо итгэлийг зүтгэл дүүрэн хариулаад сурчихсан Н.Лхамбаяр бүхнийг амжуулаад инээгээд зогсож байна. Амьдралын ончроо нугачаанд түшиг тулгуур болж ирсэн хамт олон минь надад юу юунаас эрхэм гэж тэр ярих. Хөвүүлэн баяжуулагч мэргэжлийн тавдугаар зэрэгтэй тэрээр жилд 155 удаагийн үйлдвэрлэлийн туршилтын сорьцлолт, 2078 сорьцлолтын дээжийн боловсруулалт, 548.7 дээжид ширхгийн шинжилгээ, 418 дээжид нунтаглалтын горим тогтоох ажил гүйцэтгэсэн байдаг. Энэ тоо зарим хүмүүсийн хувьд мөрөөдлийн үзүүлэлт байж мэдэх юм. Н.Лхамбаяр ирээдүйд ашиглах хүдрийн технологийн шинж чанарыг тодорхойлох, геометаллургийн загвар буюу ордын геологи ашиглалтыг боловсруулах лаборатори, хагас үйлдвэрлэл, үйлдвэрлэлийн туршилтад идэвх чармайлттай оролцон сорьцлолт, ширхэглэлийн шинжилгээ хийх ажлыг үр дүнтэй гүйцэтгэсээр байна. Ажилд орсон эхний жилүүдэд үйлдвэрээс дээжээ авчирч хатаагаад, аяганд хийж гараар нунтаглаад шинжилгээ сорьцлолтыг нүдэн баримжаагаар шахуу хийдэг байснаа тэр дурссан. “Одоо орчин үеийн дэвшилтэт олон багаж, тоног төхөөрөмжтэй, түүн дээр ажиллаж байгаа залуус нь дэлхийн хэмжээний мэдлэг боловсролтой, хэл устай, судалгаа шинжилгээний ажил нь Эрдэнэт үйлдвэртээ төдийгүй улсад үнэлэгдэх хэмжээнд хүрсэн нь сайхан шүү”, гээд сэтгэл дүүрэн инээмсэглэсэн. Тэрээр ажилдаа тун өөриймсөг ханддаг онцлогтой. Ажлын байрны хөдөлмөрийн нөхцөл, зохион байгуулалтад анхаарч, аюул, эрсдэлийг олж илрүүлэн арилгахад санаачилгатай ажилладаг. Тиймдээ ч “Аюулгүй ажиллагч”-аар гурван удаа шалгарсан, залуу ажилчдад үлгэр дуурайлал болсон тэргүүний ажилтан төдийгүй халамжлан хүмүүжүүлэгч юм.  Хамт олныхоо хайр хүндэтгэлийг хүлээсэн, Эрдэнэт үйлдвэрийн Хөдөлмөрийн аварга Н.Лхамбаярын гурван хүүхэд өнөөдөр ээжийгээ ачлах хэмжээнд хүрчээ. Том охин нь Баяжуулах үйлдвэрийн Өөрөө нунтаглах хэсэгт конвейерийн машинчаар ажиллаж байгаа бол дундах нь Японд ажиллаж, амьдардаг. Харин бага хүү нь саяхан, “Энержи ресурс” компанид ажилд оржээ. Дөрвөн ач, зээгийн эмээ болсон, гээд нүүр дүүрэн инээмсэглэх түүний яриа цаанаа л хат суусан, амьдрал таньсан, өөрийн жаргалаас илүү үр хүүхдүүдээ гэсэн чин сэтгэлт торгууд эмэгтэйн гайхамшигт түүхтэй. Амьдрал хэмээх их далайн шуурганд сэлүүрээ алдаж, бүр живсэн хүмүүс ч бий. Харин Н.Лхамбаяр итгэлийн хүчээр жигүүрлэн, зүтгэлийнхээ илчинд дулаацан жаргаж, хамт олондоо хүндлэгдэн, уурхайчдынхаа урд эгнээнд тэмүүлэл дүүрэн алхаж явна.  М.Одгэрэл Фото: Б.Баттөгс Дэлгэрэнгүй...
  • Өглөөний сэргээш цуврал контент #20: Дашцэрэнгийн ТӨГСБАЯР

    Төгссөн сургууль: 1998 онд ШУТИС-ийн МТС-д хими технологич мэргэжлээр бакалавр, 2002 онд МТС-д техникийн ухааны магистр, 2010 онд КТМС-д үйлдвэрлэлийн менежментээр магистрын зэрэг тус тус хамгаалсан. Мэргэжил: Химийн технологич Ажилласан туршлага: 1998 онд Эрдэнэт үйлдвэрийн Дулааны цахилгаан станцад ажилд орсноос хойш эдүгээ 22 дахь жилдээ ажиллаж байна. Мэргэжил дээшлүүлсэн байдал: 2009 онд ОХУ-ын Москва хотноо химийн лабораторийн тоног төхөөрөмжийн чиглэлээр, 2012 онд Сингапур улсад ISO чанарын стандартын чиглэлээр, 2019 онд Австрали улсад сэргээгдэх эрчим хүчний чиглэлээр мэргэжил дээшлүүлсэн. Чин хүсэл: Эрдэнэт үйлдвэрийн Чанарын хяналтын хэлтэс, Дулааны цахилгаан станцын химийн инженерээр ажиллаж байсан тэрээр сүүлийн нэг жилийн хугацаанд Лабораторийн эрхлэгчээр дэвшин ажиллаж байна. Өөрийгөө чадваржуулж, үйлдвэрлэлд үр өгөөжтэй ажил хийхийг зорьж яваа түүний томоохон оролцооны нэг нь Эрдэнэт үйлдвэрийн хэмжээнд энэ оны сүүлчээр хэрэгжих “Химийн бодис, урвалжийн менежментийг сайжруулах” төсөл юм. Чадварлаг инженерүүдээс бүрдсэн энэхүү төслийн баг тайлангаа тавих бэлтгэл ажилдаа оржээ. Химийн инженер мэргэжлийнхээ үнэ цэнийг хэрэгтэй газарт нь харуулж, бодит ажил болгох нь түүний чин хүсэл билээ. Тиймдээ ч Эрдэнэт үйлдвэрийн ДЦС-ын Уур усны лабораторийг MNS ISO/IEC17025:2018 стандартын түвшинд хүргэж, Монгол Улсын эрчим хүчний салбарын итгэмжлэгдсэн  лабораториудын  нэг болгохоор хичээн ажиллаж байна. -Таны амьдралын сэргээш юу вэ, хэнээс, юунаас урам зориг, эрч хүч авдаг вэ? -Хөгжим, кино бол миний амьдралын сэргээш. Мөн хамгийн ойр байдаг гэр бүл, хамт олноосоо урам зориг, эрч хүч авдаг даа. -Хийж байгаа ажлын тань онцлог юу вэ? -Аливааг шинжлэн судлахад чиглэсэн,  химийн шинжлэх ухаан нь дэлхий нийтэд хурдацтайгаар хөгжиж, шинэ шинэ технологиуд гарч байгаа нь,  мэргэжлийн биднээс өөрийгөө хөгжүүлэх, маш их уншихыг шаарддаг. Тиймээс ч уншихгүйгээр энэ ажлыг хийх боломжгүй юм. -Та ойрын хугацаанд ямар ажил амжуулахаар төлөвлөж байна вэ? -Эрдэнэт үйлдвэрийн Дулааны цахилгаан станцын Уур усны лабораторийг итгэмжлэлд оруулна. Бид энэ ажлынхаа хүрээнд Монгол Улсын Стандартчилал, хэмжилзүйн газраар итгэмжлэл хийлгэхээр ойрын хугацаанд бэлтгэл ажлаа хангаж байна. Мөн төслийн ажлаа хийж дуусгана даа. -Ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаардаг вэ? -“Эрүүл биед саруул ухаан оршино” гэж их чухал үг санагддаг. Эрүүл гэдэг үгэнд хүний бие бялдрыг хамааруулахаас гадна, сэтгэл санаа эрүүл саруул байх нь чухал юм. Хүмүүс бие бялдрын эрүүл мэндэд ихээхэн анхаардаг ч сэтгэл санааны эрүүл мэнддээ хайхрамжгүй хандах нь бий. Сэтгэл санааг эрүүл саруул байлгах нэг гол хүчин зүйл нь сэтгэл судлал гэж боддог учраас сүүлийн жилүүдэд энэ чиглэлээр илүүтэй судалж, хувь хүнийхээ хөгжилд анхаарч байна. -Таны хамгийн том мөрөөдөл юу вэ? -Дэлхийн алдартай хөгжимчдийн тоглолт үзэхийг мөрөөддөг. -Таны амьдралдаа авч байсан хамгийн сайн зөвлөгөө? -Бусдад түвэг учруулахгүй ажиллаж, амьдрах л хэрэгтэй. -Одоо хийж буй ажил таны мөрөөдлийн ажил мөн үү? -Мэдээж, энэ бол миний мөрөөдлийн ажил. Би сурагч байхын л химийн хичээлд дуртай хүүхэд байсан. Их сонирхолтой шинжлэх ухаан шүү. Өнөөгийн залуусыг ажиглаад байхад ажилдаа дургүй, аливаад ял авсан юм шиг ханддаг. Хүн өөрийн ажлыг аль болох сонирхолтой байх талаас нь анхаарч, түүнийгээ хийж хэрэгжүүлснээр жинхэнэ утгаар нь ажилдаа дурладаг болов уу. Сэтгэлээсээ хийсэн ажил үр шимээ өгдгийг мартаж болохгүй. -Эрдэнэт үйлдвэр таны харах өнцөг, үзэл бодол, итгэл үнэмшилд хэрхэн нөлөөлж байна вэ? -Эрдэнэт үйлдвэр ажилчдадаа олон талын боломжийг нээж өгдөг. Миний хувьд хамт олон, нийгэмд хувь хүн өөрийгөө хэрхэн, яаж авч явахыг Эрдэнэт үйлдвэрт ажиллах хугацаандаа л сурсан. Эхний 15 жил өөрөөсөө  ах хүмүүстэй ажиллаж байсан бол сүүлийн 6 жил дандаа залуучуудтай ажиллаж байна. Энэ хоёрын хооронд маш их ялгаа харагддаг. Аль ч насны хүнийг ойлгож ажиллана гэдэг л надаас их зүйлийг шаарддаг. Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Нэвтрүүлэг

-Эрдэнэт хот Монголын Волейболын холбооны Үндэсний дээд лигийн тэмцээнийг зохион байгуулах

спортын ордонтой болно-

     Энэ үдшийн онцлох үйл явдлаар Эрдэнэт үйлдвэрийн Спорт цогцолборын “Хангарьд” паласт болсон Монголын Волейболын холбооны Үндэсний дээд лигийн аварга шалгаруулах тэмцээний нээлтийн үйл ажиллагааг нэрлэж байна. Нээлтийн үйл ажиллагаанд Орхон аймгийн Засаг дарга Д.Батлут, Засаг даргын орлогч С.Батжаргал, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, Монголын Волейболын холбооны Ерөнхийлөгч Ц.Баярбаатар тэргүүтэй холбооны Удирдах зөвлөлийн гишүүд, ахмад тамирчид, шүүгчид, баг тамирчид болон спорт сонирхогч, хөгжөөн дэмжигчид оролцлоо. Үндэсний дээд лигт ур чадвар, авхаалж самбаагаа сорин өрсөлдөхөөр хүрэлцэн ирсэн “Алтайн барс”, “Тэнүүн-Огоо”, “Уурхайчин”, “Эрчим”, “Хос бар”, “Хобби эйс”, “Дархан Сеть”, “Инагурэ”, “Булган” багийн тамирчид, хүндэт зочдыг улаан хивсний ёслолоор угтаж, энэ үдшийн ёслолын үйл ажиллагаа эхэлсэн юм.

       

    Тэмцээнийг нээж, Монголын Волейболын холбооны ерөнхийлөгчөөр 12 жил ажиллаж, волейболын спортын хөгжилд үнэтэй хувь нэмрээ оруулсан, их спортыг дэмжигч “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн үг хэлж, баг тамирчдад амжилт хүслээ. Тэрээр “Монгол Волейболын холбоо Үндэсний дээд лигийг 1995 оноос хойш 2012 он хүртэл тасралтгүй зохион байгуулсан бөгөөд сүүлийн зургаан жил тасраад байсан тэмцээнийг энэ онд сэргээх шийдвэр гаргасан юм. Уулын баяжуулах Эрдэнэт үйлдвэрийн баазад түшиглэн энэ удаагийн тойргийн тоглолтуудыг зохион байгуулах гэж байна. Өнгөрсөн хугацаанд баг тамирчдаа хөхиүлэн дэмжиж, тэмцээнд оролцож ирсэн Монголын Волейболын холбооны Ерөнхийлөгч, “Эрчим” багийг олон жил удирдан чиглүүлж ирсэн Ц.Баярбаатар танд болон танай багийнханд Зохион байгуулах хороо болон нийт уурхайчид, Эрдэнэтчүүдийнхээ нэрийн өмнөөс чин сэтгэлийн талархал дэвшүүлж, ажил үйлсэд тань өндөр амжилт хүсэн ерөөе. Холбоог хөгжүүлэхийн төлөө үе үеийн зүтгэлтнүүд, волейболчид баг болж ажилласны үр дүн өнөөдрийн Волейболын холбооны хөгжил дэвшлийг илтгэж байна. Ахмад үеийнхэн хүрэлцэн ирлээ. Тэд бол ДАШТ-нд баг хамт олноороо оролцож, волейболын хөгжлийн түүхийг зурагласан хүмүүс. Та бүхэндээ талархал дэвшүүлж, эрүүл энх, аз жаргал, хамгийн сайн сайхан бүхнийг хүсэн ерөөе.

    Уурхайчид бид энэхүү тэмцээнд эхнээс нь идэвх зүтгэлтэй оролцож ирснийг тэмдэглэн хэлэх нь зүйтэй байх. Өнөөгийн Волейболын холбооны Ерөнхий нарийн бичгийн дарга Г.Баярсайхан бид 1998 онд “Уурхайчин” багийг үүсгэн байгуулсан. “Уурхайчин” клуб 21 дэх жилдээ ажиллахдаа 5-6 үеийн волейболчдыг бэлтгэн гаргаж, өнөөдөр 15-17 насны залуучуудаар шинэчлэгдээд байна. Монголын волейболын ирээдүй болсон залуучууддаа улам их амжилтыг хүсэн ерөөе. “Уурхайчин” багийн тамирчин Үндэсний дээд лигт тоглосны дараа Афины олимпоос мөнгөн медаль хүртсэн сайхан түүх бий. Энэ бол Монголын Волейболын холбооны баг тамирчдын чансааны үзүүлэлт гэж бид ойлгодог. Сайхан тэмцээн болно гэдэгт эргэлзэхгүй байна. Үндэсний дээд лигийн тэмцээний ач холбогдлыг өндөрт өргөхийн төлөө бид зорьж байна. Эрдэнэт үйлдвэр, Волейболын холбоо, Орхон аймгийн удирдлагуудын ярилцаж шийдвэрлэснээр “Монголын Волейболын холбооны ордон”-г Орхон аймаг, Эрдэнэт хотдоо барьж байгуулан, ирэх онд буюу Олимпийн жил ашиглалтад оруулахаар болсныг волейболчид та бүхэнд дуулгахад таатай байна” хэмээгээд 2019 оны Монголын Волейболын холбооны аварга шалгаруулах тэмцээн албан ёсоор нээснийг зарлалаа.

       

   Орхон аймгийн Засаг дарга Д.Батлут өсвөр үеийнхний ирээдүйд үнэтэй хөрөнгө оруулалт хийж, ордонтой болгох шийдвэрт гүнээ талархан, лигийн тэмцээнийг Эрдэнэт хотноо зохион байгуулахад хамгийн их үүрэг оролцоотой байсан уурхайчиддаа баярлалаа хэмээн хэлсэн үгэндээ онцоллоо. Мөн энэ үеэр Волейболын холбооны Ерөнхийлөгч Ц.Баярбаатар холбооны үйл ажиллагааг дэмжин, баг тамирчдыг хөгжүүлэхэд хамтран зохион байгуулагчаар ажиллаж буй “Эрдэнэт үйлдвэр” ТӨҮГ, уурхайчид, Эрдэнэтчүүдэд баярласан сэтгэлээ илэрхийлсэн. Ахмад тамирчид холбооны удирдлагуудад дурсгалын цом гардуулан, энэ үдшийн үйл ажиллагаа дуу хуур, бүжиг наадмаар үргэлжлэв. Монголын Волейболын холбоо байгуулагдсаны 62 жил, волейболын спортыг хөгжүүлсний 92 жилийн ой тохиосон энэ жилийн Үндэсний дээд лигийн аварга шалгаруулах тэмцээн ёслол төгөлдөр эхэлж, тэмцээний цомыг талбайн төв хэсэгт хүндэтгэлтэйгээр залснаар энэ үдшийн үйл ажиллагаа өндөрлөсөн юм.

       

       

       

И.Чинтогтох

Фото: Б.Баттөгс

Пүрэв, 07 11-р сар 2019 00:00

Уурхайчин гэр бүл

   

   Ургах нарыг угтан мэндчилж, улс орныхоо төлөөх их үйлсэд гар бие оролцож, өөрийн хувь нэмрээ зориулахаар ажил руугаа яаран алхах сайхан. Гэр бүл, хайртай үрсийнхээ гэгээн ирээдүйг бүтээхээр өнөөдрийн ажлаа төлөвлөн алхах энэ бүсгүй бол Дашнямын Цэнд-Аюуш. Тэрээр Эрдэнэт үйлдвэрийн дэргэдэх Технологийн сургуулийн номын санч. Түүний нөхөр Бямбаа нь Хүдрийн ил уурхайн цахилгааны хэсэгт цахилгаанчин. Эрдэнэт үйлдвэр ТӨҮГ-т ажиллаж эрдэнэсийн өлгий Эрдэнэт хотод амьдардаг эгэл нэгэн “Уурхайчин гэр бүл”-ийг танилцуулж байна.

   Өрхийн тэргүүн Ц.Бямбаа Өмнөговь аймгийн Ноён сумын харьяат бөгөөд кино техникч, цахилгаанчин мэргэжилтэй. Харин Д.Цэнд-Аюуш номын санч, ном зүйч. Тэд хоёулаа Эрдэнэт үйлдвэрт 16 дахь жилдээ ажиллаж байгаа хоёр сайхан охидын ээж аав. Ууган охин Б.Нарангарав эмчийн мэргэжилтэй нийслэлд  ажиллаж  ажилладаг. Бага охин Номин-Эрдэнэ МУИС-ийн 2-р курсийн оюутан юм.

   1990 онд их сургуулийнхаа дотуур байранд танилцсан хоёр оюутан сургуулиа төгсөөд захидлаар харилцдаг байж. 1995 онд говийн хүү Эрдэнэт хотод амьдрахаар зориг шулуудан сэтгэлт бүсгүй рүүгээ ирсэн нь Ц.Бямбаагийнх гэх нэгэн айлын гал голомтыг бадраах шалтгаан байв. Зах зээлд шилжээд удаагүй байсан тухайн үед айл орон болж амьдрал зохиоход амар байгаагүй ч хайр сэтгэлийн илчинд хоёр биеэ түшиж амьдралыг ёстой л “тэг”-ээс эхэлжээ.   

   Тэд амьдралынхаа бүхий л цаг үед хамтдаа хичээж, хамтдаа зүтгэж. Санаа зөвийн сайнаар хүний дайтай сайхан амьдарч ижил хөөрхөн охидоо өсгөж хүмүүжүүлжээ. Бага залуудаа “ГОК” хэмээх их айлын гишүүн болохыг мөрөөдөж явтал энэ сайхан хамт олны эд эс нь болох азтай хувь 2003 онд тохиож, тэд хоёул Эрдэнэт үйлдвэрт ажилд оржээ. Ц.Бямбаа хамт олныхоо хөдөлмөрийн аварга, шилдэг шинийг санаачлагч, Эрдэнэт үйлдвэрийн 100 шилдэг санаачлагч ажилтнаар гурван ч удаа шалгарсан тэргүүний ажилтан юм.

    
     

   Д.Цэнд-Аюуш мэргэжлээрээ улсад 27 жил, Технологийн их сургуульд 16 дахь жилдээ ажиллаж байна. Ажил мэргэжилдээ гаршсан, хамт олондоо нэр хүндтэй нийгмийн идэвхтэй, сургуулийн эмэгтэйчүүдийн зөвлөлийн дарга, ҮЭ-ийн тэргүүлэгч гишүүн зэрэг сонгуульт ажлыг хийж иржээ. Тэр Монгол улсын Соёлын тэргүүний ажилтан цолтой. Чөлөөт цагаараа шүлэг найраг, нийтлэл бичих, хамт олондоо нөхөрсөг элэглэл бичих дуртай. Урлаг уран сайхны ажилд манлайлан оролцдог чамбай бүсгүй. Тэрээр мэргэжлийн дагуу намтар номзүй болон бүртгэн мэдээлэх номзүйн бүртгэлүүдийг эмхэтгэн гаргадаг, сургуулийнхаа 45 жилийн ойгоор шүлгийн номоо гаргахаар бэлтгэж байгаа аж.

   Эрхэлсэн ажилдаа эзэн нь байх дуртай. Ийм л эгэл түүхийн эзэд Уурхайчин гэр бүл дэлхийн шилдэг аж ахуй нэгж, Зууны манлай бүтээн байгуулалт Эрдэнэт үйлдвэрт ажиллаж, өөрсдийн чадах хэрээр хувь нэмрээ оруулж байгаадаа омогшин баярладаг. Цай сүүнийхээ дээжийг энэ сайхан нутгийнхаа уул овоонд сүсэглэн өргөдөг эгэл нэгэн Уурхайчин гэр бүл юм.
 
Б.Учрал
   “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн Орхон аймгийн Төрийн бус байгууллагуудтай хийсэн уулзалтын дүнд “Эрдэнэтийн эрүүл иргэн” ТББ-аас хэрэгжүүлэх “Эрүүл Эрдэнэт хүн” төсөл, “Эрдэнэтийн Сороптимист” ТББ-ын “Шүүдэр охидын төв”, “Хүрэхүй” төслийг дэмжин ажиллахаар боллоо. Нийгмийн харилцааны хэлтэс хэрэгцээ шаардлага, үндэслэл, хүрэх үр дүнг нягтлан үзэж, өсвөр насны хүүхдүүд, Эрдэнэт үйлдвэрийн ажилтан, ажиллагсад, иргэдийн эрүүл мэндэд хүрэх үр өгөөжтэй төслүүд хэмээн сонгосон байна.  
   “Эрдэнэтийн Эрүүл иргэн” ТББ нь 2016 оноос ходоод, улаан хоолой, элэгний хорт хавдрын шалтгаант өвчлөлийн тархалтыг бууруулах зорилгоор үйл ажиллагаагаа явуулж эхэлжээ. Улмаар 2018 онд “Эрүүл Эрдэнэт хүн” төслийг хэрэгжүүлэхээр Орхон аймгийн Засаг даргын Тамгын газар, “Медипас”, Бүсийн оношилгоо, эмчилгээний төв, Эрүүл мэндийн газар, МСНЭ-ийн Орхон аймаг дахь салбартай санамж бичиг байгуулан ажилласан байна. 2020 онд “Эрүүл Эрдэнэт хүн” төслийн хүрээнд Эрдэнэт үйлдвэрийн ажилтнуудад эрүүл мэндийн боловсрол олгож, эрүүл мэндээ хамгаалах дадал хэвшилтэй болгох, үйлдвэрийн газрын нийгмийн хариуцлагыг дээшлүүлэхэд чиглэсэн үйл ажиллагаа явуулахаар төлөвлөжээ. 
   Харин “Эрдэнэтийн Сороптимист” ТББ-ын хувьд бага насны хүүхдийг бэлгийн хүчирхийлэлд өртөхөөс өөрийгөө хамгаалах дархлаатай болгох зорилгоор “Хүрэхүй” төслийг санаачлан, хэрэгжүүлсэн байна. Хүүхэд хамгааллын сайн үйлс, охидын эрүүл мэндийн чиглэлээр сургалт явуулж, 2017 оноос “Шүүдэр охидын төв” төслийг амжилттай хэрэгжүүлсэн уг төрийн бус байгууллагын “Хүрэхүй” төсөлд Орхон аймгийн дөрвөн сургуулийн 970 сурагч хамрагджээ. Энэ удаад Ерөнхий боловсролын сургуулийн нэгдүгээр ангийн 2300 сурагчийг хамруулах төсөл боловсруулан, 2020-2022 онд хэрэгжүүлэхээр төлөвлөж байна. 
   Орхон аймагт үйл ажиллагаа явуулдаг Төрийн бус байгууллага олон ч, хэрэгжүүлэх төслөө тодорхой болгож, хойч ирээдүйнхээ төлөө санаа тавьсан дээрх төслүүд эхний ээлжинд дэмжигдлээ. Нийгмийн хариуцлагаа сахин биелүүлэх хамтын ажиллагаа өргөжин тэлсээр байна. 
 
И.Чинтогтох
Фото: Б.Баттөгс
 

   Монголын Волейболын холбооны Үндэсний дээд лигийн хоёрдугаар тойргийн тоглолтыг Орхон аймагт зохион байгуулах болсонтой холбогдуулан волейболын спортын ахмад, дунд, залуу үеийнхний төлөөлөл хэвлэлийн бага хурал зохион байгууллаа. Хэвлэлийн бага хуралд Монголын Волейболын холбооны Ерөнхий нарийн бичгийн дарга Г.Баярсайхан, Удирдах зөвлөлийн тэргүүлэгч гишүүн С.Алтансүх, “Эрдэнэт үйлдвэр” ТӨҮГ-ын Спорт цогцолборын дарга, Үндэсний дээд лиг зохион байгуулах хорооны гишүүн Ш.Даваахүү, Спорт цогцолборын ахлах арга зүйч А.Батмагнай нар оролцсон юм. Холбооны бүтэц, зохион байгуулалт өнгөрсөн зургаадугаар сард шинэчлэгдэж, Үндэсний дээд лигийг сэргээх, шигшээ багийг бэхжүүлэх, спорт заалтай болох гурван зорилт дэвшүүлсэн талаар холбооны Ерөнхий нарийн бичгийн дарга Г.Баярсайхан мэдээллээ. 60 гаруй жилийн түүхтэй Монголын Волейболын холбооны дээд лиг 1995-2012 онуудад тасралтгүй зохиогдсон бөгөөд сүүлийн 7 жил тасраад байсныг энэ жил “Эрдэнэт үйлдвэр” ТӨҮГ-ын дэмжлэгтэйгээр сэргээж байна. Тэмцээн 10 дугаар сарын 25-наас 12 дугаар сарын 06-ны өдрүүдэд үргэлжлэх бөгөөд хоёрдугаар тойргийн тоглолтууд 8, 9, 10-ны өдрүүдэд Эрдэнэт үйлдвэрийн Спорт цогцолборын “Хангарьд” паласт болно. Хөдөө орон нутагт анх удаа нээлт хийх болсон нь хүүхэд, залуучуудыг их спортод татан оролцуулах, бусдаас үлгэрлэх, авьяасаа нээн хөгжүүлэхэд түлхэц болно хэмээн зохион байгуулагчдын зүгээс үзжээ. Тэмцээний нээлтийн ёслол өнөөдөр 18 цагаас, Эрдэнэт хотын төв зам дагуу, нийт баг тамирчдын баярын цуваагаар эхэлж, Эрдэнэт үйлдвэрийн Спорт цогцолборын Хангарьд паласт үргэлжилнэ. 

И.Чинтогтох
Фото: Б.Баттөгс
   “Эрдэнэт үйлдвэр” ТӨҮГ-ын Нийгмийн харилцааны хэлтэс, “Эрдэнэт Өргөө” кино театрын хамтын ажиллагааны хүрээнд энэ сарын 1-нээс “Миний гэр бүлд гайхамшиг үргэлжилсээр” уриатай урамшуулалт хөтөлбөр хэрэгжиж эхэллээ. Уурхайчдын чөлөөт цагийг зөв боловсон өнгөрүүлэх, гэр бүлдээ зарцуулах цагийг нэмэгдүүлэх, хайр халамжаа харамгүй түгээхэд дэмжлэг үзүүлэх зорилгоор шинэлэг ажил эхлүүлсэн нь энэ юм. Хагас жилийн турш үргэлжлэх урамшуулалт хөтөлбөрийн талаар мэдээлэл хүргэхээр “Эрдэнэт Өргөө 4”-ийн хамт олон Эрдэнэт үйлдвэрийн захиргааны 1, 2 дугаар байранд хоёр өдрийн турш ажиллалаа. Салбарын захирал Н.Дашхүүгээс зарим зүйлийг тодруулсан юм. 
 
 
   - “Эрдэнэт Өргөө 4” кино театр Эрдэнэтчүүдийн соёлын боловсролд хөрөнгө оруулалт хийгээд багагүй хугацаа өнгөрч байна. Та бүхэн юуны төлөө зорьж байна вэ?
   - “Өргөө” кино театр энтертайнмент салбарт үйл ажиллагаа явуулдгийн хувьд гэр бүл рүү чиглэсэн олон үйл ажиллагаа зохион байгуулсаар ирсэн. “Эрдэнэт Өргөө 4” салбар 2017 оны 6 дугаар сарын 24-нд нээлтээ хийж, орон нутгийн иргэдэд кино урлагийн үйлчилгээг шуурхай, шинэлэг хэлбэрээр, чанартай хүргэх зорилго тавин ажиллаж байна. Өнөөдрийн байдлаар үзэгчдийн тоо бидний хүссэн хэмжээнд хүрээгүй ч хүн бүрт кино урлагийн гайхамшгийг мэдрүүлэх үндсэн бодлогоо хэрэгжүүлж байна. Үйлчлүүлэгчдийн хувьд 40-өөс дээш насныхан кино театраар үйлчлүүлэх нь харьцангуй бага байдаг тул бид байгууллага руу чиглэсэн үйлчилгээг санал болгож эхэлсэн. Өнгөрсөн зургаадугаар сараас “Гэр бүлийн өдөрлөг” зохион байгуулж, хамтын ажиллагаагаа өргөжүүллээ. Өдөрлөгт Нийгмийн даатгал, Мэдээлэл холбооны сүлжээ ТӨХК, Мобиком, Татварын хэлтсийн хамт олныг оролцуулсан. Өнөөгийн хүмүүс ихэнх цагаа ажил дээрээ өнгөрүүлснээр гэр бүлдээ зарцуулах цаг нь хомс болсон санагддаг. Хөгжих, баясах, хүүхдээ баярлуулах энэхүү ажил нь нийгэм рүү чиглэсэн томоохон алхам байсныг хэлэх нь зөв байх. Энэ удаа Эрдэнэт үйлдвэрийн Нийгмийн харилцааны хэлтэстэй хамтран ажиллаж байна.
 
   - Шинэлэг ажлуудынхаа талаар мэдээлэл өгөхгүй юу?
   - Кино театраар үйлчлүүлэх, чөлөөт цагаа зөв боловсон өнгөрүүлэх нь нэг талаар соёл юм. Бид “Кино үзээрэй” гэж хэлэхийг урьтал болгодоггүй. Харин гэр бүл, найз нөхдөөрөө кино театрт ирснээр цагаа яаж өнгөрүүлж болохыг хүмүүст таниулж ойлгуулахад чиглэдэг. Хувь хүн өөртөө, гэр бүлдээ хөрөнгө оруулалт хийж, мөнгөө зөв зүйлд зарцуулан, аз жаргалтай, сайхан амьдрах боломжийг бүрдүүлж байна. Манай кино театр дэлхийн стандартад нийцсэн барилга байгууламжтай. Энэ сарын 25-нд Дархан-Уул аймагт 8 давхар барилга бүхий “Өргөө 6” салбар нээлтээ хийхээр төлөвлөсөн.

   - Хамтын ажиллагааны хүрээнд Эрдэнэт үйлдвэрийн уурхайчдад ямар урамшуулал санал болгох вэ?
   - Уурхайчид шинэ тутам гарч байгаа киног хүлээн авч үздэг, чөлөөт цагаа гэр бүлдээ зарцуулдаг байгаасай гэж хүсэж байна. Энэ ч утгаараа кино урлаг ямар гайхамшигтай болохыг ойлгож, дэлхий дахинд нээлтээ хийж байгаа киног тухайн цаг мөчид нь Эрдэнэтдээ нэгэн зэрэг анхны сэтгэгдлээр үзэх нь ямар торгон мөч болохыг сэтгэл зүрхээрээ мэдрэх боломжийг “Эрдэнэт Өргөө”-гийн хамт олон өгөхийг хичээдэг. Эрдэнэт үйлдвэрийн ажилтан, ажиллагсдад манай кино театрын зүгээс 50 хувийн хөнгөлөлт санал болгосон. Урамшуулалт хөтөлбөрийнхөө талаар мэдээлэл хүргэхэд үйлдвэрийн ажилтнууд таатай хандаж байна. Ажилтан бүр “Эрдэнэт Өргөө” кино театр дээр ажлын үнэмлэхтэйгээ очиж, 50 хувийн хөнгөлөлт авах боломжтой. Нэг сарын хугацаанд хүчинтэй картыг бусдад бэлэглэсэн ч болно. Зөвхөн Эрдэнэт үйлдвэрт зориулан 14 хоногт нэг удаа өглөөний 10:00-12:00 цагийн хооронд үзвэрийн заалаар үйлчилж, хурал семинар, зөвлөгөөн, чуулган зохион байгуулах боломжоор хангасан.
 
И.Чинтогтох
Фото: Ш.Лхамсүрэн

   Өнөөдөр өглөө Эрдэнэт хотноо хүрэлцэн ирсэн, Монголын Волейболын холбооны Үндэсний дээд лигийн аварга шалгаруулах тэмцээнд оролцогч баг тамирчдыг “Эрдэнэт үйлдвэр” ТӨҮГ-ын холбогдох цех, нэгжийн удирдлагууд угтан авлаа. Баг тамирчдад хандан Монголын  Волейболын холбооны Үндэсний дээд лиг зохион байгуулах хорооны гишүүн, Спорт цогцолборын дарга Ш.Даваахүү үг хэлж, амжилт хүссэн юм. Тэрээр “Эрхэм хүндэт үе үеийн алдар суут тамирчид, тэмцээнийг зохион байгуулах хорооны гишүүд, Монголын волейболын холбооны төлөөлөгчдөдөө цэнгэг өглөөний мэндийг чин сэтгэлийн угаас хүргэе. Эрдэнэт үйлдвэр нийгмийн харилцааны чиглэлээр хүлээсэн үүргийнхээ дагуу спорт, урлагийн олон талт үйл ажиллагааг бүс нутаг, улс, Олон улсын түвшинд зохион байгуулж ирсэн уламжлалтай. Энэхүү уламжлалт ажлын үргэлжлэл бол та бүхний оролцохоор хүрэлцэн ирсэн Монголын Волейболын холбооны Үндэсний дээд лигийн тэмцээн юм. Эрдэнэт үйлдвэр уг тэмцээнийг Монголын Волейболын холбоотой хамтран зохион байгуулахаар шийдвэрлэн, өндөр хэмжээнд зохион байгуулахаар бэлтгэлээ хангаад байна. Тамирчид та бүхэн хурд хүч, өндөр үсрэлтийн гайхамшгийг мэдрүүлэн, ухаалаг, уран тоглолтоор үзэгчдийг баясгаж, Эрдэнэтийн волейбол сонирхогч, дэмжигчдийн сэтгэлд бахархалтайгаар үлдэнэ гэдэгт итгэлтэй байна. Эрдэнэтийн волейбол сонирхогч хүүхэд, залуучууд уран сайхан тоглолтыг үзэж, түүнээс суралцан, өөрсдийн ур чадвараа дээшлүүлэхийн зэрэгцээ та бүхний залгамж халаа болох олон шилдэг тамирчид төрнө гэдэгт бид итгэж байна. Та бүхэнд спортын өндөр амжилт хүсэн ерөөе. Эрдэнэт хотод тавтай морилно уу” хэмээсэн. Энэ үеэр, Монгол Улсын СГЗ, зохиолч, яруу найрагч Баатарын Цэрэндондовын ая, МЗЭ-ийн шагналт яруу найрагч Намсрайжавын Батжаргалын үг “Жигүүрт бөмбөлөг” дуугаар нийт тамирчдад мэндчилгээ дэвшүүллээ. Энэхүү дуу нь Монголын Волейболын холбооны сүлд дуу болон эгшиглэх юм. 
 

 
 
 
 
 
 
 
 
И.Чинтогтох
Фото: Б.Баттөгс
 
   “Эрдэнэт үйлдвэр” ТӨҮГ-ын Экспорт, борлуулалтын хэлтсийн Тэргүүлэх мэргэжилтэн Х.Мөнхцэцэгтэй уулзаж, зэсийн зах зээлийн үнэ ханш, зэсийн үнийн бууралтын талаар ярилцлаа.

   - Өнгөрсөн сард зэсийн үнэ ямар түвшинд байсан бэ?
   - 2019  оны 10-р сард Лондоны Металлын Биржийн цэвэр зэсийн үнэ дунджаар 5742,89 ам.доллар тонн байсан нь өнгөрсөн есдүгээр сарын дундаж үнэтэй харьцуулахад 2.5 ам.доллараар буурсан үзүүлэлттэй байна. 2019 оны эхний арван сард зэсийн үнэ дунджаар 6014 ам.доллар тонн байгаа нь 2018 оны дундаж үнэтэй харьцуулахад 513 ам.доллараар, 2019 оны төлөвлөгөөт үнээс 258 ам.доллараар тус тус буурсан үзүүлэлттэй байна.

   - 2019 оны үлдсэн хугацаанд буюу дөрөвдүгээр  улиралд  зэсийн үнэ ямар түвшинд байх төлөвтэй байна?
   - 2019 оны аравдугаар сард судалгааны байгууллагуудын шинэчлэн гаргасан  2019 оны дөрөвдүгээр улирлын зэсийн үнийн төсөөлөл харилцан адилгүй  байна.
   Ихэнх томоохон судалгааны байгууллагууд 2019 оны дөрөвдүгээр улиралд зэсийн үнэ дунджаар 5700-5800 ам.доллар тонн, 2019 онд 5950-6000 ам.доллар тонн байх магадлалтай гэж үзэж байна. Tухайлбал Wood Mackenzie судалгааны байгууллага 2019 оны дөрөвдүгээр улиралд зэсийн үнэ дунджаар 5760 ам.доллар, 2019 онд дунджаар 5972 ам.доллар тонн байх төлөвтэй гэж судалгаандаа дурдсан бол CRU судалгааны байгууллага 2019 оны дөрөвдүгээр улиралд зэсийн үнэ дунджаар 5770 ам.доллар, 2019 онд дунджаар 5980 ам.доллар тонн байна гэж судалгаандаа дурджээ. 
 

   
   - Иймээс 2019 оны дөрөвдүгээр улиралд зэсийн үнэ өснө гэсэн хүлээлт байхгүй гэсэн үг үү?
   - Сүүлийн үеийн мэдээллээс харахад 2019 оны дөрөвдүгээр улирал болон 2020 онд зэсийн үнэ өсөх магадлал бага байна. 2019 онд дэлхийн зэсийн уул уурхайн үйлдвэрлэл 0,3  орчим хувиар буурч цэвэр зэсийн зах зээл  99  мянга орчим  тонны хомсдолтой байсан.  2020 онд зэсийн уул уурхайн үйлдвэрлэл өсөх боловч зэсийн зах зээл мөн 86 мянган тонны хомсдолтой байна гэж Олон улсын зэс судлалын Групп болон бусад судалгааны байгууллагууд мэдээлж байгаа. Үүнтэй холбоотойгоор  зарим судлаачид зэсийн үнэ өснө гэсэн байр суурьтай байгаа. Гэвч өнгөрсөн оны нөхцөл байдлаас харахад зэсийн үнийн түвшинд зэсийн эрэлт, нийлүүлэлт, зах зээлийн тэнцэл гэх мэт суурь хүчин зүйлсээс илүү макро эдийн засгийн байдал голлон нөлөөлж байна.
   Иймээс дэлхийн эдийн засгийн өсөлтийн түвшин сул, АНУ, Хятадын худалдааны дайны асуудал эрсдэл дагуулсан хэвээр байгаа зэргээс шалтгаалан 2020 онд зэсийн үнэ 2019 оны түвшнээс өсөх  магадлал  бага гэж судлаачид үзэж байна.
   Томоохон судалгааны байгууллагуудын 2020 оны зэсийн үнийн төсөөлөл дунджаар 5895 ам.доллар тонн байгаа. 

   - АНУ, Хятадын худалдааны дайны хэтийн төлөв ямар байна вэ? 
   - АНУ, Хятадын төлөөллүүд худалдааны маргааныг шийдвэрлэх хэлэлцээрт энэ сард гарын үсэг зурахаар болсон тул энэ асуудал нааштай шийдэгдэх магадлалтай талаар эх сурвалжууд мэдээлж байгаа. Мөн энэхүү мэдээлэлтэй холбоотойгоор эдийн засгийн зарим үзүүлэлтүүд сайжрах хандлага сүүлийн өдрүүдэд ажиглагдсан. Гэвч АНУ, Хятадын худалдаан дайны асуудал амархан шийдэгдэх магадлал бага ба хэтийн төлөв ямар байх, металлын зах зээлд хэрхэн нөлөөлөх тухай асуудлыг урьдчилан таамаглахад хүндрэлтэй гэж  шинжээчид дүгнэж байна.  
 
Ярилцсан А.Бямбамаа
 

 

Мэдээний төрөл

Календарь

« 11-р сар 2019 »
Да Мя Лх Пү Ба Бя Ня
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

Зургийн цомог