• С.БУЛГАНТАМИР: “Эрдэнэт үйлдвэр” Волейболын дээд лигийг өндөр хэмжээнд зохион байгуулж буйд тамирчид талархалтай хандаж байна

        Монголын волейболын холбооны дээд лигийн аварга шалгаруулах тэмцээн медалийн төлөөх өрсөлдөөнөөр нийслэл Улаанбаатар хотноо үргэлжилж байна. Медалийн төлөөх цуврал тоглолтуудын үеэр “Энагурэ” клубын 3 дахь үеийн  тамирчид багтаа 3 дахь аварга цолыг авчирлаа. Шигшээ цувралд 3 дарааллан хожиж лигийн аваргаар шалгарч, алтан медалийн болзол хангалаа. Энэ үеэр “Энагурэ” багийн ахлагч, спортын мастер С.Булгантамиртай цөөн хором ярилцлаа.        -Дээд лигийн аварга болсонд баяр хүргэе! Тэмцээний талаар сэтгэгдлээсээ хуваалцаач?       -Миний хувьд энэ спортоор хичээллээд 7 жил болж байна. Монголын волейболын дээд лигийн хувьд  маш өндөр зохион байгуулалттай болж байгаад талархалтай байна. Эрдэнэт хотруу яваад 3 тойргийн турш  тойргийн нийлбэр дүнгээ гаргасан. Тоглолт бүр хариуцлагатай байлаа.      -Хобби эйс багтай алтын төлөө учраа таарч амжилттай тоглож алтан медалийн эзэд болж байна.Танай багийн давуу тал, тоглолтын тактик юу байсан бэ?     -Ер нь өрсөлдөгч багийн хувьд насны хувьд, довтдогчид, онооны хувьд  тэнцүүхэн байлаа. Манай багийн давуу тал бол хаалт сайн байсан гэж хэлж болно.     -“Энагурэ” багийн онцлог юу вэ? Багийн гишүүдийнхээ тухай яриач?     -Манай багийн онцлог гэвэл тамирчдын хувьд нас бага залуу. Тэгэхээр энэ баг бүрэлдэхүүнээрээ  олон жил гар нийлж тоглох боломжтой гэж харж байна. Энэ бол бидний давуу тал.     -Дээд лигийн хувьд олон жил тасарсан тэмцээнийг сэргээж зохион байгуулж байгаа гэдгээрээ үзэгч, сонирхогчдод өндөр хүлээлт үүссэн байна. Бусад тэмцээнээс ялгарах онцлогийг тамирчид  та бүхэн хэрхэн дүгнэж байна?     -Тамирчид их өндөр сэтгэгдэлтэй байгаа. Ялангуяа Эрдэнэт хотод очиж тоглоход эхнээсээ дуусах хүртэлх бүх үйл ажиллагааг маш өндөр түвшинд зохион байгуулсан. Азийн наадам, олон улсын тэмцээнд ирсэн юм шиг сэтгэгдэл төрж байлаа. Эрдэнэтийн багийн хувьд “Хобби эйс” багтай хүч тэнцүү 5 ээлжийн тоглолтыг сонирхуулсан нь үзэгчдэд  таалагдсан гэдэгт итгэлтэй байна. Энэ дашрамд Эрдэнэт үйлдвэрийн хамт олон, Эрдэнэтчүүддээ талархлаа илэрхийлье!     -Бусад баг тамирчиддаа хандаж юу гэж хэлэх вэ?    -2019 оны волейболын дээд лиг маш сайхан зохион байгуулагдаж байна.Нийт үзэгчид, зохион байгуулагчиддаа баярлалааа.                         Э.Мөнх-Уянга Фото. Б.Баттөгс     Дэлгэрэнгүй...
  • Эрдэнэт үйлдвэртээ баярлалаа #2

      Аж ахуй, үйлчилгээний цехийн Хими цэвэрлэгээний машинист Ц.ГЭРЭЛМАА “Энэ уулын буянд бид сайн сайхан амьдарч, хойч ирээдүйнхээ төлөө хөдөлмөрлөж, өөрсдийн аз жаргал, ирээдүйг бүтээж яваа шүү” гэж өглөө бүр Эрдэнэт уулаа сэтгэлдээ бодож сэрдэг дээ. Үйлдвэрээрээ бахархаж байна. Хүн ер нь сэтгэлийн үгээ хэлэх боломж тэр бүр гардаггүй бололтой. Эрдэнэт үйлдвэрийг бүтээн цогцлооход гар бие оролцсон үе үеийн уурхайчиддаа талархаж явдгаа энэ дашрамд илэрхийлье. Би Эрдэнэт үйлдвэрт 33 жил ажиллахдаа 17 жилийг нь энэ хамт олонтойгоо үдэж байна. Ээж шиг, эгч шиг нь байж, найз нөхөд болж ээнэгшин дассан хамт олондоо хайртай. Та бүхнийхээ хүчинд өдий зэрэгтэй яваа юм шүү. Тэтгэврийн нас ойртох тусам сэтгэлд нэг зүйл тороод ч байх шиг. Хамт олноо их санах байх. Эрдэнэтийн уурхайчдын сүлд дуу “Уурхайчин би”-г амандаа аялж, автобусны цуваагаа хараад огшиж суудаг би жирийн л нэг уурхайчин. Үйлдвэрийнхээ удирдлагууд, нийт уурхайчиддаа, тэдний үр хүүхэд, ач зээ нар, гэр бүлд сайн сайхныг хүсье.   Засвар механикийн заводын Уул уурхайн хүнд механизм, тоног төхөөрөмжийн засварчин С.БАТЗОРИГ Монгол улсдаа төдийгүй дэлхийд үнэлэгдсэн, ТОП 10 үйлдвэрийн нэг болох уулын баяжуулах Эрдэнэт үйлдвэрт 15 дахь жилдээ ажиллаж байгаадаа баяртай байна. Үйлдвэрийн газраас тоног төхөөрөмжийн шинэчлэл хийж, орчин үеийн уул уурхайн хөгжилтэй хөл нийлүүлэхийн зэрэгцээ ажилчдаа мэргэжлийн талбар дээр мэргэших, хөгжихөд ихээхэн анхаарч байгаа нь сайшаалтай юм. Би мэргэжлийнхээ дагуу ур чадвараа нэмэгдүүлэн, цаашдаа улам хичээж ажиллах болно. Хамт олондоо халуун баяр хүргэе.   Тээвэр ложистикийн төвийн Бүтээмж, инновацын мэргэжилтэн З.БАТЦЭНГЭЛ 1978 онд илгээлтээр Эрдэнэт хотод ирэх шийдвэр гаргасан аав, ээждээ маш их баярлалаа. Өнөөдөр би аав, ээжийнхээ үргэлжлэл болж, хүүтэйгээ мөр зэрэгцэн үйлдвэртээ ажиллаж байна. Бид удам дамжсан уурхайчид. Тийм ч учраас үйлдвэртээ маш их хайртай. Аав ээж минь, “Бор ууландаа залбирч яваарай” гэж захидаг. Бор ууландаа, Эрдэнэт үйлдвэртээ маш их баярлалаа.   Дулааны цахилгаан станцын Лабораторийн эрхлэгч Д.ТӨГСБАЯР Би Эрдэнэт үйлдвэрт 19 жил ажиллахдаа өдий дайны ажилтай, мэдлэг мэргэжилтэй болсондоо баярлаж явдаг. Хүн бүр үйлдвэрийнхээ хөгжилд хувь нэмэр оруулах ёстой гэж би хувьдаа боддог. Миний чадах зүйл бол эргэн тойрондоо зөв хандлага түгээх юм. Ер нь зөв хандлагатай, эргэн тойрны уур амьсгал эерэг байвал бүх ажил бүтэмжтэй байна гэдэгт итгэдэг. Та бүхэндээ үйлдвэрийнхээ ойн мэндийг хүргэж, бүгдээрээ эерэг хандлага түгээе гэж уриалмаар байна. И.Чинтогтох Фото: Б.Баттөгс   Дэлгэрэнгүй...
  • Монголын волейболын холбооны дээд лигийн аварга шалгаруулах тэмцээнд “Дархан сеть” эмэгтэй баг хүрэл медалийн болзол хангалаа

         Монголын волейболын холбооноос анхдугаар лигийн тэмцээнийг 1995 онд зохион байгуулж эхэлсэн түүхтэй. Харин эмэгтэйчүүдийн лигийг 1997 оноос эхлүүлэн зохион байгуулж эхэлжээ. Ийнхүү 2011 он хүртэл 17 удаа лиг зохион байгуулаад найман жил завсардсан юм. Тэр хугацаанд МВХ-ны цомын аварга шалгаруулах тэмцээн нь лигийг орлож байжээ. Энэ жил Волейболын холбооны удирдах зөвлөлийн бүрэлдэхүүн өөрчлөгдсөнтэй холбогдуулан дээд лигийн тоглолтыг сэргээн зохион байгуулж “Эрдэнэт үйлдвэр” ТӨҮГ хамтран зохион байгуулах болсон. Дээд лигт эрэгтэй долоо, эмэгтэй найман баг өрсөлдөж, эмэгтэй багаас “Уурхайчин” багт ОХУ-ын нэг тоглогч ирсэн бол эрэгтэй бүх багт гаднаас тоглогч ирсэн. Лигийн тэмцээнд багууд гурван тойрог өрсөлдөж, нийт 108 тоглолтын дараа медалийн төлөө өрсөлдөх багууд тодроод байна. Медалийн эздийг цуврал тоглолтоос тодруулах бөгөөд түрүүлж гурав хожсон нь ялна. Шигшээ тоглолтууд энэ сарын 8-ныг хүртэл үргэлжлэх бөгөөд “MNB Sport” суваг шууд дамжуулан үзүүлж байна. Монголын волейболын холбооны үндэсний дээд лигийн аварга шалгаруулах тэмцээнд эрэгтэй 82, эмэгтэй 74 нийт 156 тамирчин хурд хүчээ сорьсноос 70 гаруй хувь нь анх удаа лигт тоглож байна. Ихэнх тамирчны анхны лиг учраас нас, туршлага ойролцоо, өрсөлдөөн тэнцүү байгаа нь тэмцээнийг сонирхолтой болгож байна. Волейболын лигийн нэг онцлог нь “Play-Off” буюу хасагдах шатны тоглолт гэж байдаггүй. Шууд медалийн төлөөх тоглолтуудаар үргэлжилдэг. Өнөөдрийн эхний тоглолт “Дархан сеть”, “Тэнүүн-Огоо” багийн ширүүн өрсөлдөөнөөр эхэлж 3:2-ийн харьцаатайгаар “Дархан сеть” багийн эмэгтэй тамирчид  хүрэл медалийн болзол хангалаа.                        Э.Мөнх-Уянга Фото: Б.Баттөгс   Дэлгэрэнгүй...
  • Төрийн албан хаагчид тангараг өргөлөө

       Монгол Улсын төрийн жинхэнэ албан хаагчид өнөөдөр Орхон аймгийн ЗДТГ-т тангараг өргөв. “Эрдэнэт хотын өдөр” болон “Анхдагч, илгээлтийн эздийн өдөр”-ийг тохиолдуулан Төрийн албаны Орхон аймаг дахь салбар зөвлөл тус үйл ажиллагааг зохион байгууллаа. Орхон аймгийн ИТХ-ын ажлын алба, Хүнс, хөдөө аж ахуйн газар, Татварын хэлтэс, Хөдөлмөр, халамж үйлчилгээний газар, Жаргалант сумын ЗДТГ-ын 13 албан хаагч ёслолд оролцон төрийн жинхэнэ албан хаагчийн тангараг өргөлөө. Орхон аймаг, Эрдэнэт хотын 100 гаруй мянган хүн амд үйлчлэх төрийн захиргааны алба тэднээр бүл нэмж, 400 орчим болж байна.     У.Цэрэнбат           Дэлгэрэнгүй...
  • Өглөөний сэргээш: Ганболдын БОЛДХУЯГ

    Төгссөн сургууль: Ш.Отгонбилэгийн нэрэмжит Технологийн сургуулийг 2005-2006 онд Түгээмэл баяжуулагч мэргэжлээр төгссөн.   Мэргэжил: Тээрмийн машинч   Ажилласан туршлага: 2007 оны 6 дугаар сараас Эрдэнэт үйлдвэрийн Баяжуулах үйлдвэрт баяжуулагч, 2007 оны 10 дугаар сараас одоог хүртэл тээрмийн машинч   Мэргэжил дээшлүүлсэн байдал: 2014-2016 онд “Газарчин” дээд сургуульд Уул уурхайн баяжуулалтын технологич мэргэжлээр суралцсан.   Чин хүсэл: Аливаа ажлыг хийж байгаа хүнд туршлага чухал бөгөөд тэрхүү туршлагыг ажлаасаа олж авсан Г.Болдхуяг үйлдвэрийн өнөөгийн нөөц бололцоонд тулгуурлан хүдэр боловсруулалтыг нэмэгдүүлж, зардал бууруулахын төлөө хүчин чармайлт гарган ажиллаж буй Эрдэнэт үйлдвэрийн манлайлагчдын төлөөлөл билээ. Тэрээр үйлдвэрлэлийн бүтээмжийг дээшлүүлэхэд өөрийн оюун ухаан, хүч чадлаа бүрэн дүүрэн дайчилж, эргээд харахад бүтээсэн зүйлтэй байхыг эрмэлзэн, чин сэтгэлдээ итгэлийн оч бадраан яваа шинийг сэтгэгч залуусын нэг.     -Та өглөөг хэрхэн эхлүүлдэг вэ? Өдөр бүр хэвшил болсон дадал бий юу? -Өглөө бүр аль болох эрт сэрж, орой эрт унтахыг хичээдэг. “Хүн үхэхдээ мөнх унтахаас хойш оршин байх цаг хугацаандаа бага унтаж бай” хэмээсэн Солонгосын нэгэн удирдагчийн үг бий. Хоногийн 24 цагт 6-7 цаг унтах нь хангалттай гэж боддог. Харин ажилдаа гарахаас өмнө өглөөний цайгаа ууж хэвшсэн.    -Таны амьдралын сэргээш юу вэ? -Намайг урам зориг, эрч хүчээр тэтгэдэг эхний зүйл нь миний гэр бүл гэж хэлмээр байна. Эхнэртэйгээ арваад жилийн өмнө гэр бүл болж, хоёр хөөрхөн хүүтэй болсон. Тэд бол миний амьдралын хамгийн том хөрөнгө. Харин хоёр дахь сэргээшийг ажлын хамт олноо гэж боддог. Өчигдрөөс өнөөдөрт хүрэх замд тэд хамгийн их түшиг тулгуур болж, хийж бүтээх урам өгсөөр ирсэн.   -Таны эзэмшсэн ажил, мэргэжлийн онцлог юу вэ? -Манай хэсгийнхэн их онцлог ажилтай. Баяжуулах үйлдвэрийн Бутлан тээвэрлэх хэсгээс ирж байгаа хүдрийг нунтаглаж, баяжуулаад зэс, молибденыг ялган, Шүүн хатаах хэсэг рүү дамжуулдаг. Энэ утгаараа хамгийн гол хэсэг ч гэж нэрлэж болох юм. Миний хариуцсан ажлын хувьд ашигтай эрдсийг хоосон чулуулгаас бүрэн салгаж, нунтаглаж өгөх үүрэгтэй. Манай хэсэгт нэгдүгээр шатны 9, хоёрдугаар шатны 13 тээрэм ажиллаж, хүдрийг хоёр дамжлагаар нунтагладаг. Ингэхдээ нэг тээрмийн хүдрийн дундаж ачаалал 289 тонн/цаг гэж бодвол 9 тээрэм цагт 2500-2700 тонн хүдэр нунтагладаг гэсэн үг юм. Баяжуулалтад бэлтгэх энэхүү үйл явц нь нийт зардлын 80 орчим хувийг эзэлдэг тул бидний ажил маш өндөр хариуцлагатай. Тээрмийн машинч мэргэжлийн эзэд нь зөвхөн эрчүүд байдаг учраас эзэмшсэн ажил мэргэжлээрээ үнэхээр их бахархдаг. Бэрхшээл олон гардаг ч, багаараа ажилласан цагт тэр бүхний ард төвөггүй гарч чадах итгэл сэтгэл бидэнд бий.    -Ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаарч байна вэ? -Аливаа ажлыг хийхэд тухайн хүний сэтгэл, ажилдаа хандах хандлага маш чухал байдгийг өнгөрсөн хугацаанд ойлгосон. Саяхан Монгол Улсын Ерөнхий Сайдын ивээл дор 1000 инженерийн чуулга уулзалт зохион байгуулж, аж үйлдвэрийн салбарын дөрөвдүгээр хувьсал болох дижитал шилжилтийн талаар ярилцлаа. Миний бие тус хуралд Эрдэнэт үйлдвэрийн инженерүүдтэй мөр зэрэгцэн оролцсон. Үйлдвэр маань зогсолтгүй ажилласаар 41 жилийг үдэж байна. Нэгэн үеийн ахмадууд халаагаа өгч, залуучууд уул уурхайн салбарт хүч түрэн орж ирлээ. Техник технологийн эринд амьдарч байгаа бидэнд цаг үеэсээ  хоцрох эрх байхгүй, харин ч шинэлэг зүйлсээс суралцаж, Эрдэнэт үйлдвэрт ололттой бүхнийг нэвтрүүлэх нь чухал гэж ойлгож байна. Хэлний боловсролоо дээшлүүлж, өөрийн хувь нэмрийг оруулах болно.    -Таны амьдралдаа авч байсан хамгийн сайн зөвлөгөө? -Миний аав ахмад уурхайчин хүн бий. Одоо гавьяаны амралтандаа энх тунх жаргаж, залгамж халааг нь хоёр хүү нь авсан юм. Миний дүү Баяжуулах үйлдвэрийн Өөрөө нунтаглах хэсэгт ажилладаг. Аав биднийг бага байхаас “Ямар ч ажлыг голж болохгүй” гэж сургадаг байж билээ. Би алдарт зохиолч Шекспирийн “Өөрийнхөөрөө байх, итгэсэн хүндээ үнэнчээр зүтгэх, шударга хүнийг хайрлах, ухаантай бага ярьдаг хүнээс суралцах, нийтийн санаа бодолтой зохицох, ямар ч аргагүй болсон нөхцөлд сэлэм зөрүүлэх” гэсэн үгсийг хэлэх дуртай.    -Эрдэнэт үйлдвэрийн үнэ цэнийг та хэрхэн ойлгодог вэ? Түүхэн ойд зориулсан таны сэтгэлийн үг?  -Эрдэнэт үйлдвэрийг дагаж Эрдэнэт хот бий болсон. Жилээс жилд барилга байгууламж нэмэгдэж, хүн амын тоо өссөөр байна. Эрдэнэтийн Овооны ордын батлагдсан нөөцөөр 60 жил ажиллах боломжтой хэдий ч байгалийн баялаг гэдэг зүйл хэзээ нэгэн цагт шавхагддаг нь маргаангүй юм. Тиймээс ирэх 60 жилд Эрдэнэт үйлдвэрийг дагасан олон үйлдвэр бүтээн цогцлоох хэрэгтэй гэж бодож байна. Бид цаашид зэс, молибденыг эцсийн бүтээгдэхүүн болгон хэрэглэгчийн гарт хүргэх бодлого баримтлах хэрэгтэй байх. 41 жилийн тэртээ байгуулагдсан уулын баяжуулах Эрдэнэт үйлдвэрээр овоглосон мянга мянган уурхайчиддаа баярын мэнд дэвшүүлье. Бид цаг хугацаа, цадиг түүхийн үргэлжлэл болон ажиллаж, баялаг бүтээгчдийнхээ суу алдрыг өндөрт өргөж явах болно.   Дэлгэрэнгүй...
  • Эрдэнэт үйлдвэртээ баярлалаа #1

        Тээвэр ложистикийн төвийн 6 дугаар агуулахын нярав М.ЭРДЭНЭБАЯР: Би Эрдэнэт хотын унаган иргэн гэдгээрээ бахархдаг. Энэ хотдоо төрж өссөн. Уурхайчин ах дүү нар олонтой болохоор ч тэр үү, багаасаа уурхайд ажиллана гэж мөрөөддөг байлаа. Мөрөөдлөө биелүүлэхийн тулд ШУТИС-ийн Уул уурхайн удирдлага, менежментийн ангийг 2008 онд төгсөж, 2012 оноос Эрдэнэт үйлдвэрт ажилд орсон. Эрдэнэт хүслийг минь биелүүлсэн өгөөжтэй уурхай.   Засвар угсралтын цехийн душны үйлчлэгч Т.ЭРДЭНЭЧИМЭГ: Би Эрдэнэт үйлдвэрт 23 дахь жилдээ ажиллаж байна. Хүн бүрт хайрлан дээдэлдэг үнэт зүйл гэж бий. Миний хувьд дэлхийд данстай Эрдэнэт үйлдвэрт ажиллаж байгаадаа баярлаж, бахархаж явдаг. Үйлдвэрийнхээ түүхэн өдрийг тохиолдуулан нийт уурхайчид, Засвар угсралтын цехийн хамт олондоо чин сэтгэлийн мэндчилгээ дэвшүүлж, та нартаа эрүүл энх, ажил хөдөлмөрийн өндөр бүтээмжийг хүсэн ерөөе.   ХАБЭА-н хэлтсийн дарга Д.ЦАГААН-ЭРДЭНЭ: Төрөлх хот минь Эрдэнэт, төрөлх үйлдвэр минь Эрдэнэт. Энэ онд 41 жилийн ойгоо тэмдэглэж байгаа хот, үйлдвэртээ хүч хөдөлмөрөө зориулан өнөөдрийг хүрсэндээ баярлаж, талархаж байна. Эрийн цээнд хүрсэн Эрдэнэт үйлдвэрийнхээ хөдөлмөрч, бүтээлч хамт олонд эрүүл энх,саруул сайхныг хүсье. Энэ хотод ажиллаж, амьдрах нь нэр төрийн хэрэг гэж би хувьдаа боддог. Энэ сайхан үйлдвэрт ажилладаг бид хамгийн азтай хүмүүс.   ХМТАЦ-ийн Уул тээврийн ажлын хэсгийн программын инженер Ц.ТУНГАЛАГ: Бүтээлч хамт олондоо баярын мэнд дэвшүүлж, аз жаргал, эрүүл энх, сайн сайхан бүхнийг хүсэн ерөөе. Миний хувьд ил уурхайн карьераас Баяжуулах үйлдвэрт хүдэр өгөх хүртэл үйл явцыг хянаж, системийн программ хангамжийг хариуцан ажиллаж байна. Мэргэжлийнхээ чиглэлээр цаашид Баяжуулах үйлдвэрээс явагддаг үйл явцыг нарийвчлан судалж, нэгдсэн систем бий болгохыг хүсдэг. И.Чинтогтох Фото: Б.Баттөгс Дэлгэрэнгүй...
  • Дэлхийд танигдсан оргил

    Их спортыг дэмжигч Эрдэнэт үйлдвэр       Энгүй уудам ертөнцийн хязгааргүй их зайд  хүмүүн заяаг олж мэндлэн хөрс дэлхийд мөрөө үлдээх хувьтай хүний амьдралын  үүх түүх юутай сонин агаад гайхан бишрэм. Ачтай аавын гэрт эрхэлж өссөн танхилхан охин ард олныхоо хайр хүндлэлийг хүлээсэн алдар цуутай тамирчин болох ерөөл тавилангийн эзэн бол Цээ-Оригийн  Шоовдор. Монголын волейболчид түүнийг андахгүй.     Хүмүүний  бие махбод, бодгалиараа хийж  болох  бүх чадвар, хурд хүч, мэдрэмжийн бахдам сайхныг чухам спорт л мэдрүүлдэг. Тийм л баяр бахдал дүүрэн уран тоглолтуудаар Монголын волейболын спортод өөрийн нэрээ тодоор сийлсэн хүн бол Шоогоо багш. XX зууны спорт сонирхогчид, үзэгчдийн хувьд тэр жинхэнэ од байсан юм. Волейболоор сонирхон хичээллэгч хүүхэд залуусын өдрийн бодол шөнийн зүүд болж байсан үлгэр дуурайлал нь тэр байлаа.  Тэр одоо ч  домог хэвээр. Тэртээ 1950-аад оны дунд үед Эрхүүд сурч байсан оюутнууд хоёр бөмбөг, нэг тор авч ирж, эх орондоо волейбол хэмээх гайхамшигт спортын эхлэлийг тавьсан гэдэг. Тамирчдын бие бялдрыг өсгөлүүн, өлчир чийрэг болгоод зогсохгүй хурд, хүч, авхаалж самбааг жинхэнэ утгаар сорьдог спортын энэ төрөл хувь хүнийг төлөвшүүлдэг гайхалтай спорт. Тэр дундаа бусдыг хүндэтгэн, өөрийгөө ялах ухаанд сургаж,  багаар ажиллах чадварыг  бүрэн утгаар хөгжүүлдэг нь волейболын спортын  бас нэгэн гайхамшиг.      Монгол Улсын гавьяат тамирчин Ц.Шоовдор волейболын үндэсний шигшээ багийн бүрэлдэхүүнд  1958 оноос эхлэн тоглож олон улсын тэмцээнд 21 жил тасралтгүй оролцжээ. Тvvний нэрэмжит волейболын өсвөр үеийн  улсын аварга шалгаруулах тэмцээн олон жил тасралтгүй зохион байгуулж  олон ч аймгийн төвд үзэгчдийн уухай хадааж байсан юм.  Шоогоогийн багийн найз анх санаачлан төрсөн нутаг Өвөрхангай аймагтаа 1990 онд нэрэмжит тэмцээнийг зохион байгуулж байсан түүхтэй.  Ийнхүү волейболын спортод дурлан тэмүүлэх хүүхэд залуусыг хөгжих боломжийг олгож долоон жил тасралтгүй зохион байгуулсан байна.  Дундговь, Баянхонгор, Хэнтий аймгуудад буухиалсан тэмцээнийг тамирчид, дасгалжуулагчид одоо ч дурсан ярьдаг.  Гавьяатын гараар дамжсан 200 гаруй спортын мастер бий. Тэдний 30 гаруй нь олон улсын хэмжээний мастерууд. Спортын зэрэгтэй тамирчид бол хэдэн зуугаар тоологдоно.  “Их спорт хэзээ ч хүнийг ганцаардуулдаггүй юм” хэмээн ярьдаг тэрээр өдгөө шавийнхаа шавь, бас түүний шавьд ч мэдсэн сурснаа харамгүй түгээж буй буянтай багш дасгалжуулагч билээ.   Монгол Улсын гавьяат тамирчин, Олон улсын хэмжээний мастер, Хөдөө аж ахуйн Их сургуулийн  дэд профессор Ц. Шоовдор   гуай 3 дахь үеийн шавь нараараа хүрээлүүлсэн азтан. Урлаг, спортын аль ч төрөл хэлбэрт шавийнхаа шавь, түүний шавьд зааж сургах нь ховор тохиолдол.  Хагас зууны турш спортын талбайд илүүрхсэн түүнийг харахдаа тухайн үеийн спортын гадаад мэргэжилтнүүд “Танай баг зургаан Шоовдортой бол аль ч улсын багийг урдаа гаргахгүй дээ” хэмээн шагшиж байсан гэдэг. Тийм ч болохоор Монголын волейболыг Шоовдоргүйгээр ойлгож үл болно.      Өдгөө 80 насыг шүргэж байгаа Шоогоо МУИС-ийг 1969 онд улаан дипломтой төгсөж, сургуульдаа урилгаар багшилж байлаа. Түүний дараа 1973-2014 он хүртэл ХААИС-д нийгмийн ухааны багшаар ажиллаж, үндсэн ажлын цагаа дуусахаар үргэлжлүүлээд секц хичээллүүлж байж. Үүрийн гэгээнээс үдшийн бүрий хүртэл хичээн зүтгэж, үнэн цагаан сэтгэлээр үргэлж тууштай ажиллаж хөдөлмөрлөсөн хичээнгүй монгол бүсгүй. Түүний спортын амжилтыг үнэлж 1971 онд Монгол Улсын Гавьяат тамирчин хэмээх алдар цолыг хүртээжээ.      Тэр дэлхийд хүлээн зөвшөөрөгдсөн дээлтэй монгол бахархалт охидын нэг. Шоогоо бол дүүлэн нисэх мэт уран, хадаас хатгах мэт хурд хүчтэй тэгш тоглолттой тамирчин. Спортын амжилт гэдэг зөвхөн бие бялдрын  хүч нөөцөөс бус оюуны бяд чадлаас ихээхэн шалтгаалдаг гэдгийг мэдэрдэг. Тийм ч учраас математикийн гүнзгий ангийг сонгон авч волейболын  спортын шинэ залуу тамирчдыг бэлтгэж байсан алсын хараатай удирдагч билээ. Түүний хурд, үсрэлт тухайн үеийн тамирчдаас хол илүү байсан учраас эрэгтэйчүүдийн тоглодог өндөр сеткэнд тоглодог байсныг тухайн үеийн тамирчид дасгалжуулагчид хэлдэг. Ердөө 2-3-хан хормын дотор хаана яаж, хэр хүчтэй, эсвэл эргэлттэй бөмбөгөөр  довтлохыг, эргээд хэрхэн хамгаалахыг  давхар тооцдог учраас сэтгэлгээний хурдыг асар их шаарддаг спорт бол яах аргагүй волейбол. Энэ л спортын нөлөөгөөр эрүүл чийрэг бие бялдартай, ажиллаж хөдөлмөрлөх их эрч хүчтэй байдаг гэдгийг волейболынхон хэлдэг. Тэдний амьдрал ч үүнийг нотолдог.      Улсын шигшээ багийн үндсэн тоглогчоос гадна багийн ахлагч,  дасгалжуулагчаар тасралтгүй олон жил ажилласан тэрээр  Улсын аварга шалгаруулах тэмцээн, Монголын бүх ард түмний спартакиад, олон улсын болон  дэлхийн оюутны Универсад, дэлхийн аварга, Ази тивийн  аварга шалгаруулах тэмцээнд багаа удирдан амжилттай тоглож байлаа. Тэр тэмцээнүүдэд шилдэг тоглогчоор олон удаа шалгарч, энгэр хоосон буцаж байсан түүх үгүй ч гэхэд болно. Ахиц амжилтын түүх бүрийг өгүүлнэ гэвэл хэдэн арван хуудсаар хэмжигдэх нь лавтай.     Тэрээр Биеийн тамир спорт, Хөдөө аж ахуй, Ардын боловсролын тэргүүний ажилтан. Шоогоо гавьяат Монгол Улсад волейболын спорт үүсэж хөгжсөний 80, Монголын волейболын холбоо байгуулагдсаны 50 жилийн ойд зориулж  “Миний амьдралын хагас зуун жил” хэмээх дурсамж  номоо хэвлүүлжээ.  Аав ээжийнхээ гэрт ихэр юм шиг ижилдэн өссөн хоёр охин хоёулаа Шоовдор нэртэй байж.  Магад ямар нэгэн таагүй зүйлсээс цэрвэж  ийн хоёр охиноо нэрийдсэн нь цаанаа нэг учир шалтгаантай байсан ч биз ээ.  Алив муугаас эвийлэн нуусан эрдэнэ шиг  бага Шоовдор  ийн амьдралын түмэн нугачааг сөрж өндийгөөд зогсохгүй их спортын түүхэнд өөрийн хүч нөөц чадлаараа тодорсон жинхэнэ од болж чадсан. Мэдээж амжилт бүрийн ард дандаа алга ташилт, сайн сайхан урам дүүрэн байгаагүй нь лавтай. Тэр атаа хорслын хий мананг хага зүсэн цойлж мандсан нар.  Энгүүхэн яриатай, заримдаа үгнийхээ ард үг дайж шоолонгуйхэн инээх нь багахан шооч хүн гэдгийг илтгэнэ. Түүний сэтгэлийн хат бэлтгэл нь ханасан тамирчны  булчин шөрмөстэй эн тэнцүү болов уу гэмээр бядтай. Дүүлэн нисэх мэт нандин сайхан сэтгэлтэй Шоогоо он цагийн уртад хүнээс хүнд хүрч үргэлжлэх жинхэнэ домог. Түүнийг түүх мэддэг. Б.Учрал Фото: Б.Баттөгс Дэлгэрэнгүй...
  • Эрдэнэт үйлдвэрийн Технологийн сургуулийн төгсөгч “Эр зоригийн одон”-гоор шагнагдахаар боллоо

            Эрдэнэт үйлдвэрийн дэргэдэх Ш.Отгонбилэгийн нэрэмжит Технологийн сургуулийг 2011 онд Цахилгаан систем автоматжуулалтын мэргэжлээр төгсөж, эдүгээ Австрали улсын Мельбурн хотноо Мэдээллийн технологийн чиглэлээр магистрт суралцаж байгаа Т.Чингэсдолоон давхрын тагтнаас үсэрч, амиа хорлохыг завдсаннэгэн эмэгтэйгаварчээ.Т.Чингэс аялах зорилгоор Австралийн Күийнсланд мужид очсон бөгөөдКайрнс хэмээх жижиг хотын"Pасific" нэртэй зочид буудалд байрлаж байх үед буюу арваннэгдүгээр сарын 23-ны өдрийн 16.00-17.00 цагийн орчимд энэ үйл явдал болсон юм. Түүнийгөрөөндөө орж ирэх үедгэнэт хүчтэй юм унах чимээ сонсогдож,  тагт руу гарч харахад долоон давхрын тагтны гадна талд үсрэхэд бэлэн хүн харагдсан байна. Таван давхарт байрлаж байсан учир амийг нь аврахаар тагтаар дамжин,гараас нь барьж амжжээ.Амиа хорлохыг завдсан эмэгтэй 26 настай бөгөөд хар тамхинаас хамааралтай болсны улмаас ийм үйлдэл гаргасанбайна. Т.Чингэс болсон үйл явдлын талаар өөрийн фэйсбүүк хуудаснаа "Амьд явахдаа хүний амь аварна чинээ бодож явсангүй. Хар тамхи гэдэг зүйлээс хол байгаарай. Битгий хайртай нэгнээ нулимсанд автуулаарай. Долоон давхраас үсрэх гэж байсан эмэгтэйг аварч чадлаа” гэж нийтэлжээ.      Т.Чингэсийн эр зориг хүн чанарыг үнэлэн Австралийн Засгийн газраас “Эр зоригийн одон”-гоор шагнах болсон тухайгаа мэдэгдсэн байна. Технологийн сургуулийн  төгсөгч Т.Чингэсдээ хүний алтан амь аварсанд нь баяр хүргэж, цаашдын судалгааны ажилд нь амжилт хүсье.   “Эрдэнэтийн үйлдвэр” ТӨҮГ-ын дэргэдэх Технологийн сургуулийн захиргаа Дэлгэрэнгүй...
  • "Эрдэнэт" үйлдвэр "Росгеологи" компанитай хамтарч гүний хайгуул хийнэ

                 Монгол Улсын Ерөнхий сайд У.Хүрэлсүхийн ОХУ-д хийж байгаа албан ёсны айлчлалын хүрээнд хэд хэдэн чухал баримт бичигт гарын үсэг зурж байгаа билээ. Үүний нэг нь “Геологи, геофизикийн болон инженер-геологийн судалгааны салбарт хамтран ажиллах тухай Монгол Улсын “Эрдэнэт үйлдвэр” ТӨҮГ болон ОХУ-ын “Зарубежгеология” ХН хоорондын гэрээ” ба гэрээнд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, “Росгео” ХН-ийн Удирдлагын дарга, Ерөнхий захирал С.Н.Горьков нар гарын үсэг зурлаа.        Гэрээний талаар “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн дараах тайлбарыг өгсөн юм.        Х.БАДАМСҮРЭН: “Эрдэнэт үйлдвэрийн хувьд “Росгеологи” компанитай геологи хайгуулын чиглэлээр хамтарч ажиллахаар гэрээнд гарын үсэг зурж байна. Энэ бол Эрдэнэтийн овооны ордыг гүнд нь хайгуул хийх, мөн тухайн орчимд хайгуул хийх, ингэхдээ хамгийн орчин үеийн арга аргачлал, техник технологийг нэвтрүүлэх ажил болж байна. "Эрдэнэт" үйлдвэрийн хувьд сүүлийн гурван жилд геологи хайгуулынхаа ажлыг 2016 онтой харьцуулахад хоёроос гурав дахин нэмэгдүүлсэн. Ингэсний үр дүнд үйлдвэрийн насжилтыг 20 жилээр урстасгаж, өнөөдрийн байдлаар цаашдаа 60 жил ажиллах нөөц баялагтай байна. Нөөц баялаг улам их байвал Эрдэнэт үйлдвэрт ч, Монгол Улсад ч үр өгөөжтэй байх учиртай. Уулын баяжуулах үйлдвэрийн оршин тогтнох үндсийн үндэс нь нөөц баялаг. Ийм учраас олон жил Зөвлөлтийн, Оросын геологичидтой хамтарч ажилласан туршлагадаа тулгуурлан шинэ нөхцөл байдалд, шинэ арга барилаар хамтарч ажиллахаар гэрээнд гарын үсэг зурлаа. Ордыг ашиглах нөөц баялаг бол хэмжээтэй. Тиймээс хайгуулын менежмент, байгаль орчны асуудлыг байнга ярьж явах ёстой. Гэхдээ болж өгвөл, аль болох урт удаан хугацаанд үйлдвэрлэлээ ажиллуулах, насжилтыг удаан байлгахын төлөө ажиллах хэрэгтэй. Цаашдаа баяжмал гаргаж байгаа бол боловсруулалтын түвшинг дээшлүүлэх чиглэлд явж байна. Нөгөө талаас уул уурхайн үйлдвэрлэлийн явцад үүсмэл ордууд бий болдог. Ядуу агуулгатай хүдрийн овоолго, хаягдлын аж ахуйд бий болсон орд бол үүсмэл орд. Тиймээс энэ чиглэлээрээ ч бид орос нөхдүүдтэй хамтарч судалгаа шинжилгээ хийнэ”    Дэлгэрэнгүй...
  • “Шударга утас-71600” ажиллаж эхэллээ

           “Эрдэнэт үйлдвэр” ТӨҮГ-ын Захиргаа, хүний нөөцийн бодлогын газар, Хуулийн хэлтсээс “Шударга утас-757 71600” ажиллуулж эхэллээ. “Шударга утас”-ны гол зорилго нь “Эрдэнэт үйлдвэр” ТӨҮГ-ын хэмжээнд шударга бус үйлдэл, авлига, гэмт хэрэг, захиргааны зөрчлийг илрүүлэх, мэдээллийн мөрөөр холбогдох арга хэмжээ авч, хууль бус үйлдэл, гэмт хэргийг таслан зогсоох зорилготой юм. Түүнчлэн Авлигын эсрэг хууль, Эрүүгийн хууль, Зөрчлийн тухай хууль, Гэмт хэргээс урьдчилан сэргийлэх тухай Монгол Улсын хуулиудыг хэрэгжүүлэх юм. Үйлдвэрийн газрын хэмжээнд гэмт хэрэг, зөрчлийн шинжтэй мэдээллийг хуулийн дагуу холбогдох байгууллагуудаар шалгуулж хэрэгжилтэд хяналт тавьж хариуг мэдэгдэх болно.    Эрдэнэт үйлдвэрийн газрын өмч, эд хөрөнгийг хулгайлах, завших, үрэгдүүлэх, устгах, гэмтээх, авлига, албан тушаалын гэмт хэрэг, зөрчлийн талаар үнэн зөв, баталгаатай мэдээлэл өгсөн тохиолдолд мэдээллийн нууцлалыг чандлан хадгалж, мэдээлэл алдагдсанаас хувь хүний албан тушаал нэр төр, алдар хүндэд харш аливаа үйлдэл гарахаас сэргийлнэ. Үндэслэлгүй худал мэдээлэл өгч, бусдын нэр хүндэд халдах, гүтгэх, доромжлох үйлдэл гаргасан тохиолдолд хуульд заасан арга хэмжээ авна гэдгийг анхааруулж байна.     “Шударга утас” нь таны мэдээллийг хадгалан авч, эрх бүхий албан тушаалтанд хүргэх болно.     “Эрдэнэт үйлдвэр” ТӨҮГ-ын үйл ажиллагааг сайжруулах, шударга ёсыг тогтоох, гэмт хэрэг, зөрчлийг таслан зогсоохоор “ШУДАРГА УТАС-71600” таныг сонсож байна. А.Бямбамаа   Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Холбоо барих
Даваа, 13 5-р сар 2019 00:00

Гэр бүлд ээлтэй Эрдэнэт

     Орхон аймгийн Эмэгтэйчүүдийн зөвлөлийн тэргүүлэгчид өнөөдөр хэвлэлийн бага хурал хийв. Жил бүрийн тавдугаар сарын 15-ныг дэлхий нийтээрээ гэр бүл, үр хүүхдийнхээ сайн сайхны төлөө дуу хоолойгоо нэгтгэн тэмдэглэдэг. Дэлхийн гэр бүлийн өдрийг тохиолдуулан Орхон аймгийн Эмэгтэйчүүдийн зөвлөл,  “Эрдэнэт үйлдвэр” ТӨҮГ, Орхон аймгийн ЗДТГ хамтран нийгмийн сайн сайхан, гэр бүлийн аз жаргалын төлөө олон үйл ажиллагаа явуулж байгаа тухай мэдээллээ. Эмэгтэйчүүдийн зөвлөл, Орхон аймгийн ЗДТГ-ын Нийгмийн бодлогын хэлтэстэй хамтран доктор /Ph.D/ Н.Алтанцоожийн “Гэр бүлийн боловсрол олгох” өглөөний цуврал уулзалт зохион байгуулж байгаа бол тавдугаар сарын 11-ний өдөр Эрдэнэтийн гэр бүлүүд “Байгальд ээлтэй гэр бүл болцгооё” уриан дор гэр бүлээрээ мод тарьсан байна.
     Орхон аймгийн 28895 гэр бүлийн төлөөлөл 1000 гэр бүл оролцсон тайван жагсаал энэ сарын 14-нд зохион байгуулагдана. Тэд хүүхдийн хүчирхийллийг зогсоож, тэдний дуу хоолойг нийгэмд хүргэхээр “Аз жаргалтай гэр бүл” чуулган зохион байгуулж, үзэл бодлоо нэгтгэх юм. Мөн Дэлхийн гэр бүлийн өдрийг угтаж өрх толгойлсон 10 эмэгтэйд гал голомтыг нь бадраах, өргөө цагаан гэр олгохоор болсноо өнөөдрийн бага хуралд мэдээллээ.

У.Цэрэнбат






 

     “Эрдэнэт үйлдвэр” ТӨҮГ-ын тавдугаар сарын эхний 10 хоногийн үйлдвэрлэлийн төлөвлөгөөний гүйцэтгэл гарлаа. Сарын эхний арав хоногт “Эрдэнэт” үйлдвэрийн уурхайчид 702.7 мянган метр куб уулын цул гаргаж, төлөвлөгөөг 106.6 хувиар, 308.4 мянган метр куб хөрс хуулж төлөвлөгөөг 106.7 хувиар, 1 сая 5.4 мянган тонн хүдэр олборлож, төлөвлөгөөг 106.6 хувиар тус тус давуулан биелүүлжээ.
     Баяжуулагчид энэ хугацаанд 892.6 мянган тонн хүдэр боловсруулж, төлөвлөгөө 103.3 хувиар биелсэн байна. Баяжмал дахь металл авалтын гүйцэтгэл зэсээр 3617.7 тонн  буюу төлөвлөгөө 102.2 хувиар, молибден авалтын гүйцэтгэл 65.16 тонн буюу 102.3 хувиар биелсэн үзүүлэлттэй бол зэсийн агуулга 22.5 хувьтай байж төлөвлөгөө 100.8 хувиар, молибдены агуулга 50.6 хувьтай байж, төлөвлөгөө 105.5 хувиар давж биеллээ.  Уурхайчид сарын эхний 10 хоногт 16212.6 тонн зэсийн баяжмал ачсан байна.

М.Балжинням


 

     Энэ удаа бид Баяжуулах үйлдвэрийн Нунтаглан баяжуулах хэсгийн хөвүүлэн баяжуулагч Төгссайханы Мөнхцэнгэлтэй ярилцлаа. Тэрээр Баяжуулах үйлдвэрийн Бүтээмж чанарын “Хамтын хөгжил” дугуйлангийн гишүүн юм.

     -Таны мэргэжлээ хэрхэн сонгосноос ярилцлагаа эхлэх үү?
    -Анх 2007 онд Эрдэнэт үйлдвэртэй хувь заяагаа холбож байлаа. Тухайн үед 10 жилийн сургуулиа төгсөөд мэргэжлээ сонгож чадахгүй, бусад хүүхдийн адил Улаанбаатарт очиж суралцах чин хүсэлтэй явсан. Тэгэхэд аав маань Уул уурхайн мэргэжлээр суралцахыг зөвлөдөг юм. Зөвлөснөөр нь уул уурхайн хүн болохоор шийдсэн.  Тухайн үеийн сонирхол хот явах байсан ч хүмүүс үйлдвэрлэлийн материаллаг баазтай, Эрдэнэтийн Технологийн сургуульд суралцахыг зөвлөж, ятгаснаар тус сургуульд суралцсан. Энэ нь ч оносон гэж боддог.

     -Дээд сургуулиа төгсөөд ажилчин болсон уу?
    -Их сургуулиа төгсөхдөө гэр бүлтэй болчихсон учраас Эрдэнэт үйлдвэрээс өөр газар ажиллах сонирхол байгаагүй. Төгссөн өдрөөсөө эхлээд ажил хөөцөлдсөн. Шинэ төгссөн залуу инженер ажилд ороход их л хялбар юм шиг бодож явсан. Хоёр, гурван жилийн дараа тийм биш юм гэдгийг ойлгоод тухайн үеийн удирдлагуудын нэр дээр хоёр хувь өргөдөл биччихээд, бичиг баримтуудаа байнга цүнхэлж явдаг болсон. Ажилд орох бичиг баримт, өргөдлөө өгчхөөд хөдөө ч тайван явж чадахгүй, араас дуудчих юм шиг санагдаад догдолж явснаа дурсахад сайхан байна. Сургуулиа хавар төгсчхөөд, өвөл болтол ажилгүй явсан. Энэ хугацаанд ажилгүй нэртэйгээс биш энд тэнд очиж зарагдаад явдаг байлаа. Ажилд ороод харин ч амарсан.

     -Эрдэнэт үйлдвэрийн “зүрх” болсон Баяжуулах үйлдвэрт ажиллаж яваагийн давуу тал юу вэ?
    -Би Баяжуулах үйлдвэрт гурав дахь жилээ ажиллаж байна. Ашигт малтмал баяжуулалтын технологич мэргэжилтэй. Үйлдвэрлэлийн менежмент мэргэжлээр магистрын зэрэг хамгаалсан. 2016 онд Баяжуулах үйлдвэрийн Нунтаглан баяжуулах хэсэгт насосын машинчаар ажилд орсноос хойш хөвүүлэн баяжуулагч, тээрмийн машинч, хяналтын оператор зэрэг мэргэжлээр ажиллалаа. Эрдэнэт үйлдвэрийн маань хуучин ажилчид тэтгэвэртээ гарч залуу боловсон хүчин шинээр орж ирсэн. Үүнтэй холбоотой ажилтнууд бидний дунд шилжилт хөдөлгөөн хийх зайлшгүй шаардлага гарсан гэж ойлгодог. Ажлын байр өөрчлөгдөх болгонд үйлдвэрээ төдийгүй өөрийн мэргэжлээ илүү таньж мэдэх, мэдлэг боловсролоо бататгаж авах ач холбогдолтой байдаг. Тухайн ажлын байрны хэвшмэл байдлаас бүтээмжтэй холбоотой сайжруулалт хийх санааг хялбар олж авдаг.  Өөрөөр хэлбэл тухайн ажлын байранд удаан ажилласан хүн хэцүү ч байсан, хялбар ч байсан гарт нь орсон ажил учраас нэгэн хэв маягаар ажилладаг. Үүнийг шинэ хүн хийхэд хэрхэн сайжруулж болохыг хялбархан олж хардаг.

     -Монголын уул уурхайн салбарын түүчээ Эрдэнэт үйлдвэрт мэргэжлээрээ ажиллаж, сурч мэдсэн зүйлийнхээ үр өгөөжийг гаргаж яваа та бүхнээр  бахархмаар. Энэ талаар та ямар бодолтой явдаг вэ?
    
-“Том газрын жижиг чулуу байснаас жижиг газрын том чулуу бай” гэдэг зарчмыг өөрийн эрхгүй баримтлаад байх шиг санагддаг. Энэ үгийг их сургуулиа сонгох тэр мөчид “Зууны мэдээ” сонины редактор эгч надад хэлэхэд үнэхээр аятайхан үг санагдаж, байнга толгойд бодогдож явах болсон. Тэгээд ч би өөрөө сайн боловсроогүй байж, нэр хүндтэй удирдах ажил хийх сонирхол байдаггүй. Аз тохиогоод ч юм уу, магадгүй хэн нэгэнд сайнаар үнэлэгдэж дарга болчхоод ажлаа мэдэхгүй, хамт олондоо нэр хүнд муутай явна гэхээс их санаа зовдог. Үүнийг ярихын учир өөрийгөө том чулуу гэж магтаж байгаадаа биш, ямар ч газрын том чулуу болохын төлөө эрмэлзэж, хичээх нь зүйн хэрэг ч хамгийн гол нь бидний эргэн тойронд ийм үзэгдэл их байгаа нь бидний ярьдаг, “Бүтээмж” гэх зүйлийг үгүй хийгээд байх шиг...

    -Сайн саналын системд шинэ санал, санаачилга гаргасан 100 манлайлагчийн нэг нь та.  Үйлдвэрийн хэмжээнд явагдаж буй Бүтээмжийн хөдөлгөөний талаарх таны бодлыг сонсъё?
     -Үйлдвэрийн хэлтэс, нэгжийн ямар нэгэн үйлчилгээнээс тэр болгон анзаарагддаггүй ажлын төлөвлөлт, гүйцэтгэл, цагийн зохион байгуулалт, соёлтой найрсаг харилцаа, зөвлөгөө гээд бүтээмжийн зөвлөлийнхний ялгагддаг сайхан талууд олон байдаг. Магадгүй ийм төрлийн албан тушаалыг илүү чадварлаг боловсон хүчнээр хангаж, орчин үеийн шинэ менежментүүдийг судалж нэвтрүүлбэл Эрдэнэт үйлдвэрийн бүтээмжийн тал дээр ахиц илүү гарах байх. Өөрөөр хэлбэл хүний хөгжил, байгаль орчин, аюулгүй байдалд түшиглэн баялаг бүтээх явдал чухал. Бүтээмжийг мэргэжлийн хүмүүс олон томьёогоор тайлбарладаг. Үйлдвэрийн энгийн ажилтан бидний хувьд хүний аливаад хандах хандлага буюу хэн нэгэнд гаргаж буй сэтгэл гэж ойлгох юм. Насосын зумп дээрх элсийг угаа гэсэн даалгавар авсан ажилтан элсийг нь угаачхаад засвараас үлдсэн металлын үлдэгдэл, тайрдас, эрэг боолтны хаягдлыг авч хаях уу, үгүй юу. Эдгээрийг зохицуулахын тулд Эрдэнэт үйлдвэрийн бүтээмжийн хөдөлгөөн хэчнээн их хэмжээний мөнгө хөрөнгө, хөдөлмөр зарцуулдгийг бид мэднэ. Мэдээж энэ нь тодорхой хэмжээнд үр дүнгээ өгсөөр байна. Миний оюутны дадлага хийж явсан үеэс одоогийн ажлын байрны орчин нөхцөл, тохижилт, ажлын арга барил гээд маш олон зүйл сайжирсан ч илүү сайн арга зам ямагт байдаг гэдэгчлэн бүтээмжийн хөдөлгөөнөөс илүү өндөр үр дүн гарах ёстой юм болов уу.
 

     Бүтээмжийн үйл ажиллагаанд тоглоом, харандаа, фломастер, цаасан аяга, кофе, печениэс эхлээд сургалт, ухуулгад ямар их зүйл зарцуулдгийг ажилтан бүр ойлгож ухамсарлаасай. Мөн бүтээмжийн зөвлөлийнхний зүгээс шинэ орсон ажилтнуудыг ажлын байрны хэвшмэл болсон дадал зуршлыг хуучин ажилчдаас эзэмшихээс өмнө бүтээмжийн хөдөлгөөнд идэвхтэй хамруулж, оновчтой байдлаар сэдэлжүүлж сэргэг хэвээр нь авч үлдэх арга барил ашиглах нь өнөөгийн нөхцөлд цаг үеэ олсон ажил болох юм шиг санагддаг. Тодруулбал, хуучин ажилтнуудын олон жилийн дадлага туршлагатай байдлыг шинэ залуу ажилтнууд хэнэггүй, хайнга байдалтай андуурч хэт назгай байдлаар ажилд хандаад байх шиг. Сайн саналын системийн саналуудыг ажиглахад ажлын байранд хөдөлмөр хөнгөвчлөх, орчин нөхцөл сайжруулах, аюул эрсдэлийг бууруулах, үйлдвэрлэлийн өртөг зардлыг багасгах чиглэлтэй байдаг. Залуу боловсон хүчнээр сэлгэгдсэн энэ үед сургуульд эзэмшсэн онолын мэдлэгээ үйлдвэрлэлийн өнөөгийн нөхцөлтэй уялдуулан судалгааны ажил хийж, илүү шинжлэх ухаанч саналууд гаргамаар байна. Тасралтгүй үйл ажиллагаатай уул уурхайн үйлдвэрлэлд маш их хэмжээний материалын урсгал зардал гардаг. Иймээс тоног төхөөрөмжийн багахан өөрчлөлтөөс их  зардал хэмнэх боломжтой. Ер нь тооцоо, судалгаа хийж сайжруулах, магадгүй эрдмийн цол зэрэг хамгаалахаар сэдвүүд манай үйлдвэрт олон бий.

     -Бүтээмж чанарын дугуйлангийн үйл ажиллагааны эерэг, сөрөг тал ажиглагдах юм уу?
    -Бүтээмж чанарын дугуйлангийн ажлын хувьд дэвтрийн хөтлөлтийг аль болох хялбар болгосон авч түүнийг хөтлөх зааварчилгаа дутмаг, нэг зүйлийг олон талаас нь тодорхойлохыг шаарддаг хэт нуршуу загвартай санагддаг. Ажилчин хүний зүгээс харахад бүтээмжийг онолын талаас, мэргэжлийн түвшинд тооцоолохыг шаарддаг нь учир дутагдалтай. Энэ тал дээр ажилчдыг бүгдийг нь хамруулдаггүй юм гэхэд дугуйлан бүрийн ахлагч, идэвхтэн гишүүдийг арга зүйгээр хангахад чиглэсэн ажил хиймээр байна. Бүтээмж чанарын дугуйлангаар дамжуулан үйлдвэрт хэрэгтэй маш олон төсөл, жижиг сайжруулалтын ажил хийгдэж байгаа. Энэ нь ажилчдын чин сэтгэлийн санал санаачилга гэхээс илүү улиралд хоёр төсөл  ч юм уу бичигдээгүй тушаал, захирамжийн хүрээнд ажил явагдаад байх шиг. Хэдий тийм ч төслийн ажил дууссаны дараа тодорхой нэг асуудлыг шийдвэрлэсэн, хийсэн зүйлээрээ бахархахаас гадна урамшууллын мөнгө авах нь ч бас сайхан юм. Сайн санал нь ажилчин хүний өөрийн цэвэр идэвх, санал санаачилгаар гардаг ч саналын системд санал оруулахад ажлын байрны онцлогтой холбоотой асуудал байна. Магадгүй сайн саналын системд үйлдвэрийн дотоод сүлжээнээс биш дурын газраас хандаж болдог, тэр тусмаа гар утаснаас саналаа оруулдаг бол санал хаягдахгүй. Мөн сайн саналыг системтэй хэрхэн харьцах талаар ажилчид  мэдлэг муутай байна. Иймээс шинээр ажилд орогчдыг сургалт хөтөлбөрт хамруулж болох юм. Таван сайн үйлсийг захиргааны ажилтнууд хэрхэн хэрэгжүүлдгийг мэдэхгүй байна. Цехийн ажилчдын тухайд анхан шатны удирдлагуудыг арга зүйгээр ханган хянаж ажилламаар санагддаг. Удирдлагаас өгсөн үүрэг даалгаврыг ажлын байрны хариуцсан талбай, тоног төхөөрөмжид ажлаа хэрхэн зөв хуваарилан гүйцэтгэж, ажлын байрны эмх цэгц, цэвэрлэгээ үйлчилгээг ямар түвшинд хангаж байгаа нь ажилчин бүрт ялгаатай. Нэг зүйл тодотгон хэлэхэд хэн нэгэнтэй найзалдаггүй зангаараа хүнд тэр болгон таалагддаггүй ч өөрт оногдсон ажлыг хэнээс ч дутахааргүй гүйцэтгээд явдаг ажилтнууд байдаг. Энэ бүхнийг бүтээмжийн удирдлагууд анхаардаг байгаасай гэж боддог.

     -Та залуу хүний хувьд амьдралаа хэрхэн авч явна. Үр, хүүхдийнхээ хүмүүжилд аль хэр анхаарал хандуулдаг вэ?
    -Манайх ам бүл дөрвүүлээ. Гэргий маань хүнсний үйлдвэрлэлийн салбарт хувийн бизнес эрхэлдэг. Том хүү Орос сургуулийн нэгдүгээр ангид сурдаг. Бага хүү маань Улсын тэргүүний дөрөвдүгээр цэцэрлэгт явж байна. Үр хүүхдээ би эрдэмтэн доктор болгохоос илүүтэй Орос хүмүүсийн аливаад нямбай ханддаг, зарчимч, хариуцлагатай зан чанараас суралцаж, ирээдүйн чадварлаг хүүхэд залуустай мөр зэрэгцэн, хэл ярианы болон зан харилцааны соёлтой хүн болон төлөвшүүлэхийг хичээдэг. Монголын боловсролын салбар хүүхдэд мэдлэг олгоход хэт анхаараад хүн болон төлөвших явцад нь учир дутагдалтай санагддаг. Бидний үед том жижиг а үсэг, тоо зэргийг дэвтрийн нүүр дүүрэн бичүүлж сургадаг байлаа. Гэвч явцын дунд хүн бүр өөр өөрийн бичгийн хэвтэй, тоог өөрсдийн түвшний сэтгэлгээгээр бодох жишээтэй. Харин хүн бүр аав, ээж болдог гэгчээр хүн байхын утга учрыг л үр хүүхдүүддээ ойлгуулахыг чухалчилдаг даа.

      -Цаг гарган ярилцсанд баярлалаа.

Т.БАТЧУЛУУН

     “Эрдэнэт үйлдвэр” Төрийн өмчит үйлдвэрийн газар болон статус өөрчлөгдсөнтэй холбогдуулан ажилтнуудтай Хөдөлмөрийн гэрээ шинэчлэн байгуулж байна. Энэ ажлын явц болон гэрээнд нь ямар өөрчлөлт орж буй талаар Хуулийн хэлтсийн орлогч дарга Д.Төгсбаяраас тодруулсан юм.

     -Статус, бүтэц өөрчлөгдсөнтэй холбоотой эрх зүйн баримт бичгүүдийн шинэчлэл шат дараатай хийгдэж байна. Энэ талаар мэдээлэл өгөөч?
     -
“Эрдэнэт үйлдвэр”-ийн статус 2017 оны хоёрдугаар сарын 10-ны өдрийн УИХ-ын 23-р тогтоолоор Хязгаарлагдмал хариуцлагатай компани байсныг Төрийн өмчит үйлдвэрийн газар болгон өөрчилж ажиллуулахаар шийдвэрлэсэн. Энэ тогтоолыг Монгол Улсын Засгийн Газрын 2019 оны гуравдугаар сарын 21-ний өдрийн 102 дугаар тогтоолоор “Эрдэнэт үйлдвэр”-ийг Төрийн өмчит үйлдвэрийн газар гэсэн статустайгаар ажиллуулахаар өөрчлөн байгуулах, үйлдвэрийн газрын дүрэм болон удирдлагуудын эрх хэмжээг тогтоон баталж өгсөн. Үүнээс хамаарч эрх зүйн баримт бичгүүдийг өнөөгийн нөхцөл байдалд  нийцүүлэн шинэчлэх, боловсруулах зайлшгүй шаардлага урган гарсан.

     -Ерөнхий захирал Хөдөлмөрийн дотоод журмыг саяхан баталсан. Үүнийг дагаад Хөдөлмөрийн гэрээ шинэчлэгдэх байх...?
     -2019 оны 04 дүгээр сарын 26-ны өдрийн Ерөнхий захирлын А/294 дүгээр тушаалаар Хөдөлмөрийн дотоод журмыг шинэчлэн баталж мөрдөж эхэллээ. Мөн өдрийн Ерөнхий захирлын А/293 дугаар “Хөдөлмөрийн гэрээний загвар баталж, мөрдүүлэх тухай” тушаалаар тухайн хөдөлмөрийн гэрээний загварыг шинэчлэн батлуулснаар дараагийн шатны ажил төлөвлөгөөний дагуу хийгдэж байна.

     -Хөдөлмөрийн шинэ гэрээний заалтад өөрчлөлт орсон уу, эсвэл нэршил, тамга солих байдлаар дахин байгуулах юм уу?
    
-Хөдөлмөрийн гэрээний заалтуудад шинээр батлагдсан нэршил болон тодорхой хэсгүүдэд өөрчлөлт орсон. Өмнө нь компанийн зохион байгуулалтаар ажиллаж байсан бол өнөөдөр Төрийн өмчит үйлдвэрийн газрын зохион байгуулалтаар явж байна. Тэгэхээр өмнө нь компанийн тухай хуулийг мөрдөж байсан бол өнөөдөр төрийн болон орон нутгийн өмчийн тухай хуулийг мөрдөж ажиллахаар өөрчлөгдсөн байгаа. Үүнтэй холбоотой Хөдөлмөрийн дотоод журмын болон Хөдөлмөрийн гэрээнд ажил олгогч болон ажилтнуудын хариуцлагын хэсэгт тодорхойгүй байсан зарим заалтыг боловсронгуй болгож өгсөн.

     -Тухайлбал...?
     -Хөдөлмөрийн гэрээнд ажилтанд чөлөө олгох, хөдөлмөрийн гэрээг цуцлах, дуусгавар болгох, нууцлал хадгалах зэргийг нарийвчлан заасан. Түүнээс гадна Хамтын гэрээ, Хөдөлмөрийн дотоод журам, Хөдөлмөрийн гэрээ хоорондын уялдаа авцалдааг шинэчилсэн загварт тусгаж өгсөн.

     -Ажилтнууд Хөдөлмөрийн гэрээ шинэчлэн байгуулахдаа юуг анхаарах ёстой вэ?
     -Хөдөлмөрийн гэрээ бол ажил олгогч  болон ажилтнуудын хувьд хамгийн чухал баримт бичиг. Иймээс хүний нөөцийн менежерүүд Хөдөлмөрийн гэрээний шинэчилсэн загварыг ажилтнуудад маш сайн танилцуулах, өөрт нь уншуулсны дараа гэрээ байгуулах хэрэгтэй. Учир нь Хөдөлмөрийн гэрээ бол ажил олгогч, ажилтан хоёр аль аль талдаа санал болгож, танилцаж байж байгуулах ёстой баримт бичиг юм. Өмнө нь Хөдөлмөрийн гэрээ байгуулахад тайлбарлан таниулах үйл явц дулимаг байсныг үгүйсгэхгүй. Ажилтан хүн Хөдөлмөрийн гэрээгээр ямар эрх, үүрэг, хариуцлага хүлээснээ мэдэх нь нэн чухал юм.

     -Хөдөлмөрийн гэрээ шинэчлэн байгуулах ажил хэдий хугацаанд хийгдэх вэ?
    -Бид аль болох богино хугацаанд хөдөлмөрийн гэрээ шинэчлэн байгуулахаар төлөвлөгөө гаргаад ажиллаж байна. Бүтцийн нэгжүүдэд харилцан адилгүй хугацаа шаардана. Үйлдвэрийн томоохон нэгжүүд олон ажилтантай учраас хугацаа нэлээд орно. 1000 гаруй ажилтантай цех ч бий шүү дээ. Хөдөлмөрийн дотоод журам, Хөдөлмөрийн гэрээний загварыг гарын авлага байдлаар хэвлээд ажилчдадаа таниулах үйл ажиллагаа явуулж байгаа сайшаалтай цех ч байна. Цөөхөн ажилтантай цех, нэгжүүдийн хүний нөөцийн менежер нь уншиж танилцуулах, сургалт явуулах байдлаар гээд янз бүрийн арга хэлбэрээр ажил урагшилж байна.
     Ер нь “Эрдэнэт үйлдвэр” ТӨҮГ нь 50-иад бүтцийн нэгжтэй байхаар Төрийн өмчийн бодлого зохицуулалтын газраас баталсан. Эдгээр бүтцийн нэгжийн үйл ажиллагааны журмыг энэ сард багтаан боловсруулж, Ерөнхий захирлын тушаалаар батлуулахаар Захиргаа, хүний нөөцийн бодлогын газар, Хуулийн хэлтэс, Эдийн засгийн бодлогын хэлтэс хамтарсан төлөвлөгөө гаргаад ажиллаж байна.

     -Цаг гаргасан танд баярлалаа.
 

М.ОДГЭРЭЛ

     Ус хангамжийн шугам хоолойн шинэчлэлийн хүрээнд Номин агуулахаас хотын насосны станц хүртэлх 400 мм-ийн голчтой  хос, 600 мм-ийн голчтой цэвэр усны шугамыг ган хоолойгоор сольж байна. Уг ажлыг “Хангилцаг” компани гүйцэтгэж, Ус хангамжийн цех өдөр тутам хяналт тавин ажиллаж байна. Энэхүү шинэчлэлээр орон сууцны 2А хорооллын барилгажих талбайг чөлөөлөн тус талбайн дундуур явсан газрын доогуурх шугамыг ил гарган, дулааны шугамтай зэрэгцүүлэн тавьжээ. Засвар үйлчилгээ хийхэд тохиромжтой болгох үүднээс тус цех ус дамжуулах шугамыг газар дээгүүр тавихаар зорьж байгаа тухай мэргэжилтэн ярилаа. Өнгөрсөн оны 8-р сараас эхэлсэн уг ажлыг энэ сард ашиглалтад хүлээлгэн өгөх аж. Энэ хэсгийн шугамийг 1978 оноос хойш анх удаа шинэчилжээ. Уг цэвэр усны шугамыг хэсэгчлэн сольсноор хотын ус хангамжийн найдвартай ажиллагаа дээшлэх  юм.

Я.ЭНХ

     “Эрдэнэт үйлдвэр” Хаягдлын аж ахуйн цагаан тоосны дэгдэлт дарах ажлаа эрчимжүүлэн техникийн хүчийг ашиглаж байна. Герман улсын химийн бодис болон тоног төхөөрөмж үйлдвэрлэгч “VASF” компанийн урвалж найруулан цацагч төхөөрөмж өнгөрсөн сарын сүүлээр “Эрдэнэт үйлдвэр”-т нийлүүлэгдсэн бөгөөд суурилуулалтын ажил амжилттай дуусч цагаан тоосны дэгдэлт дарах ажилд ашиглаж эхэллээ. Тавдугаар сарын дөрвөнд булингад дарагч бодис хольж анхны цацалтыг 48 цагаар хийсэн нь 356 га талбайг хамаржээ. Ингэснээр нарийн ширхэгтэй элс бүдүүн ширхэгтэй шороотой барьцалдан өрөмтөж тогтсон байна. Дөрөв хоногийн дараа дахин өөр цэг дээрээс хучилт хийхэд өрөмтөж барьцалдсан өмнөх талбайгаас тоос босохгүй байжээ. Шинэ тоног төхөөрөмжөөр хийгдэж буй энэ ажлын үр дүнд Байгаль орчин, ногоон хөгжлийн хэлтсийн мэргэжилтнүүд хяналт, шинжилгээ хийж байна. Мөн энэ сарын сүүлээр цагаан тоосны дэгдэлт дарах ажилд хүч нэмэх газар уснаа явагч тусгай зориулалтын техник ирнэ. Үүнийг Баяжуулах үйлдвэрийн дэргэд шинээр байгуулагдсан Цагаан тоосны алба хариуцан ажиллуулах юм. Түүнээс гадна ирэх долдугаар сард Франц улсаас чирэгч, дэлгэгддэг цацагч “Эрдэнэт үйлдвэр”-т нийлүүлэгдэхэд энэ ажилд мэдэгдэхүйц ахиц гарна гэж мэргэжилтнүүд үзэж байна.

М.ОД

Мэдээний төрөл

Календарь

« 5-р сар 2019 »
Да Мя Лх Пү Ба Бя Ня
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Зургийн цомог