• Шилдэг шинийг санаачлагч

      Эрдэнэт үйлдвэрийн 2019 оны шилдэг шинийг санаачлагч, Автотээврийн цехийн Эрчим зүйн албаны тэргүүлэх эрчим зүйч А.Батдорж, түүний хамт олны ажил үйлсийн тухай өгүүлэх нь.   1990 онд Эрхүүгийн Политехникийн дээд сургуулийг Уулын цахилгааны инженер мэргэжлээр төгссөн тэрбээр  яамны томилолт өвөртлөн Эрдэнэтийг зорьжээ. Завхан нутгийн хүү, сургаар мэдэх болсон энэ хотод хөл тавьсан тэр нэгэн өдрөөс хойш өдгөө 30 хаврыг үджээ. Засвар механикийн заводын Цахилгаан тоног төхөөрөмжийн засварын хэсгээс хөдөлмөрийн гараагаа мастераар эхэлж, 1995 он хүртэл ажилласан. 1995 оноос өнөөг хүртэл Авто тээврийн цехэд энэ л албанд  зүтгэсээр. Одоо тэр Эрчим зүйн 62 хүнтэй хүчирхэг албыг тэргүүлэн ажиллаж буй. Энэ алба Авто тээврийн байгууллагыг уур, ус, дулаан, цахилгаанаар найдвартай хангах үндсэн үүрэгтэй. Тэдний харьяанд Шатахуун түгээх станц, Технологийн тээврийн, Төрөл бүрийн маркийн  автомашины, Тусгай зориулалтын автомашины засварын газруудын машин угаалга, гараажууд ч харьяалагдана. Машин угаах, шатахуун түгээх гээд л үйлдвэрийн хэмжээний  нэн чухал албыг тэд залгуулдаг. Эднийхэн 2019 онд ажил үйлс, ХАБЭА, бүтээмж инноваци, сахилга дэг журам гээд л бүхий л үзүүлэлтээрээ Авто тээврийн цехийн бүх хэсгээс тэргүүлсэн. А.Батдоржоор ахлуулсан энэ баг үндсэн үүргээ чанд биелүүлэхээр ажлаа хязгаарлахгүй.  “Ахлагч”-ийн толгойд  шинийг эрэлхийлэх, эрчим хүчний орчин үеийн дэвшилтэт технологи нэвтрүүлж, зардал  хэмнэх бодол байнга эргэлдэнэ. Үйлдвэрийн ажлын байранд лед гэрэл суурилуулах төслийг эднийх анх хэрэгжүүлсэн гэдэг. Цахилгаан эрчим хүч ихээхэн хэмнэсэн энэ туршлагыг Эрдэнэт үйлдвэр даяар нэвтрүүлсэн. Тэр, автомашиныг шингэрүүлсэн шатдаг хийгээр цэнэглэх станц байгуулах санаачилга гарган ашиглалтад оруулснаар суудлын 20 машины зөвхөн түлшний үнийн зөрүүгээс сард 5,1 сая төгрөг хэмнэжээ. Түүний санаачилсан “Автомат мэдрэгчтэй шүршүүр” төсөл үйлдвэрийн хэмжээнд шалгарч хэрэгжсэн. Түүнчлэн “Нарны толин гэрэлтүүлэг” зэрэг төсөл хэрэгжүүлснээр ус, цахилгаан эрчим хүчийг ихээхэн хэмнэжээ. Өнгөрсөн жил цехийн ажлын байрны дулааны системийн 30 хувийг нь шинэчилжээ. Тухайлбал, багахан гурван өрөө тус бүрийг 22 квт-ын хөдөлгүүртэй  вентилятороор халаадаг байсан бол 7,5 квт-ын орчин үеийн ганц вентилятороор  эдгээр өрөөг дулаанаар үлээх системд холбожээ. Энэ хэрээр зардал буурах юм. Мөн машиныг шлянкаар угаадгийг халж, тусгай зориулалтын компрессор ашигласнаар усны хэрэглээ үлэмж багасжээ. Эрчим хүч хэмнэж, эх дэлхийгээ аврах үйлсэд эдний хамт олон жинтэй хувь нэмэр оруулж буй нь тодорхой. А.Батдорж хамт олноо байн байн магтана. Манайхны ихэнх нь залуус. Ажилдаа өөриймсөг ханддаг, санаачилгатай, хөдөлмөрч нь дэндсэн л гэнэ. “Үндсэн ажлынхаа зэрэгцээ төсөл санаачлах, түүнийг хэрэгжүүлэхэд бүгд л эрвийх дэрвийхээрээ оролцдог. Ажлын орчноо тохь тухтай, цэвэр цэмцгэр байлгах нь манайханд хэвшсэн ажил” гэв.  Бид БелАЗ-ын гарааж дахь Эрчмийнхний ажлын байрыг сонирхлоо. Энд угаас гарааж бус “Аптек” гэмээр цэвэрхэн, урлаг, спортын танхим мэт цэлгэр. Хэзээ ч ороод очиход бүртийх төдий ч тоос шороо, тос маслыг эндээс олж харахгүй. Эднийхний санаачилж, байгуулсан Ус хөргөх зориулалттай усан сан цэмцийнэ. Том ёмкост ашиглан хийсэн энэ сангийн эргэн тойрны бүх зүйл эмх цэгцтэй, цайвар цэнхэр өнгөөр будсан бетонон шал шил толь мэт. Түүн дээр усны дусал ч алга.  Танай үйлчлэгч их ажилсаг, нямбай хүн бололтой гэхэд: “Манайд орон тооны үйлчлэгч үгүй. Ажлаа хийчхээд ажлын байрыг цэгцэлж, цэвэрлэх нь манайхны сурсан зан” гэв.  Багаж олгодог, бас чөлөөт цагаа өнгөрөөх багахан өрөөгөөр орлоо. Тэнд байх бүхий л зүйлийг тэд өөрсдөө бүтээжээ. Диван, сандал, ширээ, бас багажийн шкафыг хаягдал поошик ашиглан хийсэн байна. Багажийн шкаф дотроо эргэдэг тавиур өлгүүртэй. Энд багаж бүр өөрийн байртай, эмх цэгцтэй.  Хэн, хэзээ, хэдэн ширхэг ямар түлхүүр авсныг тэмдэглэх дэвтэр ч үүн дотор байх. Энэ шкаф их эрэлттэй, үзэсгэлэн худалдааны үеэр үүнийг захиалж авдаг хэрэглэгч олон гэнэ.          Энэ гараажид цахилгаан хуваарилах дэд станц байрладаг. Түүнд төмөр сараалжин хашаа хийж, тэмдэг, тэмдэглэгээ, зураг плакат байрлуулсан нь аюулгүй ажиллагааны шаардлагад нийцсэн, өнгөлөг гоёмсог болжээ. Цехийн хэмжээнд   таван дэд станц байдаг бөгөөд бүгдийг нь ийм болгосон гэсэн. Ажлын байраа танилцуулж явахдаа А.Батдорж ажил хуваарилах өрөөг хамт олныхоо хандиваар тохижуулж байгаагаа ярьсан. Тансаг сайхан өрөөтэй болно оо, бид. Тохижуулж дуусахаар нь ирж үзээрэй. Ажилчид маань наръядаа аваад ажилд гарахдаа сэтгэл тэнүүн сайхан байх болно. Энэ ч ажлын бүтээмжид сайнаар нөлөөлнө гэв.      Бүтээмжийн менежер Ж.ПҮРЭВСҮРЭН: “Манай тэргүүлэх эрчим зүйч А.Батдорж их санаачилгатай, бүтээлч хүн. Шинэ зүйл санаачлах үйлст хамт олноо үлгэрлэн дагуулж, залуусыг хөгжиж, шинээр сэтгэхэд сэдэлжүүлэн ажилладаг. Эдний ажлын байр үлгэр жишээ, санаачилсан бүхэн нь үр ашигтай байдаг. Ноднин хийн компрессорыг Ил уурхайтай ойролцоо суурилуулах санаачилга гаргаж хэрэгжүүлсэн нь зардал хэмнэсэн сайхан ажил болсон” гэсэн юм. Бид Ил уурхай дахь БелАЗ-ын зогсоол дээр байрлах компрессорыг үзлээ. БелАЗ-ын гарааж дээр өндөр хүчин чадалтай хийн компрессор суурилуулж, хуучныг нь энд байрлуулжээ. Ингэснээр БелАЗ-ын дугуй хийлэх зайг ойртуулж, хэмнэлт гаргах үндэс болсон байна.  БелАЗ-ын нэг дугуй дунджаар 64,9сая төгрөг байдаг. Түүний зургаан дугуйг жигд хийтэй ажиллуулснаар даац хэвийн, эд ангид эвдрэл бага байж, ажлын бүтээмж дээшилж, эдийн засагт хэмнэлт гардаг аж. Компрессорыг Ил уурхайд ойртуулснаар дугуйн хийг нэмэх, шалгах тоо жилийн хугацаанд 120-оор нэмэгджээ. Энэ нь жолооч нар дугуйндаа хяналт сайн тавьж байгааг харуулж буй аж. Дугуй хийлэхээр БелАЗ-ын гарааж руу очиход 4, км, харин эндээс 2 км.  Хүдэр тээвэрлэдэг 30 БелАЗ жилийн турш 8269 км сул явалт хэмнэсэн байна. Үүнийг мөнгөн дүнгээр авч үзвэл 102, сая төгрөгийн дизель түлш, тос тосолгооны материал, авто дугуйн элэгдлийн зардлын бодит хэмнэлт гарчээ. Энэ төсөл зардлаа хасаад 95,2сая төгрөгийн үр ашигтай болсон гэж эдийн засагчид тооцжээ. А.Батдорж энэ төслөө улам сайжруулан төгс болгох зорилттой байгаагаа ярьсан. Эдний албаныхан Ил уурхай дээр зөөврийн ШТС барьсан бөгөөд үүнийхээ дэргэд компрессор байрлуулах гэнэ. Ингэснээр жолооч шатахуунаа авах хооронд дугуйн хийгээ шалгах, нэмэх боломж бүрдсэнээр илүү ихийг хэмнэнэ гэж үзжээ.    Зэсийн үнэ дэлхийн зах зээл дээр унаж буй энэ үед та бүхэн ямар хэмнэлт гаргах вэ? гэсэн асуултад тэр: “Гадна температур дулаарч буйг ашиглан хүн ажилладаггүй хэсэг, тухайлбал, гараажуудынхаа дулааныг 4-р сарын нэгнээс хэсэгчлэн хааж эхэллээ. Ингэснээр дулааны зардлыг 30 орчим хувиар хэмнэх тооцоо гарч байгаа” гэв.  Эрдэнэт үйлдвэрийн Шилдэг шинийг санаачлагч А.Батдорж эрчим хүчний хэрэглээнд байнга хяналт тавьж, дүгнэлт хийж,  уур, ус, цахилгаан, дулааныг үр өгөөжтэй ашиглаж, хэмнэх боломжийг эрэлхийлэн, ажлын байрыг тав тухтай байлгахын  төлөө  оюунаа чилээж  явна.         Я.Энхтуяа Фото: Б.Баттөгс Дэлгэрэнгүй...
  • Өнөөдөр - 04 дүгээр сарын 08

    Мэдүүштэй... 1. Өнөөдөр жилийн 98 дахь өдөр. Он дуусахад 267 хоног үлдлээ. 2. Эрдэнэт хотод агаарын хэм өдөртөө 4-8 градус дулаан, шөнөдөө 0-2 градус хүйтэн, бага зэргийн хур тунадастай, салхины хурд 5-6 м/сек байна.     3. Аргын тооллын 4 сарын 8. Буд гариг. Билгийн тооллын 15. Тэргүүн дагуул одтой, цагаагчин могой өдөр. Өдрийн наран 6 цаг 16 минутад мандан, 19 цаг 32 минутад жаргана. Тухайн өдөр үхэр, тахиа жилтнээ аливаа үйлийг хийхэд эерэг сайн ба могой морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр архи уух, тамхи татах, сэтгэл муутантай нөхөрлөх зэргийг цээрлэх хэрэгтэй ба сүм дуганыг сэргээх, газар лусын зан үйл хийх, өр барагдуулах, гэр бүрэхэд сайн. Ургаа мод таслах, газрын ам нээх, гөлөг тэжээхэд муу. Өдрийн сайн цаг нь үхэр, луу, морь, хонь, нохой, гахай болой. Хол замд явах хүмүүс баруун хойш мөрөө гаргавал зохистой. Үс шинээр үргээлгэх буюу засуулбал өлзийтэй сайн.     4. Дэлхийн зах зээл дээр нэг тонн зэс 5067 ам.долларын ханштай байна. (Эх сурвалж: www.lme.com) 5. Монгол банкны энэ өдрийн нэрлэсэн ханшаар АНУ-ын доллар 2781, евро 3024, БНХАУ-ын юань 394, ОХУ-ын рубль 36, Японы иен 25 төгрөгтэй тэнцэж байна. Эрдэнэт үйлдвэрийн түүхэнд энэ сар... 1975 оны 4-р сар Монгол-Зөвлөлтийн Засгийн газар хоорондын комиссын хуралдаанаар Эрдэнэтийн бүтээн байгуулалтад зориулан нэмэлт хөрөнгө гаргах тухай асуудлыг хэлэлцэж шийдвэрлэв. 1976 оны 4-р сар 22-нд: Эрдэнэт хотын АДХ-ын гүйцэтгэх захиргааны 08 дугаар тогтоолоор Эрдэнэт хотод хивсний үйлдвэр байгуулах талбайг 13 га-гаар тогтоож, үүнээс 12 га-г үйлдвэрлэлийн зориулалтаар, 1 га-г хаягдал шингэний хөөс агуулах талбайгаар ашиглуулахаар тогтжээ. 23-нд: Эрдэнэт үйлдвэрийн Тооцоолон бодох төв үйл ажиллагаагаа эхлэв. 26-нд: Эрдэнэт үйлдвэрийн төв корпусыг барих ажил эхлэв. 1978 оны 4-р сар Эрдэнэт үйлдвэрийн Хөдөлмөрийн аюулгүй байдал, эрүүл ахуйн хэлтэс анх Хөдөлмөр хамгааллын хэлтэс нэртэйгээр зохион байгуулагдав. Дэлгэрэнгүй...
  • Цутгуурын цехийн өргөтгөл ирэх сарын нэгэн гэхэд бүрэн ашиглалтад орно

    Засвар механикийн заводын Цутгуурын цехийн өргөтгөлийг ирэх сарын нэгэн гэхэд бүрэн ашиглалтад оруулна гэжзаводын дарга Б.Баасансүрэн мэдээллээ. Одоогийн байдлаар механикийн чиглэлийн тоног төхөөрөмж суурилуулж дууссан. Байгууламжийн агаар, ус, хий дамжуулах төхөөрөмжийн угсралт 96 хувьтай байна. Германы мэргэжилтнүүд ирж үндсэн тохируулга хийх байсан ч, цаг үеийн нөхцөл байдлаас шалтгаалан амжаагүй. Ерөнхий захирлын 151-р тушаалаар томилогдсон ажлын хэсэг  ажиллаж, 3-р сарын 16-наас ХБНГУ-ын FAT компанитай онлайнаар холбогдон тоног төхөөрөмжүүдийг хэсэгчлэн  тохируулж байна. Мэргэжилтнүүд  энэ сарын27 гэхэд тоног төхөөрөмжийн тохируулгаа дуусаж, туршилт хийхээр төлөвлөн ажиллаж байна.Засвар механикийн завод, Баяжуулах үйлдвэр, Дулааны цахилгаан станц, Эрчим хүчний хэлтсийн мэргэжилтнүүдээс бүрдсэн ажлын хэсэг амжилттай ажиллаж байна. Ийнхүүцутгуурын үйлдвэрлэлийн хэвний технологид ХБНГУ-д үйлдвэрлэсэн “Хүйтнээр хатууруулах холимгоорхэв бэлтгэх” хагас автомат шугамын цогц систем нэвтрүүлэх техник технологийн шинэчлэл  дуусах шатандаа орлоо.                                                                                                                             Я.Энхтуяа Фото: Ш.Лхамсүрэн Дэлгэрэнгүй...
  • УЦУОШТ: Нарийн тоос маргааш сарних төлөвтэй байна

    Орхон, Булган, Дархан-Уул аймгийн нутаг дэвсгэрийг хамран агаарт дэгдсэн нарийн тоос агаарын урсгал хөдөлгөөнд орж, маргааш сарних төлөвтэй байгааг аймгийн Ус цаг уур, орчны шинжилгээний төвөөс мэдээлж байна. Манан мэт агаарт тогтсон нарийн тоос нь онц сонин үзэгдэл биш хэдий ч манай аймгийн хувьд анхны тохиолдол болжээ. Энэ сарын 5-наас эхлэн Сэлэнгэ, Төв, Дундговь аймгийн нутагт шороон шуурга шуурч, улмаар агаарт дэгдсэн шороо нь нарийн тоос болон хуралджээ. Ойрын өдрүүдэд салхины хүч бага байгаа нь нарийн тоосыг хөдөлгөөнгүй байдалд оруулсан бөгөөд маргааш салхины чиглэл нутгийн баруун хойноос байх төлөвтэй тул агаарт сарнина гэж тооцоолж байна. Нарийн тоос нь хүний биед ямар сөрөг нөлөө үзүүлэхийг эрүүл мэндийн байгууллага л тогтоох боломжтой тул иргэдийг амны хаалтаа зүүж, эрүүл мэнддээ анхаарахыг зөвлөлөө. Цаг агаарын урьдчилсан мэдээгээр энэ сарын 8-нд ялимгүй хур тунадастай, шөнөдөө 0-5 градус хүйтэн, өдөртөө 8-13 градус дулаан байна. Харин 12, 13-нд салхины хурд ихсэж, шороон шуурга шуурах төлөвтэй байгааг Ус, цаг уур, орчны шинжилгээний төвийн Цаг уур, орчны технологи, мэдээллийн үйлчилгээний хэлтсийн дарга Б.Цээнээ мэдээллээ.   И.Чинтогтох Фото: Б.Баттөгс Дэлгэрэнгүй...
  • Урьдчилан сэргийлэх ажил тогтмолжсон

    Дэлхийн 200 гаруй улс оронд тархаад буй “ковид-19” цар тахлаас урьдчилан сэргийлэх ажлын хүрээнд Эрдэнэт үйлдвэрт Шуурхай штаб байгуулагдаад 2 сар гаруй болж байна. Шуурхай штабынхан өглөө ажилдаа ирж буй ажилчдын биеийн халууныг хэмжих, хяналт тавих, хоолны цэгүүдийн эрүүл ахуй, ариутгал халдваргүйтгэлийн мэдээллийг цаг тухайд нь авч, нэгтгэн үйлдвэрийн Ерөнхий диспетчер болон Уул уурхайн яам, Улсын Онцгой комисст хүргэх чиг үүрэг хүлээдэг. Штабын бүрэлдэхүүнд Онцгой байдлын газар, “Эрдэнэт” сувиллын цогцолбор, ХАБЭА-н хэлтсийн ажилтан болон эмч нар ээлжийн горимоор ажиллаж байна. Өнгөрсөн хугацаанд Дэлхийн Эрүүл Мэндийн байгууллага, Улсын Онцгой комисс, Эрүүл мэндийн яамнаас өгч буй зөвлөмжийг хэвшүүлэхэд хяналт тавьснаар ажилчид амны хаалт зүүх, гар угаах ариутгах нь тогтмолжиж, хоолны цэгүүдийн үйлчилгээ, эмх цэгц сайжирсныг Шуурхайн штабынхан онцоллоо.         М.Балжинням   Дэлгэрэнгүй...
  • Д.ЭРДЭНЭБАТ: 1А хорооллын инженерийн шугам сүлжээ, дэд бүтцийн асуудлыг шийдсэн нь Эрдэнэтийн уурхайчдаас иргэддээ барьж буй бэлэг юм.

    “Эрдэнэт үйлдвэр” ТӨҮГ, нийгмийн хариуцлагыг хэрэгжүүлэгч жишиг үйлдвэрийн хувьд жилийн нийт зардлынхаа 7-8 хувийг ажилтнуудынхаа нийгмийн хөгжлийн бодлого8хөтөлбөрт зарцуулдаг. Энэ үзүүлэлт жилээс жилд ахиж, ажилтан руу чиглэсэн олон талын бодит ажил нэмэгдсээр байна. Сүүлийн үед нийгмийн чиглэлээр хэрэгжиж буй ажлуудын талаар Нийгмийн харилцааны хэлтсийн орлогч дарга Д.Эрдэнэбаттай ярилцлаа. -Цаг үеийн асуудлаас ярилцлагаа эхэлье. Манай үйлдвэрт Эрүүл мэндийн байнгын комисс байгуулагдсан. Та ажлын хэсгийн орлогчоор ажиллаж байгаа юм байна. Ямар зорилго, чиглэлтэй ажиллах вэ? -Үйлдвэрийн газрын  Эрүүл мэндийн байнгын ажлын хэсэг Ерөнхий захирлын нэгдүгээр орлогч бөгөөд Ерөнхий инженерийн шийдвэрээр шинэчлэн байгуулагдлаа. Зорилго нь ажилчдын эрүүл мэндийг хамгаалах, өвчин эмгэгээс урьдчилан сэргийлэх ажлыг эрчимжүүлэх, тэдгээрийн хэрэгжилтийг хангах үйл ажиллагааг зохион байгуулах, хяналт тавих  чиглэлээр байнгын үйл ажиллагаа явуулна. Эрүүл мэндийн чиглэлээр ажилладаг бүтцийн нэгжүүд бий. Тэдгээр нь өөрийн хариуцсан чиглэлээр үүргээ сайн гүйцэтгэдэг. Гэхдээ зарим нэг тохиолдолд тухайн ажил нь саатах, удаашрах тал гардаг учраас Эрүүл мэндийн байнгын комисс энэхүү асуудлыг шийдвэрлэхэд түлхэц өгөх, шийдвэрлүүлэх талаар анхаарч ажиллана. Комиссын бүрэлдэхүүн саяхан шинэчлэгдсэн. Эхний байдлаар ажлын хэсгийн журмын төслийг боловсрууллаа. Одоо бид Эрүүл мэндийг дэмжиххөтөлбөрөөхэлэлцэж бэлэн болгоно. Хөтөлбөр маань мөн л төслийн шатанд байгаа. Оны эхнээс бид комиссын ажлаа эхлэхээр төлөвлөж байсан ч “ковид-19” цар тахал  тархсаны улмаас цаг үеийн нөхцөл байдалтай уялдуулан ажиллаж байна. Ажлын хэсгийн журмын дагуу бүтцийн нэгжүүдийн холбогдох мэргэжилтнүүд уг бүрэлдэхүүнд ажиллана. Өөрөөр хэлбэл, эрүүл мэнд гэхээр зөвхөн эмч, эмнэлгийн ажилтнууд гэлтгүй нийгмийн, эрүүл ахуйн, хоол зүй, хөдөлмөр хамгаалал, хүний нөөцийн  чиглэлийн мэргэжилтнүүд багтаж байна. -Эрүүл мэндийн хөтөлбөрийг шинэчлэн батална гэлээ. Энэ хөтөлбөрийг ямар хугацаатай боловсруулж, хэрэгжүүлж байна вэ? 2020 оны Эрүүл мэндийн хөтөлбөр ямар онцлогтой байх вэ? -Хөтөлбөрийнхөө төслийг боловсруулаад байж байна. Миний хувьд, Эрдэнэт үйлдвэрт жирийн ажилчнаас эхлээд 29 дэх жилдээ ажиллаж байна. Ийм ч учраас  ажиллагсдын эрүүл мэнд, тэр тусмаа урьдчилан сэргийлэх чиглэлийн ажлууд илүү чухал гэж боддог. Тиймээс уурхайчдынхаа эрүүл мэндийг хамгаалах, урьдчилан сэргийлэх чиглэлээр хийх ажлууд түлхүү тусгагдана гэж харж байгаа. -Нийгмийн харилцааны хэлтсийн ойрын үед хийж буй томоохон ажлууд юу байна вэ? Нийгмийн цехүүдийг тойрсон асуудлыг хэрхэн шийдвэрлэж байна вэ? -Эрдэнэт үйлдвэр нь ТӨҮГ болж, бүтцийн өөрчлөлт хийсний хүрээнд Нийгмийн харилцааны хэлтэс шинээр байгуулагдсан. Өнөөдрийн байдлаар, манай хэлтсийн ажил олон чиглэлд үргэлжилж байна. Юуны өмнө бүтэц бүрэлдэхүүн, чиг үүргээ тодорхойлж, нийгмийн хариуцлагын чиглэлээр ажиллах хэлтсийн журмыг батлуулсан. Захиргаа, хүний нөөцийн бодлогын газартай зөвшилцсөний үндсэн дээр нийгмийн чиглэл болон Захиргаа, хүний нөөцийн бодлогын газрын чиг үүргийн журмыг салган, өөр өөрийн харьяалалд авч шинэчиллээ. Шинэчлэхдээ бид, Ерөнхий захирлын өгсөн чиглэлийн дагуу журмуудыг  нэгтгэж цэгцэлж байна. Тухайлбал, таван өөр журмаар зохицуулдаг байсан тусламж үйлчилгээг нэг журамтай болгох гэх мэт. Мөн цаг үетэйгээ холбогдож шинэ журам боловсруулах шаардлага гарч байна. Нөгөө нэг томоохон ажил гэвэл бид 2019 оны нийгмийн хариуцлагын тайланг бэлтгэж байна. Өнгөрсөн онд Эрдэнэт үйлдвэр нийгмийн хариуцлагын чиглэлд хэрхэн ажилласныг олон түмэнд таниулж, хүргэх цогц тайлан удахгүй гарна. Манай үйлдвэр орон нутагтай нягт хамтын ажиллагаатай. Саяхан, Орхон, Булган аймагтай хамтран ажиллах 2019 оны гэрээг дүгнэж, шинэ онд хэрэгжүүлэх төлөвлөгөөгөө баталж, гарын үсэг зурлаа. 2020 онд хамтын ажиллагааны хүрээнд манай үйлдвэр Орхон аймагт 2 тэрбум, Булган аймагт 700 сая гаруй төгрөгийн хөрөнгө оруулалт хийнэ. Энэ удаагийн гэрээнд Эрдэнэт үйлдвэр зөвхөн өгөх биш, орон нутаг харилцан ашигтай ажиллах тухай тусгаснаараа онцлог болсныг хэлэх нь зүйтэй байх. Сүүлийн 2 жилийн хугацаанд бидний өмнө тулгамдаж буй нэг асуудал бол Орос сургууль, цэцэрлэг, орос эмнэлгийн тусгай зөвшөөрлийн асуудал байсан. Энэ талаар манай хэлтэс байгуулагдсан цагаасаа хөөцөлдсөн. Монгол Улсын холбогдох хууль дүрмийн дагуу Орос сургууль,  орос цэцэрлэг ажиллах ямар ч үндэслэлгүй гэдгийг бүх мэргэжлийн байгууллагууд тогтоосон. Тиймээс орон нутагтай хамтраад уг сургуулийг Эрдэнэт үйлдвэрийн харьяа орос хэлний гүнзгийрүүлсэн сургалттай сургууль болгох нь зөв гэсэн шийдэлд хүрээд байна. Үүнийг хэрэгжүүлэх Орхон аймгийн ЗДТГ-тай хамтарсан ажлын хэсэг байгуулагдан ажиллаж байна. Мөн олон жил царцсан 1А хорооллын инженерийн шугам сүлжээ, дэд бүтцийг барьж байгуулах ажил байна. 1А хороолол маань баригдаж эхэлсэн боловч  инженерийн шугам сүлжээ, дэд бүтцийг барьж байгуулах хөрөнгө мөнгөгүйгээс, барилгын ажил зогсоод байсан юм. Монгол Улсын Ерөнхий сайд Орхон аймагт айлчлах үеэр Засаг дарга уг асуудлыг шийдүүлэхээр хандсан. Ерөнхий сайд Эрдэнэт үйлдвэр, Орхон аймгийг хамтран шийдэх үүрэг чиглэл өгсний дагуу Эрдэнэт үйлдвэрийн зүгээс төсөлд шаардлагатай байгаа 12.5 тэр бум төгрөгийн санхүүжилтийг шийдээд байна. Энэ бол Эрдэнэт үйлдвэрийн уурхайчдын зүгээс аймгийн иргэддээ барьж буй том бэлэг юм. Бурхан багшийн сэрэг дүрийн урд байрлах 1А хорооллын дэд бүтцийн ажлын хүрээнд цахилгааны под станцыг өргөтгөх, цэвэр бохир усны бүх шугам сүлжээнд холбох, үерийн усны далан барих, гол магистрал засмал зам тавих гээд иж бүрэн бүтээн байгуулалт хийгдэнэ. Зөвхөн ЦРП-2  дэд станцыг өргөтгөснөөр Эрдэнэт хотын цахилгаан хангамжийн чадал 2 дахин нэмэгдэнэ. Энэ асуудлыг Эрдэнэт үйлдвэр нийгмийн хариуцлагын хүрээнд бодлогоороо  шийдэж байна гэж ойлгож болно. -Нийгмийн чиглэлийн бүтээн байгуулалтын ажлын тухайд..? -Нийгмийн харилцааны хэлтсийн үндсэн хэсэг нь нийгмийн төсөл хөтөлбөрүүдийг хэрэгжүүлэхэд чиглэдэг. Эрдэнэт үйлдвэр нийгмийн чиглэлийн төсөл хөтөлбөрүүдэд 31.3 сая доллар зарцуулахаар төлөвлөсөн. Цаг үеийн байдлаас шалтгаалан зарим нэг ажлаа түр хугацаагаар зогсоож байна. Өөрөөр хэлбэл, коронавирусын тархалтын улмаас дэлхийн зах зээлд унаж буй зэсийн үнэ эргээд өссөн үед эдгээр ажлууд үргэлжлээд явна. Төлөвлөгөөнд тусгагдсан ажлуудаа бид эрэмбэлж, хамгийн чухлаас нь үргэлжлүүлэн хэрэгжүүлэхээр ажиллаж байна. Өнгөрсөн оны хөрөнгө оруулалт бүтээн байгуулалтын ажлын төлөвлөгөөнд тусгагдан, Баян-Өндөр уулын энгэрт баригдаж эхэлсэн, хуучнаар “Москва 300” буюу “Уурхайчин-1”орон сууцны хороолол 2020 оны 12 дугаар сард ашиглалтад орох ёстой. Одоогийн байдлаар уг хорооллын барилгын ажил хэвийн, хоёрдугаар давхрын цутгалт хийгдэж байна. Ирэх 6 дугаар сард цутгалтын ажил бүрэн хийгдэж, барилгын гадна тал дуусаж 12 сар гэхэд дотоод чимэглэл бэлэн болж ашиглалтад хүлээлгэн өгөхөөр  гүйцэтгэгч компани ажиллаж байна. Тус хорооллын гүйцэтгэгчээр “Хемон”, “Одкон” компаниуд ажиллаж байна. Мөн “Эрдэнэт” соёл, спортын цогцолбор энэ онд баригдана. Гүйцэтгэгчээр Эрдэнэт үйлдвэрийн Барилга засварын цех ажиллаж, 12 сард дуусгах төлөвлөгөөтэй. Дараагийн бүтээн байгуулалтын ажил нь “Сэлэнгэ” амралт, аялал жуулчлалын цогцолборын “Ногоон хөгжлийн төв”-ийн байгуулалт. “Уурхайчин-2” орон сууцны хорооллын барилгын ажил энэ онд эхлэх бол “Уурхайчин-3” хорооллыг барьж байгуулах гүйцэтгэгчийн асуудал удахгүй шийдэгдэнэ. -Ирэх 12 сард ашиглалтад орох “Уурхайчин-1” орон сууцны хороололд орох ажилтнуудын захиалга авсан. Өөрөөр хэлбэл, шинэ байрны захиалга дүүрсэн үү? -Үйлдвэрийн цех нэгжүүдээс санал авсан. “Уурхайчин-1” орон сууцны хороолол 300 айлынх. Тиймээс бид цехүүддээ квот тогтоож өгсөн. Бидний тавьж буй шалгуур бол тухайн ажилтан өмнө нь Эрдэнэт үйлдвэрээс байр болон байрны тусламж хөнгөлөлт аваагүй байх. Учир нь үйлдвэрээс олгодог 12 сая төгрөгийн байрны хөнгөлөлтийг урьдчилгаа төлбөрийн 30 хувьд нь оруулахаар зорьж байгаа. Өнөөдрийн байдлаар, 280 гаруй ажилтны материалыг авч, хамтран ажиллаж буй Богд банканд хүргүүлсэн. -Эцэст нь, орон сууцны хувьчлалын тухай тодруулъя. Төрийн өмчийн бодлого зохицуулалтын газраас чиглэл өгсөн байгаа. Энэ ажил хэзээ хэрэгжих вэ? -Монгол Улсын Төрийн өмчийн бодлого зохицуулалтын газраас “Эрдэнэт үйлдвэр” ТӨҮГ-ын орон сууцыг үе шаттайгаар хэсэгчлэн хувьчлах шийдвэр гаргасан. Энэ дагуу манай үйлдвэрт ажлын хэсэг байгуулагдан, үйлдвэрийн хэмжээнд байгаа нийт орон сууцны тоо, мэдээлэл, цех нэгжүүдийн санал зэрэг нэгдсэн судалгаа хийж байна. Орон сууц хувьчлалын ажлын хэсэгт үндсэн цехүүд болон санхүү эдийн засаг, аудит, хууль, нийгмийн харилцаа, Захиргаа, хүний нөөцийн бодлогын газар зэрэг бүхий л хэлтэс нэгжийн төлөөллүүд орсон. Мэдээж, Эрдэнэт үйлдвэрийн албаны зориулалтаар ашиглагдаж буй болон Орос мэргэжилтнүүдийн амьдардаг байрууд хувьчлалд хамрагдахгүй. М.Балжинням Фото: Б.Баттөгс Дэлгэрэнгүй...
  • Өнөөдөр - 04 дүгээр сарын 07

    Мэдүүштэй... Өнөөдөр жилийн 97 дахь өдөр. Он дуусахад 268 хоног үлдлээ. Эрдэнэт хотод агаарын хэм өдөртөө +7 градус, шөнөдөө -1 градус байх бөгөөд шороон шуургатай, салхины хурд 5 м/сек. Аргын тооллын 4 сарын 7. Ангараг гариг. Билгийн тооллын 14. Тугчин одтой, цагаан луу өдөр. Өдрийн наран 6 цаг 18 минутад мандан, 19 цаг 30 минутад жаргана. Тухайн өдөр хулгана жилтнээ аливаа үйлийг хийхэд эерэг сайн ба бич, тахиа жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлийг эхлэх, дээдсээс халамж хүсэх, лам хувраг болох, багш шавьд барилдах, номын авшиг авах, шинэ гэр ба байр авах, угаал үйлдэх, бороо хур оруулах, зэтгэрийг номхотгох, хөгжмийн зэмсэг урлах, дархны үйлд сайн. Гүүр тавих, газар шороо ухахад муу. Өдрийн сайн цаг нь бар, луу, могой, бич, тахиа, гахай болой. Хол замд явах хүмүүс зүүн зүгт мөрөө гаргавал зохистой. Үс шинээр үргээлгэх буюу засуулбал эд, мал арвидна.                        Дэлхийн зах зээл дээр нэг тонн зэс 4863 ам.долларын ханштай байна. (Эх сурвалж: www.lme.com) Эрдэнэт үйлдвэрийн түүхэнд энэ өдөр... 1973 оны 4-р сар Эрдэнэт үйлдвэрийн бүтээн байгуулалтыг эхлүүлж, эрчимжүүлэх зорилгоор МАХН-ын Төв хороо, БНМАУ-ын Сайд нарын Зөвлөлөөс Монголын ард түмэнд хандан уриалга гаргав. 1973 оны 4-р сард   Эрдэнэтийн бүтээн байгуулалтад оролцохоор Зөвлөлтийн барилгачдын эхний хэсэг болох 18 хүн Эрдэнэтэд ирж, 5 дугаар сарын 9-нд Зөвлөлтийн мэргэжилтэн Ю.М. Овсянниковын удирдсан угсралтын бригад анхны уурын зуухны баганыг босгож, барилгын үйлдвэрийн баазын суурийг тавих ёслолын ажил болов. Эрдэнэтэд нэн түрүүнд баригдах шаардлагатай байгууламжаар, Дархан хот дахь дамжин өнгөрүүлэх бааз Улсын хилээс Дархан-Орхон-Эрдэнэт хүртэлх 220кВт-ын, Эрдэнэтээс Сэлэнгийн мод бэлтгэлийн аж ахуй хүртэлх 110 кВт-ын нийт 335 км өндөр хүчдэлийн цахилгаан дамжуулах шугам, трансформаторын дэд станц, Монголын зохион байгуулалттай ажилчдын тосгон Зөвлөлтийн барилгачдын хотхон Салхит-Эрдэнэтийн төмөр замын хайгуул, бусад бэлтгэл ажил Дархан-Эрдэнэтийн 170 км автозамын засвар Цэвэр усны шугам байгууламжууд /Эрдэнэтээс 60 км-ийн зайд Сэлэнгэ мөрний эргээр гүний худгууд гаргах/ -ыг нэрлэж байлаа. Дэлгэрэнгүй...
  • О.ОТГОНБАЯР: Бид хийж байгаа ажлаа түгээхийн зэрэгцээ цаашид илүү санаачилгатай ажиллана

    Төрийн байгууллагын ажлын зохион байгуулалт, архив, албан хэрэгт хөтлөлтийн улсын үзлэгийг 2019 оны 06 дугаар сарын 03-наас 12 дугаар сарын 25-ныг хүртэлх хугацаанд орон даяар зохион байгуулсан билээ. Эрдэнэт үйлдвэр энэхүү улсын үзлэгт шилдэг 5 байгууллагын нэгээр шалгарч, өнгөрсөн долоо хоногт өргөмжлөлөө гардан авлаа. Удирдлагуудын өргөтгөсөн шуурхай зөвлөгөөний үеэр Захиргаа, хүний нөөцийн бодлогын газрын дарга О.Отгонбаяр шагналын талаар албан ёсны мэдээлэл хийж, баг болж хамтран ажилласан нийт удирдлага, уурхайчин хамт олондоо талархал илэрхийлж, ажлын амжилт хүссэн юм. -Эрдэнэт үйлдвэр “Байгууллагын зохион байгуулалт, архив, албан хэрэг хөтлөлтийн улсын үзлэг”-ээр 2 дахь удаагаа шалгарлаа, баяр хүргэе? -Монгол Улсын Засгийн газраас 2019 онд зохион байгуулсан “Байгууллагын зохион байгуулалт, архив, албан хэрэг хөтлөлтийн улсын үзлэг”-т нийт 5444 байгууллага хамрагдсан. Бид өнгөрсөн 7 хоногт Хууль зүй, дотоод хэргийн яамны Төрийн нарийн бичгийн дарга Г.Билгүүн, Архивын Ерөнхий газрын дарга С.Энхбаатар нараас шилдэг байгууллагын шагналаа гардан авлаа. Дөрвөн жил тутам болдог улсын үзлэгт Эрдэнэт үйлдвэр хоёр дахь удаагаа шалгарч байна. Энэ удаа УИХ-ын Тамгын газар, Сонгинохайрхан дүүргийн Засаг даргын Тамгын газар, Цагдаагийн Ерөнхий газар, Баянхонгор аймгийн Засаг даргын Тамгын газар болон “Эрдэнэт үйлдвэр” ТӨҮГ тэргүүн байр эзэллээ. Манай үйлдвэрийн хувьд улсын хэмжээнд үйл ажиллагаа явуулж байгаа төрийн өмчит компани болон төрийн өмчит үйлдвэрийн газруудаас 97,25 хувьтай дүгнэгдэж, үйл ажиллагаагаараа тэргүүлсэн. -Шилдгээр шалгарахад нөлөөлсөн тэргүүн туршлагаасаа нэрлэвэл? -Бид Мэдээллийн технологийн хэлтэс, Холбоо, мэдээллийн технологи, автоматжуулалтын цехтэй хамтран байгууллагын зохион байгуулалт, архив, албан хэрэг хөтлөлтийн үйл ажиллагааг дижитал хэлбэрт шилжүүлэх, е-office, е-doc систем нэвтрүүлэн санаачилгатай ажилласан. Улсын үзлэгийн дүгнэлтэд, “Эрдэнэт үйлдвэр энэ чиглэлээр хийж хэрэгжүүлж байгаа тэргүүн туршлагаа бусад байгууллагад түгээн дэлгэрүүлэх” тухай тусгасан. Энэ утгаараа бид хийж байгаа ажлаа түгээхийн зэрэгцээ цаашид илүү санаачилгатай ажиллах хэрэгтэй болж байна. Эрдэнэт үйлдвэр таран байршсан 40 гаруй бүтцийн нэгжийг хамруулан үйл ажиллагаа явуулдаг. Орон зай, цаг хугацааны хувьд алслагдсан нэгжүүд ч бий. Иймд бид үйл ажиллагаандаа мэдээллийн нэгдсэн систем нэвтрүүлэн, е-office, е-doc программуудыг ахисан шатанд гаргах, шийдвэрлэлтийн үйл ажиллагааг цахимаар хянах, шийдвэрлэлтийн үйлажиллагаагудирдлагыншийдвэргаргалтын төвшинд хэрэгжүүлэх, шийдвэрт гаргалтад бодит үр дүн гаргахад анхаарч ажиллана. Манай 6000 ажилтан дунд ямар чадвартай, мэдлэг туршлагатай хүн ажиллаж байна, хүний нөөцийг хэрхэн зөв байршуулах вэ, давтан сургах уу, Эрдэнэт үйлдвэрт ирээдүйд ямар мэргэжил нэн түрүүнд шаардлагатай байна, гэх зэргээр хүний нөөцийн бодлогод цахим НR-ийг хөгжүүлэх чиглэлээр зорилт тавин ажиллаж байна. Энэ ажил маань гол үнэлгээ болсон гэж бодож байна. И.Чинтогтох Фото: Б.Баттөгс   Дэлгэрэнгүй...
  • Эрдэнэт үйлдвэр эдийн засгийн хямралыг даван туулах Төв штаб байгуулан ажиллаж байна

    “COVID-19” коронавирусын цар тахлаас урьдчилан сэргийлэх, эдийн засгийн хямралтай нөхцөл байдлаас амжилттай гарахад чиглэсэн Төв штаб Эрдэнэт үйлдвэрийн хэмжээнд ажиллаж байна. Тус штаб нь 4 салбар штабтай бөгөөд үйлдвэрлэлийн тасралтгүй хэвийн ажиллагааг хангах ажлыг Ерөнхий захирлын нэгдүгээр орлогч бөгөөд Ерөнхий инженер Т.Батмөнх, санхүү, эдийн засгийн бодлогыг Санхүү, эдийн засгийн асуудал хариуцсан орлогч Д.Үүрийнтуяа хариуцан ажиллаж байна. “Эрдэнэт үйлдвэр” ТӨҮГ-ын Ерөнхий захирал Х.Бадамсүрэнгийн хэлсэнчлэн коронавирусын тархалт, эдийн засгийн хямралтай үед бүх бодлого ажиллагааны төвд хүн байх учиртай. Тэр утгаараа нийгмийн цехүүдийн үйл ажиллагаа, энэ чиглэлийн бүтээн байгуулалтын ажлыг Хамтын ажиллагаа, нийгмийн асуудал хариуцсан орлогч Д.Дэлгэрбаяр ахалж ажиллана. Хямралын үед үйлдвэрлэлийг хязгаарлалгүйгээр, орлого өгөх ажил, бүтээгдэхүүн өгөх төслүүдэд чиглүүлэх бөгөөд тэдгээр томоохон төсөл хэрэгжүүлэх штабыг Хөгжлийн асуудал хариуцсан орлогч П.Энхбат хариуцах бөгөөд штабууд өөрийн хариуцсан чиглэлээр цаг үеийн болон ажлын нөхцөл байдалд дүн шинжилгээ хийж, шуурхай арга хэмжээ авч ажиллах юм. И.Чинтогтох Фото: Б.Баттөгс Дэлгэрэнгүй...
  • М.ДАМДИНСҮРЭН: Эрдэнэт үйлдвэр 60-аас илүү жил ажиллах боломж бий

    Хаврын урь ороход геологичид маань ажлаа эрчимжүүлж байгаа даа, гэх бодол эрхгүй төрдөг. Энэ жилийн хувьд дэлхий нийтийг хамарсан корона вирусын халдвараас сэргийлэхийн тулд ажил хаа сайгүй хазаарлагдсан аястай байна. Харин Эрдэнэт үйлдвэрийн ирээдүйг бодитой тодорхойлоход чухал үүрэг гүйцэтгэдэг Геологи, хайгуулын экспедицийн ажил хэр урагштай яваа талаар тус цехийн дарга М.Дамдинсүрэнгээс тодрууллаа.  -Геологи, хайгуулын ажил эхэлсэн үү? -Гуравдугаар сарын эхээр эхэлсэн. Ил уурхай дээр энэ оны ашиглалтын хайгуулын ажил үргэлжилж байна. Одоогоор ажлын гүйцэтгэл 60 гаруй хувьтай явна. Мөн Баяжуулах үйлдвэрийн хүсэлтээр Уралын уулын хүрээлэнгээс мэргэжилтнүүд ирж Хаягдлын аж ахуйд ажилласан. Бид тэнд өрөмдлөг хийгээд саяхан дууслаа. Манай нэгдүгээр улирлын төлөвлөгөө биелсэн.  -Уралын уулын хүрээлэн-гийнхэн ямар ач холбогдолтой ажил хийсэн бэ? -Хаягдлын аж ахуйн далангийн тогтвортой байдлыг хангах гэрээний дагуу усны түвшин, шилжилт хөдөлгөөн зэрэгт гидрогеологи, маркшейдерийн ажиглалт хийлгэдэг юм. Энэ ажлын пьезометр, инклинометрийн өрөмдлөгийг манайх хийдэг. Энэ удаа шон босгох өрөмдлөг хийж дууслаа. Тэд цооногууд дээр бүтэн жил ажиглалт явуулаад он гарахаар ажлын үр дүнгээ тайлагнана. Жилдээ нэг хийгддэг ажил л даа. -Үйлдвэрийн газрын нөөцөд бүртгэгдсэн орд газруудад ажил явагдаж байна уу? -Эрдэнэтийн төвөөс 40-өөд км яваад Шандын орд бий. Тэнд өнгөрсөн жил  хайгуулын ажил хийгдсэн. Энэ жил мөн үргэлжилнэ. 7000 тууш метр өрөмдөх төлөвлөгөөтэй. Технологийн материал нийлүүлэгдэхээр ажил эхэлнэ. Тавдугаар сарын сүүлээр хээр гараад явчих болов уу. Мөн тэнд геофизикийн ажил хийнэ. -Оны эхнээс геологийн бичиглэл, зураглал эрчимтэй явуулсан байхаа? -Тэгсэн. Энэ хүрээнд дахин 10 мянган тууш метр бичиглэл хийнэ. Энэ ажил эхний шатанд амжилттай явагдаж байна. Сардаа 2000 тууш метр бичиглэл явуулах ёстой. Ямар ч байсан хоёр, гуравдугаар сарын төлөвлөгөөгөө биелүүлчхээд байгаа. -Эрдэнэтээр нисээд байгаа онгоц танай ажилтай хамааралтай юу? -Өнгөрсөн жил бол хамааралтай байсан. Агаарын геофизикийн зураглал хийсэн. Зураглал тодорхой үе шаттай, масштабуудаар хийгддэг ажил л даа. Зураглалын тайллыг үндэслэн манайх ажлаа үргэлжлүүлдэг юм. -Шандын ордоос гадна нөөцөд бүртгэгдсэн газар бий юу? -Одоогоор хайгуул хийх ёстой хоёр ч газар байна. Завсрын хэсэг гэж бий. Тэнд хагас дутуу хайгуул хийгээд, аргачлал буруу гээд Сандуйжав гуайн үед орхигдсон. Оюутын хэсэг бий. Энэ дээр урьдчилсан хайгуул хийгээд бас орхисон. Лиценз нь манайд байдаггүй. Засгийн газраас, урт нэртэй хуулийн дагуу хаачихсан. Бид 2012 оноос хойш лицензийг нь авах гэж хөөцөлдөөд хуулийн хүрээнд хаагдчихсан учраас гарч ирэхгүй байна. Энэ хоёр газар  хүдрийн биет, зэсийн нөөц байгаа нь тодорхой. -Урьдчилсан хайгуулыг манайх хийсэн үү?  -Оюут дээр урьдчилсан хайгуулыг оросууд хийсэн байсан. Нөөц нь бодогдоод гарчихсан. Гэхдээ хайгуулын үйл ажиллагаа дутуу хийгдсэн учраас үргэлжлүүлэх шаардлагатай. Шанд ч ялгаагүй. -Эрдэнэт үйлдвэрийн насыг жарнаар тооцох болсон. Энэ хоёр ордын нөөц үүнд багтсан уу? -Хамрагдаагүй. Хэрэв нөөц нь тодорхой болоод бодогдох юм бол Эрдэнэт үйлдвэр 60-аас илүү жил ажиллах нөхцөл бүрдэнэ. -Ер нь жаран жилийг яаж бодоод байна? -2016 онд “Эрдэнэтийн-Овоо” ордын хүдрийн нөөцийн тайлан, техник эдийн засгийн үндэслэлээр энэ хүчин чадлаараа 39 жил ажиллахаар тооцогдсон юм. Энийг 40 жил гэж үзэх боломжтой. 2016 оноос өнөөдрийг хүртэл ордын баруун хойд болон  төвийн хэсэг дээр үргэлжлүүлэн хайгуул хийсэн нөөц маань дахиад 20 жил ажиллах хэмжээнд байгаа учраас нийлбэрээр нь 60 жил гэж үзэж байгаа юм. -Ойлгомжтой. Энэ оны хөрөнгө оруулалтаар техникийн шинэчлэл хийх үү? -Хамгийн том нь нэг өрөм шинээр авна. Бид техникийн тодорхойлолт, захиалгаа өгчихсөн. Үнэлгээний хороо байгуулагдсан. Удахгүй тендер зарлагдах болов уу гээд хараад сууж байна. Токарийн машин, индукцийн зуух гээд захиалгад орсон тоног төхөөрөмжүүд бий. Геологи, хайгуулын экспедици хайгуулын шатны үйл ажиллагаа явуулахаас гадна хайгуулын өрмийн хошуу ч юм уу, технологийн тоног төхөөрөмжийн хэрэгтэй сэлбэг хэрэгслүүдийг өөрсдөө хийхийг зорьж байгаа. Энэ хүрээнд эдгээр тоног төхөөрөмжийг авч байгаа юм. Гэхдээ одоохондоо энэ тухай ярихад эрт байна. 2021 онд хэрэгжих ажил. -Манайх Монгол улсын хэмжээнд хайгуулын хамгийн том өрөм эзэмшдэг газар шүү дээ. Хэргийг нь гаргаж байна уу?    -Геологи, хайгуулын анги экспедици болж өргөжсөнөөр зөвхөн үйлдвэрийн хэмжээнд бус улсын хэмжээнд үйл ажиллагаа явуулах эрхтэй болсон. Тэр тусмаа Төрийн өмчит үйлдвэрийн газар учраас Төрийн өмчийн бодлого зохицуулалтын газрын харьяа “Эрдэнэс-Таван толгой”- гоос эхлээд Багануур, “Шивээ-Овоо” гэх мэт уурхайнууд ямар нэгэн сонгон шалгаруулалтгүйгээр ажил хийлгэх боломжтой. Эдгээр уурхай хайгуулын төрөл бүрийн ажил үргэлж хийж байх ёстой. Манайх  ашиглалтын хайгуул, дараа нь гүйцээх хайгуул хийдэг. Үүний тулд өрөмдлөг зайлшгүй шаардлагатай. Мөн Геологи, хайгуулын анхан шатны ажил болох бүх төрлийн зураглал хийдэг.              -Зураглал олон янз байдаг уу? -Геологийн, гидрогеологийн, геофизикийн зураглал гэж бий. Энэ ажлуудыг хэрэгцээтэй талбайд хийж өгөөд эрлийг эхлүүлдэг. Эрлийн ажил дууссаны дараа урьдчилсан хайгуул, нарийвчилсан хайгуулын төгсгөлд нөөцийн тайлан бичигдэнэ. Үүний үр дүнд техник эдийн засгийн үндэслэл боловсруулагддаг. Уурхай болоод явсны дараа ашиглалтын хайгуул, гүйцээх хайгуул болон тусгайлсан хайгуул хийгддэг. -Тусгайлсан хайгуулыг хаана хийдэг вэ?  -Жишээ нь олон жил болсон овоолгуудын нөөцийг тусгайлсан хайгуулаар тогтоодог. Хэдийгээр уурхайгаас гарч байгаа уулын цул сар, улирал, жилийн үр дүнгээр тоон үзүүлэлт, хүдрийн хэмжээтэй байдаг ч талбайд тараагаад асгачихаар хаана нь юу орсон нь мэдэгдэхгүй. Тиймээс хайгуул явуулдаг юм. Дараа нь “Ачит Ихт”, “Эрдмин” компани шиг хэрэглэнэ гэсэн үг.   -Шинээр авах өрөм өмнөх томтой ижил үү?  -Адилхан, 2500 м хүртэл өрөмдөх хүчин чадалтай. Шандын ордын хөрсний зузаан нь 300 метр байна. Түүнээс доош хүдэр байгаад байдаг. Гэтэл манайх хамгийн гүндээ 1617 хүртэл метр өрөмдөж байсан. Одоо 300, түүнээс гүн өрөмдөх шаардлагатай учраас хүчин чадал өндөр өрөм захиалсан. -Зэсийн үнэ унаж байгаатай холбогдуулан үйлдвэрийн газрын хэмжээнд хэмнэлтийн бодлого хэрэгжиж байна. Танайд боломж бий юу? -Хэмнэлтийн бодлогын хүрээнд энэ онд 170 сая төгрөг хэмнэх техник, зохион байгуулалтын төлөвлөгөө гаргаад ажиллаж байна. -Баярлалаа.    М.Одгэрэл Фото: Б.Баттөгс Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Холбоо барих
    Эрдэнэт үйлдвэрийн “Бүтээн байгуулалт, хөрөнгө оруулалт 2019” жилийн хүрээнд хийгдсэн Ган бөөрөнцгийн цехийн индукцийн технологи, цувих иж бүрэн шугамыг ашиглалтад хүлээн авах нээлтийн үйл ажиллагаа өнөөдөр боллоо. Эрдэнэт үйлдвэр хурдацтай хөгжиж буй технологийн дэвшлийг дагаж тоног төхөөрөмжөө шинэчлэх, ажилчдынхаа ажиллах орчин нөхцөлийг сайжруулах, үйлдвэрлэлийн цар хүрээг нэмэгдүүлэх, үр ашгийг дээшлүүлэхэд чиглэсэн нийт 410 тэрбум төгрөгийн хөрөнгө оруулалтыг энэ онд хийсэн. 
    Цувих хос шугам ашиглалтад хүлээн авах нээлтийн үйл ажиллагаанд Эрдэнэт үйлдвэр ТӨҮГ-ын Ерөнхий захирал Х.Бадамсүрэн, орлогч захирлууд болон холбогдох газар, хэлтсийн дарга нар оролцлоо. 1996 онд Монгол Улсын Хөдөлмөрийн баатар, Техникийн шинжлэх ухааны доктор Ш.Отгонбилэг агсны санаачилгаар байгуулагдсан Ган бөөрөнцгийн цех өнөөг хүртэлх хугацаанд 300-аад мянган тонн ган бөөрөнцөг буюу 60 орчим тэрбум төгрөгийн бүтээгдэхүүн үйлдвэрлээд байна. Нүүрс хийжүүлэх зуухнаас татгалзаж, байгальд ээлтэй, хүний эрүүл мэндэд сөрөг нөлөөгүй индукцийн технологи нэвтрүүлснээр 80х100, 40х80-ын голчтой цувих шугамаар ган бөөрөнцөг үйлдвэрлэх боломж бүрдлээ. Шинэ технологи нэвтрүүлэх тус ажилд дөрвөн тэрбум төгрөгийн хөрөнгө оруулалт хийсэн бөгөөд зардлаа 1,5 жилийн дотор нөхөх тооцоо гаргаад байна. Эрдэнэт үйлдвэр цахилгаан эрчим хүчээр ажилладаг индукцийн технологи руу шилжсэнээр жилдээ 24500 тонн ган бөөрөнцөг үйлдвэрлэхэд 1,3 тэрбум төгрөг хэмнэж ажиллана. Баялаг бүтээгчид оны ажлаа үр дүнтэй бүтээн байгуулалтаар өндөрлөж, ирэх оныг эрч хүчээр дүүрэн угтаж байна. 
 
 
 
 
 
 
 
 
 
И.Чинтогтох
Фото: Б.Баттөгс
    “Эрдэнэт үйлдвэр” ТӨҮГ-ын Ерөнхий захирлын нэрэмжит “Уурхайчдын их цэнгүүн” Спорт цогцолборын “Хангарьд” паласт энэ сарын 30-ны өдөр ёслол төгөлдөр боллоо. 2019 оны ажлаа дүгнэж, амжилт ололтоо хамт олонтойгоо хуваалцсан энэхүү баярын цэнгүүнд үйлдвэрийн удирдлагууд, бүтцийн нэгжийн шилдэг, тэргүүний ажиллагсад уригдан оролцсон. Эрдэнэт үйлдвэр түүхэндээ анх удаа 37 сая тонн хүдэр олборлож, 32 сая тонн хүдэр боловсруулсан тэргүүн дээд амжилтаар 2019 оныг үдэж, улс, орон нутгийн төсөвт 936.5 тэрбум төгрөг төвлөрүүлсэн амжилтаа баяр бахдалтайгаар ийнхүү тэмдэглэлээ.
 
    Эрдэнэт үйлдвэрийн Ерөнхий захирал Х.Бадамсүрэн нийт уурхайчдадаа хандан, их цэнгүүнийг нээж хэлсэн үгэндээ “Энэхүү баярт цэнгүүний үеэр уурхайнхаа мөргөцөгт ажиллаж, Баяжуулах үйлдвэрийнхээ технологийн горимыг хянаж, хөвүүлэн баяжуулах процессоо хараад баясан байгаа баяжуулагч нартаа, яг энэ цаг мөчид цех, нэгжийнхээ ээлжинд гарч, төв диспетчерийн байрандаа тасралтгүй үйл ажиллагааг ханган ажиллаж байгаа нийт ажилтнууддаа шинэ оны баярын мэндийг дэвшүүлж, аз жаргал, сайн сайхан бүхнийг хүсэн ерөөе. 2019 онд бид сайн ажиллаж, энэ өнөр бүлийн гишүүн бүр өөрийн хариуцсан ажилтай, өөрт оногдсон үүрэх ачааг эзний ёсоор сайн хийлээ. Манай хамт олон ингэж ажиллахад үнэлж баршгүй хувь нэмэр оруулдаг хань ижил, гэр бүлд нь үйлдвэрийн удирдлагын зүгээс гүн талархал илэрхийлье. Түүхэн амжилт, түүхэн бүтээн байгуулалтын жилд үйлдвэрлэлийн үйл ажиллагаа түүхэн дээд амжилт тогтоож, түүнийг дагасан санхүү эдийн засгийн үзүүлэлт сайн байлаа. Сэтгэл зүтгэлтэй ажилласан нийт хамт олондоо баярт цэнгүүний индэр дээрээс талархал дэвшүүлье, та нартаа халуун баяр хүргэж, цаашдын хөдөлмөрт нь улам их амжилтыг хүсэн ерөөе” хэмээсэн.
 
    Орхон аймгийн Засаг дарга бөгөөд Эрдэнэт хотын захирагч Д.Батлут “Уурхайчдын их цэнгүүн”-д урилгаар оролцож, талархал илэрхийллээ. Тэрээр энэ онд орон нутгийн хэмжээнд хийж хэрэгжүүлсэн ажлаа онцолж, ирэх онд хамтын ажиллагааны хүрээнд илүү дэвшилттэй ажиллах жил болно гэдэгт итгэж байгаагаа уламжилсан. Эрдэнэт үйлдвэр 2020 оны босгон дээр манлайлагч, тэргүүний баялаг бүтээгчдээ шалгаруулж, энэ үдшийн цэнгүүн дээр шагналыг нь гардуулан өглөө. Мөн энэ үеэр Ил уурхайн ажилтан Э.Отгонбаатар Ерөнхий захирлын нэрэмжит “Уурхайчдын их цэнгүүн”-ий супер азтан болж, хоёр өрөө байрны түлхүүр гардан, баярласан сэтгэгдлээ илэрхийллээ. Цех, хэлтсийн шилдэг ажилтнууд өвлийн өвгөнөөс бэлэг гардаж, хөдөлмөрөө үнэлүүлсэн энэ үдшийн үйл ажиллагаа дуу хуур, бүжиг наадмаар өндөрлөн, уурхайчид айсуй оноо угтсан юм.
 
    2019 он Эрдэнэт үйлдвэрийн хувьд бүтээн байгуулалтын хоёр дахь давалгааг эхлүүлсэн онцлог жил байсан төдийгүй үр ашиг, үйлдвэрлэлийн төлөвлөгөөт үзүүлэлтээ давуулан биелүүлсэн түүхэн цаг хугацаа байсныг тэмдэглье. Монгол Улсын төсвийн 10 орчим хувийг дангаар бүрдүүлдэг “Эрдэнэт үйлдвэр” ТӨҮГ-ын хамт олон шинэ оноо өрнүүн их амжилт, хөдөлмөр бүтээлээр утгаж байна.
 
И.Чинтогтох
Фото: Б.Баттөгс
    “Эрдэнэт үйлдвэр” ТӨҮГ-ын удирдлагуудын ээлжит шуурхай хуралдаан өчигдөр болж, 2019 оны ажлаа дүгнэн хэлэлцэв. Энэ үеэр Эрдэнэт үйлдвэрийн гадаад, дотоод худалдаа болон бүтээгдэхүүний маркетингийн бодлогыг чадварлаг тодорхойлж олон жил үр бүтээлтэй ажилласан Маркетингийн хэлтсийн тэргүүлэх мэргэжилтэн Л.Гантулгад Санхүү, бүртгэлийн Тэргүүний ажилтан, мэргэжилтэн Б.Болдбаяр болон уул уурхайн салбарын хэвлэл мэдээлэл, телевизийн салбарт өөрийн 30 жилийн хөдөлмөрөө зориулсан нэвтрүүлэгч П.Энхтуяа нарыг Уул, уурхай хүнд үйлдвэрийн яамны сайдын шийдвэрээр “Тэргүүний уурхайчин” хүндэт тэмдгээр шагнасныг удирдлагууд гардуулж, баяр хүргэлээ. Мөн тус хэлтсийн мэргэжилтэн Ч.Тод-Эрдэнэ Яамны хүндэт жуух бичгээр шагнагдсан юм. Шинэ оны босгон дээр шагнал хүртсэн журмын нөхөддөө баяр хүргэе.     
 
 
 
 
М.Одгэрэл
Фото: Б.Баттөгс
Мягмар, 31 12-р сар 2019 00:00

Мэндчилгээ

 
 
     “Эрдэнэт үйлдвэр” ТӨҮГ-ын уурхайчин хамт олондоо, Орхон аймгийн ард иргэд Та бүхэндээ морилон ирж буй шинэ жилийн баярын мэнд дэвшүүлье. 
    Баялаг бүтээгч хамт олон маань улирч буй 2019 оныг “Хөрөнгө оруулалтын жил” болгон зарлаж ихийг төлөвлөн хэрэгжүүлж бүтээн байгууллаа. Техник, технологийн бодлогын хүрээнд Ил уурхайд 32 тэрбум төгрөгийн хөрөнгө оруулалттай техникийн шинэчлэл хийсний үр дүнд үйлдвэрлэлийн найдвартай ажиллагаа сайжирч, жилийн дүнгээр анх удаа 37 сая тонн хүдэр олборлов. Баяжуулах үйлдвэрийн үндсэн хэсгүүд болох Бутлан тээвэрлэхээс эхлээд Шүүн хатаах, Хаягдлын аж ахуй хүртэлх бүхий л дамжлага дээр өргөтгөл, шинэчлэлийн ажил өрнөж, бүтээн байгуулалтын төслүүд амжилттай хэрэгжсэний үр дүнд энэ онд анх удаа 32 сая тонн хүдэр боловсруулж, түүхэн дээд амжилт тогтоолоо. 
2019 онд “Эрдэнэт үйлдвэр” ТӨҮГ бүтээн байгуулалт, техник, технологийн шинэчлэлд түүхэндээ хамгийн өндөр буюу 410 тэрбум төгрөгийн хөрөнгө оруулж, үйлдвэрлэлийн үр ашгийг нэмэгдүүлэх олон чухал ажил хийж хэрэгжүүллээ. Тухайлбал, Баяжуулах үйлдвэрийн Нунтаглан баяжуулах хэсэгт зэс молибдены баяжмал салгах, молибдены баяжуулалтын дамжлага шинэчлэгдсэнээр жилд 1.8 тэрбум төгрөгийн, Бутлан тээвэрлэх хэсгийн 13 дугаар бутлуурыг МР-800 бутлуураар сольсноор жилд 95.5 тэрбум төгрөгийн нэмэлт орлого олох нөхцөл бүрдсэн. Хүдэр нунтаглалтын 7 дугаар тээрмийг шинэчиллээ, Засвар механикийн заводын Цутгуурын цехэд болон Ган бөөрөнцгийн цехэд дэлхийн дэвшилтэт технологийн шинэчлэл хийгдэж байна. Мөн Хаягдлын аж ахуйд М4 далан, холбох сувгийн хамт барьж байгуулах төсөл амжилттай хэрэгжиж, хаягдлын сангийн насжилт зургаан жилээр уртаслаа. Энэ мэт их ажил ундарсан, Эрдэнэт үйлдвэрийн түүхэнд 2019 он тод үлдсэн жил болж өндөрлөж байна.    
    Сүүлийн жилүүдэд үйлдвэрийн анхдагч ажилчдын нэгэн бүтэн үе шинэчлэгдэхийн хэрээр залуу ажилчдын нийгмийн асуудлыг цогцоор шийдэх шаардлага шинээр ургаж байна. Эрдэнэт үйлдвэр ажилтнууддаа тогтвор суурьшилтай ажиллах нөхцөлийг бүрдүүлэх үүднээс орон сууцтай болоход нь үзүүлдэг дэмжлэгийг 2019 оны нэгдүгээр сарын нэгнээс 12 сая төгрөг болгон нэмэгдүүлсэн билээ. Ингэснээр энэ жил 518 ажилтанд 6.2 тэрбум төгрөгийн дэмжлэг олгосон байна. Мөн ажилчдынхаа цалинг тавдугаар сарын нэгнээс 10 хувиар, аравдугаар сарын нэгнээс дахин 10 хувиар нэмэгдүүллээ. Цаашид ч Эрдэнэт үйлдвэрийнхээ хөгжил дэвшлийн төлөө хоёргүй сэтгэлээр зүтгэж, ажлын өндөр бүтээмжтэй ажиллаж буй баялаг бүтээгчдийнхээ орлогыг өсгөх бодлого баримтлан ажиллах болно.    
   2019 онд Эрдэнэт үйлдвэр ХХК маань ТӨҮГ болон статус нь өөрчлөгдсөн, бид бүхэн шинэчилсэн дүрмээр, онцгой дэглэмд амжилтаа ахиулж ажилласан, 2020 оны бизнес төлөвлөгөөгөө шинэ оны өмнө батлуулж, дараа жилийнхээ ажилд эртлэн шамдсан сайхан жил улирч байна. Эрдэнэт үйлдвэрийн асуудлыг Засгийн газар тусгайлан авч үзэж, 2019 оны зургаадугаар сард тогтоол гаргалаа. Үүнийг үндэслэн Төрийн өмчийн бодлого, зохицуулалтын газар Эрдэнэт үйлдвэрийг 2031 он хүртэл хугацаанд хөгжүүлэх Үндсэн чиглэлийг баталсан зэрэг нь 2019 онд онцлох чухал шийдвэр юм. Үндсэн чиглэл батлагдсанаар Эрдэнэт үйлдвэр тодорхой бодлоготой, зорилготой, жарнаар хэмжигдэх ирээдүйг харж ажиллах нөхцөл бүрдлээ. 
   Эрдэнэт үйлдвэрийн уурхайчид 2019 оны үйлдвэрлэлийн төлөвлөгөөний бүх үзүүлэлтийг уурхайчдын баярын өмнө буюу 12 дугаар сарын 22-ны өдөр биелүүлж, 2020 оны ажилдаа ороод байна. Бид улс орныхоо өмнө хүлээсэн үүргээ нэр төртэй биелүүлж, 2019 онд түүхэндээ хамгийн их буюу 936,5 тэрбум төгрөгийн орлогыг улс, орон нутгийн төсөвт төвлөрүүллээ. Өөрөөр хэлбэл Эрдэнэт үйлдвэрийн ажилтан бүр 140 орчим сая төгрөгийн баялаг бүтээснийг энд тэмдэглэхэд таатай байна.  
Монголын Үндэсний худалдаа аж үйлдвэрийн танхимын "Энтрепренер-2019" шалгаруулалтын шилдгийн шилдэг “Гранпри” шагналын эзнээр хоёр дахь удаагаа шалгарч, 2020 оныг амжилт дүүрэн угтаж байна.  
    2020 онд Эрдэнэт үйлдвэрт их бүтээн байгуулалт үргэлжилсээр байх болно. Бид хөрөнгө оруулалтын бодлогын хүрээнд үйлдвэрлэлийн болон нийгмийн чиглэлд олон ажил хэрэгжүүлэхээр төлөвлөсөн. Улс орондоо баялаг бүтээгч Эрдэнэтийн уурхайчид бид өнөөдрийн амжилтаа ахиулахын төлөө, маргаашийн хөгжил дэвшлийн төлөө хичээн ажиллах болно.  
    “Эрдэнэт үйлдвэр” ТӨҮГ-ын анхдагч ахмадууддаа, 6600 уурхайчин бүрт, тэдний гэр бүлд, хамтран ажилладаг түншүүддээ, Орхон аймгийн иргэд та бүхэндээ айсуй 2020 ондоо ажлын өндөр амжилт гаргаж, эрүүл энх, аз жаргалтай байхын өлзийтэй ерөөлийг өргөн дэвшүүлье.
 
 “ЭРДЭНЭТ ҮЙЛДВЭР” ТӨҮГ-ЫН ЕРӨНХИЙ ЗАХИРАЛ,
АЖ ҮЙЛДВЭРИЙН ГАВЬЯАТ АЖИЛТАН,
ТЕХНИКИЙН ШИНЖЛЭХ УХААНЫ ДОКТОР /Sc.D/
Х.БАДАМСҮРЭН
 
 
     Эрдэнэт үйлдвэрийн удирдлагуудын 2019 оны сүүлчийн шуурхай хуралдаан болж, бүтцийн нэгжийн дарга нар өөрийн цех, хэлтсийн ололт амжилт хийгээд ирэх онд хэрэгжүүлэхээр төлөвлөсөн ажлаа тоймлон хэлэлцлээ. Зууны манлай үйлдвэр 2019 оныг хөрөнгө оруулалт, бүтээн байгуулалтын жил болгон зарлаж, техник, технологийн шинэчлэлд 410 тэрбум төгрөг зарцуулан, томоохон төсөл, хөтөлбөрүүдийг амжилттай хэрэгжүүлсний үр дүнд үйлдвэрлэлийнхээ хүчин чадлыг анх удаа 32,2 сая тоннд хүргэв. Мөн “Эрдэнэт”-ийн баялаг бүтээгчид улс, орон нутгийн төсөвт түүхэндээ хамгийн их буюу 936,5 тэрбум төгрөг төвлөрүүллээ. Энэчлэн олон дээд амжилтаа хэлэлцсэн шуурхайн зөвлөгөөний үеэр “Эрдэнэт үйлдвэр” ТӨҮГ-ын Ерөнхий захирлын санхүү, эдийн засаг хариуцсан орлогч Д.Үүрийнтуяа 2019 онд мөнгөн хөрөнгийн чөлөөт үлдэгдлийн хүүгээс хамгийн өндөр буюу 19 тэрбум төгрөгийн орлого олсныг дуулгаад, эндээс үйлдвэрийн газрын удирдлагууд уурхайчдадаа урамшуулал олгохоор шийдвэрлэснийг мэдээлсэн юм. Эрдэнэт үйлдвэр 2019 онд санхүү, мөнгөний оновчтой бодлого хэрэгжүүлэн арилжааны банкнуудтай өрсөлдөх чадвараар нь хамтран ажилласан. Тухайлбал, Эрдэнэт үйлдвэрийн ажилчдад цалингийн болон ипотекийн зээлийн хамгийн бага хүү санал болгуулах, тус үйлдвэрийн газрын мөнгөн хөрөнгийн чөлөөт үлдэгдлийг өндөр хүүтэй хадгалах зэрэг хэлцэл хийж хамтран ажилласны үр дүнд энэхүү боломж нөхцөл бүрджээ. Мөн 2019 онд дэлхийн зах зээл дээр зэсийн ханш  төлөвлөснөөс бага байсан тул Эрдэнэт үйлдвэрийн Ерөнхий захирал тушаал гарган хэмнэлтийн бодлого хэрэгжүүлсэн. Үүний үр дүнд тав орчим тэрбум төгрөг хэмнэжээ. Зардал бууруулж, санаачилгатай ажилласан цех, хэлтсийн дарга нарт ажилчдаа урамшуулах эрх мөн олгов. 
М.Одгэрэл
Б.Баттөгс
 

    “Эрдэнэт үйлдвэр” ТӨҮГ-ын www.erdenettoday.mn сайт энэ өдөр цахим сэтгүүлзүйн шилдгүүдийг тодруулдаг “Web awards” наадмын хоймроос “Орон нутгийн шилдэг сайт” өргөмжлөлийг хүртлээ. Монголын сайтын холбоо, Харилцаа холбоо мэдээллийн технологийн газар, Монголын Сэтгүүлчдийн нэгдсэн эвлэлээс хамтран хоёр жил тутам зохион байгуулдаг цахим салбарын тэргүүн наадам 4 дэх жилдээ амжилттай болж, онцлох 10 номинацын эздийг нэрлэсэн юм. Маркетингийн хэлтсийн Олон нийттэй харилцах албанаас эрхлэн явуулдаг www.erdenettoday.mn, www.erdenetmc.mn цахим хуудас нь Эрдэнэт үйлдвэрийн үйл ажиллагааны шинэлэг мэдээ мэдээллийг олон нийтэд хүргэн ажиллаж, уурхайчдынхаа хөдөлмөр бүтээл, ололт амжилтаар цахим салбарт өнгө нэмсэн. Уул уурхайн мэдээллийг улс орон даяар түгээгч www.erdenettoday.mnсайт өнгөрсөн хугацаанд шинэ контентууд үйлдвэрлэж, төв, орон нутгийн вэб сайтуудын албан ёсны эх сурвалж болсоор ирсэн юм.

     “Web awards” тэргүүн наадмын шилдгүүдэд салбар салбарын хүндтэй эрхмүүд шагнал гардууллаа. “Шилдэг вэб хөгжүүлэгч”-ээр “Хас сошиал медиа” ХХК, “Шилдэг төрийн байгууллагын сайт”-аар Улсын Онцгой байдлын газрын www.nema.mn, “Нийгмийн хариуцлага хэрэгжүүлэгч сайт”-аар шуурхай мэдээ мэдээллийн www.zarig.mn, “Шилдэг технологи нэвтрүүлэгч сайт”-аар www.tovch.mn, “Шилдэг төрөлжсөн мэдээллийн сайт”-аар www.urlag.mn, “Шилдэг бизнесийн сайт”-аар www.biznetwork.mn, “Шилдэг төсөл хэрэгжүүлэгч сайт”-аар www.mass.mn,“Мэдээллийн шилдэг сайт”-аар www.gogo.mn, “Сайтын шилдэг сэтгүүлч”-ээр www.zindaa.mn сайтын Э.Болорхажид тус тус шалгарч, хөдөлмөр бүтээлээ үнэлүүлсэн. Мөн “Монголын сайтын холбоо”-ны “Эрхэмсэг оршихуй” цомын эзэд болсон www.sonin.mn сайтын хамт олон тэргүүн наадмын тайзан дээр баяр талархалын үг хэлж, шагналаа гардлаа.

     Цахим сэтгүүлзүйн салбарт үнэн бодит, шуурхай, хүртээмжтэй, тэнцвэртэй мэдээллийг түгээх эрхэм зорилго тээсэн шилдэг сайтуудын хамт олонд халуун баяр хүргэж, ажлын амжилт хүсэн ерөөе.

И.Чинтогтох

 
Мэндчилгээ
 
   Тээвэр ложистикийн төвийн хамт олон бид үйлдвэрийн эцсийн бүтээгдэхүүн болох зэсийн баяжмал, молибденыг экспортонд гаргах ажлыг үйлдвэрийн нэгдсэн төлөвлөгөөний дагуу улирал, сар, хоногоор ажлаа төлөвлөн, вагон хангалтыг тасралтгүй нийлүүлснээр ачилтын төлөвлөгөөгөө 108,2 хувиар биелүүлэн ажиллалаа. Хөдөлмөрийн аюулгүй байдал, эрүүл ахуйн ажлаараа осол зөрчилгүй манлайлан ажиллаж, хоёр удаа “Тэргүүн байр”-т шалгарсан сайхан амжилтаар 2020 оныг угтаж байна. 
   
    Бидний  ажлын гол үзүүлэлт болох вагоны дундаж даац ашиглалтыг 66.83 тн-д хүргэсэн түүхэн амжилтаар 50 вагоны тээврийн хөлс болох 141.3 сая төгрөгийн бодит хэмнэлтийг гаргалаа. Ашиглагдахгүй барааны үлдэгдлийг бууруулах зорилгоор үйлдвэрийн бүтцийн нэгжүүдэд “Нээлттэй хаалганы өдөрлөг” зохион байгуулж, нийт 165 сая төгрөгийн бараа материал, сэлбэг хэрэгслийг худалдан борлуулж, өдөрлөгөө үр дүнтэй зохион байгууллаа. Хөрөнгө оруулалтаар 33 ажил төлөвлөснийг үнийн дүнгээр авч үзвэл 4.9 тэрбум төгрөгийн гүйцэтгэлтэй буюу 106,5 хувийн төлөвлөгөөний биелэлттэй ажилласан. Энэ нь 2020 онд үйлдвэрлэлийн төлөвлөгөөт үзүүлэлтийг ханган  ажиллах нөхцөл бүрдсэн гэдгийг хэлэхэд таатай байна. Бүтээмж инновацын үйл ажиллагаа  идэвхтэй өрнөж, 432 сайн санал гарснаас үйлдвэрийн ТОП-200 санал гаргагчдын эгнээнд манай 5 ажилтан багтаж, хамт олноо баярлууллаа.
 
    Эрдэнэт үйлдвэрийн уурхайчин хамт олондоо 2020 оны мэндийг дэвшүүлж, ирэх онд амжилт бүтээлээр дүүрэн, олз омог арвинтай байхын өлзийтэй ерөөлийг дэвшүүлье.
 
“ЭРДЭНЭТ ҮЙЛДВЭР” ТӨҮГ-ЫН
ТЭЭВЭР ЛОЖИСТИКИЙН ТӨВИЙН
ДАРГА С.МӨНХТЭГШ
 
 Мэндчилгээ
 
    "Эрдэнэт үйлдвэр" ТӨҮГ-ын нийт уурхайчдадаа болон тэдний гэр бүлд Дулааны цахилгаан станцын хамт олны нэрийн өмнөөс баярын мэндийг дэвшүүлье.
   Энэ онд Дулааны цахилгаан станц ашиг орлогоо нэмэгдүүлэх, эрчим хүчний нөөцийг хэмнэх, инновацийн үйл ажиллагааг дэмжих, цаашлаад Эрдэнэт үйлдвэрийн эцсийн бүтээгдэхүүний өөрийн өртгийг бууруулах зорилго тавин ажиллаж, зорилтуудаа амжилттайгаар биелүүлэн шинэ оноо угтаж байна. Тухайлбал, Дулааны цахилгаан станцын эцсийн бүтээгдэхүүн болох цахилгаан эрчим хүчний түгээлтийн төлөвлөгөөг 101 хувь биелүүлж, 264,7 сая квт.ц эрчим хүчийг төвийн эрчим хүчний нэгдсэн сүлжээнд нийлүүлсэн нь түүхэнд байгаагүй шинэ дээд амжилт болж байгаа бөгөөд борлуулалтын орлогын төлөвлөгөөгөө 100,6 хувиар биелүүлж Эрдэнэт үйлдвэрийнхээ ашиг орлогыг нэмэгдүүллээ. Үйлдвэрлэл, технологийн бодлогын хүрээнд өргөтгөлөөр суурилуулагдсан шинэ тоноглолуудаа зүгшрүүлэх, Монгол улсын эрчим хүчний нэгдсэн сүлжээнд ажиллах зохистой горим ажиллагаагаа тодорхойлох, ажилтнуудаа сургаж дадлагажуулах, тэднийг бүтээмж болон ХАБЭА-н үйл ажиллагаанд идэвхжүүлж Эрдэнэт үйлдвэр, ДЦС-аараа бахархдаг, зарчимч, ёс зүйтэй бие хүн-үнэт капитал болгон төлөвшүүлэх ажлуудыг шат дараатай хэрэгжүүлж ажиллалаа.  
    2019 онд 50,5 тэрбум төгрөгийн зардалтай ажиллахаар төлөвлөснөөс хүлээгдэж буй гүйцэтгэлээр 48,8 тэрбум буюу 1,3 тэрбум төгрөгийн зардал хэмнэж ажиллахаар байна. Мөн энэ онд 7,4 тэрбум төгрөгийн хөрөнгө оруулалтын ажлуудын үр дүнд Дулааны цахилгаан станц цаашид тасралтгүй найдвартай, илүү хэмнэлттэй, үр ашигтай ажиллах үүд хаалга нээгдэж байна. 
   Ирж буй шинэ он бидний хувьд шинэчлэл, инноваци, хэмнэлтийн бодлогоо үргэлжлүүлэх, техник, технологийн үйл ажиллагаагаа улам төгөлдөршүүлэх, цаашлаад өөрийн үйлдвэрлэсэн хямд өртөг бүхий цахилгаан эрчим хүчээр Эрдэнэт үйлдвэрийн хэрэглээний тодорхой хэсгийг хангах, ашиг, орлогыг өнөөгийн түвшнээс ахиулан ажиллах нэр хүндтэй бөгөөд хариуцлагатай жил байх болно. 2020 онд та болон танай гэр бүл эрч хүч, амжилт бүтээлээр дүүрэн байж, элгээрээ энх амгалан төрлөөрөө төвшин сайхан байж, өмнөө тавьсан зорилго бүхнээ биелүүлж, аз хийморьтой байхын ерөөлийг дэвшүүлэн шинэ жилийн мэндийг хүргэе.
 
“ЭРДЭНЭТ ҮЙЛДВЭР” ТӨҮГ-ЫН
ДУЛААНЫ ЦАХИЛГААН СТАНЦЫН
ДАРГА Г.МӨНХ-ЭРДЭНЭ
 
  1. ЭРДЭНЭТ ҮЙЛДВЭР 100 ХУВЬ ТӨРИЙН ӨМЧИТ ҮЙЛДВЭРИЙН ГАЗАР БОЛЛОО 
 
    2019 оны 3 дугаар сарын 21-ний өдөр Монгол Улсын Засгийн газар тогтоол гаргаж, “Эрдэнэт үйлдвэр”-ийг Төрийн өмчит үйлдвэрийн газар болгон өөрчилж, дүрмийг баталлаа. Эрдэнэт үйлдвэр нь Улсын үйлдвэрийн газрын статустай болсонтой уялдуулж, Ерөнхий захирлын 2019 оны 6 дугаар сарын 13-ны өдрийн А/552 дугаар тушаалаар үйлдвэрлэлийн удирдлага, менежментийн тогтолцоо, үйл ажиллагааны зарчим, хөгжлийн төлөвлөлтийг хамарсан урт хугацааны “Тогтвортой хөгжлийн бодлого”-ыг баталлаа. Энэ хүрээнд Технологийн бодлого, Техникийн бодлого, Эдийн засаг, санхүү бүртгэлийн бодлого, Нийгмийн бодлого, Байгаль орчны бодлого гэсэн тэргүүлэх 5 чиглэлийн хүрээнд 25 зорилт дэвшүүлэн ажиллаж байна.
 
 
    2. “ЭРДЭНЭТ ҮЙЛДВЭР” ТӨҮГ-ЫГ 2031 ОН ХҮРТЭЛ ХУГАЦААНД ХӨГЖҮҮЛЭХ ҮНДСЭН ЧИГЛЭЛИЙГ БАТЛУУЛЛАА 
 
    Монгол Улсын Засгийн газар сүүлийн 20 гаруй жилийн хугацаанд анх удаа Эрдэнэт үйлдвэрийн асуудлыг онцгойлон авч үзэж,  2019 оны 06 дугаар сарын 05-ны өдрийн 224 дүгээр тогтоолоо гаргалаа. Монгол Улсын эдийн засаг, нийгмийн хөгжилд “Эрдэнэт үйлдвэр” Төрийн өмчит үйлдвэрийн газрын оруулах үр өгөөжийг нэмэгдүүлэх, тус үйлдвэрийн тогтвортой хөгжил, урт хугацааны үйл ажиллагааг хангах, өрсөлдөх чадварыг дээшлүүлэх зорилгоор  “Эрдэнэт үйлдвэр”-ийг 2031 он хүртэл хугацаанд хөгжүүлэх үндсэн чиглэлийг Төрийн өмчийн бодлого зохицуулалтын газрын 2019 оны 6 дугаар сарын 18-ны өдрийн 262 дугаар тогтоолоор батлав. 2017-2019 онд геологи хайгуулын чиглэлээр 21.2 сая ам долларын  хөрөнгө оруулалт хийж, үр дүнд нь Эрдэнэт үйлдвэрийн ашиглалтын хугацааг 20 жилээр сунган, цаашид 60 жил ажиллах бүрэн боломжтой боллоо.
 
 
    3. БҮТЭЭН БАЙГУУЛАЛТ, ТЕХНИК ТЕХНОЛОГИЙН ШИНЭЧЛЭЛД ТҮҮХЭНДЭЭ ХАМГИЙН ӨНДӨР ХӨРӨНГӨ ОРУУЛАЛТ ХИЙЛЭЭ     
 
    2019 он уурхайчид бидний хувьд ажил хөдөлмөрийн том ул мөрөө үлдээсэн онцлог жил боллоо. Техник, тоног төхөөрөмжөө шинэчлэх, технологио боловсронгуй болгоход нийт 410 тэрбум төгрөгийн хөрөнгө оруулалт хийж, ажилчдынхаа ажиллах орчин нөхцөлийг сайжруулах, үйлдвэрлэлийн цар хүрээг нэмэгдүүлэх, үр ашгийг дээшлүүлэхэд чиглэсэн олон чухал ажил төлөвлөж, гүйцэтгэлээ. Эдгээрээс тоймлон дурдвал, 
- Эрдэнэт үйлдвэрийн инженерүүд, нарийн мэргэжлийн ажилчид Монголд анх удаа ЭКГ-12К маркийн хоёр экскаватор угсарч ашиглалтад орууллаа. 12.5 метр кубын багтаамжтай шанага бүхий ЭКГ-12К экскаватор нь цахилгаан зарцуулалтыг 30 хувиар хэмнэнэ.       
- Ил уурхайд САТ 824К дугуйт түрэгч, САТ 16М3 автогрейдр, САТ 232D дугуйт универсал ачигч зэрэг дөрвөн техник хүлээн авч, ашиглалтад орууллаа. /Комацу фирмийн Д-275А гинжит бульдозер, 1.2 кубын шанагатай ПС-220 жижиг оврын экскаватор шинээр ажилд гаргалаа.
- Баяжуулах үйлдвэрийн Нунтаглан баяжуулах хэсэгт Зэс молибдены баяжмалыг салгах, молибдены баяжуулалтын дамжлагыг шинэчилж, Flsmidth компанийн Inert gas-144 маркийн хөвүүлэн баяжуулах машин бүхий молибдены нөөц шугамыг угсарч суурилууллаа. Ингэснээр баяжуулалтын фронтыг  нэмэгдүүлж, молибдены металл авалтыг 1 хувиар өсгөн, жилд 1.8 тэрбум төгрөгийн цэвэр ашиг олох боломж бүрдэж байна.
- Нунтаглан баяжуулах хэсгийн хүдэр нунтаглалтын 7 дугаар тээрмийг солилоо. Энэ нь үйлдвэрийн эдийн засгийн үр ашгийг жилд дунджаар 1.2 тэрбум төгрөгөөр  нэмэгдүүлж байна. 
- Бутлан тээвэрлэх хэсгийн 13 дугаар бутлуурыг МР-800 маркийн бутлуураар сольж, суурилууллаа. Шинэ бутлуур нь нэгдүгээр шатны хүдэр нунтаглалтын бөөрөнцөгт тээрмүүдийн цагийн ачааллыг нэмэгдүүлж, жилд 95.5 тэрбум төгрөгийн нэмэлт орлого олох боломж бүрдүүлж байна.
-  Хаягдлын аж ахуйн хамгийн том холбох суваг M4 даланг барьж байгуулав. 604 метрийн урт, 24 метрийн өндөртэй М4 далан хаягдлын сангийн насжилтыг 4-6 жилээр уртасгаж үйлдвэрлэлийн найдвартай ажиллагааг хангахад ихээхэн ач холбогдолтой хөрөнгө оруулалт байлаа.  
- Засвар механикийн заводод шинэ технологи нэвтрүүлж, усаар зүсэгч машин хүлээн авлаа. Польш улсын КИМЛА фирмийн тоон удирдлагатай суурь машин нь резин, мод, шил, чулуу, хуванцар, хар болон өнгөт металл зэргийг зүсэх орчин үеийн шинэ дэвшилтэт суурь машин юм. 
- Авто тээврийн цехэд дизель түлш хадгалах, түгээх 50 метр кубын багтаамжтай, ухаалаг карт уншигч бүхий Шатахуун түгээх станц суурилуулж, хүнд даацын өөрөө буулгагч БелАЗ-75131 загварын 130 тонны даацтай 2 авто машин шинээр хүлээн авлаа.
- Ган бөөрөнцгийн цехийн индукцийн технологи, цувих иж бүрэн шугамыг ашиглалтад оруулж байна.
 
 
    4.  ХҮДЭР ОЛБОРЛОЛТ, БОЛОВСРУУЛАЛТЫН ХЭМЖЭЭГ ТҮҮХЭНДЭЭ ХАМГИЙН ӨНДӨР ТҮВШИНД  ХҮРГЭЛЭЭ
 
    “Эрдэнэт үйлдвэр” ТӨҮГ 2019 оны хүлээгдэж буй гүйцэтгэлээр 37 сая.тн хүдэр олборлож, 32 сая.тонн хүдэр боловсруулахаар байгаа нь Үйлдвэрийн газрын түүхэн 41 жилийн хугацаан дахь хамгийн дээд үзүүлэлт боллоо. Үйлдвэрийн тасралтгүй найдвартай үйл ажиллагааг ханган ажиллаж, техник технологи, хөрөнгө оруулалтад онцгойлон анхаарч ажилласны үр дүнд бид түүхэн дээд амжилтын эзэд боллоо. 
 
 
    5. УЛС, ОРОН НУТГИЙН ТӨСӨВТ ХАМГИЙН ИХ ОРЛОГО ТӨВЛӨРҮҮЛЛЭЭ
 
    “Эрдэнэт үйлдвэр” төрийн өмчит үйлдвэрийн газар болсон анхны жилдээ эдийн засгийн өндөр үзүүлэлттэй ажиллаж, улс, орон нутгийн төсөвт анх удаа хамгийн өндөр буюу 936.5 тэрбум төгрөг төвлөрүүллээ. Өөрөөр хэлбэл, улс орон нутгийн төсөвт төвлөрүүлсэн энэ мөнгө нь  900 хүүхдийн багтаамжтай 150 сургууль, эсвэл тус бүр нь 150 хүүхдийн багтаамжтай 468  цэцэрлэг барьж, байгуулахад хүрэлцэнэ. Түүнчлэн гаалийн төлбөр хураамж, цахилгаан эрчим хүчний төлбөрт 206.7 тэрбум төгрөг төлснөөр нийтдээ 1 их наяд 143 сая төгрөгийг улс орныхоо мөнгөний авдарт орууллаа.  
 
 
6.  ЦАГААН ТООСЫГ ДАРАХ ШИНЭ ТЕХНОЛОГИ НЭВТРҮҮЛЖ, БАЙГАЛЬД ЭЭЛТЭЙ ҮЙЛДВЭР БОЛЛОО
 
    “Эрдэнэт үйлдвэр” бүтцийн нэгжийн өөрчлөлтөөр Байгаль орчин ногоон хөгжлийн хэлтсийг шинээр байгууллаа. Мөн “Ногоон хөгжлийн төв” байгуулахаар шийдвэрлэлээ. Баяжуулах үйлдвэрийн Хаягдлын аж ахуйд цагаан тоос дарах технологийг амжилттай туршиж нэвтрүүлснээр байгальд ээлтэй үйлдвэр гэдгээ нотлон дорвитой алхам хийлээ. Дэгдэлт үүсгэдэг нийт талбайн 80 хувийг дарж чадcан бөгөөд энэ ажил 2020 онд үргэлжилнэ.
 
 
    7.  АЖИЛЧДЫНХАА НИЙГМИЙН ХӨГЖИЛД ЗОРИУЛАХ ЗАРДЛЫГ  НЭМЭГДҮҮЛЛЭЭ
 
   Эрдэнэт үйлдвэр нийгмийн хөгжлийн бодлого, хөтөлбөрт нийт зардлынхаа 7 орчим хувийг төлөвлөж зарцуулдаг. 2017 онд 59.3 тэрбум төгрөг, 2018 онд 98.4 тэрбум төгрөг зарцуулж байсан бол 2019 онд 104.9 тэрбум төгрөг болгож өсгөлөө. Үйлдвэрийн ажилтнуудын цалинг 20 хувиар нэмлээ. Анхан шатны удирдах ажилтны үүрэг оролцоог өсгөх, тэдний манлайллыг нэмэгдүүлэх, ур чадварыг хөгжүүлэх, урамшуулах зорилгоор “Манлайлагч мастерын нэмэгдэл цалин”-г шинээр бий болгож, 40 мастерт сар бүр 600 мянгаас 1 сая төгрөгийн нэмэлт цалин, тэргүүлэх зэрэгтэй мэргэшсэн ажилчны нэмэгдэл олгож эхлэв. Ажилчдын орон сууцны хөнгөлөлтийг 50 хувиар буюу 12.0 сая төгрөг болгон нэмэгдүүлж, ажилчдад халуун хоолоор үйлчлэх зардлыг 49.3 хувиар нэмэгдүүлснээр амт чанартай хоолоор үйлчлэх нөхцөлийг бүрдүүллээ. 
 
 
    8. ГАДААД ХАРИЛЦАА, ХАМТЫН АЖИЛЛАГААГ ШИНЭ ШАТАНД ГАРГАЛАА
 
    Монгол Улсын Ерөнхий сайд У.Хүрэлсүхийн ОХУ-д хийсэн айлчлалын үеэр Москва хотноо зохион байгуулагдсан “Монгол-Орос евроазийн эдийн засгийн холбооны бизнес эрхлэгчид нэгдсэн зах зээлд бизнес эрхлэх нь” форумын үеэр Монгол-Орос ажил хэргийн зөвлөлийн үйл ажиллагааны зарчим болон механизмын тухай протоколд, “Геологийн судалгааны салбарт хамтран ажиллах тухай” гэрээнд Ерөнхий захирал Х.Бадамсүрэн гарын үсэг зурлаа. Мөн “Олимп, параолимпод оролцох баг тамирчдаа дэмжих” харилцан ойлголцлын санамж бичиг, “Эрдэнэс-Таван толгой” ХК-тай хамтран ажиллах санамж бичиг Орхон, Булган аймагтай хамтран ажиллах санамж бичгүүдэд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн гарын үзэг зурлаа. Хамтын ажиллагааны хүрээнд 22 залуу инженерийг ОХУ-ын шилдэг их, дээд сургуульд суралцуулж, мэргэжил дээшлүүлэхээр илгээлээ.  Монголын Волейболын холбооны Үндэсний дээд лигийн тэмцээнийг анх удаа орон нутагт амжилттай зохион байгуулж, их спортыг дэмжигч Эрдэнэт үйлдвэр гэдгээ дахин нотоллоо.
 
 
    9. ЭРДЭНЭТ ҮЙЛДВЭРТ ХОЁР ШИНЭ ГАВЬЯАТ ТӨРЖ,  ГАВЬЯАТ АЖИЛТНЫ ТОО 46-Д ХҮРЛЭЭ 
 
    Улсын баяр наадмын босгон дээр Монгол Улсын Ерөнхийлөгчийн зарлигаар Эрдэнэт үйлдвэрийн анхдагч, ахмад ажилтан Ю.Цэдэнбал Монгол Улсын “Гавьяат уурхайчин”, Экспорт, борлуулалтын хэлтсийн дарга Я.Пүрвээ “Аж үйлдвэрийн гавьяат ажилтан” цол тэмдэг хүртлээ. Эрдэнэсийн их уурхайн 41 жилийн түүхэнд Монгол Улсын Хөдөлмөрийн зургаан баатар төрж, Төрийн соёрхолт болон гавьяатын тоо 46-д хүрч, Эрдэнэт үйлдвэрийн 1000 ажилтан тутмын нэг нь Монгол Улсын Хөдөлмөрийн баатар, 150 ажилтан тутмын нэг нь гавьяат ажилтан боллоо.
 
 
    10. “ENTREPRENEUR 2019” ОНЫ ШИЛДЭГ ГРАН ПРИ ШАГНАЛЫН ЭЗНЭЭР “ЭРДЭНЭТ ҮЙЛДВЭР” ТӨРИЙН ӨМЧИТ ҮЙЛДВЭРИЙН ГАЗАР 2 ДАХЬ УДААГАА ШАЛГАРЛАА
 
    МҮХАҮТ жил бүр тухайн оны онцлох ТОП-100 аж ахуйн нэгж, салбарын шилдгүүдийг тодруулдаг уламжлалтай.  "Энтрепренер 2019" шагналын  шилдэг аж ахуй нэгж Гранпри номинацийн эзнээр Эрдэнэт үйлдвэр 16 жилийн дараа 2 дахь удаа шалгарлаа. Монгол Улсын нийгэм, эдийн засгийн хөгжилд бодитой хувь нэмэр оруулж байгаа “Эрдэнэт үйлдвэр” Төрийн өмчит үйлдвэрийн газрын баялаг бүтээгч уурхайчин хамт олон Улс, эх орны өмнө хүлээсэн түүхэн үүргээ нэр төртэйгөөр биелүүлэн 2020 оныг амжилт дүүрэн угтаж байна. 
 
 
   
 
 
   Мэндчилгээ
 
    Улиран одож буй 2019 онд Засвар механикийн заводын бүтээлч хамт олон өмнөө тавьсан зорилтоо амжилттай биелүүлж үйлдвэрлэлийн үндсэн үзүүлэлтүүдийг 100-111,4 хувиар давуулан биелүүллээ. Заводод хийгдэж буй техник технологийн шинэчлэлийн зогсолтын үеийн нөөц бүрдүүлэх ажлын хүрээнд цутгамал бүтээгдэхүүний үйлдвэрлэлийг 10 сарын хугацаанд  5718 тонн бүтээгдэхүүн буюу 16 сарын ажил хийсэн байна. 2019 онд хоёр тэрбум орчим төгрөгийн импорт орлох бүтээгдэхүүн үйлдвэрлэв. Манай хамт олон Эрдэнэт үйлдвэрийн бүтээн байгуулалтын ажлын хүрээнд Цутгуурын цехийн үйлдвэрлэлийн үйл ажиллагааг 2019 оны 11 дүгээр сарын нэгний өдрөөс түр зогсоон, цутгуурын үйлдвэрлэлийн хэвний технологид ХБНГУ-д үйлдвэрлэсэн Хүйтнээр хатуурах холимгоор хэв бэлтгэх хагас автомат шугамын цогц систем нэвтрүүлэх техник, технологийн шинэчлэлийн ажлыг эхлүүллээ. Өнөөдрийн байдлаар шаардлагагүй болсон хуучин тоног төхөөрөмжүүдийг буулгаж, зарим тоног төхөөрөмжийг шилжүүлэн суурилуулах, шинэ тоног төхөөрөмжүүдийн суурь бэлтгэх ажил ид явагдаж байна.  
    Энэхүү цогц систем нэвтрүүлснээр жилд 12000 тн хүртэл цутгамал бүтээгдэхүүн үйлдвэрлэх боломж нээгдэх төдийгүй,  нэг тн цутгамал бүтээгдэхүүний өөрийн өртөг 140 орчим ам.доллараар, технологийн гологдлын хэмжээг 1,5 хувь хүртэл бууруулах нөхцөл бүрдэх юм. Шинэчлэлийн ажил 2020 оны тавдугаар сар хүртэл үргэлжилнэ. ЗМЗ-ын Цутгуурын цехийн техник технологийн шинэчлэлийн ажилд нийт 150 орчим тн металл хийц, стандартын бус тоног төхөөрөмж үйлдвэрлэлээ. Механик цехэд Польш улсын КИМЛА фирмийн тоон удирдлагатай Waterjet-2161 маркийн суурь машиныг ажиллуулж эхэллээ. Монголд анх удаа ашиглаж буй орчин үеийн ухаалаг суурь машин нь   резин, мод, шил, чулуу, хуванцар, хар болон өнгөт металл зэрэг бүхий л төрлийн хуудсан материалыг ус болон абразив ширхэгт холимгийн тусламжтайгаар  зүсэх зориулалттай. Уг суурь машиныг ашигласнаар гадаргуугийн боловсруулалтын цэвэршилт сайжирна. Цахилгаан эрчим хүчний өндөр хэмнэлттэй, утаа униаргүй, дуу чимээ багатай зэрэг нь ажилчдын эрүүл мэнд, хөдөлмөрийн бүтээмжид эергээр нөлөөлнө.Мөн БНСУ-д үйлдвэрлэсэн DOOSAN фирмийн MYNX 6500/40 маркийн дөрвөн тэнхлэгт тоон удирдлагатай CNC фрезерийн суурь машиныг ашиглалтад оруулснаар эд ангид өндөр нарийвчлалтай боловсруулалт хийх техникийн боломжтой боллоо. Уг суурь машин нь 1270*670*625 мм-ийн хэмжээтэй 500 кг хүртэлх жинтэй эд ангид хэмжээ тавих, өрөм болон фрезерийн боловсруулалтыг нэгэн зэрэг хийх давуу талтай. 
    Механик цехэд суурилагдсан тоон удирдлагатай суурь машинаас бүрдсэн CNC төвийг өргөжүүлж эд ангийг олон улсын стандартад нийцэхүйцээр үйлдвэрлэх боломж бүрдээд байна. “Эрдэнэт үйлдвэр” ТӨҮГ-ын хөгжлийн үндсэн чиглэл, хаалт-хөгжлийн менежмент, техник технологийн шинэчлэлийн бодлоготой уялдуулан Засвар механикийн заводод 2018-2031 онд өргөтгөл шинэчлэл хийх урьдчилсан ТЭЗҮ боловсруулах судалгааны ажил, зөвлөх үйлчилгээг “Эс Ай Си Эй” ХХК болон түүний туслан гүйцэтгэгч ОХУ-ын “Интра прожект” компанийн судалгааны баг Заводын хөгжлийн хэтийн ирээдүйн бодлогын томоохон бичиг баримтыг боловсруулав. Цаашид заводын техник технологийн шинэчлэлийн бодлого, бүтээгдэхүүн үйлдвэрлэлийн хэмжээ,зах зээлийн судалгааг оновчлох зэрэг ойрын ирээдүйд хийх ажлыг илүү нарийн тодорхой болгох “Засвар механикийн заводын өргөтгөл шинэчлэлийн нарийвчилсан ТЭЗҮ болон зураг төсөл боловсруулах ажил”-ыг хийхээр төлөвлөж байна. “Эрдэнэт үйлдвэр” ТӨҮГ-ын баялаг бүтээгч нийт хамт олондоо болон хамтран ажиллагч, харилцагч байгууллагууддаа улиран одож буй хуучин оноо амжилт бүтээлээр үдэж, угтан ирж буй 2020 ондоо эрүүл энх, аз жаргал, амжилт бүтээлээр арвин байхын ерөөлийг Засвар механикийн заводынхоо нийт хамт олны нэрийн өмнөөс болон хувиасаа өргөн дэвшүүлье.
 
“ЭРДЭНЭТ ҮЙЛДВЭР” ТӨҮГ-ЫН
ЗАСВАР МЕХАНИКИЙН ЗАВОДЫН 
ДАРГА Б.БААСАНСҮРЭН
 

Мэдээний төрөл

Календарь

« 12-р сар 2019 »
Да Мя Лх Пү Ба Бя Ня
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

Зургийн цомог