• Төрийн өмчийн бодлого зохицуулалтын газрын дарга Б.Цэнгэлээр ахлуулсан ажлын хэсгийнхэн хоёр дахь өдрөө Орхон аймагт ажиллаж байна

         Ажлын хэсгийнхэн өчигдөр Эрдэнэт үйлдвэрийн бүтцийн нэгжүүдийн үйл ажиллагаа, өргөтгөл шинэчлэл, бүтээн байгуулалтын ажлын явцтай танилцсан бол өнөөдөр Орхон аймаг дахь Төрийн өмчит үйлдвэрийн газруудаар орлоо.      Мөн Эрдэнэт үйлдвэрийн Ус хангамжийн цехийн Цэвэрлэх байгууламжийн үйл ажиллагааг газар дээр нь очиж үзлээ. Эрдэнэт хотын хүн ам, албан байгууллагыг ундны болон техникийн усаар тасралтгүй найдвартай хангадагаараа Ус хангамжийн цехийн Цэвэрлэх байгууламж нь онцлог талтай. Цэвэрлэх байгууламж нь хоногт 12 мянга орчим шоо метр бохир усыг татан, дөрвөн үе шаттайгаар цэвэрлэж, зайлуулах хүчин чадалтайгаар ажилладаг иж бүрэн техник, тоног төхөөрөмжтэй байгууламж юм.      Төрийн өмчийн бодлого зохицуулалтын газрын дарга Б.Цэнгэл болон албаны бусад хүмүүс Цэвэрлэх байгууламжийн бохир усанд байгаа хог хаягдал, элс, лаг, өөх тосыг арилган, цэвэрлэж, халдваргүйжүүлэлт хүртэл хийгддэг үе шат бүрийг нарийвчлан үзэж сонирхлоо. Энэ үеэр Эрдэнэт үйлдвэрийн бүтцийн нэгжүүд бүгд сайн ажиллаж байна гэж онцоллоо.      Ажлын хэсгийнхэн одоо “Эрдэнэт үйлдвэр” ТӨҮГ-ын Сэлэнгэ амралт, аялал жуулчлалын цогцолбор дахь Ногоон хөгжлийн төвийн болон бусад бүтээн байгуулалттай танилцаж байна.     А.Бямбамаа Фото: Ш.Лхамсүрэн Дэлгэрэнгүй...
  • Өнөөдөр 08 дугаар сарын 14

    Мэдүүштэй... 1. Өнөөдөр жилийн 226дахь өдөр. Он дуусахад 139 хоног үлдлээ.                 2. Эрдэнэт хотод агаарын хэм өдөртөө +23градус, шөнөдөө +11градус дулаан,хүчтэй аадар бороотой, салхины хурд 6 м/сек байна. (Эх сурвалж: www.tsag-agaar.gov.mn) 3. Аргын тооллын 8 сарын 14. Баасан (Сугар) гараг. Билгийн тооллын 25, шарагчин үхэр, гөрөөсөн толгой-4 од, суудал уул, мэнгэ 3 хөх, үл тохирохын барилдлагатай өдөр. Овоо тахих, лусын буулттай өдөр.Өдрийн нар ургах/шингэх цаг: 05:46-20:06. Өдрийн сайн цаг: Могой(09:40-11:40), бич(15:40-17:40), гахай(21:40-23:40), бар(03:40-05:40), туулай(05:40-07:40) болой.Үс бүү засуул нүд бүрэлзэн улцайна муу цээрлэвэл зохилтой.Хол газар явагсад баруун хойд зүгт мөрөө гаргавал зохистой.Могой, тахиа, үхэр, бич жилтнээ аливаа үйлийг хийхэд эерэг сайн. Харин хонь, бар, туулай жилтнээ сөрөг муу. Замд гарах, тариалангийн үйл, үхэгсдийн үйл, худалдаа хийх, эм найруулах, мал зарах, хот суурин, байшин барилгын суурь тавих, хулгай, дээрэм дарах, дайсныг номхтгох үйлд сайн. Амраг садан бололцох, багш шавь барилдах, өндөр суудалд сууж эхлэх, туг дарцаг хийсгэх, урлан бүтээх, дархлах, эрдэм ухаанд суралцах, цэрэг хөдөлгөх, шинэ малгай, хувцас өмсөх, эд хөрөнгө зээлдүүлэх, нэхэх, нүүдэл хийх, ажилчин шүтүүлэхэд муу. 4. Монгол банкны энэ өдрийн нэрлэсэн ханшаар АНУ-ын доллар 2847,евро 3345, БНХАУ-ын юань 409, ОХУ-ын рубль 38, Японы иен 26, БНСУ-ын вон 2.4төгрөгтэй тэнцэж байна. (Эх сурвалж: www.gogo.mn) 5.Дэлхийн зах зээл дээр нэг тонн зэс 6380.00 ам.долларын ханштай байна. (Эх сурвалж: www.lme.com)     Эрдэнэт үйлдвэрийн түүхэнд энэ сард... 1965оны 8 сарын 16. Монгол, Чехословакийн геологийн анги Эрдэнэтийн-Овооны орд газарт явуулсан эрэл, үнэлгээний ажлаатайлагнав. 1974 оны 8 сарын 24. МХЗЭ-ийн анхны илгээлтийн эзэд Эрдэнэтийг зорив. 1975 оны 8 сарын 25. БЕЛАЗ-ын жолоочийн курст суралцах анхны хүмүүсийг ЗХУ руу илгээв. 1978 оны 8 сарын 1. Цахилгаан цех байгуулагдав. 1978 оны 8 сарын 12. Анхны зэсийн баяжмалыг гарган авав. 2001 оны 8 сар. Баяжуулах фабрикийн хүчин чадлыг 2 сая тонноор нэмэгдүүлэв. 2013 оны 8 сарын 17. Үйлдвэрийн 35 жилийн ойгоор “Хөдөлмөрийн гавъаны улаан тугийн одон”-гоор шагнагдав.     Дэлгэрэнгүй...
  • Өглөөний сэргээш цуврал контент #25: Хоролгаравын АМАРЗАЯА

    -Төгссөн сургууль: Монгол Улсын Политехникийн Дээд сургууль -Мэргэжил: Ашигт малтмалын ордын эрэл зураглалын геологич инженер -Ажилласан туршлага: Геологи, уул уурхайн салбарт 30 жил ажилласан бөгөөд Эрдэнэт үйлдвэрийн Геологи хайгуулын экспедицид техник геологичоос тэргүүлэх геологич болтлоо дэвшин ажиллаж байна. -Мэргэжил дээшлүүлсэн байдал: Монгол Улсын Төрийн захиргаа, удирдлагын хөгжлийн төвийн бизнесийн удирдлагыг “Удирдлагын арга зүйч” мэргэжлээр, 2011 онд геологийн магистр, 2012 онд “зэс профирын ордын уурхайн геологи” мэргэшлээр Мэргэшсэн инженер, Монголын геологи, уул уурхайн мэргэжлийн институтийн ахмад гишүүн. -Чин хүсэл: Уул уурхайн салбарын амин сүнс нь ордын нөөц баялаг байдаг. Тиймээс, Эрдэнэт үйлдвэрийн Геологи хайгуулын экспедицийн хайгуулчин хамт олон дараагийн том Эрдэнэтийг хайх эрлийн эзэд билээ. Тэдний дунд эрчүүдтэй мөр зэрэгцэн ажиллаж буй, арвин туршлагын эзэн тэрээр сурсан мэдсэн эрдэм мэдлэгээ, эзэмшсэн мэргэжлийнхээ үнэ цэнэтэй хослуулан үйлдвэрийнхээ нөөц баялгийг нэмэгдүүлэх, шинэ орд илрүүлэх, шинэ нөөц бий болгох эрхэм хүсэлтэй геологич юм. -Таны амьдралын сэргээш юу вэ, хэнээс, юунаас урам зориг, эрч хүч авдаг вэ? Хамгийн эрхэм гэр бүл хань, үр хүүхэд, ач зээ нарынхаа халуун дотно яриа хөөрөөнөөс амьдралын эрч хүчийг авдаг. Мөн Эрдэнэт хот, “Эрдэнэт үйлдвэр” ТӨҮГ, хамт олон, найз нөхдөөсөө урам зориг авдаг. Түүнчлэн ажил мэргэжлийн онцлог болсон хайгуулын хээрийн ажлаасаа эерэг энерги эрч хүчийг олж авдаг. -Хийж байгаа ажлын тань онцлог юу вэ? Эрдэнэт үйлдвэрийн маань ажиллагсад бор уулын минь буян гэж амны уншлага болон хэлэх дуртай байдаг. Харин миний хувьд хэдэн “бор” геологичдын минь хичээл зүтгэл буян нь өнөөдрийн Эрдэнэт үйлдвэрийн тогтвортой үйл ажиллагааг хангаж байгаа гэж хэлэх дуртай. Миний, бидний ажил өнөөдрийн эрдэнэт үйлдвэрийг тасралтгүй, амжилттай ажиллуулахад чиглэгдэн, зэс молибдены хайгуулын ажлыг үе шаттайгаар явуулж байгаа. Нөөц баялаг нь байхгүй бол үйлдвэр, цаашлаад хот ч үгүй байх байсан. Бидний ажил анхдагчийн анхдагч нь юм. Ийм учраас ажил мэргэжил, хамт олноороо бахархах сэтгэл өөрийн эрхгүй ундардаг даа. -Та ойрын хугацаанд ямар ажил амжуулахаар төлөвлөж байна вэ? “Эрдэнэт үйлдвэр” ТӨҮГ нь жил бүр геологи хайгуулын ажилд тодорхой хэмжээний хөрөнгө оруулалтыг зарцуулж байна. Хөрөнгө оруулалтаар гүйцэтгэх ажлын хүрээнд геотехникийн томоохон цогц ажлыг төлөвлөсөн. Манай уурхайн хувьд геотехникийн асуудал нэлээд хожуу хөндөгдөж байгаа. Геотехникийн судалгаа хийгдээгүй уурхайд хүн амь насаа алдах, машин техникээ эвдэхээс эхлээд уурхай нь өөрөө ашиггүй, асар их хэмжээний алдагдал хүлээх зэрэг эрсдэлтэй байдаг. Тиймээс хөгжингүй орнуудад уул уурхайн компани хувьцаа гаргахад хөрөнгийн бирж нь геотехникийн судалгаа хийсэн байхыг шаарддаг. Тийм ч учраас бид энэ томоохон ажилд анхаарал хандуулж байна. -Ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаардаг вэ? Амьдралдаа баримталдаг хэд хэдэн дадал надад байдаг. Хийх ажлаа тогтмол, байнга төлөвлөж  тэмдэглэдэг. Өглөө бүр эрт босож, явган алхалт хийх,  ажлаа 7 цагт эхэлдэг гэх зэрэг... Сүүлийн жилүүдэд хайгуулын ажлыг олон улсын JORC стандартад нийцүүлэн гүйцэтгэх болсонтой холбоотойгоор хэлний мэдлэг зайлшгүй шаардагдаж байгаа. Мөн удирдах албан тушаалтны хувьд бусдыг манлайлах, тэдэнд нөлөөлөх ур чадвартаа анхаарал хандуулж байгаа. -Таны хамгийн том мөрөөдөл юу вэ? Дэлхийн алдартай ашигт малтмалын ордуудтай танилцах гео аялал хийхийг мөрөөддөг. -Боловсролын талаарх таны бодол? Хүн зогсонги, тайван, идэвхгүй  байдалд орохгүйн тулд уураг тархиа байнга идэвхжүүлж байх хэрэгтэй гэж боддог.  Үүний тулд л унших, хөгжих нь чухал. Боловсрол гэдэг өөрөө өргөн утгатай ойлголт. Эрдэм номын боловсрол, ухамсрын боловсрол, төлөвшил, сахилга бат, хариуцлагын боловсрол, хувь хүний суурь боловсрол гээд л дурдвал их зүйл бий. -Одоо хийж буй ажил таны мөрөөдлийн ажил мөн үү? Анх геологич мэргэжлийг сонгохдоо хувь тавилангаа л дагасан мэт санагддаг. Тухайн үед охидын сонгож болох олон мэргэжлийн сургууль байсан ч би энэ сонголтыг хийсэндээ үргэлж баярлаж, бахдаж явдаг. -Залуучуудад хэлэх таны зөвлөгөө? Эрсдэл хийдэг хүн л урагшилдаг. Хаширласаар байвал байрандаа л үлдэнэ. Тиймд хамгийн том өрсөлдөгч болох өөртэйгөө сайн тулалдах хэрэгтэй. Мөн хувийн сахилга бат, хариуцлагатай байхыг хичээгээрэй. Хамгийн чухал зүйл нь хийж байгаа ажилдаа дуртай, түүндээ чин сэтгэлээсээ ханддаг байвал амжилт өөрөө ирнэ. -Эрдэнэт үйлдвэр таны харах өнцөг, үзэл бодол, итгэл үнэмшилд хэрхэн нөлөөлж байна вэ? Эрдэнэт үйлдвэр 10 жилийн ойгоо тэмдэглэж дуусаад удаагүй тэр мөчид би энэ их айлын босгыг алхаж, охин нь болж явсан дурсамж минь сэтгэлд тодхон санагдаж байна. Монголын мянга мянган залуучуудын ажиллах дуртай, хүсээд ч орох боломж тэр бүр байдаггүй, энэ уул уурхайн салбарын их айлд би багтаж өнөөдрийг хүртэл ажиллаж байгаадаа өөрийгөө хамгийн азтайд тооцож, бахархдаг. Тэр тусмаа гарын 10 хуруунд багтахааргүй цөөхөн геологич эмэгтэйчүүдийн нэг нь гэдэгтээ хувь тавиландаа талархаж явдаг. Энэ хугацаанд ордын ашиглалтын хайгуул, гүйцээх хайгуулын ажлуудыг удирдан явуулж, нөөцийн тайланг бичилцэж, нөөц өсгөсөн хүндтэй гавьяатай геологичдын эгнээг бүрдүүлж яваа минь ажил мэргэжилдээ хайртай геологич хүний хамгийн сайхан зүйл гэж боддог доо. Эрдэнэт үйлдвэр энэ л эрчээрээ зогсолтгүй урагшлах, хөгжих итгэл дүүрэн үйлдвэр байх болно гэдэгт би итгэдэг. Тиймдээ ч үйлдвэр дагасан хот сүндэрлэсээр л байна.     Надад, танд ч амархан олдоо нь үгүй Нар, саранд ч ижилдэн дасахад бэрх Хүнд хүчир бүхнийг өөрийн итгэлээр дийлсэн Хээр тайгын эрэлчин  Би хайгуулчин бүсгүй   Уяхан цагаан хуруу нь хатуужин борлож Улаа бутарсан уруул нь хүрэнтэн хатсан ч Гуалиг бүсгүй бие нь уран байгальдаа л зохицсон Газар эхийн сурвалжлагч Би хайгуулчин бүсгүй Дэлгэрэнгүй...
  • Нийгмийн чиглэлээр шийдлээ хүлээж буй зарим асуудалд анхаарч, дэмжихийг хүслээ

         Эрдэнэт үйлдвэрт ажиллаж буй ТӨБЗГ-ын дарга Б.Цэнгэл өнөөдөр үдээс хойш тус үйлдвэрийн нийгмийн цехүүдээр орж, үйл ажиллагаатай нь танилцав. Байгуулагдсан цаг үеэсээ нийгмийн цогц хөтөлбөрийг үйлдвэрлэлийн бодлоготойгоо зэрэгцүүлэн хэрэгжүүлж ирсэн Эрдэнэт үйлдвэр дэргэдээ 10 гаруй нийгмийн цехтэй. Тэдгээрээр дамжуулан уурхайчид болон Эрдэнэтчүүдэд эрүүл мэнд, боловсрол, соёл урлаг, спорт, байгаль орчны чиглэлээр үйлчилгээ, үйл ажиллагааг хүргэж байна.      Нийгмийн цехүүдийн үйл ажиллагааг зангидаж, ажиллагсдад чиглэсэн нийгмийн хөгжлийн болоод хамгааллын асуудлыг нэгтгэн хэрэгжүүлж буй Нийгмийн харилцааны хэлтсийн дарга Д.Өнөбат "Нийгмийн бодлогын хэрэгжилт" сэдвээр танилцуулга хийж, хөрөнгө оруулалт бүтээн байгуулалтын төсөл хөтөлбөрийн талаар мэдээлэл өглөө. Мөн "Эрдэнэт цогцолбор" дээд сургууль, Соёл, урлагийн цогцолбор, Орос сургууль, Спорт цогцолборын удирдлагууд өөрсдийн үйл ажиллагааг танилцуулж, шийдлээ хүлээж буй зарим асуудалд анхаарч, дэмжин ажиллахыг ТӨБЗГ-ын даргад уламжлав. Түүнчлэн, хөрөнгө оруулалтын бодлогын хүрээнд бүтээн босгож буй Соёл, спортын “Эрдэнэт” цогцолборын барилгын ажлын явцтай танилцлаа.         М.Балжинням Фото Б.Баттөгс Дэлгэрэнгүй...
  • Өргөтгөлийн ажлыг богино хугацаанд чанартай гүйцэтгэхээр шамдаж байна

         Баяжуулах үйлдвэрийн Өөрөө нунтаглах хэсгийн Өргөтгөлийн ажлын хэсгийн тав дахь удаагийн хуралдаан боллоо. Барилгын ажлын гүйцэтгэгчээр  “Эрдэнэт лайт” компани  ажиллаж байгаа бөгөөд  “Орхон-Од” компаниар  хүч нэмэгдүүлснээр өнгөрсөн даваа гарагаас 80 хүн барилгын ажилд оролцож байна. Үйлдвэрийн зүгээс барилгын ажлыг шуурхай явуулах бүхий л нөхцөл бололцоогоор ханган ажиллахын зэрэгцээ дүрэм журмын дагуу хяналтаа ч сулруулахгүй гэсэн байр суурьтай  байна.        Уг бүтээн байгуулалтын барилгын ажлын хүрээнд 19800 метр куб бетон цутгах төлөвлөгөөтэйгөөс өнөөдрийн байдлаар 350 метр куб орчмыг цутгасан байна. Гурван тээрмийн суурийн эхний шатыг өнөөдрөөс цутгаж эхэллээ. Өргөтгөлийн барилгын ажилд 100 вагон цемент шаардлагатай гэсэн  тооцоо гарчээ. Барилгын гүйцэтгэгч компани дотоодын үйлдвэрлэлээ дэмжих үүднээс “Мак”, “Хөтөл” компаниудаас цементээ авч байна. Эдгээр үйлдвэрийн үйл ажиллагаа тасралтгүй сайн явагдах нь өргөтгөлийн ажилд  шууд хамааралтай юм. Барилгын бусад материалын хувьд ч тасалдахгүй гэж гүйцэтгэгч компаниас мэдээлж байна.         Энэ удаагийн хуралдаанаас Мэдээллийн технологийн хэлтэстэй хамтран барилгын ажлын талбайд орчин үеийн камер суурилуулах шийдэл гаргалаа. Энэ нь ажлын үе шат бүрийг бичиж, электрон хэлбэрээр хадгалан үлдээх  зорилготой юм. Уг камерын тусламжтайгаар барилгын ажлын явцыг үйлдвэрийн удирдлагууд өрөөнөөсөө хянах, үндсэн тоног төхөөрөмж үйлдвэрлэгч “Найпу” компанийнхан ч барилгын ажлын явцтай танилцаж, санаа оноогоо хэлэлцэх боломж бүрдэх юм байна.        Хил хаагдсанаас “Найпу” компанийн төлөөлөгчидтэй цахимаар харилцаж зураг төслөө тодруулахын зэрэгцээ ажлын явцаа мэдээлж байна. Өргөтгөлийн барилгын ажилтай үндсэн тоног төхөөрөмжийн үйлдвэрлэл, зураг төслийн зарим ажлууд зэрэгцэн хийгдэж байгаа юм байна.      “2021 оны наймдугаар сард өргөтгөлийг бүрэн дуусгахаар шахуу төлөвлөгөөтэй ажиллаж байна. Ирэх онд  өргөтгөл ашиглалтад орох байдлаар  үр ашгаа тооцож, төсвийн өмнө хүлээх үүргээ төлөвлөсөн. Тиймээс манай зүгээс болон гүйцэтгэгч, захиалагч байгууллагууд аль аль нь богино хугацаанд өндөр хариуцлагатай ажиллаж байгаа” гэж Барилга байгууламж, хяналт төлөвлөлтийн албаны инженер, Өргөтгөлийн ажлын хэсгийн нарийн бичиг Д.Баярмаа мэдээллээ.        Нийтдээ 125 орчим сая ам долларын өртөгтэй энэхүү өргөтгөл ашиглалтад орсноор Баяжуулах үйлдвэр хүчин чадлаа 6 сая тонноор нэмэгдүүлэх нөхцөл бүрдэх юм.     Я.Энхтуяа Фото: Ш.Лхамсүрэн   Дэлгэрэнгүй...
  • Б.Цэнгэл: Эрдэнэт үйлдвэрийнхэн үйлдвэрлэлээ цар тахлын үед ч амжилттай ажиллуулж байгаа нь харагдаж байна

         Төрийн өмчийн бодлого, зохицуулалтын газрын дарга Б.Цэнгэл томилолтын баг бүрэлдэхүүний хамт Эрдэнэт үйлдвэрийн үйлдвэрлэлийн үйл ажиллагаатай биечлэн танилцлаа. Ил уурхай, Баяжуулах үйлдвэр, Засвар механикийн завод зэрэг үндсэн үйлдвэрлэлийн цех болон Дулааны цахилгаан станц, Ган бөөрөнцгийн цехүүдийн удирдлагууд өнөөгийн үйл ажиллагаа, технологийн шинэчлэл, шинэ бүтээн байгуулалтын явц, төсөл хөтөлбөрүүдийн хэрэгжилтийн талаар танилцуулахын зэрэгцээ тулгамдаж буй асуудлуудаа ч ярьж, санал бодлоо солилцов. “Жилд 32 сая тонн хүдэр боловсруулах хүчин чадалтай, үйлдвэрлэлийн гол зүрх болсон, Баяжуулах үйлдвэр шинэ өргөтгөлийн бүтээн байгуулалтын ажлаа үргэлжлүүлж байна. Энэ нь, хүдэр боловсруулалтын хүчин чадлын хэмжээг 6 саяар өсгөх технологи бүхий, Өөрөө нунтаглах хэсэгт баригдаж буй өргөтгөл юм. Уг бүтээн байгуулалтыг ирэх оны наймдугаар сард ашиглалтад оруулахаар төлөвлөж байгаа бөгөөд барилга байгууламжийн ажил өнөөдрийн байдлаар 45 хувийн гүйцэтгэлтэй байна” гэж Баяжуулах үйлдвэрийн дарга М.Отгон онцлов. Түүнчлэн, жилээс жилд уул геологийн нөхцөл хүндэрч, хүдрийн агуулга буурч байгаатай холбогдуулан авах арга хэмжээ, Засвар механикийн заводын Цутгуурын цехийн шинэ өргөтгөлийн үр өгөөж, хэрэглэгчээс үйлдвэрлэгчийн эгнээнд шилжсэн ДЦС-ын найдвартай ажиллагаа, Ган бөөрөнцгийн цехийн шинэ технологи, үйл ажиллагаа зэрэг цех бүрийн онцлог ажилтай ТӨБЗГ-ын дарга газар дээр нь танилцлаа.         Тэрээр, Эрдэнэт үйлдвэрийн үйлдвэрлэлийн үйл ажиллагаа болон катодын зэс үйлдвэрлэгч “Эрдмин” компанитай танилцсаны дараа Эрдэнэтийн уурхайчдын ажил үйлсийн талаар товч дүгнэхдээ: “Улс орны өмнө хүлээсэн үүргээ нэр төртэй биелүүлж, төсвийн орлогын гол ачааг нуруундаа үүрч яваа Эрдэнэт үйлдвэрээс орон нутгийн томилолтоо эхлүүлж байна. “Ковид-19” цар тахлын тархалтын улмаас онцгой горимоор ажиллаж буй энэ цаг үед Төрийн өмчит үйлдвэрүүдийн хувьд аль болох алдагдал багатай ажиллах чиглэл баримталж байна. Харин Эрдэнэт үйлдвэрийнхэн энэ үеийг эсрэгээр нь үр ашгаа дээшлүүлж, хөрөнгө оруулалтаа нэмэгдүүлэх боломж болгон ажиллаж байгаа нь харагдаж байна. Энэ нь бусад үйлдвэрлэгчид хүлээн зөвшөөрөхүйц сайн туршлага, үлгэр дуурайл болно гэдгийг тэмдэглэе” гэсэн юм.               М.Балжинням Фото Б.Баттөгс     Дэлгэрэнгүй...
  • Төрийн өмчийн бодлого, зохицуулалтын газрын дарга Б.Цэнгэл Эрдэнэт үйлдвэрт ажиллаж байна

         Төрийн өмчийн бодлого, зохицуулалтын газрын дарга Б.Цэнгэл албаны хүмүүсийн хамт "Эрдэнэт үйлдвэр" ТӨҮГ-ын үйл ажиллагаатай танилцаж байна. Тэрээр томилолтын албан ажлаа тус үйлдвэрийн удирдлагын баг болон ерөнхий захиргааны ажилтнуудтай уулзаж эхэлсэн. Уулзалтын эхэнд "Эрдэнэт үйлдвэр" ТӨҮГ-ын Ерөнхий захирал Х.Бадамсүрэн үйлдвэрийн үйл ажиллагааг "Эрдэнэт үйлдвэрийн өнөө ба ирээдүй" сэдвийн хүрээнд дэлгэрэнгүй танилцуулав. Мөн дэлхий нийтэд цар тахал болон нүүрлээд буй корона вирусын сөрөг үр дагавар, хүндрэл бэрхшээлийг эрсдэлгүй даван туулах зорилтыг дэвшүүлж, уурхайчид, тэдний ар гэрийг хамгаалж ажиллахын төлөө бүхий л боломж, бололцоог дайчлан ажиллаж, үр дүнд хүрч байгааг онцоллоо. Дэлхийн жишиг, Монголын бахархал байх эрхэм зорилготой Эрдэнэт үйлдвэрийн бодлого тодорхой, ирээдүйд хөтлөх зорилт ил тод, ойлгомжтой байгааг өнөөгийн бодит эдийн засгийн үзүүлэлт, хэрэгжилтийн үр дүнд тулгуурлан танилцуулав.     Ерөнхий захирал Х.Бадамсүрэн үйлдвэрийнхээ үйл ажиллагаа, цаашдын зорилтын талаар танилцуулсны дараа ТӨБЗГ-ын дарга Б.Цэнгэл Эрдэнэт үйлдвэрийн ажилтнуудад хандаж үг хэлэв. “Шинэ коронавирусын тархалтын улмаас үүсээд буй эдийн засгийн хүндрэлийн үед тогтвортой сайн ажиллаж, үйлдвэрлэл, эдийн засгийн зорилтоо амжилттай хэрэгжүүлж байгааг онцлон тэмдэглэсэн. Мөн, Монгол Улсын Засгийн газраас Эрдэнэт үйлдвэрийн үйл ажиллагааг дэмжин, тулгамдаж буй асуудлыг хурдан шуурхай, оновчтой шийдвэрлэхэд онцгой анхаарч ажиллаж байгаа нь тус үйлдвэрийн өнөө болон ирээдүйд сайн нөлөө үзүүлж байна” гэлээ. Түүнчлэн, Эрдэнэт үйлдвэрийн ирээдүй гэрэлтэй байгаад сэтгэл өндөр буйгаа илэрхийлэн, “бодлого, үйл ажиллагаагаа нэгтгэн хамтран ажиллах болно” гэсэн юм. ТӨБЗГ-ын дарга Б.Цэнгэл Эрдэнэт үйлдвэрт хоёр өдөр ажиллана. Тэрээр өнөөдөр тус үйлдвэрийн Ил уурхай, Баяжуулах үйлдвэр, Засвар механикийн завод, Дулааны цахилгаан станц, Ган бөөрөнцгийн цех болон нийгмийн цехүүдийн үйл ажиллагаатай танилцаж, уурхайчдын төлөөлөлтэй уулзана. М.Балжинням Фото Б.Баттөгс Дэлгэрэнгүй...
  • Хайгуулчид геохими, геофизикийн зураглалаа өөрсдөө хийснээр өртөг зардал хэмнэнэ

         “Эрдэнэт үйлдвэр”ТӨҮГ-ын Геологи хайгуулын  экспедицийнхэн  энэ онд 170-аад сая төгрөгийн хэмнэлт гаргах  төлөвлөгөөтэй ажиллаж байна. Стратегийн ач холбогдолтой болон ашиглалтын лицензтэй талбай дээр гадны компаниудыг тендерээр геологийн ажил гүйцэтгүүлэхээс гадна тус экспедицийнхэн өөрсдөө   геохими, геофизикийн зураглал хийж байна. Өрөмдлөгөөс өмнө хийгддэг энэ ажлаар  өрмийг хаана, ямар шалгуураар тавих вэ гэдгийг шийддэг юм. Геохимийн ажлууд саяхан дуусч, геофизикийн ажил үргэлжилж байна. Энэхүү зураглалыг өөрсдийн хүчээр   хийснээр өртөг зардлыг багагүй хэмнэх юм байна.      Тус хамт олон энэ онд 18 мянган тууш метр өрөмдлөгийн ажил гүйцэтгэхээс одоогийн байдлаар төлөвлөгөөт ажлынхаа 50 хувийг хийгээд байна. Экспедицийн хамт олон намар, өвлийн бэлтгэлээ ч  хангажээ. Энэ онд өрөмдлөгийн ажлын байрыг өвөл ажиллах боломжтой болгож, дулаалгатай болгохоор төлөвлөсөн бөгөөд Барилга хяналт, төлөвлөлтийн хэлтэс хариуцан ажиллаж  байна. Я.Энхтуяа   Дэлгэрэнгүй...
  • Өнөөдөр 08 дугаар сарын 12

    Мэдүүштэй... 1. Өнөөдөр жилийн 224 дахь өдөр. Он дуусахад 141хоног үлдлээ.                 2. Эрдэнэт хотод агаарын хэм өдөртөө +21 градус, шөнөдөө +11градус дулаан,хүчтэй аадар бороотой, салхины хурд 6 м/сек байна. (Эх сурвалж: www.tsag-agaar.gov.mn) 3. -Аргын тооллын 8 сарын 12. Лхагва (Буд) гараг. Билгийн тооллын 23, улаагчин гахай, 1 эхтэй 6 хөвгүүн-2 од, суудал огторгуй, мэнгэ 5 шар, үхэхийн барилдлагатай өдөр. Лусын буулттай өдөр.Өдрийн нар ургах/шингэх цаг: 05:43-20:10. Өдрийн сайн цаг: Гахай(21:40-23:40), үхэр(01:40-03:40), луу(07:40-09:40), морь(11:40-13:40), хонь(13:40-15:40), нохой(19:40-21:40) болой.Үс засуулахад эд эдлэл, идээ ундаа олдох төгс жаргалантай сайн. Гэвч могой, морь, хонь жилтнээ цээрлэвэл зохилтой.Хол газар явагсад зүүн хойд зүгт мөрөө гаргавал зохистой.Туулай, хонь, гахай, хулгана жилтнээ аливаа үйлийг хийхэд эерэг сайн. Харин могой, морь жилтнээ сөрөг муу.Замд гарах, равнай үйлдэх, хот балгадын үйл, эд юм бүтээх, бичиг зурхай зурах, ураг садан болох, сүмийн тахил тахилга засах, өөрийн амьдралд тустай ажил хийх, номын хурим, ном заалгах, гөлөг тэжээх, мал адгуус муулах үйлд сайн. Бэрийн үйл, мод таслах, газар малтах, худаг шуудуу малтах, хатуу үйл ажил хийх, лам болох, ном сонсох, гадагш өгөх, хөрөнгө исгэх, үр цацах, мал худалдах, арилжаа хийхэд муу. 4. Монгол банкны энэ өдрийн нэрлэсэн ханшаар АНУ-ын доллар 2846,евро 3349, БНХАУ-ын юань 408, ОХУ-ын рубль 38, Японы иен 26, БНСУ-ын вон 2.4төгрөгтэй тэнцэж байна. (Эх сурвалж: www.gogo.mn) 5.Дэлхийн зах зээл дээр нэг тонн зэс 6356.00 ам.долларын ханштай байна. (Эх сурвалж: www.lme.com)     Эрдэнэт үйлдвэрийн түүхэнд энэ сард... 1965оны 8 сарын 16. Монгол, Чехословакийн геологийн анги Эрдэнэтийн-Овооны орд газарт явуулсан эрэл, үнэлгээний ажлаатайлагнав. 1974 оны 8 сарын 24. МХЗЭ-ийн анхны илгээлтийн эзэд Эрдэнэтийг зорив. 1975 оны 8 сарын 25. БЕЛАЗ-ын жолоочийн курст суралцах анхны хүмүүсийг ЗХУ руу илгээв. 1978 оны 8 сарын 1. Цахилгаан цех байгуулагдав. 1978 оны 8 сарын 12. Анхны зэсийн баяжмалыг гарган авав. 2001 оны 8 сар. Баяжуулах фабрикийн хүчин чадлыг 2 сая тонноор нэмэгдүүлэв. 2013 оны 8 сарын 17. Үйлдвэрийн 35 жилийн ойгоор “Хөдөлмөрийн гавъаны улаан тугийн одон”-гоор шагнагдав.       Дэлгэрэнгүй...
  • Сарын эхний 10 хоногт төлөвлөснөөс 176 мянган тонн хүдэр илүү боловсрууллаа

         Эрдэнэт үйлдвэрийн үйлдвэрлэлийн төлөвлөгөөний 8 дугаар сарын эхний 10 хоногийн үзүүлэлтийг Үйлдвэрлэлийн хэлтсээс мэдээллээ. Энэ сарын эхний 10 хоногийн байдлаар Эрдэнэтийн уурхайчид уулын цул гаргалтыг  төлөвлөснөөс 26 мянган метр кубээр илүү гүйцэтгэж, 103.8 хувиар давуулан биелүүлсэн байна. Хүдэр олборлолтын төлөвлөгөөг 122.4 хувиар биелүүлэв. Өөрөөр хэлбэл, төлөвлөснөөс 176.6 мянган тонн хүдэр илүү олборлож, нийт 966.2 мянган тоннын гүйцэтгэлтэй ажиллажээ.       Харин баяжуулагчид 757.4 мянган тонн хүдэр боловсруулж, төлөвлөгөөг 102.4 хувиар биелүүлсэн байна. Энэ хугацаанд хүдэр дэх зэсийн агуулга 0.474 хувь буюу төлөвлөгөө 102.6 хувиар, молибдений агуулга 0.01830 хувь буюу 134.3 хувиар тус тус биелсэн дүн гарчээ. Зэсийн металл авалтын төлөвлөгөө 100.1 хувиар, молибдений металл авалтын төлөвлөгөө 103.8 хувиар биелсэн бол баяжмал дахь зэс, молибдений металл авалт 105.2-142.7 хувь хүрч биелсэн үзүүлэлттэй байна. Сарын эхний 10 хоногт хуурай жингээр 15298 тонн зэсийн баяжмал, 274 тонн молибдений баяжмал ачуулав. Ачигдсан зэсийн баяжмалын чанарын төлөвлөгөө  102.5 хувиар, молибдений баяжмалын чанар 104 хувиар давж биеллээ. М.Балжинням Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Холбоо барих

     Авто тээврийн цехийн Технологийн тээврийн авто засварын хэсгийнхэн оны эхний улиралд сайн саналын системд ажил сайжруулах чиглэлээр нийт 63 санал гаргажээ. Тус хамт олон өнгөрсөн онд энэ чиглэлээр 172 санал гаргаж байсан байна. Технологийн тээврийн хэрэгслийн засварчид он гарсаар засвар бага байгааг онцоллоо. “Техник үйлчилгээ цаг хугацаандаа чанартай хийгдэж байгаа нь урсгал засварын тоог цөөрүүлж байна. Сэлбэг хугацаандаа ирээгүйгээс засвар хойшлох хүндрэл гардаг ч технологийн тээвэр доголдох хэмжээнд хүрдэггүй” гэж хэсгийн дарга ярилаа. Одоогоор шинэчлэх шаардлагатай 130 тонны “он хөгширсөн” 10-аад белаз байгаа ажээ. Эдний бэлэн байдлын коэфциент 0.92 хувьтай байгаа нь сайн үзүүлэлт юм.  

М.ОДГЭРЭЛ

   

     “Эрдэнэт үйлдвэр” Засвар механикийн заводыг 2018-2032 онд өргөтгөн шинэчлэхээр зорьж, Техник эдийн засгийн үндэслэл боловсруулах ажил хийж байна. Энэ хүрээнд заводын удирдлага, ТЭЗҮ боловсруулах ажлын гүйцэтгэгч компанийн төлөөллүүд ОХУ-ын Выкса хотын Цутгуурын үйлдвэр, Мурмо хотын машин үйлдвэрлэлийн завод, Омск хотын “Газпром”-ын засвар механикийн заводтой тус тус танилцаад ирлээ. ЗМЗ-тай ижил төрлийн үйл ажиллагаа явуулдаг энэ үйлдвэрүүдийн  бүтээгдэхүүн үйлдвэрлэл, техник технологийн шинэчлэл, төсөлд нэвтрүүлэх боломж, санаа авах зүйлсийг үзэж судалжээ. Орчин үеийн компьютер удирдлагатай суурь машин бүхий гадны үйлдвэрүүдээс бэлдцийн үйлдвэрлэлийг оновчлох, хаягдалгүй технологи бий болгох талаар туршлага судалжээ. “манай заводод нэвтрүүлэх гэж буй хүйтнээр хатууруулах холимгоор хэв барих технологийг дээрх үйлдвэрүүд цутгуурын үйлдвэрлэлд ашиглаж байна. Эдгээр  үйлдвэрийн хөгжлийн чиг хандлага бидний зорьж буйтай ойролцоо байна” гэж Засвар механикийн заводын дарга Б.Баасансүрэн онцлов. ЗМЗ-ыг өргөтгөн шинэчилснээр зөвхөн уул уурхайн төдийгүй эрчим хүч, хөдөө аж ахуйн салбарын тоног төхөөрөмжийн сэлбэг хэрэгсэл үйлдвэрлэх боломж өсөж, импорт орлох бүтээгдэхүүний үйлдвэрлэл нэмэгдэх аж.  

Я.Энх

     “Эрдэнэт үйлдвэр”-ийн хэмжээнд цацрагийн ионжуулагч туяа үүсгэгч 175 тоног төхөөрөмж бүртгэлтэй байгаагаас цаашид ашиглах боломжгүй 50 гаруй цацрагийн үүсгүүрийг устгах, мөн шинэ төхөөрөмж захиалан авах шаардлага гарчээ. Үүний дагуу Ерөнхий захирлын энэ оны 4 дүгээр сарын 8-ны өдрийн А223 тоот тушаалаар үйлдвэрийн хэмжээнд цацрагийн хамгаалалт, аюулгүй байдлын асуудлыг уялдуулан зохицуулах ажлын хэсэг байгуулсан. Ажлын хэсгийн холбогдох мэргэжилтнүүд энэ сарын 12-ны өдөр анхны хуралдаанаа зохион байгуулж, 2019 онд хэрэгжүүлэх үйл ажиллагааны төлөвлөгөөгөө хэлэлцлээ. Төлөвлөгөөнд тусгаснаар тус ажлын хэсгийнхэн Цөмийн энергийн комисс, Монголын цацрагийн хамгаалалтын нийгэмлэг зэрэг төрийн болон төрийн бус байгууллагатай хамтран ажиллахаар болсон байна. Түүнчлэн ирэх улиралд Баяжуулах үйлдвэр дээр ослын дадлага сургуулилт хийж, үйлдвэрийн хэмжээнд 75 хүнийг сургалтад хамруулахаар төлөвлөжээ.

И.Чинтогтох
Фото: Б.Баттөгс

    

   

   

  

     Монгол, Хятад хоёр улсын хооронд дипломат харилцаа тогтоосны 70 жилийн ойг тохиолдуулан “Манжуур хотын эдийн засаг, худалдааны өдрүүд”-ийг ирэх тавдугаар сард Орхон аймагт зохион байгуулахаар төлөвлөжээ. Орхон аймгийн хувьд 2014 оноос Манжуур хоттой эдийн засаг, худалдаа, хүмүүнлэгийн чиглэлд хамтран ажиллаж, хотуудын найрамдалт харилцааг эрхэмлэсээр ирсэн. Эрдэнэтийн жижиг, дунд бизнес эрхлэгчид энэхүү хамтын ажиллагааны хүрээнд Манжуур хотноо “Эрдэнэтийн өдрүүд”-ийг амжилттай зохион байгуулж, гадаад худалдааны үр өгөөжийг хүртжээ.  

     БНХАУ-ын аялал жуулчлалын гол бүсэд тооцогдох Манжуур хот нь байршлын хувьд гурван улсын хилийн заагт оршдог. Өвөрмөц содон шийдэлтэй барилга байгууламж, уран нарийн хийцтэй баримлууд, өнгө өнгийн гэрлэн чимэглэл гээд тодотгох зүйл олонтой энэ хот Хятадын хуурай замын хамгийн том боомт гэгддэг.

И.Чинтогтох

     “Эрдэнэт үйлдвэр”, МУБИС-ийн Сэтгэл судлал, боловсрол, арга зүйн тэнхимтэй хамтран хөдөлмөрийн аюулгүй байдал, эрүүл ахуйн ажиллагсдаа чадавхжуулж, багшлах эрх олгох сургалт зохион байгууллаа. Технологийн сургууль дээр тав хоног үргэлжилсэн энэ удаагийн сургалтад “Эрдэнэт үйлдвэр”-ийн ХАБЭА-н инженер, техникийн 30 ажилтан, бүтээмж, инновацийн чиглүүлэгч 10 менежер хамрагдаж байна. “Эрдэнэт үйлдвэр” боловсон хүчнээ чадваржуулж, дадлага туршлагатай болоход анхаарснаар хөдөлмөрийн аюулгүй байдал, эрүүл ахуйн болон бүтээмж, инновацийн сургалтын чанар сайжрах юм. МУБИС-иас хүрэлцэн ирсэн доктор, профессорууд эхний шатанд хичээл заасан бөгөөд 45 хоногийн хугацаанд өөр багш нар уригдан ирж, сургалтаа үргэлжлүүлнэ гэдгийг онцоллоо.

И.Чинтогтох
Фото: Б.Баттөгс

     Эрдэнэт үйлдвэрийн баялаг бүтээгчид 2019 оны дөрөвдүгээр сарын эхний 10 хоногийн байдлаар үйлдвэрлэлийн төлөвлөгөөт бүх үзүүлэлтээ давуулан биелүүлсэн амжилттай ажиллаж байна. Тодруулбал, уулын цул гаргалтын төлөвлөгөөг 59,5 мянган тонноор, хөрс хуулалтын төлөвлөгөөг 68,97 мянган куб метрээр давуулжээ. Мөн металл авалтын төлөвлөгөөг 100.2, молибдений металл авалтын төлөвлөгөөг 114 хувиар биелүүлэв. Ингэснээр 37,6 тонн цэвэр зэс, 5,6 тонн цэвэр молибдени үйлдвэрлэсэн байна. Энэ хугацаанд Эрдэнэт үйлдвэр нийт 16189 тонн зэсийн баяжмал гадаад худалдаанд гаргалаа.

     Үйлдвэрлэлийн төлөвлөгөө давж биелэхэд экскаватор нэмж ашиглалтад оруулсан, Баяжуулах үйлдвэрийн тээрмийн засварыг хугацаанаас нь өмнө гүйцэтгэсэн, хүдрийн дундажлал тогтмол байсан нь эерэг нөлөө үзүүлжээ.

М.ОДГЭРЭЛ

     Эрдэнэт үйлдвэр нийт 32.6 га талбайг нөхөн сэргээж, 30 гаруй мянган мод тарьжээ. Энэ нь дахин ашиглагдахгүй овоолго буюу зайлшгүй нөхөн сэргээх шаардлагатай ойр орчмын бүх талбайд байгалийн унаган төрхийг нь буцаан авчирсан гэсэн үг. Уурхайн орчим дахь байгаль орчныг хамгаалах, нөхөн сэргээх, экологийн тэнцвэртэй байдлыг хадгалах бодлогын хүрээнд тус үйлдвэр жил бүр 120 мод шилжүүлэн суулгах, шинээр нэмж тарих ажлыг зохион байгуулж байна. Түүнчлэн мод бут суулгаж тарихын зэрэгцээ тогоруу, туулай, үнэг, хярс зэрэг байгалийн зэрлэг ан амьтдыг нутагшуулсан нь стандартын түвшинд сайн хийгдсэн нөхөн сэргээлт гэж олон улсын байгууллагаас үнэлэгджээ. 
      Мөн үйлдвэрийн бүсэд  “Ногоон төгөл” байгуулж, гуч гаруй  нэр төрлийн хорин мянган мод тарьсан байна. Тус үйлдвэрийн цех нэгжүүд эдгээр мод суулгацын арчилгаа, усалгааг хариуцаж, өөрөөр хэлбэл байгаль орчноо хамгаалах, нөхөн сэргээх үйлсэд уурхайчин бүр гар бие оролцдог гэдгийг “Ногоон төгөл”-ийн ажилтнууд ярив. Цаашид Эрдэнэт үйлдвэр нийгмийн хариуцлагын хүрээнд байгаль орчны нөхөн сэргээлтийн ажлыг зөвхөн үйлдвэрийн бүс нутгаар хязгаарлахгүй Эрдэнэт хотын ойр орчимд ч хийхээр төлөвлөж байна.

М.Балжинням

     Орхон аймгийн Засаг дарга Д.Батлут Эрдэнэт үйлдвэрт хоёр өдөр ажиллаж, хөтөлбөрт тусгагдсан асуудлаар үйлдвэрийн удирдлагуудтай харилцан санал бодлоо солилцлоо. “Орон нутгийн удирдлагуудын өргөн бүрэлдэхүүн анх удаа Эрдэнэт үйлдвэрт ажиллаж, ажил хариуцсан албаны хүмүүс асуудалтай газар дээр нь танилцаж, хамтын шийдэл гаргаж буй нь үр дүнтэй боллоо” гэж тэрээр онцолсон. Засаг дарга түүний багийнхан хоёр дахь өдрөө Эрдэнэт үйлдвэрийн Эрчим хүчний цехээр орж, үйлдвэрийн удирдлагуудын хамт Орхон аймагт хийгдэж буй зарим бүтээн байгуулалтын ажилтай танилцсан юм.

Усны өр төлбөрийн асуудлыг ажлын хэсэг байгуулан шийдэхээр болов

     Олон жил дамнан шийдэгдээгүй ирсэн хот, үйлдвэр хоёрын хоорондох усны өр авлагын асуудлыг шийдэж, нэг мөр болгох нь аймгийн Засаг даргын “Эрдэнэт үйлдвэр”-т ажиллах хөтөлбөрийн чухал хэсэг нь байв. Эрдэнэт үйлдвэрийн  Эрчим хүчний цех Сэлэнгэ мөрний хөвөөнд орших гүний худгаас гурван ус өргөх станцаар дамжуулан,  хуримтлуулж  Эрдэнэт үйлдвэр болон Орхон аймагт ус түгээдэг. Үүнээс бохир усыг хот болон үйлдвэрийн бүсээс татан зайлуулж, цэвэрлэсэн бохир усыг зарим тохиолдолд Хаягдлын аж ахуйн даланд тунгаах эсвэл гол руу хаяж ашигладаг юм. Мөн тунгаасан усыг буцаагаад эргэлтийн усны насосны станцаар шахаж, Эрдэнэт үйлдвэрийн технологийн хэрэгцээнд нийлүүлж байна. Тус цех жилд үйлдвэрийн бүсэд 4.3 сая шоо метр куб ус буюу Сэлэнгэ мөрнөөс татаж авчирч буй нийт усны 17.1 хувийг гурван шугамаар Эрдэнэт хотын хэрэгцээнд хүргэдэг. Ингэхдээ ус дамжуулах зардал, үйл ажиллагааг Эрдэнэт үйлдвэр хариуцаж ирсэн байна. Ийм  үйл явцаар дамжуулж байгаа  нийт усныхаа 50 хувийг нь орлого болгон авч чадаагүйгээс Эрдэнэт үйлдвэр, Орхон аймгийн хооронд усны алдагдал, өр төлбөрийн асуудал үүсчээ. Энэ асуудлаар үйлдвэр болон  хотын “Эрдэнэт ус дулаан түгээх сүлжээ” ОНӨХК-ийн зүгээс олон удаа ярилцаж, асуудлыг шийдэхээр оролдсон ч өнөөг хүртэл гарц олоогүй байна. 2018 оны нэгдүгээр сарын 1-ний байдлаар ус дамжуулалтын өр авлага 3.5 тэрбум байсан бол энэ оны дөрөвдүгээр сарын 1-ний байдлаар 5.1 тэрбум төгрөгт хүрээд байгаа юм.

     Тус уулзалтад Хот суурины ус хангамж, ариутгах татуургын ашиглалт, үйлчилгээг зохицуулах зөвлөлийн дарга Ж.Батсуурь оролцож, төр засгийн зүгээс шийдэж болох боломжийн талаар байр сууриа илэрхийлсэн. Ус дамжуулах, түгээхэд гарч буй зардал, хэрэглээний тарифыг зөв болгох, багасгах зэрэг боломжит гарц хайж, хоорондоо зөвшилцөх нь хамгийн зөв шийдэл болно гэдгийг тэрээр онцолж байв.

     “Сэлэнгэ мөрнөөс Эрдэнэтийн усан сан хүртэлх татаж авчрах хос шугам хоолойнууд 40 гаруй жилийн насжилттай болсны улмаас нимгэрч, усны даралт даахгүй эрсдэл үүсэх хэмжээнд хүрч байгаа. Иймээс гурав дахь шугамыг шинээр татах шаардлага тулгарсныг албаны хүмүүс анхаарах ёстой. Энэ бол зөвхөн үйлдвэрийн асуудал биш, хотод ч тулгамдаж буй асуудал. Тиймээс  төр засаг болон орон нутгийн  дэмжлэг туслалцаа ч хэрэгтэй буй” гэдгийг  Эрдэнэт үйлдвэрийн Ерөнхий захирлын нэгдүгээр орлогч бөгөөд Ерөнхий инженер Т.Батмөнх хэлсэн.  Хамгийн чухал нь усаа татаж авчрах технологи. Техник, тоног төхөөрөмж, аюулгүй найдвартай ажиллах ёстой гэж тэрбээр анхаарууллаа.

     Хоёр талын удирдлагууд олон талаас нь ярилцаж, санал солилцсоны эцэст эл асуудлыг нэг мөр болгохын  тулд гурван чиглэлээр ажиллах шийдэл гаргасан. Үйлдвэр, хотын хамтарсан ажлын хэсэг байгуулж, асуудлыг үе шаттай шийдэх, хуульд заасны дагуу ус дамжуулах, түгээх шугамын ялгаа, хил хязгаар тогтоосноор усны алдагдал гэх ойлголтыг цэгцлэх, алдагдал багасгах, ус хангамжийн ажлын 50 гаруй хувийг эзэлдэг цахилгааны төлбөрийн өртгийг  ахуйн хэрэглээний тарифаар тооцох боломж нээх, өөрөөр хэлбэл зөв тариф хэрэглэх, ус татуургын тоног төхөөрөмжийг шинэчлэхэд хөрөнгө оруулалтын асуудал ярилцах зэргээр хамтарч ажиллахаар боллоо.  


Хотын гудамж талбайн үзэмж хамтран сайжруулж, шинэ Бөхийн өргөөний барилгыг барьж дуусгана

      Гурван замын постноос Эрдэнэт хот руу орж ирэх авто замын дагуух тохижилтыг сайжруулж, зурагт самбаруудыг шинэчлэн байрлуулах чиглэлээр Орхон аймаг, Эрдэнэт үйлдвэр хамтран ажиллана. Хотын төв зам дагуух өнгө үзэмжгүй, зөвшөөрөлгүй байрлуулсан самбаруудыг буулгах, шинээр өлгөх ажилд техникийн болон бусад тусламж дэмжлэг үзүүлж ажиллахыг Эрдэнэт үйлдвэрийн Ерөнхий захирал холбогдох албаны хүмүүст үүрэг болголоо. Хотын төв хүртэлх авто зам дагуу Эрдэнэт үйлдвэрийн түүхэн замнал, бахархалт түүхийг харуулсан гурван самбарыг шинэчилж, Эрдэнэт хотод барьж байгуулсан үйлдвэр, үйлчилгээний газруудын жагсаалт бүхий түүхэн самбарын өнгийг сэргээн засварлах ажлуудыг ойрын хугацаанд хийхээр болов.

     Мөн Баян-Өндөр сумын Зэст багийн нутаг дэвсгэрт байрлах 1232 айлын орон сууцны 1А цогцолбор хороолол, Бөхийн өргөөний барилгын ажлыг даруй шийдвэрлэх талаар санал солилцов. Инженерийн шугам сүлжээ, дэд бүтцийн  асуудлыг шийдээгүйн улмаас зогсоод буй уг барилга байгууламжийг барьж дуусгах нь энэ оны том зорилт гэдгийг Засаг дарга Д.Батлут ярив. Энэхүү 1А цогцолбор хорооллын дэд бүтцийн  асуудлыг шийдвэрлэхэд нийт 16 тэрбум төгрөг шаардлагатай байгаа юм байна.  Ойрын хугацаанд  шийдвэрлэх боломж байгаа эсэхийг тал талаас нь судалж, эхний  хөрөнгө оруулалтын тооцоог гаргах, хурдан эхлүүлэх арга хэмжээ авах нь зүйтэй гэдгийг удирдлагууд зөвшилцлөө. Бөхийн өргөөг ашиглалтад оруулснаар Эрдэнэтчүүд чөлөөт цагаа өнгөрөөх бас нэгэн шинэ газартай болох юм.  


Соёл амралтын хүрээлэнд 4 тэрбум төгрөгийн хөрөнгө оруулалт хийнэ

     Орхон аймгийн Цагаанчулуут багийн урд хэсэгт 20 га талбай бүхий “Эрдэнэт” соёл амралтын хүрээлэн баригдаж байна. Энэ бүтээн байгуулалтад Эрдэнэт үйлдвэр хамтын ажиллагааны хүрээнд 4 тэрбум төгрөгийн хөрөнгө оруулалт хийж байгаа юм. Хамгийн сүүлийн үеийн загвараар баригдах соёл амралтын хүрээлэнгийн инженерийн шугам сүлжээний ажил хийгдэж дуусчээ. Тус цогцолборыг улс болон орон нутгийн төсвийн 3,2 тэрбум төгрөг, Эрдэнэт үйлдвэрийн 4 тэрбум төгрөгийн хөрөнгө оруулалтаар энэ онд багтаан барьж дуусгах ажээ.

 


Бүтээн байгуулалтын ажлуудын нээлт 5 сарын 1-ний өдөр болно

      Эрдэнэт үйлдвэр 2019 оныг “Хоёр дахь ээлжийн бүтээн байгуулалтын жил” болгохоор зорьж, нээлтийн үйл ажиллагааг ирэх тавдугаар сарын 1-ний өдөр хийхээр төлөвлөөд байна. Өөрөөр хэлбэл, энэ онд томоохон  бүтээн байгуулалтын ажлууд эхэлж, технологийн төслүүд хөдөлж эхлэх юм. Харин энэхүү нээлтийн үйл ажиллагааг хамтран зохион байгуулж, тавдугаар сарын 1-ний өдрийг Орхон аймаг, Эрдэнэт үйлдвэрийн 2019 оны бүтээн байгуулалтын ажлын нээлтийн өдөр болгох санаачилгыг аймгийн удирдлагын зүгээс гаргаж, талууд санал нэгдлээ. Ингэснээр  Эрдэнэт үйлдвэрт техник, технологийн шинэчлэл, Орхон аймагт нийгмийн хөгжлийн хоёрдахь ээлжийн  бүтээн байгуулалтын ажлын эхлэл зэрэг тавигдаж байна.

М.Балжинням

Фото: Б.Баттөгс

Мэдээний төрөл

Календарь

« 4-р сар 2019 »
Да Мя Лх Пү Ба Бя Ня
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30          

Зургийн цомог