• Төрийн өмчийн бодлого зохицуулалтын газрын дарга Б.Цэнгэлээр ахлуулсан ажлын хэсгийнхэн хоёр дахь өдрөө Орхон аймагт ажиллаж байна

         Ажлын хэсгийнхэн өчигдөр Эрдэнэт үйлдвэрийн бүтцийн нэгжүүдийн үйл ажиллагаа, өргөтгөл шинэчлэл, бүтээн байгуулалтын ажлын явцтай танилцсан бол өнөөдөр Орхон аймаг дахь Төрийн өмчит үйлдвэрийн газруудаар орлоо.      Мөн Эрдэнэт үйлдвэрийн Ус хангамжийн цехийн Цэвэрлэх байгууламжийн үйл ажиллагааг газар дээр нь очиж үзлээ. Эрдэнэт хотын хүн ам, албан байгууллагыг ундны болон техникийн усаар тасралтгүй найдвартай хангадагаараа Ус хангамжийн цехийн Цэвэрлэх байгууламж нь онцлог талтай. Цэвэрлэх байгууламж нь хоногт 12 мянга орчим шоо метр бохир усыг татан, дөрвөн үе шаттайгаар цэвэрлэж, зайлуулах хүчин чадалтайгаар ажилладаг иж бүрэн техник, тоног төхөөрөмжтэй байгууламж юм.      Төрийн өмчийн бодлого зохицуулалтын газрын дарга Б.Цэнгэл болон албаны бусад хүмүүс Цэвэрлэх байгууламжийн бохир усанд байгаа хог хаягдал, элс, лаг, өөх тосыг арилган, цэвэрлэж, халдваргүйжүүлэлт хүртэл хийгддэг үе шат бүрийг нарийвчлан үзэж сонирхлоо. Энэ үеэр Эрдэнэт үйлдвэрийн бүтцийн нэгжүүд бүгд сайн ажиллаж байна гэж онцоллоо.      Ажлын хэсгийнхэн одоо “Эрдэнэт үйлдвэр” ТӨҮГ-ын Сэлэнгэ амралт, аялал жуулчлалын цогцолбор дахь Ногоон хөгжлийн төвийн болон бусад бүтээн байгуулалттай танилцаж байна.     А.Бямбамаа Фото: Ш.Лхамсүрэн Дэлгэрэнгүй...
  • Өнөөдөр 08 дугаар сарын 14

    Мэдүүштэй... 1. Өнөөдөр жилийн 226дахь өдөр. Он дуусахад 139 хоног үлдлээ.                 2. Эрдэнэт хотод агаарын хэм өдөртөө +23градус, шөнөдөө +11градус дулаан,хүчтэй аадар бороотой, салхины хурд 6 м/сек байна. (Эх сурвалж: www.tsag-agaar.gov.mn) 3. Аргын тооллын 8 сарын 14. Баасан (Сугар) гараг. Билгийн тооллын 25, шарагчин үхэр, гөрөөсөн толгой-4 од, суудал уул, мэнгэ 3 хөх, үл тохирохын барилдлагатай өдөр. Овоо тахих, лусын буулттай өдөр.Өдрийн нар ургах/шингэх цаг: 05:46-20:06. Өдрийн сайн цаг: Могой(09:40-11:40), бич(15:40-17:40), гахай(21:40-23:40), бар(03:40-05:40), туулай(05:40-07:40) болой.Үс бүү засуул нүд бүрэлзэн улцайна муу цээрлэвэл зохилтой.Хол газар явагсад баруун хойд зүгт мөрөө гаргавал зохистой.Могой, тахиа, үхэр, бич жилтнээ аливаа үйлийг хийхэд эерэг сайн. Харин хонь, бар, туулай жилтнээ сөрөг муу. Замд гарах, тариалангийн үйл, үхэгсдийн үйл, худалдаа хийх, эм найруулах, мал зарах, хот суурин, байшин барилгын суурь тавих, хулгай, дээрэм дарах, дайсныг номхтгох үйлд сайн. Амраг садан бололцох, багш шавь барилдах, өндөр суудалд сууж эхлэх, туг дарцаг хийсгэх, урлан бүтээх, дархлах, эрдэм ухаанд суралцах, цэрэг хөдөлгөх, шинэ малгай, хувцас өмсөх, эд хөрөнгө зээлдүүлэх, нэхэх, нүүдэл хийх, ажилчин шүтүүлэхэд муу. 4. Монгол банкны энэ өдрийн нэрлэсэн ханшаар АНУ-ын доллар 2847,евро 3345, БНХАУ-ын юань 409, ОХУ-ын рубль 38, Японы иен 26, БНСУ-ын вон 2.4төгрөгтэй тэнцэж байна. (Эх сурвалж: www.gogo.mn) 5.Дэлхийн зах зээл дээр нэг тонн зэс 6380.00 ам.долларын ханштай байна. (Эх сурвалж: www.lme.com)     Эрдэнэт үйлдвэрийн түүхэнд энэ сард... 1965оны 8 сарын 16. Монгол, Чехословакийн геологийн анги Эрдэнэтийн-Овооны орд газарт явуулсан эрэл, үнэлгээний ажлаатайлагнав. 1974 оны 8 сарын 24. МХЗЭ-ийн анхны илгээлтийн эзэд Эрдэнэтийг зорив. 1975 оны 8 сарын 25. БЕЛАЗ-ын жолоочийн курст суралцах анхны хүмүүсийг ЗХУ руу илгээв. 1978 оны 8 сарын 1. Цахилгаан цех байгуулагдав. 1978 оны 8 сарын 12. Анхны зэсийн баяжмалыг гарган авав. 2001 оны 8 сар. Баяжуулах фабрикийн хүчин чадлыг 2 сая тонноор нэмэгдүүлэв. 2013 оны 8 сарын 17. Үйлдвэрийн 35 жилийн ойгоор “Хөдөлмөрийн гавъаны улаан тугийн одон”-гоор шагнагдав.     Дэлгэрэнгүй...
  • Өглөөний сэргээш цуврал контент #25: Хоролгаравын АМАРЗАЯА

    -Төгссөн сургууль: Монгол Улсын Политехникийн Дээд сургууль -Мэргэжил: Ашигт малтмалын ордын эрэл зураглалын геологич инженер -Ажилласан туршлага: Геологи, уул уурхайн салбарт 30 жил ажилласан бөгөөд Эрдэнэт үйлдвэрийн Геологи хайгуулын экспедицид техник геологичоос тэргүүлэх геологич болтлоо дэвшин ажиллаж байна. -Мэргэжил дээшлүүлсэн байдал: Монгол Улсын Төрийн захиргаа, удирдлагын хөгжлийн төвийн бизнесийн удирдлагыг “Удирдлагын арга зүйч” мэргэжлээр, 2011 онд геологийн магистр, 2012 онд “зэс профирын ордын уурхайн геологи” мэргэшлээр Мэргэшсэн инженер, Монголын геологи, уул уурхайн мэргэжлийн институтийн ахмад гишүүн. -Чин хүсэл: Уул уурхайн салбарын амин сүнс нь ордын нөөц баялаг байдаг. Тиймээс, Эрдэнэт үйлдвэрийн Геологи хайгуулын экспедицийн хайгуулчин хамт олон дараагийн том Эрдэнэтийг хайх эрлийн эзэд билээ. Тэдний дунд эрчүүдтэй мөр зэрэгцэн ажиллаж буй, арвин туршлагын эзэн тэрээр сурсан мэдсэн эрдэм мэдлэгээ, эзэмшсэн мэргэжлийнхээ үнэ цэнэтэй хослуулан үйлдвэрийнхээ нөөц баялгийг нэмэгдүүлэх, шинэ орд илрүүлэх, шинэ нөөц бий болгох эрхэм хүсэлтэй геологич юм. -Таны амьдралын сэргээш юу вэ, хэнээс, юунаас урам зориг, эрч хүч авдаг вэ? Хамгийн эрхэм гэр бүл хань, үр хүүхэд, ач зээ нарынхаа халуун дотно яриа хөөрөөнөөс амьдралын эрч хүчийг авдаг. Мөн Эрдэнэт хот, “Эрдэнэт үйлдвэр” ТӨҮГ, хамт олон, найз нөхдөөсөө урам зориг авдаг. Түүнчлэн ажил мэргэжлийн онцлог болсон хайгуулын хээрийн ажлаасаа эерэг энерги эрч хүчийг олж авдаг. -Хийж байгаа ажлын тань онцлог юу вэ? Эрдэнэт үйлдвэрийн маань ажиллагсад бор уулын минь буян гэж амны уншлага болон хэлэх дуртай байдаг. Харин миний хувьд хэдэн “бор” геологичдын минь хичээл зүтгэл буян нь өнөөдрийн Эрдэнэт үйлдвэрийн тогтвортой үйл ажиллагааг хангаж байгаа гэж хэлэх дуртай. Миний, бидний ажил өнөөдрийн эрдэнэт үйлдвэрийг тасралтгүй, амжилттай ажиллуулахад чиглэгдэн, зэс молибдены хайгуулын ажлыг үе шаттайгаар явуулж байгаа. Нөөц баялаг нь байхгүй бол үйлдвэр, цаашлаад хот ч үгүй байх байсан. Бидний ажил анхдагчийн анхдагч нь юм. Ийм учраас ажил мэргэжил, хамт олноороо бахархах сэтгэл өөрийн эрхгүй ундардаг даа. -Та ойрын хугацаанд ямар ажил амжуулахаар төлөвлөж байна вэ? “Эрдэнэт үйлдвэр” ТӨҮГ нь жил бүр геологи хайгуулын ажилд тодорхой хэмжээний хөрөнгө оруулалтыг зарцуулж байна. Хөрөнгө оруулалтаар гүйцэтгэх ажлын хүрээнд геотехникийн томоохон цогц ажлыг төлөвлөсөн. Манай уурхайн хувьд геотехникийн асуудал нэлээд хожуу хөндөгдөж байгаа. Геотехникийн судалгаа хийгдээгүй уурхайд хүн амь насаа алдах, машин техникээ эвдэхээс эхлээд уурхай нь өөрөө ашиггүй, асар их хэмжээний алдагдал хүлээх зэрэг эрсдэлтэй байдаг. Тиймээс хөгжингүй орнуудад уул уурхайн компани хувьцаа гаргахад хөрөнгийн бирж нь геотехникийн судалгаа хийсэн байхыг шаарддаг. Тийм ч учраас бид энэ томоохон ажилд анхаарал хандуулж байна. -Ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаардаг вэ? Амьдралдаа баримталдаг хэд хэдэн дадал надад байдаг. Хийх ажлаа тогтмол, байнга төлөвлөж  тэмдэглэдэг. Өглөө бүр эрт босож, явган алхалт хийх,  ажлаа 7 цагт эхэлдэг гэх зэрэг... Сүүлийн жилүүдэд хайгуулын ажлыг олон улсын JORC стандартад нийцүүлэн гүйцэтгэх болсонтой холбоотойгоор хэлний мэдлэг зайлшгүй шаардагдаж байгаа. Мөн удирдах албан тушаалтны хувьд бусдыг манлайлах, тэдэнд нөлөөлөх ур чадвартаа анхаарал хандуулж байгаа. -Таны хамгийн том мөрөөдөл юу вэ? Дэлхийн алдартай ашигт малтмалын ордуудтай танилцах гео аялал хийхийг мөрөөддөг. -Боловсролын талаарх таны бодол? Хүн зогсонги, тайван, идэвхгүй  байдалд орохгүйн тулд уураг тархиа байнга идэвхжүүлж байх хэрэгтэй гэж боддог.  Үүний тулд л унших, хөгжих нь чухал. Боловсрол гэдэг өөрөө өргөн утгатай ойлголт. Эрдэм номын боловсрол, ухамсрын боловсрол, төлөвшил, сахилга бат, хариуцлагын боловсрол, хувь хүний суурь боловсрол гээд л дурдвал их зүйл бий. -Одоо хийж буй ажил таны мөрөөдлийн ажил мөн үү? Анх геологич мэргэжлийг сонгохдоо хувь тавилангаа л дагасан мэт санагддаг. Тухайн үед охидын сонгож болох олон мэргэжлийн сургууль байсан ч би энэ сонголтыг хийсэндээ үргэлж баярлаж, бахдаж явдаг. -Залуучуудад хэлэх таны зөвлөгөө? Эрсдэл хийдэг хүн л урагшилдаг. Хаширласаар байвал байрандаа л үлдэнэ. Тиймд хамгийн том өрсөлдөгч болох өөртэйгөө сайн тулалдах хэрэгтэй. Мөн хувийн сахилга бат, хариуцлагатай байхыг хичээгээрэй. Хамгийн чухал зүйл нь хийж байгаа ажилдаа дуртай, түүндээ чин сэтгэлээсээ ханддаг байвал амжилт өөрөө ирнэ. -Эрдэнэт үйлдвэр таны харах өнцөг, үзэл бодол, итгэл үнэмшилд хэрхэн нөлөөлж байна вэ? Эрдэнэт үйлдвэр 10 жилийн ойгоо тэмдэглэж дуусаад удаагүй тэр мөчид би энэ их айлын босгыг алхаж, охин нь болж явсан дурсамж минь сэтгэлд тодхон санагдаж байна. Монголын мянга мянган залуучуудын ажиллах дуртай, хүсээд ч орох боломж тэр бүр байдаггүй, энэ уул уурхайн салбарын их айлд би багтаж өнөөдрийг хүртэл ажиллаж байгаадаа өөрийгөө хамгийн азтайд тооцож, бахархдаг. Тэр тусмаа гарын 10 хуруунд багтахааргүй цөөхөн геологич эмэгтэйчүүдийн нэг нь гэдэгтээ хувь тавиландаа талархаж явдаг. Энэ хугацаанд ордын ашиглалтын хайгуул, гүйцээх хайгуулын ажлуудыг удирдан явуулж, нөөцийн тайланг бичилцэж, нөөц өсгөсөн хүндтэй гавьяатай геологичдын эгнээг бүрдүүлж яваа минь ажил мэргэжилдээ хайртай геологич хүний хамгийн сайхан зүйл гэж боддог доо. Эрдэнэт үйлдвэр энэ л эрчээрээ зогсолтгүй урагшлах, хөгжих итгэл дүүрэн үйлдвэр байх болно гэдэгт би итгэдэг. Тиймдээ ч үйлдвэр дагасан хот сүндэрлэсээр л байна.     Надад, танд ч амархан олдоо нь үгүй Нар, саранд ч ижилдэн дасахад бэрх Хүнд хүчир бүхнийг өөрийн итгэлээр дийлсэн Хээр тайгын эрэлчин  Би хайгуулчин бүсгүй   Уяхан цагаан хуруу нь хатуужин борлож Улаа бутарсан уруул нь хүрэнтэн хатсан ч Гуалиг бүсгүй бие нь уран байгальдаа л зохицсон Газар эхийн сурвалжлагч Би хайгуулчин бүсгүй Дэлгэрэнгүй...
  • Нийгмийн чиглэлээр шийдлээ хүлээж буй зарим асуудалд анхаарч, дэмжихийг хүслээ

         Эрдэнэт үйлдвэрт ажиллаж буй ТӨБЗГ-ын дарга Б.Цэнгэл өнөөдөр үдээс хойш тус үйлдвэрийн нийгмийн цехүүдээр орж, үйл ажиллагаатай нь танилцав. Байгуулагдсан цаг үеэсээ нийгмийн цогц хөтөлбөрийг үйлдвэрлэлийн бодлоготойгоо зэрэгцүүлэн хэрэгжүүлж ирсэн Эрдэнэт үйлдвэр дэргэдээ 10 гаруй нийгмийн цехтэй. Тэдгээрээр дамжуулан уурхайчид болон Эрдэнэтчүүдэд эрүүл мэнд, боловсрол, соёл урлаг, спорт, байгаль орчны чиглэлээр үйлчилгээ, үйл ажиллагааг хүргэж байна.      Нийгмийн цехүүдийн үйл ажиллагааг зангидаж, ажиллагсдад чиглэсэн нийгмийн хөгжлийн болоод хамгааллын асуудлыг нэгтгэн хэрэгжүүлж буй Нийгмийн харилцааны хэлтсийн дарга Д.Өнөбат "Нийгмийн бодлогын хэрэгжилт" сэдвээр танилцуулга хийж, хөрөнгө оруулалт бүтээн байгуулалтын төсөл хөтөлбөрийн талаар мэдээлэл өглөө. Мөн "Эрдэнэт цогцолбор" дээд сургууль, Соёл, урлагийн цогцолбор, Орос сургууль, Спорт цогцолборын удирдлагууд өөрсдийн үйл ажиллагааг танилцуулж, шийдлээ хүлээж буй зарим асуудалд анхаарч, дэмжин ажиллахыг ТӨБЗГ-ын даргад уламжлав. Түүнчлэн, хөрөнгө оруулалтын бодлогын хүрээнд бүтээн босгож буй Соёл, спортын “Эрдэнэт” цогцолборын барилгын ажлын явцтай танилцлаа.         М.Балжинням Фото Б.Баттөгс Дэлгэрэнгүй...
  • Өргөтгөлийн ажлыг богино хугацаанд чанартай гүйцэтгэхээр шамдаж байна

         Баяжуулах үйлдвэрийн Өөрөө нунтаглах хэсгийн Өргөтгөлийн ажлын хэсгийн тав дахь удаагийн хуралдаан боллоо. Барилгын ажлын гүйцэтгэгчээр  “Эрдэнэт лайт” компани  ажиллаж байгаа бөгөөд  “Орхон-Од” компаниар  хүч нэмэгдүүлснээр өнгөрсөн даваа гарагаас 80 хүн барилгын ажилд оролцож байна. Үйлдвэрийн зүгээс барилгын ажлыг шуурхай явуулах бүхий л нөхцөл бололцоогоор ханган ажиллахын зэрэгцээ дүрэм журмын дагуу хяналтаа ч сулруулахгүй гэсэн байр суурьтай  байна.        Уг бүтээн байгуулалтын барилгын ажлын хүрээнд 19800 метр куб бетон цутгах төлөвлөгөөтэйгөөс өнөөдрийн байдлаар 350 метр куб орчмыг цутгасан байна. Гурван тээрмийн суурийн эхний шатыг өнөөдрөөс цутгаж эхэллээ. Өргөтгөлийн барилгын ажилд 100 вагон цемент шаардлагатай гэсэн  тооцоо гарчээ. Барилгын гүйцэтгэгч компани дотоодын үйлдвэрлэлээ дэмжих үүднээс “Мак”, “Хөтөл” компаниудаас цементээ авч байна. Эдгээр үйлдвэрийн үйл ажиллагаа тасралтгүй сайн явагдах нь өргөтгөлийн ажилд  шууд хамааралтай юм. Барилгын бусад материалын хувьд ч тасалдахгүй гэж гүйцэтгэгч компаниас мэдээлж байна.         Энэ удаагийн хуралдаанаас Мэдээллийн технологийн хэлтэстэй хамтран барилгын ажлын талбайд орчин үеийн камер суурилуулах шийдэл гаргалаа. Энэ нь ажлын үе шат бүрийг бичиж, электрон хэлбэрээр хадгалан үлдээх  зорилготой юм. Уг камерын тусламжтайгаар барилгын ажлын явцыг үйлдвэрийн удирдлагууд өрөөнөөсөө хянах, үндсэн тоног төхөөрөмж үйлдвэрлэгч “Найпу” компанийнхан ч барилгын ажлын явцтай танилцаж, санаа оноогоо хэлэлцэх боломж бүрдэх юм байна.        Хил хаагдсанаас “Найпу” компанийн төлөөлөгчидтэй цахимаар харилцаж зураг төслөө тодруулахын зэрэгцээ ажлын явцаа мэдээлж байна. Өргөтгөлийн барилгын ажилтай үндсэн тоног төхөөрөмжийн үйлдвэрлэл, зураг төслийн зарим ажлууд зэрэгцэн хийгдэж байгаа юм байна.      “2021 оны наймдугаар сард өргөтгөлийг бүрэн дуусгахаар шахуу төлөвлөгөөтэй ажиллаж байна. Ирэх онд  өргөтгөл ашиглалтад орох байдлаар  үр ашгаа тооцож, төсвийн өмнө хүлээх үүргээ төлөвлөсөн. Тиймээс манай зүгээс болон гүйцэтгэгч, захиалагч байгууллагууд аль аль нь богино хугацаанд өндөр хариуцлагатай ажиллаж байгаа” гэж Барилга байгууламж, хяналт төлөвлөлтийн албаны инженер, Өргөтгөлийн ажлын хэсгийн нарийн бичиг Д.Баярмаа мэдээллээ.        Нийтдээ 125 орчим сая ам долларын өртөгтэй энэхүү өргөтгөл ашиглалтад орсноор Баяжуулах үйлдвэр хүчин чадлаа 6 сая тонноор нэмэгдүүлэх нөхцөл бүрдэх юм.     Я.Энхтуяа Фото: Ш.Лхамсүрэн   Дэлгэрэнгүй...
  • Б.Цэнгэл: Эрдэнэт үйлдвэрийнхэн үйлдвэрлэлээ цар тахлын үед ч амжилттай ажиллуулж байгаа нь харагдаж байна

         Төрийн өмчийн бодлого, зохицуулалтын газрын дарга Б.Цэнгэл томилолтын баг бүрэлдэхүүний хамт Эрдэнэт үйлдвэрийн үйлдвэрлэлийн үйл ажиллагаатай биечлэн танилцлаа. Ил уурхай, Баяжуулах үйлдвэр, Засвар механикийн завод зэрэг үндсэн үйлдвэрлэлийн цех болон Дулааны цахилгаан станц, Ган бөөрөнцгийн цехүүдийн удирдлагууд өнөөгийн үйл ажиллагаа, технологийн шинэчлэл, шинэ бүтээн байгуулалтын явц, төсөл хөтөлбөрүүдийн хэрэгжилтийн талаар танилцуулахын зэрэгцээ тулгамдаж буй асуудлуудаа ч ярьж, санал бодлоо солилцов. “Жилд 32 сая тонн хүдэр боловсруулах хүчин чадалтай, үйлдвэрлэлийн гол зүрх болсон, Баяжуулах үйлдвэр шинэ өргөтгөлийн бүтээн байгуулалтын ажлаа үргэлжлүүлж байна. Энэ нь, хүдэр боловсруулалтын хүчин чадлын хэмжээг 6 саяар өсгөх технологи бүхий, Өөрөө нунтаглах хэсэгт баригдаж буй өргөтгөл юм. Уг бүтээн байгуулалтыг ирэх оны наймдугаар сард ашиглалтад оруулахаар төлөвлөж байгаа бөгөөд барилга байгууламжийн ажил өнөөдрийн байдлаар 45 хувийн гүйцэтгэлтэй байна” гэж Баяжуулах үйлдвэрийн дарга М.Отгон онцлов. Түүнчлэн, жилээс жилд уул геологийн нөхцөл хүндэрч, хүдрийн агуулга буурч байгаатай холбогдуулан авах арга хэмжээ, Засвар механикийн заводын Цутгуурын цехийн шинэ өргөтгөлийн үр өгөөж, хэрэглэгчээс үйлдвэрлэгчийн эгнээнд шилжсэн ДЦС-ын найдвартай ажиллагаа, Ган бөөрөнцгийн цехийн шинэ технологи, үйл ажиллагаа зэрэг цех бүрийн онцлог ажилтай ТӨБЗГ-ын дарга газар дээр нь танилцлаа.         Тэрээр, Эрдэнэт үйлдвэрийн үйлдвэрлэлийн үйл ажиллагаа болон катодын зэс үйлдвэрлэгч “Эрдмин” компанитай танилцсаны дараа Эрдэнэтийн уурхайчдын ажил үйлсийн талаар товч дүгнэхдээ: “Улс орны өмнө хүлээсэн үүргээ нэр төртэй биелүүлж, төсвийн орлогын гол ачааг нуруундаа үүрч яваа Эрдэнэт үйлдвэрээс орон нутгийн томилолтоо эхлүүлж байна. “Ковид-19” цар тахлын тархалтын улмаас онцгой горимоор ажиллаж буй энэ цаг үед Төрийн өмчит үйлдвэрүүдийн хувьд аль болох алдагдал багатай ажиллах чиглэл баримталж байна. Харин Эрдэнэт үйлдвэрийнхэн энэ үеийг эсрэгээр нь үр ашгаа дээшлүүлж, хөрөнгө оруулалтаа нэмэгдүүлэх боломж болгон ажиллаж байгаа нь харагдаж байна. Энэ нь бусад үйлдвэрлэгчид хүлээн зөвшөөрөхүйц сайн туршлага, үлгэр дуурайл болно гэдгийг тэмдэглэе” гэсэн юм.               М.Балжинням Фото Б.Баттөгс     Дэлгэрэнгүй...
  • Төрийн өмчийн бодлого, зохицуулалтын газрын дарга Б.Цэнгэл Эрдэнэт үйлдвэрт ажиллаж байна

         Төрийн өмчийн бодлого, зохицуулалтын газрын дарга Б.Цэнгэл албаны хүмүүсийн хамт "Эрдэнэт үйлдвэр" ТӨҮГ-ын үйл ажиллагаатай танилцаж байна. Тэрээр томилолтын албан ажлаа тус үйлдвэрийн удирдлагын баг болон ерөнхий захиргааны ажилтнуудтай уулзаж эхэлсэн. Уулзалтын эхэнд "Эрдэнэт үйлдвэр" ТӨҮГ-ын Ерөнхий захирал Х.Бадамсүрэн үйлдвэрийн үйл ажиллагааг "Эрдэнэт үйлдвэрийн өнөө ба ирээдүй" сэдвийн хүрээнд дэлгэрэнгүй танилцуулав. Мөн дэлхий нийтэд цар тахал болон нүүрлээд буй корона вирусын сөрөг үр дагавар, хүндрэл бэрхшээлийг эрсдэлгүй даван туулах зорилтыг дэвшүүлж, уурхайчид, тэдний ар гэрийг хамгаалж ажиллахын төлөө бүхий л боломж, бололцоог дайчлан ажиллаж, үр дүнд хүрч байгааг онцоллоо. Дэлхийн жишиг, Монголын бахархал байх эрхэм зорилготой Эрдэнэт үйлдвэрийн бодлого тодорхой, ирээдүйд хөтлөх зорилт ил тод, ойлгомжтой байгааг өнөөгийн бодит эдийн засгийн үзүүлэлт, хэрэгжилтийн үр дүнд тулгуурлан танилцуулав.     Ерөнхий захирал Х.Бадамсүрэн үйлдвэрийнхээ үйл ажиллагаа, цаашдын зорилтын талаар танилцуулсны дараа ТӨБЗГ-ын дарга Б.Цэнгэл Эрдэнэт үйлдвэрийн ажилтнуудад хандаж үг хэлэв. “Шинэ коронавирусын тархалтын улмаас үүсээд буй эдийн засгийн хүндрэлийн үед тогтвортой сайн ажиллаж, үйлдвэрлэл, эдийн засгийн зорилтоо амжилттай хэрэгжүүлж байгааг онцлон тэмдэглэсэн. Мөн, Монгол Улсын Засгийн газраас Эрдэнэт үйлдвэрийн үйл ажиллагааг дэмжин, тулгамдаж буй асуудлыг хурдан шуурхай, оновчтой шийдвэрлэхэд онцгой анхаарч ажиллаж байгаа нь тус үйлдвэрийн өнөө болон ирээдүйд сайн нөлөө үзүүлж байна” гэлээ. Түүнчлэн, Эрдэнэт үйлдвэрийн ирээдүй гэрэлтэй байгаад сэтгэл өндөр буйгаа илэрхийлэн, “бодлого, үйл ажиллагаагаа нэгтгэн хамтран ажиллах болно” гэсэн юм. ТӨБЗГ-ын дарга Б.Цэнгэл Эрдэнэт үйлдвэрт хоёр өдөр ажиллана. Тэрээр өнөөдөр тус үйлдвэрийн Ил уурхай, Баяжуулах үйлдвэр, Засвар механикийн завод, Дулааны цахилгаан станц, Ган бөөрөнцгийн цех болон нийгмийн цехүүдийн үйл ажиллагаатай танилцаж, уурхайчдын төлөөлөлтэй уулзана. М.Балжинням Фото Б.Баттөгс Дэлгэрэнгүй...
  • Хайгуулчид геохими, геофизикийн зураглалаа өөрсдөө хийснээр өртөг зардал хэмнэнэ

         “Эрдэнэт үйлдвэр”ТӨҮГ-ын Геологи хайгуулын  экспедицийнхэн  энэ онд 170-аад сая төгрөгийн хэмнэлт гаргах  төлөвлөгөөтэй ажиллаж байна. Стратегийн ач холбогдолтой болон ашиглалтын лицензтэй талбай дээр гадны компаниудыг тендерээр геологийн ажил гүйцэтгүүлэхээс гадна тус экспедицийнхэн өөрсдөө   геохими, геофизикийн зураглал хийж байна. Өрөмдлөгөөс өмнө хийгддэг энэ ажлаар  өрмийг хаана, ямар шалгуураар тавих вэ гэдгийг шийддэг юм. Геохимийн ажлууд саяхан дуусч, геофизикийн ажил үргэлжилж байна. Энэхүү зураглалыг өөрсдийн хүчээр   хийснээр өртөг зардлыг багагүй хэмнэх юм байна.      Тус хамт олон энэ онд 18 мянган тууш метр өрөмдлөгийн ажил гүйцэтгэхээс одоогийн байдлаар төлөвлөгөөт ажлынхаа 50 хувийг хийгээд байна. Экспедицийн хамт олон намар, өвлийн бэлтгэлээ ч  хангажээ. Энэ онд өрөмдлөгийн ажлын байрыг өвөл ажиллах боломжтой болгож, дулаалгатай болгохоор төлөвлөсөн бөгөөд Барилга хяналт, төлөвлөлтийн хэлтэс хариуцан ажиллаж  байна. Я.Энхтуяа   Дэлгэрэнгүй...
  • Өнөөдөр 08 дугаар сарын 12

    Мэдүүштэй... 1. Өнөөдөр жилийн 224 дахь өдөр. Он дуусахад 141хоног үлдлээ.                 2. Эрдэнэт хотод агаарын хэм өдөртөө +21 градус, шөнөдөө +11градус дулаан,хүчтэй аадар бороотой, салхины хурд 6 м/сек байна. (Эх сурвалж: www.tsag-agaar.gov.mn) 3. -Аргын тооллын 8 сарын 12. Лхагва (Буд) гараг. Билгийн тооллын 23, улаагчин гахай, 1 эхтэй 6 хөвгүүн-2 од, суудал огторгуй, мэнгэ 5 шар, үхэхийн барилдлагатай өдөр. Лусын буулттай өдөр.Өдрийн нар ургах/шингэх цаг: 05:43-20:10. Өдрийн сайн цаг: Гахай(21:40-23:40), үхэр(01:40-03:40), луу(07:40-09:40), морь(11:40-13:40), хонь(13:40-15:40), нохой(19:40-21:40) болой.Үс засуулахад эд эдлэл, идээ ундаа олдох төгс жаргалантай сайн. Гэвч могой, морь, хонь жилтнээ цээрлэвэл зохилтой.Хол газар явагсад зүүн хойд зүгт мөрөө гаргавал зохистой.Туулай, хонь, гахай, хулгана жилтнээ аливаа үйлийг хийхэд эерэг сайн. Харин могой, морь жилтнээ сөрөг муу.Замд гарах, равнай үйлдэх, хот балгадын үйл, эд юм бүтээх, бичиг зурхай зурах, ураг садан болох, сүмийн тахил тахилга засах, өөрийн амьдралд тустай ажил хийх, номын хурим, ном заалгах, гөлөг тэжээх, мал адгуус муулах үйлд сайн. Бэрийн үйл, мод таслах, газар малтах, худаг шуудуу малтах, хатуу үйл ажил хийх, лам болох, ном сонсох, гадагш өгөх, хөрөнгө исгэх, үр цацах, мал худалдах, арилжаа хийхэд муу. 4. Монгол банкны энэ өдрийн нэрлэсэн ханшаар АНУ-ын доллар 2846,евро 3349, БНХАУ-ын юань 408, ОХУ-ын рубль 38, Японы иен 26, БНСУ-ын вон 2.4төгрөгтэй тэнцэж байна. (Эх сурвалж: www.gogo.mn) 5.Дэлхийн зах зээл дээр нэг тонн зэс 6356.00 ам.долларын ханштай байна. (Эх сурвалж: www.lme.com)     Эрдэнэт үйлдвэрийн түүхэнд энэ сард... 1965оны 8 сарын 16. Монгол, Чехословакийн геологийн анги Эрдэнэтийн-Овооны орд газарт явуулсан эрэл, үнэлгээний ажлаатайлагнав. 1974 оны 8 сарын 24. МХЗЭ-ийн анхны илгээлтийн эзэд Эрдэнэтийг зорив. 1975 оны 8 сарын 25. БЕЛАЗ-ын жолоочийн курст суралцах анхны хүмүүсийг ЗХУ руу илгээв. 1978 оны 8 сарын 1. Цахилгаан цех байгуулагдав. 1978 оны 8 сарын 12. Анхны зэсийн баяжмалыг гарган авав. 2001 оны 8 сар. Баяжуулах фабрикийн хүчин чадлыг 2 сая тонноор нэмэгдүүлэв. 2013 оны 8 сарын 17. Үйлдвэрийн 35 жилийн ойгоор “Хөдөлмөрийн гавъаны улаан тугийн одон”-гоор шагнагдав.       Дэлгэрэнгүй...
  • Сарын эхний 10 хоногт төлөвлөснөөс 176 мянган тонн хүдэр илүү боловсрууллаа

         Эрдэнэт үйлдвэрийн үйлдвэрлэлийн төлөвлөгөөний 8 дугаар сарын эхний 10 хоногийн үзүүлэлтийг Үйлдвэрлэлийн хэлтсээс мэдээллээ. Энэ сарын эхний 10 хоногийн байдлаар Эрдэнэтийн уурхайчид уулын цул гаргалтыг  төлөвлөснөөс 26 мянган метр кубээр илүү гүйцэтгэж, 103.8 хувиар давуулан биелүүлсэн байна. Хүдэр олборлолтын төлөвлөгөөг 122.4 хувиар биелүүлэв. Өөрөөр хэлбэл, төлөвлөснөөс 176.6 мянган тонн хүдэр илүү олборлож, нийт 966.2 мянган тоннын гүйцэтгэлтэй ажиллажээ.       Харин баяжуулагчид 757.4 мянган тонн хүдэр боловсруулж, төлөвлөгөөг 102.4 хувиар биелүүлсэн байна. Энэ хугацаанд хүдэр дэх зэсийн агуулга 0.474 хувь буюу төлөвлөгөө 102.6 хувиар, молибдений агуулга 0.01830 хувь буюу 134.3 хувиар тус тус биелсэн дүн гарчээ. Зэсийн металл авалтын төлөвлөгөө 100.1 хувиар, молибдений металл авалтын төлөвлөгөө 103.8 хувиар биелсэн бол баяжмал дахь зэс, молибдений металл авалт 105.2-142.7 хувь хүрч биелсэн үзүүлэлттэй байна. Сарын эхний 10 хоногт хуурай жингээр 15298 тонн зэсийн баяжмал, 274 тонн молибдений баяжмал ачуулав. Ачигдсан зэсийн баяжмалын чанарын төлөвлөгөө  102.5 хувиар, молибдений баяжмалын чанар 104 хувиар давж биеллээ. М.Балжинням Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Холбоо барих

     “Эрдэнэт” үйлдвэрийн Дулааны цахилгаан станц дотооддоо цахилгаан, эрчим хүч үйлдвэрлэх болсноор өнгөрсөн онд 6.7 тэрбум төгрөгийн эдийн засгийн үр ашигтай ажилласан байна. Мөн Монгол Улсын эрчим хүчний системд 8-9 тэрбум төгрөгийн ашиг өгснийг тус станцын  Ерөнхий инженер Д.Дарханбаяр мэдээлэлдээ онцлов.
     “Эрдэнэт” үйлдвэрийн Дулааны цахилгаан станцад 48 МВт-ын нийлбэр хүчин чадал бүхий дөрвөн турбингенераторыг суурилуулан өргөтгөж, ашиглалтад оруулснаар тус үйлдвэр Монгол Улсын эрчим хүчний том хэрэглэгчээс  үйлдвэрлэгч рүү шилжиж,  эрчим хүчний салбарт зохих хувь нэмрээ оруулж байна.
      Монгол Улсын Эрчим хүчний зохицуулах хороо, Диспетчерийн үндэсний төвөөс 2018  онд тус станцад 310 сая КВт цахилгаан, эрчим хүч үйлдвэрлэх даалгавар өгчээ. Харин ДЦС-ын хамт олон бүрэн хүчин чадлаа ашиглан ажилласны үр дүнд нийт 321 сая КВт.цаг цахилгаан эрчим хүч үйлдвэрлэн, Төвийн эрчим хүчний системд 317 сая КВт.цаг цахилгаан эрчим хүч нийлүүлсэн байна. Ингэснээр төлөвлөгөөг 107 хувиар давуулан биелүүлжээ. Энэ онд тус станцын хамт олон 324 сая КВт цахилгаан, эрчим хүч үйлдвэрлэн, түгээх зорилт тавин ажиллаж байна.

М.Балжинням



 

     Эрдэнэт үйлдвэрийн уурхайчид 2019 оны нэгдүгээр улирлын үйлдвэрлэлийн төлөвлөгөөт үзүүлэлтээ бүх төрлөөр 100-аас дээш хувиар давуулан биелүүлсэн амжилтаар хоёрдугаар улирлын ажлаа эхэлж байна. Үйлдвэрлэлийн төлөвлөгөөний биелэлт болон бусад үйл ажиллагааны талаар  Үйлдвэрлэлийн хэлтсийн дарга Т.Түмэн-Өлзийгөөс асууж, тодрууллаа.

     -Эрдэнэт үйлдвэрийн бүтээлч хамт олон 2019 оны гуравдугаар сарын болон эхний улирлын үйлдвэрлэлийн ажлаа дүгнэж, дүнгээ гаргалаа. Үйлдвэрлэлийн төлөвлөгөөний биелэлт энэ хугацаанд ямар үзүүлэлттэй байсан талаар мэдээлэл өгнө үү?
     Бид дөрөвдүгээр сарын 1-ний өдөр маркшейдер хэмжилт хийж, таваарын балансаа бодож гаргалаа. Сар хаалтын хурлаараа 2019 оны гуравдугаар сар болон нэгдүгээр улирлын үйлдвэрлэлийн төлөвлөгөөт үзүүлэлтээ дүгнэсэн. Гуравдугаар сард манай хамт олон үйлдвэрлэлийн бүх төлөвлөгөөт үзүүлэлтийг нэр төрөл бүрт 100 буюу түүнээс дээш хувиар давуулан биелүүллээ.
     Өнгөрсөн гуравдугаар сард бид уулын цул гаргалтын төлөвлөгөөг 106.1 хувиар давуулсан. Энэ нь  төлөвлөснөөс 123 мянган метр куб илүү уулын цул гаргасан гэсэн үг.  Хөрс хуулалтын хэмжээ 931.3 мянган метр куб буюу төлөвлөснөөс 86.9 мянган метр куб илүү байж, 100.3 хувиар давж  биеллээ. Хүдэр олборлолт 3 сая 123 мянган тонн буюу төлөвлөгөөнөөс 92 мянган тонн хүдэр олборложээ. Өрөмдлөгийн хэмжээ 42200 тууш метр байв. Ингэснээр төлөвлөгөөнөөсөө 970 тууш метр илүү өрөмдлөгийн ажил гүйцэтгэсэн байна. Ачаа эргэлтийн хувьд 18 сая 350 мянган тонн.км гүйцэтгэлтэй байсан нь төлөвлөгөөнөөс илүү 1 сая 450 мянган тонн км ачаа эргэлтийн ажил хийсэн дүнтэй байна. Баяжуулах үйлдвэрт 2 сая 737 мянган тонн буюу төлөвлөснөөс 95 мянган тонн хүдэр илүү боловсруулснаар биелэлт нь 103.6 хувьд хүрлээ.
     Хүдэр дэх зэсийн агуулга гуравдугаар сард 0.461 хувьтай, молибден 0.0174 хувьтай байсан. Харин зэсийн металл авалт бодит гүйцэтгэлээр 88.32 хувьтай, молибденийн металл авалт 54.60 хувьтай байв.
   Баяжмал гаргалтын хувьд, хуурай жингээр нийт 48657 тонн зэсийн баяжмал үйлдвэрлэснээр 1999 тонныг төлөвлөгөөнөөс илүү гаргаж, төлөвлөгөөт үзүүлэлт 104.3 хувиар давж биеллээ. Энэ сард молибдений баяжмал гаргалт өмнөх нэг, хоёрдугаар сартай харьцуулахад маш сайн үзүүлэлттэй гарсан. Сарын хугацаанд 192 контейнер молибден үйлдвэрлэж, 24 багцыг гадаад худалдаанд ачлаа. Цэвэр металлаар тооцвол зэсийн баяжмал дахь зэс 18143 тонн, молибдений баяжмал дахь молибден 260 тонн байсан нь зэсийн хэмжээгээр 412 тонн, молибденоор 71.5 тонныг  төлөвлөгөөнөөс илүү үйлдвэрлэсэн байна. Сарын хугацаанд 779 вагон зэсийн баяжмал ачсан нь төлөвлөснөөс 6 вагон илүү ачсан үзүүлэлттэй гарлаа.
     Ингээд 2019 оны эхний гурван сарын биелэлтийг улирлаар нь авч үзвэл, манай хамт олон төлөвлөснөөсөө 253 мянган метр куб уулын цул илүү гаргасан байна. 178.8 мянган метр куб хөрс илүү хуулж, 189.2 мянган тонн хүдэр илүү олборлолоо. Мөн Баяжуулах үйлдвэрт 219 мянган тонн хүдрийг төлөвлөснөөс илүү боловсруулжээ. Оны эхний 3 сарын байдлаар цэвэр зэсээр 962 тонн зэс зэсийн баяжмалд, 81 тонн молибден молибдений баяжмалд тус тус үйлдвэрлэлээ. Хэдийгээр оны эхний саруудад уул геологийн нөхцөл хүндрэлтэй байсан ч уурхайчид бид гуравдугаар сард амжилттай ажилласны үр дүнд алдагдлаа нөхөж, үйлдвэрлэлийн төлөвлөгөөт бүх үзүүлэлтээ 100 буюу түүнээс дээш хувиар давуулан биелүүллээ. Нийт үйлдвэрлэлийн хамт олондоо 2019 оны гуравдугаар сар болон эхний улирлын үйлдвэрлэлийн төлөвлөгөөт бүх үзүүлэлтийг 100-аас дээш хувиар давуулан биелүүлж, нэр төртэй ажилласанд баяр хүргэж, улам өндөр амжилт гаргахыг энэ дашрамд хүсэн ерөөе.

     -Оны эхний улиралд техник технологийн шинэчлэлийн хүрээнд хийгдэх ажил хэрхэн үргэлжилж байна вэ?
   -Он гарсаар техник технологийн шинэчлэлийн ажил амжилттай үргэлжилж буйг онцломоор байна. Тухайлбал, Ил уурхайд 12 метр кубын  багтаамжтай шанага бүхий ЭКГ- 12К маркийн экскаватор угсарч, ашиглалтад авахад бэлэн боллоо. ЭКГ-12К экскаваторын угсралтын ажлыг өнгөрсөн хоёрдугаар сарын сүүлээс нэг сарын хугацаанд гүйцэтгэж, одоо 72 цагийн туршилтын тохируулгын ажлыг эхлүүлсэн. Шинэ экскаваторыг уурхайн мөргөцөгт нүүлгэж, аваачсан байгаа. Туршилт тохируулга бүрэн дууссаны дараа албан ёсоор хүлээж авахаар төлөвлөж байна. Мөн манай хамт олон Авто тээврийн байгууллага дээр тус бүр нь 40 тоннын даацтай хоёр ширхэг шинэ БелАЗ машиныг угсарч, ажилд нь гаргалаа.

    -Уурхайн уул геологийн нөхцөл жилээс жилд хүндэрч буйтай холбогдуулан үйлдвэрлэлийн төлөвлөгөөнд ямар өөрчлөлт гарч байна вэ? Тухайлбал, 2019 оны үйлдвэрлэлийн төлөвлөгөөний онцлог юу вэ?
     -Мэдээж, уурхай гүнзгийрэх тусам бидний олборлон, боловсруулж буй хүдэр дэх зэсийн агуулга жил ирэх тусам буурч байгаа. Үүнтэй холбогдуулаад бид техник технологийн  хэд хэдэн арга хэмжээнүүдийг авч хэрэгжүүлэхээр төлөвлөөд байна. Юуны өмнө, манай уурхайчид зэсийн металл авалтын хэмжээг өнөөдрийн хүрсэн түвшингээс буулгахгүй байх зорилт тавиад ажиллаж байна. Өнгөрсөн онд бидний боловсруулсан хүдэр дэх зэсийн агуулга 0.48  хувьтай байсан бол энэ жил 0.461 хувь болж буурсан. Үүнийг дагаад үйлдвэрлэж байгаа баяжмал болон түүнд агуулагдах металлын хэмжээ багагүй түвшинд буурч байна. Тиймээс бид техник зохион байгуулалтын арга хэмжээ авснаар энэ оны бизнес төлөвлөгөөнд тодотгол хийгдэж байна. Өөрөөр хэлбэл, өнгөрсөн онд бид 31 сая тонн хүдэр боловсруулах төлөвлөгөөтэй ажиллаж байсан бол 2019 онд 31.5 сая тонн хүдэр боловсруулахаар төлөвлөн ажиллаж байна.

     -Өнгөрсөн 2018 онд бид бүхий л хүч чадлаа дайчлан ажиллаж, түүхэн дээд амжилтад хүрсэн гэж Ерөнхий захирал онцолж байсан. Гэтэл энэ амжилтаа ахиулах даалгаврыг Төрийн өмчийн бодлого зохицуулалтын газраас өгөөд байгаа. Үүнийг биелүүлэх боломж ямар байгаа вэ?
     -Бид аль болохоор 2018 оны амжилтыг бататгах зорилттой ажиллаж байна. Төрийн өмчийн бодлого зохицуулалтын газраас өгсөн чиглэлийг биелүүлэхийн тулд чармайн ажиллана. Түрүүн би хэлсэн, энэ онд 31.5 сая тонн хүдэр боловсруулах том зорилт бид өмнөө тавьсан. Уурхайчид бид нэг зорилготой гар сэтгэл нийлж ажилласнаар энэ зорилтоо биелүүлж чадна гэдэгт итгэлтэй байгаа.

     -Монгол Улсын Засгийн Газраас Эрдэнэт үйлдвэрт онц дэглэм тогтоосонтой холбогдуулан Ерөнхий захирлын “Онц дэглэмийн үед авч хэрэгжүүлэх зарим арга хэмжээ”-ний тухай тушаал батлагдан, мөрдөж байгаа. Сахилга хариуцлага өндөр хэмжээнд ажиллахаар даалгасан уг тушаал хэрхэн хэрэгжиж байна вэ?
     -“Онц дэглэмийн үед авч хэрэгжүүлэх зарим арга хэмжээ”-ний тухай Ерөнхий захирлын тушаалын дагуу үйлдвэрлэл хариуцсан захирлаар батлуулсан ажлын төлөвлөгөөг боловсруулан ажиллаж байна. Одоогийн байдлаар, үйлдвэрлэл техникийн ямар нэгэн сул зогсолтгүй, технологийн доголдол хоцрогдолгүй хэвийн үргэлжилж байна. Мөн үйлдвэрийн бүх цех нэгжийн удирдлагыг хамруулсан хариуцлагатай жижүүрийг амралт, баяр ёслолын өдрүүдэд хуваарийн дагуу ажиллуулж байгаа. Аливаа зөрчил дутагдалгүй хэвийн тогтвортой ажиллаж буйг дахин хэлье. 

      -Цаг үеийн ажлууд ямар явцтай байна вэ? Тухайлбал, хавар зуны бэлтгэл гэх мэт...?
     -Манай хэлтсээс үйлдвэрийн бүтцийн нэгжүүдийн хавар зуны болон намар өвлийн бэлтгэл ажлын төлөвлөгөөг нэгтгэн гаргаж, биелэлтэд нь хяналт тавьж ажилладаг. Өнөөдрийн байдлаар, хавар зуны бэлтгэл ажлыг эхлүүлэхээр цех нэгжүүдэд ажлын чиглэл өгөөд байна.

     -Үйлдвэрлэлийн үйл ажиллагааны амжилт, ажлын бүтээмжид уурхайчдын ур чадвар, сэтгэл зүтгэл, залгамж чанар хамгийн гол хүчин зүйл болдог. Өдөр тутмын үйлдвэрлэлийн үйл ажиллагааг хариуцан ажилладаг хүний хувьд энэ талаар ямар бодолтой байна вэ?
     -Миний бодлоор, манай үйлдвэрийн уурхайчид ажилдаа эзэн болсон, мэргэшсэн хамт олон. Хэдийгээр ахмад үе маань гавьяаны амралтаа авч, хүний нөөцийн хөдөлгөөн ихэссэн ч дараагийн үеэр эгнээгээ тэлж байна. Багш шавийн барилдлага, мэргэшсэн инженер техникийн ажилтнуудынхаа  чадвар, туршлаганд тулгуурлан үйлдвэрлэл амжилттай үргэлжилж буйд сэтгэл өндөр явдаг. Түүнчлэн бид шинэ залуу ажилтнуудаа сургаж, дадлагажуулахад онцгой анхаарч байна. Товчхон хэлэхэд, манай үйлдвэр өндөр мэдлэг чадвартай хүний нөөцөөр хангагдсан гэж хэлж болно.


М.Балжинням  
 

 

Мэдээний төрөл

Календарь

« 4-р сар 2019 »
Да Мя Лх Пү Ба Бя Ня
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          

Зургийн цомог