• Уурхайчид 9 сарын эхний 20 хоногт 2161 мянган тонн хүдэр олборложээ

       Эрдэнэт үйлдвэрийн уурхайчдын 9 сарын эхний 20 хоногийн үйлдвэрлэлийн төлөвлөгөөний үзүүлэлт гарсан байна. Сарын эхний 20 хоногт уурхайчид 1460.60 мянган метр куб уулын цул гаргаж, төлөвлөгөөгөө 107.8 хувиар биелүүллээ. Түүнчлэн 612.79 мянган метр куб хөрс хуулж, төлөвлөгөөний биелэлт 108.8 хувьтай, хүдэр олборлолтын гүйцэтгэл 2161.92 мянган тонн буюу 107.1 хувьтай гарчээ.     Баяжуулагчид энэ хугацаанд 1820.07 мянган тонн хүдэр боловсруулж, төлөвлөгөө 103.5 хувиар биелүүлсэн байна. 9 сарын эхний 20 хоногийн байдлаар хүдэр дэх металлын агуулга зэсийнх 0.441 хувь, молибденых 0.018 хувь байв. Төлөвлөгөөний биелэлт 94.0-113 хувийн дүнтэй байна.    Металл авалтын төлөвлөгөө 100-106.7 хувиар биеллээ. Тодруулбал, зэсийн металл авалт 88.32 хувь, молибдены металл авалт 51.77 хувийн гүйцэтгэлтэй байна. Баяжмал дахь зэсийн агуулга 22.56 хувь буюу 101 хувиар, молибдены агуулга 49.70 хувь буюу 103.5 хувиар тус тус биелсэн дүнтэй байна. Энэ хугацаанд 32395.17 тонн зэсийн баяжмал, 383.97 тонн молибдены баяжмал ачигдаж, чанарын төлөвлөгөө 101-103.5 хувиар биелжээ.    М.Балжинням   Дэлгэрэнгүй...
  • Монгол Улсын Ерөнхий сайд У.Хүрэлсүх Эрдэнэт үйлдвэрт зочиллоо

       Монгол Улсын Ерөнхий сайд У.Хүрэлсүх өнөөдөр зууны манлай үйлдвэр “Эрдэнэт үйлдвэр” ТӨҮГ-т зочилж, үйл ажиллагаатай нь танилцлаа. Тэрээр энэ сарын 22-ны өдөр Орхон аймагт ажиллаж буй бөгөөд ажлын айлчлалынхаа хүрээнд дагалдан яваа албаны хүмүүсийн хамт Эрдэнэт үйлдвэрийн Ил уурхай, Баяжуулах үйлдвэрээр орж, уурхайчдын төлөөлөлтэй уулзав. Ерөнхий сайд У.Хүрэлсүх болон албаны хүмүүсийг  “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, түүний удирдлагын багийнхан хүлээн авч, ажлаа танилцууллаа.     “Эрдэнэт үйлдвэр сүүлийн гурван жилд Ил уурхайн гүнд болон ойр орчимд геологи хайгуулын ажлыг эрчимжүүлсний үр дүнд цаашид 60 жил ажиллах нөөц баялагтай гэдгийг тогтоогоод байна. Анх уг ордыг илрүүлэхдээ дунджаар 300 метрийн гүнд өрөмдөж байсан бол сүүлийн жилүүдэд бид хамгийн гүн цооногт 1,3 км-ийн  өрөмдлөг хийж, хүдрийн нөөц байгааг илрүүлсэн. Нөөц баялагийг өсгөх бодлого хэрэгжүүлэхдээ бид  уурхайг тэлэх зорилго тавьж,  60 орчим километрийн радиуст хайгуулын ажлыг хийж байна. Ашиглалтын эхэн үетэй харьцуулахад өнөөдөр хүдэр дэх металлын агуулга 2 дахин буурч, уул геологийн нөхцөл хүндэрч байгаа. Үүнийг манай хамт олон технологийн сайжруулалт,  уулын ажлын зөв горимоор үйлдвэрлэлийн өртөг зардлыг бууруулан ашигт ажиллагааны түвшинг хэвийн хэмжээнд барьж ажилласнаар уурхайн тогтвортой ажиллах үндсийг хангаж байна. Өртөг зардлаа бууруулахын тулд агаарын тандалтыг ч мөн хийж байгаа. Энэ бүхний үр дүнд Эрдэнэтийн орд газрын  баялаг наанадаж 60 жилийн нөөцтэйг тогтоож,   үйлдвэрийнхээ  насжилтыг 20 жилээр уртасгаад байна” гэж Ерөнхий захирал Х.Бадамсүрэн үйлдвэрийн “амин чухал” асуудлаас Ерөнхий сайдад мэдээлэл өгөв. Эрдэнэт үйлдвэрийн  Ил уурхай жилд 36 сая тонн хүдэр олборлож байна. Өнөөдрийн байдлаар үүний 31.5 сая тонн нь Баяжуулах үйлдвэрт уламжлалт буюу флотацийн аргаар боловсруулагдаж байна. Үлдсэн хэсэг нь исэлдсэн хүдэр буюу ядуу агуулгатай тусгай овоолгод хадгалдаг. Эдгээрийг цаашид оновчтой, үр ашигтай технологиор боловсруулах зорилт дэвшүүлэн ажиллаж байгааг ч тэрээр ярилаа.     Уулын ажлын төлөвлөлтөөс эхлээд уурхайн бүх үйл явцыг хянах зориулалттай Питрам удирдлагын системийг Эрдэнэт үйлдвэр 2017 оноос эхлэн нэвтрүүлсэн. Олборлож буй хүдрийн агуулгыг тогтвортой байлгахад гол үүрэгтэй энэхүү хяналтын системийг нэвтрүүлсэн гурван компани дэлхийн хэмжээнд байдгийн нэг нь Эрдэнэт үйлдвэр юм. Техник технологийн шинэчлэлийг орчин үеийн хөгжил дэвшилтэй хөл нийлүүлэн хэрэгжүүлэхийн зэрэгцээ мэргэжлийн дадлага, туршлагатай, мэргэшсэн ажилтнуудыг үйлдвэрлэлийн бүх шатанд тогтвортой ажиллуулах бодлого чиглэлээ Ерөнхий захирал Х.Бадамсүрэн энэ үеэр  танилцуулж, энэхүү боломжоор ханган ажиллаж байгаа одоогийн Засгийн газарт талархаж буйгаа Ерөнхий сайд У.Хүрэлсүхэд илэрхийллээ.      Ерөнхий сайд Эрдэнэт үйлдвэрийн үйл ажиллагаанд сайн үнэлгээ өгөв      Ерөнхий сайд У.Хүрэлсүх Ил уурхайн үйл ажиллагаатай танилцсаны дараа Баяжуулах үйлдвэрээр орж, үйлдвэрлэлийн цехийн өргөтгөлийн өнөөгийн байдлыг үзэж сонирхов. Эрдэнэт үйлдвэрийн Баяжуулах цехийн өргөтгөлийн анхны ээлж 1989 онд 5.5 сая тонн хүдэр боловсруулах хүчин чадалтайгаар ажиллаж эхэлсэн бол 2015 онд 6 сая тонноор хүчин чадлыг нэмэгдүүлэх өргөтгөл барьж ашиглалтад оруулжээ. Уг өргөтгөлийг хийснээр өнөөдрийг хүртэл Баяжуулах үйлдвэрийн эцсийн бүтээгдэхүүний жигд ажиллагааг хангаж байна. Цаашид дахин ийм өргөтгөл барьж, ашиглалтад оруулах шаардлагатай байгааг Эрдэнэт үйлдвэр ТӨҮГ-ын Ерөнхий захирлын Нэгдүгээр орлогч бөгөөд Ерөнхий инженер Т.Батмөнх мэдээлэлдээ дурьдлаа. Баяжуулах үйлдвэрийн өргөтгөл, технологийн шинэчлэлийн  төслийг хэрэгжүүлэхдээ үйлдвэрлэлийн тасралтгүй үйл ажиллагааг хангаж ажиллахын зэрэгцээ хөдөлмөр зохион байгуулалтын нарийн горим, цагийн балансыг нягт тооцоолсны үндсэн дээр хийнэ. Өөрөөр хэлбэл, үйлдвэрлэж буй  бүтээгдэхүүний хэмжээ, эдийн засгийн үр ашгаа бууруулахгүй ажиллах нь бидний үндсэн зорилтын нэг гэдгийг Ерөнхий захирал Х.Бадамсүрэн онцоллоо.    Ерөнхий сайд У.Хүрэлсүх Эрдэнэт үйлдвэрийн Ерөнхий захиргааны нэгдүгээр байранд байрлах Шуурхай удирдлагын төвийн үйл ажиллагаатай танилцаж, тус үйлдвэрийн цаашдын зорилтын талаар дэлгэрэнгүй мэдээллийг сонссон. Энд Ерөнхий захирал Х.Бадамсүрэн  “Эрдэнэт үйлдвэр” ТӨҮГ-ыг 2031 он хүртэл хөгжүүлэх хөгжлийн үндсэн чиглэлд тусгагдсан төсөл хөтөлбөрүүдээ танилцуулж, эдгээрийг хэрэгжүүлэхэд гурван жил хүртэл хугацаа шаардагдаж буй, санхүү хөрөнгийн асуудлыг нь шийдвэрлэх гарцаа  хамтдаа ярилцаж, судалж олсон гээд өнөөгийн үйл ажиллагаа, ахиц дэвшил, ололт амжилтын талаар тодорхой мэдээлэв. Түүнчлэн сүүлийн 20 жилийн турш  “толгойн өвчин” гэж нэрлэгдсээр ирсэн цагаан тоосыг дарах ажлыг эрчимтэй хийж буй, хэдийгээр хүндрэл бэрхшээл ихтэй ч энэ асуудлыг ирэх жил бүрэн шийдвэрлэх боломж нээгдсэнийг ч  дурьдсан.      Тэрээр мэдээллийнхээ төгсгөлд “Эрдэнэт үйлдвэрийн  үйл ажиллагаатай танилцаж буй Ерөнхий сайд болон УИХ, Засгийн газрын гишүүдэд талархал илэрхийлье. Эрдэнэт үйлдвэрийн үйл ажиллагаа хэвийн жигд үргэлжилж байна. Бид өвөлжилтийн бэлтгэлээ 100 хувь хангасан. Тиймээс одоогийн байдлаар Засгийн газарт тавьж шийдүүлэх асуудалгүй. Монгол Улсын Засгийн газраас бидний хийх ажил, зорилтыг тов тодорхой болгож, тогтоол шийдвэр баталж өгсөн. Одоо бид зөвхөн хамтын хүчээр хийж бүтээх ажил үлдэж байна. Манай үйлдвэр 40 жилийн түүхтэй, 60 жилийн ирээдүйтэй. Цаашид бид үйлдвэрлэл болон эдийн засгийн өнөөгийн түвшинг бууруулахгүй байхын төлөө хичээн ажиллах болно” гэсэн юм.  “Эрдэнэт үйлдвэр” ТӨҮГ 2019 оны эхний 8 дугаар сарын байдлаар үйлдвэрлэлийн төлөвлөгөөт зорилтуудаа 100-аас дээш хувиар биелүүлсэн нь эдийн засгийн үзүүлэлтэнд ч эерэгээр нөлөөлж байгаа юм. Оны эхний 8 сард Эрдэнэт үйлдвэр улс болон орон нутгийн төсөвт 688 тэрбум төгрөг төвлөрүүлээд байна. Оны төгсгөлд энэ тоо 790 тэрбумд хүрэх боломж бүрджээ.     Эрдэнэт үйлдвэрийн өнөөгийн үйл ажиллагаатай танилцаж, дэлгэрэнгүй мэдээллийг сонссоны  дараа Ерөнхий сайд У.Хүрэлсүх тус үйлдвэрийн хамт олон, уурхайчдын ажил үйлсэд сайн үнэлгээ өгч, “Засгийн газраас ямар нэг зүйл хүсэхгүй өөрсдөө бүгдийг хийх бүрэн боломж байна” гэдэгт сэтгэл өндөр байгаагаа хэлсэн. Мөн Монгол Улсын эдийн засгийн гол ачааг нуруундаа үүрч, улс орон нутгийн төсөвт бүрдүүлдэг хувь нэмрээ жилээс жилд нэмэгдүүлэн ажиллаж байгаа Эрдэнэт үйлдвэр, энд ажиллаж буй нийт ажилтан, уурхайчдад талархал илэрхийлж, ажлын амжилт хүсэн ерөөлөө.                                    М.Балжинням Фото Н.Батсүх Дэлгэрэнгүй...
  • “Алтан бамбай” тэмцээнийг “Хүч” баг тэргүүллээ

       Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтэс, Гамшгаас хамгаалах штаб, Аврах, гал унтраах 58 дугаар ангиас санаачлан зохион байгуулдаг аврах ажиллагааны “Алтан бамбай” тэмцээн 9 дэх жилдээ амжилттай болж өндөрлөлөө. Эрдэнэт үйлдвэрийн 21 цех, нэгжийн 19 багийн аврагчид хоёр өдрийн турш ур чадвар, авхаалж самбаагаа сорин өрсөлдөж, шилдгүүдээ тодруулсан. Тэмцээний дүнгээр Чанар хяналтын хэлтэс, Судалгааны төвийн хамтарсан “”Хүч” багийнхан тэргүүлж цомоо гардан, Цахилгаан цехийн “Элч илч”, Автотээврийн цехийн “Сэрэмж” багууд удааллаа. Дөрвөн төрөлд зохиогдсон тус тэмцээнээс “Шилдэг аврагч”, “Шилдэг багийн ахлагч”-ийг шалгаруулан, шагнаж урамшуулсан юм. Мөн тусгай байранд Засвар угсралтын цех, Оёдлын цехийн хамтарсан “Hyper rescue”, Дулааны цахилгаан станцын “Мегаватт” багууд шалгарсан. Үйлдвэрлэлийн онцгой нөхцөлд цех, хэсгүүд бэлэн байдлаа хангаж, учирч болох эрсдлээс хамгаалахад ур чадвартай аврагчдаа бэлтгэсэн байх шаардлагатай.  2020 онд болох тэмцээний 10 жилийн ойн хүрээнд уул уурхайн компаниудын аврагч багийг урих, Улсын аварга багийн шилдэг үзүүлбэр үзэх зэрэг шинэлэг санааг хэрэгжүүлж, тэмцээнээ өргөжүүлэхээр төлөвлөжээ.                ХАБЭА-н хэлтсийн ЦХАБ хариуцсан тэргүүлэх инженер, тэмцээний Ерөнхий шүүгч Ц.ОРГИЛ:       Зохион байгуулагчдын зүгээс жил бүр тэмцээний төрлийг шинэчлэх, шинэ элемент, үүрэг даалгавар оруулахад анхааран ажиллаж байна. Энэ жилийн хувьд барилга байгууламжийн төрлийг шинэчиллээ. Шүүгчид “Баг тамирчид аврах ажиллагааг дүрэм журмаар нь хийж байна уу, Олон улсын шаардлагад нийцүүлж чадаж байна уу, үгүй юу” гэдэг асуултыг өмнөө тавьж, хэрэгжүүлж ирсэн. Тэмцээний зохион байгуулалт, дүрэм, зарчим нь Олон Улсад уул уурхайн салбарт сайн дурын аврах ажиллагааны бүлгэмүүд бэлтгэх зарчмаар явагддаг. Энд явагдсан бүх тэмцээн Олон улсын шаардлага, дүрэм журмыг хангасан.      “Шилдэг аврагч”, Ган бөөрөнцгийн цехийн кранчин З.УЧРАЛ:      Эрдэнэт үйлдвэрт 4 дэх жилдээ ажиллаж байна. Ган бөөрөнцгийн цехийг анх удаа төлөөлөн оролцож, шилдгээр шалгарсандаа баяртай байна. Хувь хүнээс хөдөлгөөн, авхаалж самбаа ихээхэн шаардлаа. Аврагч хүн эмнэлгийн анхны тусламжийг бүрэн гүйцэд үзүүлэх нь маш чухал байдаг. Энэ үүргээ биелүүллээ. Хамт олон, багийнхандаа баярлалаа.     И.Чинтогтох Фото: Ш.Лхамсүрэн Дэлгэрэнгүй...
  • Эрдэнэт үйлдвэрийн ажиллагсдын цалин ирэх 10 сарын 1-ний өдрөөс дахин нэмэгдэнэ

       Эрдэнэт үйлдвэрийнхэн 2019 оны эхний 9 сарын байдлаар үйлдвэрлэлийн төлөвлөгөөгөө бүх төрөл дээр биелүүлж, эдийн засгийн үр ашиг өссөн үзүүлэлттэй байгаа нь ажиллагсдын цалинг нэмэх боломжийг бүрдүүлжээ. Энэ таатай мэдээллийг тус үйлдвэрийн Ерөнхий захирал Х.Бадамсүрэн  үйлдвэрлэлийн цехийн ажилтнуудтай уулзах үеэр дуулгаж, ямар ч цаг үед ажил мэргэжилдээ нягт нямбай, сэтгэлтэй хандаж, хамтын хүчээр амжилттай ажиллаж байгаа уурхайчиддаа талархлаа илэрхийллээ. Ерөнхий захирал болон түүний удирдлагын багийнхан ажиллагсад, уурхайчидтай уулзаж, санал бодлыг нь сонсох, үйлдвэрийн эдийн засаг, үйлдвэрлэлийн өнөөгийн байдал, баримталж буй бодлого чиглэл, цаашдын зорилтын талаар мэдээлэл солилцох зорилгоор хамт олны төлөөлөлтэй “амьд яриа” өрнүүлж байна. Тус ярианы сүүлийн уулзалтад Баяжуулах үйлдвэр, Чанар хяналтын хэлтэс, Судалгааны төв, Инженерийн зураг төслийн төв, Барилга засварын цехийн ажилтнууд оролцож, санал бодлоо солилцлоо.     Уулзалтын эхэнд хийсэн мэдээлэлдээ Ерөнхий захирал Х.Бадамсүрэн “Оны эхнээс төлөвлөгөөт зорилтууд амжилттай хэрэгжиж байна. Бид хийх ажлаа тодорхой болгосон нь үүнд эерэгээр нөлөөлсөн. Өөрөөр хэлбэл, бид цаашдын зорилт, бодлогоо тов тодорхой төлөвлөн ажиллаж байна. Монгол улсын Засгийн газрын чиглэлийн дагуу Төрийн өмчийн бодлого зохицуулалтын газрын тогтоолоор та, бидний хамтран боловсруулсан төрөлх үйлдвэрээ дараагийн 15 жилд буюу 2031 он хүртэл хөгжүүлэх үндсэн чиглэл бид бүгдийн ирээдүйн зүг чиг болох юм. Үүнийг хэрэгжүүлэх ажлаа үе шаттай хэрэгжүүлж эхэлсэн. Бид үйлдвэрлэлийн үр дүн дээр тулгуурлан, ажиллагсдынхаа нийгмийн асуудал, цалин урамшууллыг нэмэгдүүлэх чиглэл баримтлан ажиллаж байна. Тиймээс ч өнгөрсөн 5 дугаар сарын 1-нээс бүх ажилчдын цалинг 10 хувиар нэмсэн. Мөн ур чадвартай, ажлын голыг нугалдаг сайн ажилчдаа дэмжиж урамшуулах үүднээс “Тэргүүлэх зэрэгтэй ажилчин”-ыг шалгаруулан, тэргүүлэх зэргийн нэмэгдэл урамшуулал олгодог боллоо. Тодорхой шалгуур үзүүлэлтээр эхний ээлжинд 30 ажилчныг тодруулан, өнгөрсөн 7 дугаар сарын 1-ний өдрөөс сар бүр 300 мянган төгрөгийн нэмэлт цалин тооцож олгоно. Түүнчлэн манай үйлдвэрт ээлжийн мастер гэж чухал ажил үүрэг хүлээсэн, анхан шатны удирдах ажилтнууд бий. Тэдний хөдөлмөрийг бодитой үнэлэх ёстой. Тиймээс “Манлайлагч мастер” хөтөлбөрийг хэрэгжүүлэн, энэ жилд 40 мастерийг тодруулж, тухайн ажилтны ур чадварын үзүүлэлтээр тус бүр зургаан зуугаас нэг сая хүртэл төгрөгийн урамшуулал хүртээнэ. Энэ урамшууллыг оны эхнээс тооцож олгох юм.  Дэлхийн зах зээл дээр нэг тонн зэсийн ханш сайн биш байна.  Улсын төсөвт нэг тонн зэсийн үнэ 6272 ам.доллар байхаар тусгагдсан ч өнөөдөр 5700 ам.долларын ханштай байгаа. Эндээс харахад, бид тонн тутмаас 400-500 ам.доллар алдаж байна гэсэн үг. Бодит байдал ийм байгаа ч өртөг зардлаа бууруулан ажилласны чамлахааргүй үр дүн эхний 9 сард гарна гэдэгт эргэлзэхгүй байгаа. Үүн дээр тулгуурлан, тооцоолж ирэх 10 дугаар сарын 1-ний өдрөөс ажиллагсдынхаа цалинг нэмэх шийдвэр гаргасан. Ингэснээр бид энэ онд хоёр дахь удаа ажиллагсдынхаа цалинг нэмж байгаа юм. Цалин хэдэн хувиар нэмэгдэх тоо хэмжээ удахгүй тодорхой болно. Бид эзэн хичээвэл заяа түшнэ гэсэн зарчмаар ажиллахад болохгүй, бүтэхгүй зүйл байхгүй гэдэгт итгэлтэй байна” гэсэн юм.     Дараа нь “Эрдэнэт үйлдвэр” ТӨҮГ-ын 2019 оны хүлээгдэж буй гүйцэтгэлээр үйлдвэрлэл, эдийн засгийн үйл ажиллагааны үр дүнгийн талаар Ерөнхий захирлын Эдийн засаг, санхүү хариуцсан орлогч Д.Үүрийнтуяа дэлгэрэнгүй мэдээлэл өгсөн. Тэрээр үйлдвэрлэлийн төлөвлөгөөний үзүүлэлт, эдийн засгийн өнөөгийн байдал, тэдгээрт нөлөөлж буй гадаад, дотоод хүчин зүйлс, хөрөнгө оруулалтын талаар өмнөх онуудын байдалтай харьцуулан мэдээлсний зэрэгцээ үйлдвэрт ажиллагсдын нийгмийн асуудал, тэр дундаа ажилчдынхаа ашиг орлогыг нэмэгдүүлэх, амьдралын түвшинг дээшлүүлэх,  тогтвортой байлгахад авч хэрэгжүүлж буй бодлого чиглэлийг танилцуулав. Тухайлбал, Эрдэнэт үйлдвэртэй хамтран ажилладаг арилжааны банкуудтай санал солилцож, зээлийн хүүг бууруулах, үндсэн зээл болон хүү төлөлтийн уян хатан, таатай нөхцөлийг бий болгох талаар зөвшилцөлд хүрч буйг мэдээлсэн нь ажиллагсдын сэтгэлд нийцлээ.     Уулзалтад оролцогсод үйл ажиллагааны мэдээллийн дараа санал бодлоо хэлж, удирдлагуудаас сонирхсон асуултдаа хариулт авсан. Эрдэнэт үйлдвэрийн дэргэд аж ахуйн нэгжийн статустай ажиллаж байсан РСЦ компанийг өөрчлөн, тус үйлдвэрийн бүтцийн  Барилга засварын цех болгосон нь тэнд ажиллаж буй 240 гаруй хүний нийгмийн асуудлыг давхар шийдсэн маш оновчтой шийдвэр гэж олон ажилтнууд талархаж байв.  Түүнчлэн хүнд хортой нөхцөлд ажиллаж буй ажилчдын хөдөлмөрийн нөхцөлийг сайжруулах, хамгаалах хувцас хэрэгслээр хангах ажлыг илүү боловсронгуй болгох, залуу ажилтнуудаа сурч боловсороход нь дэмжлэг үзүүлэх болон хамтын гэрээ, орон сууцны асуудлыг шийдэх зэрэг ажилчдын нийтлэг эрх ашиг, хувь хүмүүсийн асуулт, хүсэлтэд удирдлагууд хариулт өгч, шат дараалан шийдэх боломжтой гэдгийг хэллээ.      Ажилчдынхаа үгийг сонсож, тулгамдсан асуудлыг шийдвэрлэх чиглэлээр санаачилгатай ажиллаж буй Ерөнхий захирал болон бусад удирдлагуудад баярласнаа уурхайчдын төлөөлөл илэрхийлж, Эрдэнэт үйлдвэрийн ирээдүй өнгөтэй байгааг, тэрхүү сайхан ирээдүй рүү хамтын хүчин зүтгэлээр хүрэх ёстойг Ерөнхий захирал уриалснаар үйлдвэрлэлийн цехийнхэнтэй хийх уулзалтын үйл ажиллагаа өндөрлөсөн юм.      М.Балжинням Фото Ш.Лхамсүрэн                             Дэлгэрэнгүй...
  • “Намрын ногоон өдрүүд” эрүүл хоолны өдөрлөг зохион байгууллаа

       Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтэс, “Эрдэнэт” сувиллын цогцолбор, халуун хоол үйлдвэрлэлийн “Сэлэнгэ” катеринг хамтран “Намрын ногоон өдрүүд” эрүүл хоол сурталчлан таниулах өдөрлөгийг ажилчдад зориулан зохион байгууллаа.    Өдөрлөгийн зорилго нь чанар сайтай, тэжээллэг хоолоор дамжуулан ажилчдаа эрүүлжүүлэх, давс болон чихрийн  өндөр хэрэглээг багасгах, тэдгээрийн хор уршигийг таниулах, илүүдэл жинтэй хэрхэн тэмцэх зэрэг ойлголт, мэдээллийг өгөхөд чиглэсэн байна. Өөрөөр хэлбэл, “Эрүүл ажилтан” зорилтот хөтөлбөрийг хэрэгжүүлэх ажлын нэг хэсэг нь энэ өдөрлөгөөр дамжин ажиллагсдад хүрч буй аж.    “Намрын ногоон өдрүүд” өдөрлөг үйлдвэрийн бүсэд  халуун хоолны үйлчилгээ үзүүлж буй дөрвөн багц буюу Ерөнхий захиргааны нэгдүгээр байр, Авто тээврийн цехийн төрөл бүрийн авто машины засварын хэсэг, Засвар механикийн завод, Ил уурхайд долоо хоногийн турш үргэлжилж, төрөл бүрийн  хүнсний шинэ ногоо болон нарийн ногооны хачир, жимсний орцтой эрүүл хоолыг бэлтгэн, ажилчдад үйлчилсэн байна. Энэ үеэр хүнсний ногооны ач тус, тогтмол хэрэглэснээр эрүүл мэндэд үзүүлэх  эерэг нөлөөний талаар хоол болон сурталчилгаа, мэдээллийн хуудас түгээж, таниулсан нь үр дүнтэй боллоо гэж “Сэлэнгэ” катерингийн эрхлэгч Б.Хантамир ярилаа.    М.Балжинням Фото: Ш.Лхамсүрэн Дэлгэрэнгүй...
  • Эрдэнэт үйлдвэр ажилчдынхаа эрх ашгийг "Хамтын гэрээ"-гээр зохицуулдаг

      Эрдэнэт үйлдвэрийн Ерөнхий захирал Х.Бадамсүрэн Үйлдвэрчний эвлэлийн холбооны тэргүүлэгчидтэй уулзлаа. Ажилчдын эрх ашгийг хамгаалах нэг зорилгын төлөө эвлэлдэн нэгдсэн Үйлдвэрчний эвлэлийн гишүүд 2019 онд 12 бүлэг 112 заалт бүхий “Хамтын гэрээ”-г хэрэгжүүлэн ажиллаж байна. Энэ нь үйлдвэр, холбооны удирдлагуудын хооронд зөвшилцөж хийсэн 11 дэх гэрээ юм.    Уулзалтын эхэнд Ерөнхий захирал Х.Бадамсүрэн үг хэллээ. Тэрээр “Бид үйлдвэрээ хөгжүүлж, аймаг, орон нутгийнхаа хөгжилд хувь нэмрээ оруулан, газрын хөрсөн дор байгаа баялгийг эдийн засгийн эргэлтэнд оруулж, үндэсний баялаг бүтээж байна. Монгол Улсын хөгжил дэвшил, сайн сайхны төлөө ажилладаг Эрдэнэт үйлдвэр уул уурхайн баяжуулах үйлдвэр боловч эцсийн дүндээ хүний төлөө үйлдвэр юм. Бид уурхайчиддаа, хүндээ хандсан төслүүдийг хийж хэрэгжүүлнэ. Захиргаа, үйлдвэрчний байгууллага ойлголцож, хамтран ажиллаж чадвал тодорхой үр дүнд хүрч чадна гэдэгт итгэж байна. Бидний бодлого, үйл ажиллагаа цэгцтэй байх ёстой” хэмээсэн.    Эрдэнэт үйлдвэр Нийгмийн цехүүдийн үйл ажиллагаагаар дамжуулан зарим төрлийн нийгмийн халамж, үйлчилгээг хүргэн ажилладаг. Энэ тухай Ерөнхий захирлын Санхүү, эдийн засаг хариуцсан орлогч захирал Д.Үүрийнтуяа мэдээлэл хийхдээ “2019 оны хүлээгдэж буй гүйцэтгэлээр нийгмийн халамжийн чиглэлээр 100 тэрбум төгрөг зарцуулах” тухай танилцууллаа. Ажиллагсдынхаа нийгмийн асуудлыг олон талаар шийдвэрлэж ирсэн Эрдэнэт үйлдвэр энэ онд томоохон төслүүддээ хөрөнгө оруулалт хийсэн. Энэ нь үйлдвэрийн олон жилийн найдвартай, тасралтгүй ажиллагааг хангахад чиглэж байгаа юм. Нийгмийн хариуцлагын хүрээнд “Уурхайчин 1, 2, 3” орон сууцны хороолол барьж байна. Мөн Технологийн сургуульд түшиглэн, сургалт, эрдэм шинжилгээ, үйлдвэрлэлийг хослуулсан орчин үеийн цогцолбор сургууль, туршилт судалгаа хийх лабораторийн бааз бий болгоно. Орос сургуулийг түшиглэсэн Кембриджийн хөтөлбөртэй Ерөнхий боловсролын сургууль, Политехникийн коллеж барьж байгуулах зэрэг олон санаа тусгагджээ.    Эрдэнэт үйлдвэрийн санхүү, мөнгө, эдийн засгийн бодлого эцсийн дүндээ ажилтны эрх ашигт нийцсэн байх ёстой хэмээн удирдлагууд үзэж, банк санхүүгийн асуудалд ихээхэн анхаарсан. Ингэхдээ өмнө нь арилжааны 5 банктай хамтран ажилладаг байсан бол бага хувийн хүү, нэмэлт бүтээгдэхүүн санал болгосон 10 банктай хамтран ажиллах шийдэлд хүрсэн юм. Энэ нь Эрдэнэт үйлдвэртэй ажил, амьдралаа холбосон 7000 гаруй ажилтан, тэдгээрийн гэр бүл болох Орхон аймгийн 30 мянган иргэнд хийсэн үр өгөөжтэй, алсыг харсан хөрөнгө оруулалт болж байна.            ҮЭХ-ны дарга Б.Төгсбаяр: “Хамтын гэрээ”-ний биелэлтийг дүгнэлээ     Эрдэнэт үйлдвэрийн удирдлагуудтай хийсэн энэ удаагийн уулзалт хоёр ач холбогдолтой боллоо. Нэгд, өнөөдөр хүчин төгөлдөр мөрдөгдөж байгаа “Хамтын гэрээ”-гээ дүгнэсэн. Оны эхний 9 сарын байдлаар гэрээний гүйцэтгэл 98.35 хувийн биелэлттэй гарлаа. Он дуусахад нэг улирал үлдсэн тул гүйцэтгэлээ 100 хувь хангахаар байна. Хоёрт, “Хамтын гэрээ”-ний 3.4 буюу цалин хөлсийг 20 хүртэл хувиар нэмэгдүүлэх тухай заалтын дагуу 5 дугаар сарын 1, 10 дугаар сарын 1 гэсэн 2 шатлалаар цалин нэмэгдэж байгаа нь бидний хувьд чухал юм. Шинэ гэрээнд тусгах зарим ажлаа ярьлаа. Үйлдвэрийн удирдлагууд болон Үйлдвэрчний эвлэлийн холбоо цаашид хэрхэн ажиллах талаар санал солилцлоо. Ач холбогдолтой, хамтын ажиллагааг шинэ түвшинд гаргасан үйл явдал боллоо.      И.Чинтогтох Фото: Б.Ялалт     Дэлгэрэнгүй...
  • Хамтын ажиллагаа, харилцан ойлголцол, эргэх холбоо шинэ түвшинд гарсныг онцоллоо

       “Эрдэнэт үйлдвэр” ТӨҮГ-ын Ерөнхий захирал, Аж үйлдвэрийн гавьяат ажилтан, Техникийн шинжлэх ухааны доктор Х.Бадамсүрэн өнөөдөр Орхон аймгийн болон Баян-Өндөр сумын Иргэдийн хурлын төлөөлөгчдийг хүлээн авч, “Оюу” танхимд уулзалт зохион байгууллаа. Уулзалтыг нээн Ерөнхий захирал үг хэлж, Санхүү, эдийн засаг хариуцсан орлогч захирал Д.Үүрийнтуяа 2019 оны үйлдвэрлэлийн үзүүлэлт, төлөвлөгөөний биелэлт, төсөл хөтөлбөр, өргөтгөл шинэчлэл, орон нутагт хийгдэж буй хөрөнгө оруулалт, төсвийн бүрдүүлэлт гэсэн мэдээллээр танилцуулга бэлтгэн хүргэлээ. Эрдэнэт үйлдвэр өнгөрсөн онд Орхон аймагтай 5 чиглэлээр 14 ажил дээр хамтран ажиллаж, 94 хувийн биелэлтээр гүйцэтгэлээ хаажээ. Харин энэ оны санхүүжилтээр 5 чиглэлээр 13 ажил төлөвлөн хэрэгжүүлж байна.     Эрдэнэт хотын Баян-Өндөр сумын хувьд баг бүр нь Иргэдийн хуралд төлөөлөлтэй. Тэр ч утгаараа иргэдийн дуу хоолойг төрд хүргэх, төсөвт тодорхой ажлуудаа суулгах гээд төлөөлөгч нарын ажлын хариуцлага их байдаг. Эдийн засгийн мэдээллийн дараа асуулт хариултын цаг үргэлжилж, төлөөлөгч нар багийнхаа иргэдэд тулгамдсан асуудлыг танилцуулан, шийдвэрлэх, дэмжлэг үзүүлэх боломжтой эсэхэд хариулт авсан юм. Орон сууцны болон гэр хорооллын багуудад тулгамдсан асуудал харилцан адилгүй. Тиймдээ ч Уртын гол, Их залуу багийн төлөөлөгч үерийн усны далан, зам харгуй зэргийг шийдвэрлэхэд техникийн дэмжлэг хүссэн бол Согоот багийн төлөөлөгч сургуулийн өргөтгөл барих ажилд туслалцаа хүслээ.     Эрдэнэт үйлдвэр катодын зэсийн үйлдвэр барьж байгуулахаар тооцоо судалгаагаа хийж байна. Мөн гэр хорооллын багуудад тулгамдсан утааны асуудлыг шийдвэрлэхээр утаагүй түлш үйлдвэрлэх тоног төхөөрөмж оруулж ирэхээр болсон. Цагаан тоосны бүсчлэлд амьдарч байгаа болон бусад багаас түүврийн аргаар сонгосон 500-аад иргэдийг эрүүл мэндийн иж бүрэн үзлэгт хамруулж эхэлсэн. Хамтын ажиллагааны бодит үр дүн олон бий. Хурлын төлөөлөгч нар Эрдэнэт хотод Мөсөн ордон барьж байгуулах, орос сургууль, цэцэрлэгийн тоог нэмэгдүүлэх, Баян-Өндөр сумын багууд, Эрдэнэт үйлдвэрийн цехүүд хоорондын харилцаа холбоог сайжруулах, Жаргалант сумын иргэдийн хүнсний ногоогоор Эрдэнэт үйлдвэрийн хэрэгцээг хангах хүсэлтэйгээ илэрхийллээ. Хамтын ажиллагаа, харилцан ойлголцол, эргэх холбоо шинэ түвшинд гарч, хөрөнгө оруулалтын үр өгөөж бодит ажил болсоор байна.               И.Чинтогтох Фото: Ш.Лхамсүрэн     Дэлгэрэнгүй...
  • Үйлдвэрлэлийн цехийнхэн цалингийн системийг шинэчлэх талаар санал гаргалаа

         Эрдэнэт үйлдвэрийн үндсэн цех болох Хүдрийн ил уурхай, Геологи хайгуулын анги, Холбоо, мэдээллийн технологи, автоматжуулалтын цех, Автотээврийн цехийн ажиллагсдыг хамруулсан уулзалт ярилцлагад үйлдвэрийн Ерөнхий захирал Х.Бадамсүрэн, Ерөнхий захирлын нэгдүгээр орлогч бөгөөд Ерөнхий инженер Т.Батмөнх, Санхүү, эдийн засаг хариуцсан орлогч захирал Д.Үүрийнтуяа нар оролцлоо. Удирдлагуудын тавьсан илтгэлд үйлдвэрлэлийн төлөвлөгөөний үзүүлэлт, хэрэгжүүлж эхэлсэн томоохон төслүүд, тэдгээрийн үр өгөөж, эдийн засгийн ач холбогдол, хүрэх үр дүнгийн талаар тодорхой тусгажээ. Тооцоо судалгаа, нарийвчилсан тоо баримтад тулгуурласан мэдээллийн дараа ажилчдын чөлөөт асуултын цаг эхэлсэн юм.       Автотээврийн цехийн ажилчдын асуулт дийлэнх хувийг эзэлсэн бөгөөд юуны өмнө ажилчдаа сонсох уулзалт хийж байгаад тэд талархалтай хандлаа. Ажилчид тээврийн хэрэгслийн овор хэмжээнээс хамаарч цалингийн шатлал үүсгэснийг өөрчлөх цаг болсон тухай сануулж, дотооддоо шатах тослох материалын үйлдвэрлэл байгуулах, өдөр тутамд нэн шаардлагатай жижиг зүйлсийг цаг алдалгүй ханган нийлүүлэх, хайгуулчдын үр дүнг харгалзан цалингийн нэмэгдэл олгох боломжтой эсэхийг удирдлагуудаас тодруулсан юм. Уулзалтыг үр өгөөжтэй болгох үүднээс Ерөнхий захирал асуулт бүрт зохих хариулт өгч, нягтлах шаардлагатай зүйлсийг тэмдэглэн авлаа. Мөн тэрээр 2017-2019 онд үйлдвэрлэлийн нөөцийг өсгөхөд геологичид хэрхэн оролцсон талаар судалж, үнэлэлт гаргахаар болсон юм. Цаг үеийн мэдээ мэдээллийг сар бүр танилцуулж, ажилтнуудынхаа тулгамдсан бэрхшээлийг сонсох үүрэг даалгаврыг цех, нэгжийн удирдлагуудад өгснөөр энэ удаагийн уулзалт өндөрлөлөө.       Уулзалт бүр өөрийн гэсэн онцлогтой, нүүр тулсан яриа бүр тодорхой ойлголцолд хүрч байв. Уул уурхайн үйлдвэрлэлийг хөгжүүлэх, алсын хараа, эрхэм зорилгоо оновчтой тодорхойлох, хөрөнгө оруулалтын төслүүдээ хөхиүлэн дэмжих, урагш хөдөлгөх нь удирдлагын багийн шийдвэр, үйл ажиллагаанаас шууд хамааралтай. Удирдлагуудын шийдвэрээр өнгөрсөн тавдугаар сараас хэрэгжиж эхэлсэн 100 гаруй төслийн үр дүнгээр Эрдэнэт үйлдвэрийн маргаашийн хувь заяа тодорхойлогдох бөгөөд гол хөдөлгөгч хүч нь мэргэжлийн, чадварлаг боловсон хүчин болохыг сануулснаараа онцлог байлаа.    И.Чинтогтох Фото: Ш.Лхамсүрэн                     Дэлгэрэнгүй...
  • Аврах ажиллагааны “Алтан бамбай” тэмцээн эхэллээ

       Эрдэнэт үйлдвэрийн ХАБЭА-н хэлтэс, Залуучуудын холбоо, Эрдэнэт сувиллын цогцолбор, Аврах, гал унтраах 58-р анги хамтран зохион байгуулдаг аврах ажиллагааны “Алтан бамбай” тэмцээн өнөөдөр эхэллээ. Энэ удаагийн тэмцээнд гадны байгууллага оролцохгүй, зөвхөн Эрдэнэт үйлдвэрийн бүтцийн нэгжүүдийн шинэ залуу ажилчдаас бүрдсэн 19 баг аврах ажиллагааны бэлтгэл бэлэн байдлаа шалгуулан өрсөлдөж байгаагаараа онцлог юм. Хоёр жил тутамд явагддаг энэхүү тэмцээн зам тээврийн ослын, барилга байгууламжийн, газар доорх байгууламж, нурангийн аврах ажиллагаа гэсэн төрлөөр үргэлжилж байна. Тэмцээний дүн маргааш гарна.    М.ОДГЭРЭЛ Фото: Ш.ЛХАМСҮРЭН                                         Дэлгэрэнгүй...
  • Аймаг, үйлдвэр, төрийн бус байгууллага нэгдсэн бодлогоор хамтран ажиллана

       Дэлхийн жишиг, Монголын бахархал болсон Эрдэнэт үйлдвэр 100 гаруй мянган хүн амтай Эрдэнэт хотын хөгжилд жинтэй хувь нэмэр оруулсаар ирсэн. Дэд бүтэц, орон сууц, барилга байгууламж, иргэд, олон нийтийн үйлчилгээний цогцолборууд гээд энэ хотод байх ёстой бүх зүйлийг шийдэж өгсөн нь өнөөгийн хотын хөгжлийг бүрэн илтгэдэг. Эрдэнэт үйлдвэрийн Ерөнхий захирал Х.Бадамсүрэнгийн товлосон уулзалтанд Орхон аймагт үйл ажиллагаа явуулж буй төрийн бус байгууллагууд ч багтсан. Энэ удаад Орхон аймгийн ИТХ-ын дарга П.Пүрэвлхагва, Засаг дарга Д.Батлут нар 20-иод төрийн бус байгууллагын тэргүүний хамтаар хүрэлцэн ирж, хамтын ажиллагааны талаар ярилцлаа. Өнгөрсөн хугацаанд Эрдэнэт үйлдвэрийн үе үеийн удирдлага төрийн болон төрийн бус байгууллагын үйл ажиллагааг дэмжин ажиллаж, тодорхой хөрөнгө санхүүгийн дэмжлэг үзүүлсээр ирсэн. Гэвч төрийн нуруун дээрх ачааг чадлынхаа хэрээр хуваалцаж, зарим чиг үүргийг нэр төртэй гүйцэтгэж яваа төрийн бус байгууллагын төлөөллийг хүлээн авч, сэтгэлийн үгсээ хуваалцсан нь анхных билээ. Энэ ч утгаараа зочид санал хүсэлтээс илүүтэй ажлыг нь олонтаа дэмжсэн явдалд баярлаж, талархсан сэтгэгдлээ өөрийн биеэр илэрхийлэхээр ирсэн нь харагдаж байлаа.     Орхон аймгийн “Сороптимист” клуб, “Шүүдэр” охидын төвийнхөн аймгийн хэмжээнд үйл ажиллагаа явуулж байгаа бүх сургуульд нөхөн үржихүйн боловсрол олгох сургалт явуулах, “Эрдэнэтийн эрүүл иргэн” ТББ-аас Эрүүл зөв хооллолтын талаар Эрдэнэт үйлдвэрийн ажиллагсад, Ерөнхий боловсролын сургуулийн сурагчдад лекц, сургалт зохион байгуулах, “Эрдэнэт-Ард түмний өмч” ТББ-аас хотын утааны асуудлыг шийдэхэд дорвитой анхаарал хандуулах зэрэг хэд хэдэн санал гаргасан нь дэмжигдлээ. Мөн зарим саналыг ирэх 2020 оны төлөвлөгөөнд тусган, аймаг, үйлдвэр, төрийн бус байгууллага гэсэн гурван талт хамтын ажиллагааны нэгдсэн бодлого гаргахаар шийдвэрлэлээ.     Ерөнхий захирал Х.Бадамсүрэн уулзалтын төгсгөлд, “Бид нэгдсэн нэг бодлогоор ажиллана. Улмаар нэг том ажлыг өөр өөрийн оролцоотой хийж гүйцэтгэх нь илүү үр өгөөжтэй гэж бодож байна. Аймгийн удирдлагууд нэгдсэн бодлогод анхаарах байх. Эрдэнэт хот, Монгол улсыг эрүүл, боловсролтой хүн л хөгжүүлнэ. Энэ чиглэлд хамтран ажиллахад бид бэлэн байгаа учраас ажлын журмаар ярилцаж шийдвэрлье. Уурхайчид бид газрын хэвлийн баялгийг худалдан борлуулж, үндэсний баялаг бүтээдэг онцлогтой. Өнөөдрийн байдлаар Эрдэнэтийн уурхайчид улс, орон нутгийн төсөвт 688 тэрбум төгрөг төвлөрүүлсний 30 тэрбумыг Орхон аймгийн, найман тэрбум төгрөгийг Булган аймгийн төсөвт төвлөрүүллээ. Цаашид боломжийн асуудлаа шийдээд явна. Хүний төлөө, хөгжил дэвшлийн төлөө чиглэл чиглэлээр ажиллаж байгаа та бүхэнтэй уулзаж, санал бодлоо хуваалцахад таатай байлаа. Аймаг, орон нутгийн ажлын нэг хэсэг гэж ойлгож ирсэн аймгийн удирдлагууддаа талархал илэрхийлье. Хүний төлөөх ажил тань өөдрөг бүтэмжтэй байх болтугай. Бид эв нэгдэлтэй байж, ярих зүйлсээ хуваалцан, сэтгэл санаагаар нэгдэж, шаардлагатай үед биендээ гар сунган туслах болно. Ажлын өндөр амжилт, амьдралын сайн сайхныг хүсье” гэв.    И.Чинтогтох Фото: Ш.Лхамсүрэн                 Дэлгэрэнгүй...
  • Цагаан тоосны дэгдэлтийн бүсэд амьдардаг иргэдийг эрүүл мэндийн үзлэгт хамруулж эхэллээ

       Эрдэнэт үйлдвэрийн Хаягдлын аж ахуйд үүссэн элсний хуримтлалаас дэгддэг цагаан тоос тухайн бүсэд амьдардаг иргэдэд хэрхэн  нөлөөлж буйг тогтоох эрүүл мэндийн үзлэгийг тус үйлдвэр  нийгмийн хариуцлагын хүрээнд жил бүр зохион байгуулж ирсэн юм. Энэ удаагийн эрүүл мэндийн үзлэгийг  Орхон аймаг, Баян-Өндөр сум, “Эрдэнэт үйлдвэр” ТӨҮГ хамтран “Медипас” төв эмнэлэг, Эрүүл мэндийн газар, үйлдвэрийн Байгаль орчин, ногоон хөгжлийн хэлтэс, “Эрдэнэт” сувиллын цогцолбор зэрэг мэргэжлийн байгууллагуудын өргөн бүрэлдэхүүнтэйгээр өнөөдөр эхлүүллээ. Медипас эмнэлэгтэй хоёр дахь жилдээ хамтарч буй эрүүл мэндийн үзлэгт энэ жил 488 иргэнийг хамруулахаар бүртгэжээ.  Тэдний 326 нь цагаан тоосны дэгдэлтийн голомтын бүс буюу Говил, Баянцагаан, Жаргалант сумын зарим багийн иргэн бол 163 нь цагаан тоосны голомтын бус хяналтын бүсэд багтах  Баян-Өндөр сумын 6 багийн иргэдийн төлөөлөл байгаа юм. Эрүүл мэндийн үзлэгт голомтын бүсээс гадна голомтын бус хяналтын бүсийн иргэдийг хамруулж байгаа нь харьцуулалтын дүн шинжилгээ хийж, цагаан тоосны сөрөг нөлөөллийг бодитой тогтоох зорилготой гэж мэргэжлийн багийнхан ярьж байна.      Цагаан тоосны бүсэд амьдарч байгаа иргэдийг эрүүл мэндийн үзлэг, шинжилгээнд хамруулах ажлын нийт 90 орчим сая төгрөгийн зардлыг “Эрдэнэт үйлдвэр” ТӨҮГ-ын Байгаль орчныг хамгаалах менежментийн төлөвлөгөөний төсвөөс гаргажээ. Харин үзлэгт хамрагдах иргэдийн бүртгэлийг Баян-Өндөр сумын Засаг даргын тамгын газар өөрийн багуудаар дамжуулан зохион байгуулж, Медипас эмнэлэг үзлэг, шинжилгээг хариуцаж байна. Өдөрт 30 иргэнийг хүлээн авах бөгөөд иргэн бүрт 184 430 төгрөгийн өртөг бүхий эрүүл мэндийн үзлэг, шинжилгээг үнэ төлбөргүй хийх юм. “Энэ жилийн үзлэгээр  лабораторийн болон үйл оношийн шинжилгээ хийхийн зэрэгцээ зүрхний хэт авиа, уушгины томографи зэрэг  зарим нарийн шинжилгээ, оношилгоог нэмэлтээр хийнэ. Мөн эрүүл мэндийн даатгалын багц үзлэгт давхар хамрагдах боломжтой. Өөрөөр хэлбэл, дээрх үзлэгт хамрагдаж буй иргэд эрүүл мэндийн даатгал төлдөг бол эрүүл мэндийн сангаас санхүүжиж байгаа багц үзлэгийн үйлчилгээг авах боломж нээгдсэн” гэж Медипас эмнэлгийн амбулаторийн тасгийн эрхлэгч Т.Амгаланбаяр эрүүл мэндийн үзлэгийн ач холбогдлын талаар онцоллоо.      М.Балжинням         Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
Мэдээ

     Монгол ахуй соёл, нүүдэлчин хэв маяг, уламжлал, ястан үндэстний онцлогийг хойч үедээ таниулж, түүнийг түгээн дэлгэрүүлэх, өвлүүлэхээр “Ёс заншлын цогцолбор” өргөн олны өмнө үүд хаалгаа дэлгэлээ. Энэ сарын нэгэнд болсон их өргөөний нээлтийн ёслолын ажиллагаанд Орхон аймгийн удирдлагууд, төр захиргааны байгууллагын ажилтан, албан хаагчид, урлаг соёлын салбарынхан, иргэд оролцож, түүх соёлоо түгээн дэлгэрүүлж буй томоохон бүтээн байгуулалтыг үзэж сонирхлоо. Энд модон тоглоом, шагайн наадгай, гоёл чимэглэл, үндэсний дээл хувцас урлал, цагаан идээ, хөхүүрийн айраг, хөх арвайн гурил, хатаасан борц, эсгий эдлэл, дээс ширмэл, элдэж боловсруулсан арьс шир, нэхий гээд малын гаралтай түүхий эдээр хийж болох бүхнийг олонд дэлгэжээ. Ерөөл айлдаж, хан хуурын татлагаар жаврыг нь үргээсэн энэхүү их гэр 22 диаметр бүхий 380 кв.метр талбайтай. Ёс заншлын цогцолбор нь 10 га талбайд хийх бүтээн байгуулалтын томоохон ажил бөгөөд  ирэх жил 21 аймгийн гэрүүдээр хүрээгээ тэлж, Монгол нутагт амьдарч буй бүхий л ястны онцлогийг харуулахаар төлөвлөжээ. Мөн тус цогцолборын хэсэгт хөл бөмбөг, волейбол, сагсан бөмбөг, гандбол зэрэг спорт тоглоомын болон ахмадын чийрэгжүүлэлт, хүүхдийн тоглоомын талбай байрлаж, Хөдөлмөр зуслан хичээллэх юм.

Хүүхэд хүмүүжүүлэх монгол арга ухаан

     Орхон аймгийн Ерөнхий боловсролын сургуулийн сурагчдын цуглуулга болох 40 мянган шагай хүүхэд хүмүүжлийн гэрт бий. Шагайн наадгайн 13 нэр төрөл болон хорол, үүцүү, даалуу гэсэн хөлөгт тоглоомыг хүүхэд багачуудад зааж сургахаар тохижуулсан нь онцлог байлаа. Боловсролын салбарт 35 жил ажилласан ахмад багш Ч.Нарангэрэл бага гэрийг хариуцан ажиллахаар болжээ. Тэрээр, “Шагай тоглох нь хүүхдийн сэтгэхүйг хөгжүүлдэг олон талын ач тустай. Би технологийн багш мэргэжилтэй. Шинэ ажлын байртай болсондоо баяртай байна. Ахмад багш бидэнд амрах зав гарахгүй нь бололтой. Ирэх зун багш нартайгаа хамтран ширдэг ширж, бэлэг дурсгалын зүйлс урлан, эндээ үйлдвэрлэл эрхэлнэ. Сайхан зүйл санаачилсан Баян-Өндөр сумын Засаг даргад баярлалаа” хэмээн сэтгэлийн үгээ уламжилсан. Тус гэрийн гадна Говил багийн хоёрдугаар сургуулийн сурагчид шагайн харваагаар цэцээ сорьж, сурсан мэдсэнээ найзууддаа сонирхууллаа. Хоёрдугаар сургуулийн жижүүр, мужаан Г.Нармандах гуай шагайн харваагаар хичээллэгч 5-17 насны 30 гаруй шавьтай. 2017 оноос хүүхдүүд нь Улсын чанартай тэмцээнд оролцож эхэлсэн бөгөөд 2018 онд хүрэл, 2019 онд алтан медалийн эзэд болжээ.

 

Боловсруулсан арьс, нэхий

     Удаах гэрээр зочлоход Увс аймгийн Тариалан сумын харьяат, Орхон аймагт 19 дэх жилдээ амьдарч суугаа Д.Жавзан гуай угтлаа. Тэмээний ноос, зогдроор утас ээрч, адууны дэлээр гэрийн оосор, бүч томох, ямааны арьсаар элэг, сарьс хийх, хонины арьс элдэх гээд гэртээ зүгээр суух дургүй тэрээр юм юм амжуулна. Энэ бүх хөдөлмөрч зан чанар ээж ааваасаа өвлөсөн эрдэм нь юм. Тэрээр цай уух зуурт “Манайх таван хүүтэй. Бүгдийг нь гэр төхөөрч тусад нь гаргасан. Зах дээр үнэгүйдээд хаяж байгаа нэг хонины арьсыг элдээд борлуулахад 35000 төгрөг болдог гэж бодохоор амьдрал гарын алган дээр байна, хүүхдүүд ээ. Одоогийн хүүхдүүд арьс элдэж, дээс томохоос залхуурдаг болсон. Хүмүүс их сонирхож байна. Мэддэг, чаддаг бүхнээ хүүхдүүдэд зааж өгөх юмсан” гэв.

Гоёл чимэглэл, үндэсний хувцас урлал

     “Эрдэнэтийн урлан бүтээгчид”ТББ-ыг төлөөлсөн гар урлаачид монгол бүсгүйн гоёл чимэглэл, дээл хувцасаар энэхүү гэрийг чимэглэжээ. Эрдэнэт хотын урлаачид төрөл бүрийн үйл ажиллагаа зохион байгуулахаар хэдэн сарын өмнөөс нэгдэн нягтарч, Төрийн бус байгууллага хэлбэрээр үйл ажиллагаа явуулах болжээ. Гар урлалын 20-иод нэр төрлийг эгнээндээ нэгтгэсэн тус холбоо гишүүнчлэлээ өргөжүүлэхээр ажиллаж байгаа тухайгаа холбооны тэргүүлэгч Б.Баяржаргал онцоллоо.

 

Баян-Өндөр сумын Засаг дарга C.ГАНЦОГТ:
Цогцолборыг дагуулан шинэ ажлын байрууд бий болгоно

     Олон хүний итгэл сэтгэл, дэмжлэгтэйгээр “Ёс заншлын цогцолбор”-ыг бүтээлээ. Өргөөг түшиглэн малын гаралтай түүхий эд боловсруулах 17 үйлдвэрийг цогцоор нь бий болгохыг зорьж байна. Аймаг бүрийн онцлогийг харуулсан гэрүүд байгуулснаар түүх ёс заншлыг хүүхдүүд танин мэдэх боломжтой болох юм. Өргөөг түшиглэн иргэдийн чөлөөт цагийг зөв боловсон өнгөрүүлэх, монгол арга ухаанд суралцах, хүнсний аюулгүй байдлаа хангах чиглэлд орон нутгаас анхааран ажиллах болно. Хувь хүмүүс ч оролцоо дэмжлэг үзүүлж байгаад баяртай байна. ХХҮГ, аймгийн цагдаа, хүчний байгууллагууд хамтран оролцлоо. Цогцолборыг дагуулан шинэ ажлын байрууд бий болгоно. Малын махаа зөв эрхлэх, цагаан идээгээ амьдрал ахуйдаа өргөн хэрэглэхээс эхлээд “Эко Баян-Өндөр” төслийн бүтээгдэхүүнийг иргэддээ хүргэж байна. Уг төслийн хүрээнд 2000 тонны хүлэмжийг энэ онд ашиглалтад орууллаа. Өвөл зуны хүлэмж, тоглоомын талбай, нуур цөөрөм үүсгэж амралт чөлөөт цагийн талбайг бий болгох чиглэлээр цаашид хийж хэрэгжүүлэх олон ажил төлөвлөсөн.

Эко хүнс хөх арвайн гурил

     Говь-Алтай аймгийн Чандмань сум буюу Орхон аймгаас 1000 км-ийн хол газраас хөх арвайн гурил тээвэрлэж, түүнийгээ Эрдэнэтийн брэнд бүтээгдэхүүн болгохоор ажиллаж яваа нэгэн гэр бүлтэй танилцлаа. Арвайн гурилыг шээс задгайрсан хүүхдэд шар тостой багсарч өгөхөд бие нь чангарч, эрүүл мэндийн хувьд эрс сайжирдаг хэмээн хуучилсан Н.Дадийхүү эгч өвөг дээдсээс уламжилсан чулуун тээрмийн аргаар гурилаа боловсруулж, үр хүүхдүүддээ өвлүүлэн заажээ. Худалдаанд шинэхэн савлагаатай гарсан энэ гурил “Эко Баян-Өндөр” шошгоор бусдаасаа ялгарч байна. Арвайг боловсруулж, эцсийн бүтээгдэхүүн гаргах нь гар ажиллагаа ихтэй тул өдөрт 800 гр гурил үйлдвэрлэж, кг-ийг нь 12 мянган төгрөгөөр зардаг тухай тэрээр нэмж хэллээ. Тариагаа худалдан авч нөөцлөөд үйлдвэрлэлээ нэмэгдүүлнэ гэдэгтээ тэд итгэлтэй байна.

Монгол борц үйлдвэрлэл

     Монголчууд хэдэн зууны тэртээгээс махаа борц болгон хатааж, хүнс хоолондоо улирал харгалзалгүй хэрэглэсээр ирсэн. Тиймээс ч үр хүүхдүүддээ зайлшгүй таниулах зүйлсийн нэг нь борц юм. Үхрийн шийр толгой, мах шуузлах болон борцлох арга, ажиллагааны талаар мэдээлэл хүргэж, өнөө үед бизнес хэлбэрээр ашиглах шинэ санааг Баян-Өндөр сумын баг хариуцсан мэргэжилтэн С.Сэрээтэрдорж танилцууллаа. Тэрээр “Хөдөөгийн залуучууд ажилгүй байна гэж ярих юм. Борцыг нүдэж нунтаглаад, шахаад савлачихвал шинэ бизнес санаа шүү дээ” хэмээн тайлбарлаа.

И.Чинтогтох

Фото: Ш.Лхамсүрэн

     “Хурд”-ынхан Монгол орноо тойрон аялан тоглолт хийхийг хүсжээ. Ингэхдээ зүгээр нэг тоглолт хийгээд буцахыг урьтал болгосонгүй. Тэд иргэдтэй уулзаж, санаа бодлыг нь сонсож, хамтдаа ярилцаж, урмын үг, ухаарал бэлэглэхээр “Хайртай” төслийг санаачлан ажил хэрэг болгосоор 19 дэх аймагтаа айлчлан ирсэн юм. Энэ бол Эрдэнэт байлаа. Төслийн багийнхан Эрдэнэтчүүдтэй халуун дотно уулзалт, яриа өрнүүлж, хэд хэдэн нэвтрүүлгийн зураг авалт хийсэн нь олны сонирхлыг ихэд татсан юм. 60-аад хүний баг бүрэлдэхүүнтэй уг төслийг улс төрөөс ангид ойлгохыг хамтлагийнхан хүссэн. Учир нь тэд урлагаар дамжуулан соён гэгээрлийг түгээх, түүн дундаа түүчээлэн оролцохыг илүүд үзжээ. Монгол Улсын Ерөнхий сайд У.Хүрэлсүх энэхүү санаачилгыг дэмжсэнээр өнгөрсөн зургаадугаар сарын 22-ноос төслийг бодит ажил болгох эхлэл тавигдсан байна. Тоглолт, уулзалт, нэвтрүүлгийн зураг авалтыг 25 газарт зохион байгуулахаар төлөвлөжээ. Нэвтрүүлгүүдээ өөр өөр сэдвээр, уулзалт бүрийг чиглэсэн зорилгын хүрээнд хийсэн нь өвөрмөц байлаа.

     Эх орон, эрчүүд, ээж аав, цэрэг эрсийн тухай гээд сүр хүчний омогшил бадраасан олон арван дуугаараа 25 жилийн турш Монголчуудын сэтгэл зүрхэнд дүрэлзсэн “Хурд” хамтлагийнхан Цагдаагийн Ерөнхий газар, “Монгол цэргийн холбоо”, “Та Монгол ээж” ТББ-ыг эгнээндээ нэгтгэн, дуучин Б.Баярцэцэг, “Voice”-ийн шилдгүүдээр багаа бүрдүүлсэн байв. “Та Монгол ээж” сургалт, “Хөвгүүдийн яриа”, “Эр хүний ноён нуруу” уулзалт зохион байгуулсан төслийн багийнхан Эрдэнэт үйлдвэрийн ил уурхайтай танилцан, ажилчдын хоолны газраар зочилж, аварга том уулын техник болох БелАЗ-ыг үзэж сонирхон, орон нутгийн онцлогийг тусгасан тусгай нэвтрүүлгийн зураг авалтаа хийсэн юм. Дэргэдээ байгаа бүхнийг хайрлан хамгаалж, бусдад хайр түгээхийн гайхамшгийг мэдэрч, мэдрүүлж яваа “Хурд” хамтлагийн уран бүтээлчид болоод төслийн багийн зарим төлөөллийн сэтгэгдлээс хуваалцлаа.

Хамтлагийн гишүүн Д.ГАНБАЯР:Түүх, соёлоо мартахгүй байхын төлөө хичээцгээе

     Нар хур тэгширсэн сайхан үеэр Эрдэнэт хотод ирлээ. Соён гэгээрлийн энэхүү аяныхаа хүрээнд нэгнээ гэсэн амьд харилцаа бий болгохыг зорьж байна. Бидэнд хайр, хүндэтгэл дутаад байгаагаас нийгэм ороо бусгаа байна уу даа гэж бодогддог. Очсон газар бүр өөрийн онцлог, бахархах зүйлтэй байна. Тэр дундаа Дорнод аймгийн Халх гол сум, Ховд, Баян-Өлгий аймгууд гүн сэтгэгдэл үлдээлээ. Манайхан хүн бүртэй уулзаж, санаа бодлыг нь сонсож ярилцсан. Өнөө цагт Монгол эрчүүдийн ноён нуруу гундаж, бүсгүйчүүдийн нуруун дээр амьдралын их ачаа буугаад байх шиг санагдах юм. Ийм байгаагүй шүү дээ. Эрчүүд, залуучуудын нуруун дээр л Монгол минь оршин тогтноно. Түүх, соёлоо мартахгүй байхын төлөө хичээцгээе. Бид сэрэх цаг болсон. 1950, 1960-аад онд нийгмийг хэрхэн соён гэгээрүүлэх вэ гэдэг дээр олон сайхан кино бүтээсэн байдаг. Үйл явдал нь хүмүүст сэтгэлийн гэгээрлийг өгч байсан хэрэг л дээ.

 

Хамтлагийн ахлагч Д.ОТГОНБАЯР: Бид эх орны эр хүн байх ёстой

     Би урлагийн тайзнаа хөл тавиад 44 жил тоглож байна. Анх 1975 онд Эрдэнэт үйлдвэрийн нээлтэд оролцож, хөгжим тоглохоор ирж байлаа. Тухайн үед гурван шар тоосгон барилгаас өөр зүйл байгаагүй. Дараа нь 1984 онд барилгын цэргийн 110 дугаар ангид алба хаахаар ирж, “Барилгачин дайчин” нэртэй хамтлаг байгуулан, орон нутгийн сонин дээр гарч байлаа. Цэрэг байхдаа Эрдэнэтийн Дулааны цахилгаан станцын үүдний хэсэгт нь шавар зуурч, бүтээн байгуулалтын ажилд гар бие оролцсон байдаг юм. Хүн хийсэн бүтээснээ эргэж харахыг хүсдэг бололтой. Ямартаа ч Эрдэнэт хотын хөгжлийн нэгээхэн хэсэгт гар бие оролцож явсандаа баярладаг. Бид эх орны эр хүн байх ёстой. Эрчүүд минь элгээрээ хэвтээд өгвөл эх орон газар хэвтэхтэй ижил болно шүү дээ.

Орхон аймгийн Засаг дарга Д.БАТЛУТ: Бидний чиг хараа нэг шугам дээр байна

      Хайр гэдэг зүйл өнөөгийн нийгэмд асар их үгүйлэгдэж байна. Энэ цаг үед “Хайртай” төслийнхөн эх орон, газар, шороо, аав ээжээ хайрлаж, түүх, соёлоо дээдлэх тал дээр асар их ач холбогдол өгч байгаад баярлалаа. Нийгмийг соён гэгээрүүлэх ажил бол хамгийн чухал зүйл. Бид орон нутгийн бодлого шийдвэрийг хүний хөгжилд чиглүүлэн ажиллаж байна. Хувь хүний хөгжлөөс нийгмийн өнгө төрх тод томруун тодорхойлогдох учир бүтээн байгуулалт, барилга байшингаас илүү хүний хөгжил рүү чиглэсэн ажлуудыг зохион байгуулах ёстой гэж үзсэн. Бидний алхаа, чиг хараа нэг шугам дээр зогсож байгаад баяртай байна. Нийгмийг соён гэгээрүүлэх ажилд хэзээд бэлэн гэдгээ илэрхийлье.

ЦЕГ-ын Хүүхдийн гэмт хэргээс урьдчилан сэргийлэх тасгийн дарга, Цагдаагийн хошууч Д.БУДЗААН: Гэмт хэргийн гаралтаас хамтдаа сэргийлье

     Дэлхийн улс орнуудтай харьцуулахад Монгол улс хөгжлөөрөө бус, гэмт хэргийн гаралтаар 20 дугаарт жагсаж, жилдээ 36 мянган гэмт хэрэг манай улсад бүртгэгдэж байна. Гэмт хэргээс урьдчилан сэргийлэх зорилгоор Цагдаагийн Ерөнхий газраас санаачлан “Яараад яахав дээ”, “Unfriend”, “Зөв тусгал”, “Нэг хором” аян хэрэгжүүлснээр гаралт 60 орчим хувиар буурсан. Энэ бүхнээс хүлээж байгаа ганц зүйл бол соёл юм. Гэмт хэргийн гаралтаас хамтдаа сэргийлснээр та, бид амар тайван нийгэмд амьдарна. Тиймээс мөрөөдлөө биелүүлсэн эрчүүд, мөрөөдлөө биелүүлж яваа залуустаа амжилт хүсье.

Орхон аймгийн Засаг даргын орлогч А.ТҮВШИНЖАРГАЛ: Төслийн багийнханд уран бүтээлийн амжилт хүсье

     Эрдмийн баяр тохиож байгаатай холбогдуулан “Хурд” хамтлагийн уран бүтээлчид маань Орхон аймгийн нэгдүгээр сургууль дээр очиж ая дуугаа өргөлөө. Соёл урлагийн цогцолборт Цагдаагийн газар, Онцгой байдлын газар, Цэргийн анги, Тагнуулын газар, Шүүхийн шийдвэр гүйцэтгэх газар зэрэг тусгайлсан чиг үүрэг бүхий байгууллагын мөрдэстэй алба хаагчидтай уулзан, эр хүний жудаг, ноён нуруу, амьдралаа авч явах үзэл бодол Монгол Улсад үгүйлэгдэж байгаа талаар ярилцсан. Мөн Монгол Улсын Хөдөлмөрийн баатар Б.Батбаяр, Монгол Улсын гавьяат багш М.Жавхлантуяа болон “Хайртай” төслийнхөн хөвгүүдэд зориулан ирээдүйд аав байх, эх орноо жолоодох арга ухааны талаар үзэл бодлоо хуваалцан, үнэтэй зөвлөгөө өглөө. А.Амарын талбайд “Эх орны төлөө” тоглолтоор Эрдэнэтчүүддээ бэлэг барих энэ бүх үйл ажиллагаанд “Эрдэнэт үйлдвэр” ТӨҮГ-ын удирдлагууд ихээхэн дэмжлэг үзүүлж, Орхон аймгийн Засаг даргын Тамгын газар, хэвлэл мэдээллийн байгууллагууд хамтран ажиллалаа. Орхон аймаг хүний хөгжлийн индексээр улсдаа тэргүүлэгч гэдгийг улс даяар сурталчлан таниулах ажилд хамтран оролцсон та бүхэндээ баярлалаа. Төслийн багийнханд уран бүтээлийн амжилт хүсье.

 

И.Чинтогтох

Фото: Ш.Лхамсүрэн

     Эрдэнэт үйлдвэрийн үйлдвэрлэлийн төлөвлөгөөний оны эхний 8 сар болон өнгөрсөн 8 дугаар сарын дүн гарсан байна. Тус үйлдвэрийн уурхайчид оны эхнээс өнөөдрийг хүртэл 17 мянган метр куб уулын цул гаргаж, төлөвлөгөөг 103.7 хувиар, 7136.4 мянган метр куб хөрс хуулж, төлөвлөгөөг 104.2 хувиар тус тус биелүүлжээ. Энэ хугацаанд 25152 мянган тонн хүдэр олборлож, төлөвлөгөөг 103.4 хувиар, 21725 мянган тонн хүдэр Баяжуулах үйлдвэрт өгч, үйлдвэрлэлийн төлөвлөгөөг 102.5 хувиар биелүүлсэн дүнтэй байна.

     Баяжуулагчид оны эхний 8 сард 21745 мянган тонн хүдэр боловсруулснаар төлөвлөгөө 102.6 хувиар биелжээ. Хүдэр дэх зэсийн агуулга 100 хувь, молибдены агуулга 102.4 хувийн биелэлттэй гарсан бол зэсийн металл авалт 100 хувь, молибдены металл авалт 101.1 хувиар биелсэн дүнтэй байна. Баяжмал дахь зэсийн  агууламж 89184 тонн буюу 102.8 хувь, молибдены агууламж 1681 тонн буюу  106.2 хувиар биелсэн үзүүлэлттэй гарчээ. Эхний 8 сард ачигдсан зэсийн баяжмалын чанар 22.62 хувь, молибдены баяжмалын чанар 50.32 хувь байж, төлөвлөгөө 100.2-104.8 хувиар биелсэн байна. Дээрх гүйцэтгэлээс харахад Эрдэнэт үйлдвэрийн уурхайчид 2019 оны эхний 8 сарын үйлдвэрлэлийн төлөвлөгөөг бүх үзүүлэлтээр 100-аас дээш хувиар биелүүлэн ажиллажээ.

    Өнгөрсөн 8 дугаар сарын дүнгээр уурхайчид 2192 мянган метр куб уулын цул гаргаж, 933.37 мянган метр куб хөрс хуулалтын ажил гүйцэтгэсэн байна. Ингэснээр уулын цул гаргалтын төлөвлөгөө 104.4 хувиар, хөрс хуулалтын төлөвлөгөө 107.1 хувиар биелэв. Ил уурхайнхан 3209.52 мянган тонн  хүдэр олборлож, 2818 мянган тонн хүдэр Баяжуулах үйлдвэрт нийлүүлжээ. Эдгээр үзүүлэлтийн төлөвлөгөө 102.4-102.7 хувийн биелэлттэй байгаа бол баяжуулагчид энэ сард 2813 мянган тонн хүдэр боловсруулж, 102.6 хувиар төлөвлөгөөгөө биелүүлсэн байна. Өнгөрсөн 8 дугаар сард ачигдсан зэсийн баяжмалын чанар 22.39 хувь буюу 100.2 хувиар, молибдены баяжмалын чанар 50.21 хувь буюу 104.6 хувиар тус тус биелсэн үзүүлэлттэй байна. 

М.Балжинням

Дөчин таван жилийн түүхэн замналтай, “Эрдэнэт үйлдвэр” ТӨҮГ-ын дэргэдэх, ШУТИС-ийн харьяа, Ш.Отгонбилэгийн нэрэмжит Технологийн сургуулийн 2019-2020 оны хичээлийн шинэ жилийн нээлт өнөөдөр боллоо.

   Хичээлийн шинэ жилийн үйл ажиллагааг нээж, Технологийн сургуулийн захирал, доктор Д.Зоригтхүү хэлсэн үгэндээ “Бид олон улсын Чанарын менежментийн тогтолцоо ISO 9001 стандартыг хэрэгжүүлж буйг баталгаажуулсан гэрчилгээ гардан авсан Монгол Улсын цөөн сургуулийн нэгээр шинэ хичээлийн жилийг эхлүүлж байгаа. Энэ бол бахархал бөгөөд стандартын хэрэгжилтийг үргэлжлүүлэн бүрэн дүүрэн хангах томоохон хариуцлага энэ жилд ирж байна. Мөн Боловсролын магадлан итгэмжлэлийн үндэсний зөвлөлөөр гурав дахь удаагаа магадлан итгэмжлүүлж, гэрчилгээгээ авна. Өөрсдийн бэлтгэсэн  үр дүнд суурилсан гурван хөтөлбөрийг ШУТИС-ийн Эрдмийн зөвлөлөөр батлуулан, бүрэн хэрэгжүүлж эхлэхэд бэлтгэх, Ахлах сургуульдаа олон улсын Кембриджийн хөтөлбөрийг нэвтрүүлэх бэлтгэл ажлыг хангах гээд олон хариуцлагатай үүрэг, сорилт биднийг хүлээж байна” гэж шинэ хичээлийн жилийнхээ онцлог зорилтоос дурдсан юм. Тус сургуулийн хичээлийн жилийн нээлтийн ажиллагаанд Орхон аймгийн Засаг даргын тамгын газрын дарга Д.Соёлчхүү, Баян-Өндөр сумын Засаг дарга Д.Ганцогт, “Эрдэнэт үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер Т.Батмөнх болон тус сургуулийн Эрдмийн зөвлөлийн гишүүд, хамтран ажиллагч байгууллагуудын төлөөлөл, багш, ажилтан, оюутнууд оролцлоо. Энэ үеэр Орхон аймгийн Засаг дарга бөгөөд Эрдэнэт хотын захирагч, Технологийн сургуулийн төгсөгч Д.Батлут баярын мэндчилгээ илгээснийг ЗДТГ-ын дарга Д.Соёлчхүү танилцуулсан бол “Эрдэнэт үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер Т.Батмөнх уул уурхайн салбарын мэргэжилтэн бэлтгэдэг тэргүүлэгч сургуулийн нэг Технологийн сургуулийн хамт олонд баяр хүргэж, амжилт хүслээ.

   Энэ удаагийн нээлтийн ажиллагаанд Монгол Улсын далбаа болон Эрдэнэт үйлдвэр, Технологийн сургуулийн сүлд тугийг “Оюутан цэрэг” хөтөлбөрт хамрагдсан тус сургуулийн 2 дугаар ангийн оюутнууд хүндэтгэлтэйгээр залж, хичээлийн байрны төв хаалганы дээд талд байрлуулсан нь шинэлэг байв. 2019-2020 оны хичээлийн шинэ жилд тус сургуулийн 10 оюутан, ахлах сургуулийн 1 сурагч “Эрдэнэт үйлдвэр” ТӨҮГ-ын нэрэмжит тэтгэлэгт хамрагдан, сургалтын төлбөрийн 60 хувийн хөнгөлөлттэй суралцана. Тэдэнд хөнгөлөлттэй суралцах эрхийн батламжийг энэ үеэр гардуулсан. Мөн “Монгол 21” сан, Капитрон банк, Япон Улсын Засгийн Газрын Sakura Scince – A  хөтөлбөр, Технологийн сургуулийн Төгсөгчдийн холбооны тэтгэлгээр суралцах батламжийг 8 оюутан гардан авлаа.  

   Технологийн сургуульд шинэ  хичээлийн жилд бакалаврын 4 хөтөлбөрт 61 оюутан шинээр элссэнээр 7 хөтөлбөрт өдрийн ангид 415, эчнээ ангид 86 оюутан нийт 501 оюутан суралцана. Мөн магистрын 10 хөтөлбөрт 80 оюутан, ахлах сургуулийн 10, 11, 12-р ангид 84 сурагч суралцахаар болсон бол Мэргэжлийн анхан шатны боловсрол олгох 1 жилийн 3 мэргэжлийн сургалтад 30, мэргэжил олгох түр сургалтад 9 мэргэжлээр 70 суралцагч тус тус элссэн байна.

М.Балжинням

Мэдээний төрөл

Календарь

« 9-р сар 2019 »
Да Мя Лх Пү Ба Бя Ня
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Зургийн цомог