• Баяжуулагчид тэргүүний гэр бүлээ тодруулж, урчуудаа урамшууллаа

    Өнөөдөр Баяжуулах үйлдвэрийн хамт олон шинээр тодорсон “Тэргүүний гэр бүл”-үүддээ хүндэтгэл үзүүлэн шагнал гардууллаа. 2020 оны Тэргүүний гэр бүлээр Бутлан тээвэрлэх хэсгийн засварчин Ё.Батболд, Засварын хэсгийн засварчин Д.Энхмандал, Механик боловсруулалт, бигнүүрийн хэсгийн токарьчин А.Отгонбаатар, Цахилгаан хөтлүүр, автоматикийн хэсгийн инженер М.Оч-Эрдэнэ, Дулаан агааржуулалтын хэсгийн засварчин Н.Алтангэрэл, Өөрөө нунтаглах хэсгийн конвейрийн машинч Т.Цэцэгмаа, Нунтаглан баяжуулах хэсгийн хөвүүлэн баяжуулагч Г.Эрдэнэ нарын гэр бүл тодорчээ. Мөн тус цехийн удирдлагууд энэ өдөр Эрүүл мэнд, чийрэгжүүлэлтийн төвийнхөө хүүхдийн өрөөнд Бүжинлхам бурхан заллаа. Хүүхдийг сахин хамгаалагч Бүжинлхам бурханыг Бутлан тээвэрлэх хэсгийн засварчин, шашны сургууль төгссөн бурхан урлаач Н.Эрдэнэбаяр бүтээсэн бөгөөд түүнд талархсан сэтгэлээ илэрхийлэн урамшуулал гардуулав. Түүнээс гадна Эрдэнэт үйлдвэрт хүлээлгэн өгсөн зээгт наамал урлал бүхий “Цагаандарь эх” бурханыг бүтээсэн Шүүн хатаах хэсгийн краны машинч, Монгол Улсын уран хатгамалч С.Саранцэцэг тэргүүтэй дөрвөн бүсгүйг мөн урамшуулсан юм. Түүнээс гадна энэ жил 12-р анги төгсөж байгаа хүүхдүүдээ цехийн удирдлага хүлээн авч, мэргэжил сонголтын талаар зөвлөгөө мэдээлэл өгч, сургамж ерөөлөө хайрлав.     М.Одгэрэл Фото: Б.Баттөгс Дэлгэрэнгүй...
  • Жолооч нарын аюулгүй байдлыг хангалаа

    Баяжуулах үйлдвэрийн Шүүн хатаах хэсгийн дэргэдэх төмөр замын гармын урд талын авто зам дээр хоёр сарын өмнө хурд сааруулагч шинээр байгуулсан нь техникийн ерөнхий стандарт шаардлага хангаагүй, жолооч нарын аюулгүй байдлыг алдагдуулсан учир уг хурд сааруулагчийг өнөөдөр авлаа. Энэхүү хурд сааруулагчийг өвлийн улиралд гарам цэвэрлэх үед машин гулсаж орж ирэх эрсдэлтэйгээс гадна зам дагуух үерийн сувгийн чиглэлийг өөрчлөх зорилгоор Тээвэр ложистикийн төв хүсэлт гаргасны дагуу Барилга засварын цех хийсэн байна. Харин жолооч нар гомдол гаргаснаар Автотээврийн цех судалж үзээд Монгол Улсын Замын хөдөлгөөний дүрмийн “Төмөр замын гарам нэвтрэх” бүлгийн заалт зөрчих нөхцөл үүссэн, мөн өвлийн улиралд халтиргаа гулгаа үүсгэх, тээврийн хэрэгсэл өгсөх чигийн хөдөлгөөнд хүч алдах зэрэг эрсдэл үүсгэнэ гэж дүгнэн хурд сааруулагчийг авах шийдвэр гаргажээ.       М.Одгэрэл Фото: Б.Баттөгс Дэлгэрэнгүй...
  • Цутгуурын үйлдвэрлэл эхэллээ

    Засвар механикийн заводын Цутгуурын цехийн хэвний технологи бүрэн шинэчлэгдэж өнгөрсөн долоо хоногт үйлдвэрлэлийг туршилтаар эхлүүллээ. Сэтгүүлч хүний хувьд шинэ бүхнийг соргогоор мэдэрч, дэргэдээс нь үзэхийг “хорхойсдог” болохоор яваад очлоо. Өмнөх дуу чимээ, утаа униар эрс багасжээ. Төмрийн “дархчууд” маань шинэ тоног төхөөрөмж, технологи дээрээ хамгийн түрүүнд Баяжуулах үйлдвэрийн тээрмийн хуяг цутгаад дөнгөж шигшин гаргаж байхтай таарав. Одоо тасдаж ялгаад гадаргууг нь цэвэрлэнэ гэнэ. Өмнө нь үйлдвэрлэж байснаас өөр харагдана уу? гэж асуухад технологич инженер О.Майдаррагчаа “Бүрэн гүйцэт болохоор л харьцуулна даа. Хэвний хувьд нягт, гадаргуу жигд, маш сайн болсон” гэлээ. Цутгуурын цехийн хайлалт хуучнаараа явагдаж байна. Харин хэвний хагас автомат шинэ шугам зогсоо чөлөөгүй ажиллана. Үйлдвэрлэл дөнгөж эхэлж байгаа болохоор элсний температураас эхлээд үйлдвэрлэлийн явцын дунд тоног төхөөрөмжийн зарим нэг тохируулга давхар хийгдэж байв. Шинэ шугам ажилд орсноор орцын материалууд цөөрчээ. Өмнө нь 7-8 мянган тонн элс хэрэглээд хогийн цэг рүү хаядаг байсан бол одоо 2000 тонн элс цех дотроо тасралтгүй эргэлдэх юм. Зардал хэмнэхээс гадна байгаль орчин бохирдуулахгүй давуу талтай. Одоо Оросоос ирсэн кварцын элс хэрэглэж байна. Мөн манайхны ярьдгаар дулаанд тэсвэртэй хар элс ашиглаж харагдана. Түүнээс гадна өмнө нь олон төрлийн барьцалдуулагч бодис, туслах материал үйлдвэрлэлдээ хэрэглэдэг байсан бол одоо хатууруулагч, давирхай гээд хоёр бүтээгдэхүүн ашиглаж байна. Энэ нь шинэ технологи үйлдвэрлэлд хамтран нэвтрүүлж буй “FAT” компанийн тоног төхөөрөмжид зориулсан шингэн бөгөөд Чех улсаас ирдэг гэнэ.   Хүйтнээр хатуурах холимгоор хэв барих хагас автомат шугамаас гарах бүтээгдэхүүний чанар, гадаргуугийн цэвэршилт эрс сайжирсныг Хэвний хэсгийн туршлагатай мастер Э.Дүүрэнбаяр онцоллоо. Хэв сайжрах нь үйлдвэрлэлийн дараагийн дамжлагад шууд сайнаар нөлөөлнө. Тухайлбал, металл цэвэрлэх цаг гэхэд 80 хувь буурсан байх жишээтэй. Цутгуурын цехийн ажилчид өмнө нь маш их дуу чимээ, утаа униар дунд голдуу биеийн хүчний ажлыг олуулаа гүйцэтгэдэг байсан бол одоо хянах, товчлуур дарах, оосорлох, элс тэгшлэх, будах гэх мэт энгийн ажлыг тайван хийцгээнэ. Хүний гар ажиллагаа эрс багассан нь харваас илт. Хольц бэлтгэх хэсгийнхний ажил бүр үгүй болж тэнд ажиллаж байсан хүмүүсээ Механик цех рүүгээ шилжүүлжээ. Энэ үеэр зарим ажилчидтай уулзаж, ажлын завсраар нь цөөн хором ярилцлаа. Хэвчин Ж.НЯМДАВАА: -Би Эрдэнэт үйлдвэрт 18 жил ажиллаж байна. Өмнө нь гараар, хийн багажаар ажилладаг байсан. Сүүлийн үед гар чилж өвддөг болсон. Технологийн шинэчлэл хийгдсэнээр бүх тоног төхөөрөмж автомат болж, хүний гар ажиллагаа эрс багассан. Ажил хөнгөвчлөгдөж, бүтээмж сайжирсан. Манай Цутгуурын цехийн үйлдвэрлэл бүтэн долоон сар зогссон болохоор шинэ шугам дээр ажил эхлэхийг сэтгэл догдлон, хоног тоолон хүлээсэн. Өргөтгөл шинэчлэлийн энэ том ажлыг манайхан өөрсдийн хүчээр богино хугацаанд хийж, дэлхийн шилдэг технологийг алдаагүй нэвтрүүлж чадсан хамт олноороо үнэхээр бахархаж байна. Хэвчин Г.ТОГТОХБАЯР: -Би өмнө нь хольц бэлтгэгчээр ажиллаж байсан. Том холигч дээр өөрөө шавраа зуураад, хүрзэднэ. Механик ажиллагаа ихтэй, биеийн хүч шаардсан ажил байсан. Миний хийж байсан ажлыг одоо автомат машин хийх болсон. Тиймээс би хэвийг  дамжуулах хэсэг дээр ажиллаж байна. Ер нь технологийн шинэчлэл хийгдсэнээр бүтээгдэхүүний чанар сайжирч, нэр төрөл олшрохоос гадна хөдөлмөрийн аюулгүй байдал, эрүүл ахуйн эрсдэлт хүчин зүйл эрс багассан. Өмнө нь хэвний хэсэг өдөрт дунджаар 30-аад тонн цутгамал бүтээгдэхүүн хийдэг байсан бол тоног төхөөрөмжүүд маань автомат, хурдтай болсон болохоор нэмэгдэх дүр зураг харагдаж байгаа гэв. Хүйтнээр хатуурах цутгамлын технологи өндөр нарийвчлалтай. Өөрөөр хэлбэл гологдол бүтээгдэхүүн багасна гэсэн үг. 2001 онд Цутгуурын цехийн гологдол долоон хувь байсан. 2010 онд мөн Германы “FAT” компанийн хүйтнээр хатуурах гар хэвний холигч 30 тонны жижиг машин ашиглаж эхэлснээр өнгөрсөн онд гэхэд гологдол 3,9 хувь болж буурсан. Одоо шинэ технологи нэвтрүүлснээр 2,3 хувь болно. Энэ нь 160-аад тонн цутгамал бүтээгдэхүүн буюу өнөөдрийн үнэ ханшаар бодоход нэг тэрбум орчим төгрөгийн хэмнэлттэй ажиллах нөхцөл бүрдсэн гэж заводын Ерөнхий инженер А.Арвис ярьсан. Учир нь бүтээгдэхүүний чанар ажилтан бүрийн ур чадвараас шууд хамаардаг байсан бол одоо тоног төхөөрөмжийн алдаагүй ажиллагаа илүү нөлөөтэй болжээ. Эрдэнэт үйлдвэрт ажиллаж буй “FAT” компанийн төлөөлөгч Монгол инженерүүдийн ур чадвар, туршлагыг өндөр үнэлж, хамтран ажиллахдаа тун таатай байгаагаа аяга цай уух зуураа илэрхийлдэг гэнэ. Цутгуурын цехийн шинэчлэл коронавирусын халдварын төлөвлөөгүй нөхцөл байдалтай тулгарсан ч манай мэргэжилтнүүд бүхий л хүч бололцоогоо дайчлан ажиллаж ард нь гарч чадсаны тод илэрхийлэл нь шинэ шугамаас гарсан бүтээгдэхүүний хийц, чанар байв. Яг л шинэ хүүхэд мэндлэхэд догдлон тойрч суугаад харж шинждэг шиг баяр бахдал дүүрэн байцгаасан. Дэлхийн жишигт нийцсэн, Монголын бахархал болсон Цутгуурын үйлдвэрлэл ийнхүү амжилттай эхэллээ.   М.Одгэрэл Фото: Б.Баттөгс     Дэлгэрэнгүй...
  • Б.БАТЦЭЦЭГ: Тамхи татахаа багасгахаас илүү шууд хаях нь хамгийн үр дүнтэй

    Дэлхий нийтээр тамхигүй өдрийг жил бүрийн тавдугаар сарын 31-нд тэмдэглэн өнгөрүүлдэг уламжлалтай. Эл өдрийг угтан Дэлхийн эрүүл мэндийн байгууллагын гишүүн орнууд иргэдийнхээ тамхины хэрэглээг багасгах, түүний хор уршгийн талаарх мэдлэгийг дээшлүүлэх зорилт тавин олон ажил зохион байгуулж байна. Энэ удаагийн дугаарт тамхины хэрэглээ, хор уршгийн талаар “Эрдэнэт” сувиллын цогцолборын  хоол зүйч Б.Батцэцэгтэй ярилцлаа.   -Манай улсад тамхины хэрэглээ ямар түвшинд байна вэ? -Тамхи бол мансууруулах нөлөөтэй, донтуулах үйлчилгээтэй бодис агуулсан нэгэн төрлийн хор. Тамхи татахыг олон улсын өвчний ангилалд f-17 сэтгэцийн өвчнөөр бүртгэсэн байдаг. Манай улсын хүн амын 47 хувь буюу бараг тэн хагас нь тамхи татаж, үлдсэн хагас нь дам тамхидалтад өртдөг нь халдварт бус өвчин нэмэгддэг гол шалтгааны нэг  болж байна. -Тамхи татах нь хүний бие организмд ямар сөрөг нөлөөтэй вэ ? -Хүний  бие организм хүчилтөрөгчийн дутагдалд орно.  Тамхины утаанд агуулагдах янз бүрийн химийн нэгдэл, хорт бодис уушгины эдийг гэмтээнэ. Мөн цусанд шингэж судасны ханыг гэмтээх нөлөө үзүүлнэ. Ийм учраас тамхи татдаг хүн зүрхний ишеми өвчнөөр өвдөх эрсдэл тамхи татдаггүй хүнээс тав дахин их байдаг. Тамхи татах нь  жирэмсэн эмэгтэйн ураг, үр хөврөлд маш хор нөлөөтэй. Ургийн гажиг үүсэх, зулбах, жин багатай төрөх аюултай. -Тамхи хорт хавдар үүсгэдэг үү? -Тамхи бүх төрлийн хавдар үүсгэдэг. Тамхинд 7000-аад төрлийн химийн бодис байдгаас 69 нь хорт хавдар үүсгэнэ. Химийн хортой бодис агуулагддаг уушгины хавдраар өвчилсөн хүмүүсийн 87 хувь нь тамхи татдаг хүмүүс байдаг. Цус харвалт, зүрхний шигдээс, хавдар, уушгины эмгэг гэх мэт олон өвчний шалтгаан тамхинаас үүдэлтэй. Тиймээс залуу хүн ч энэ өвчинд өртөх эрсдэлтэй. Нэг янжуур татахад хүний нас долоон минутаар хорогддог гэсэн эрдэмтдийн судалгаа бий. Тиймээс өөртөө өвчин худалдаж аваад байна гэсэн үг. -Тамхинаас хүн гараад эргээд орчих тохиолдол түгээмэл байдаг. Ийм тохиолдолд яах ёстой вэ? -Хамгийн зөв арга бол ердөө өөрийгөө удирдах, тамхи татдаг тохиолдлууддаа дүгнэлт хийж, зайлсхийх төлөвлөгөө боловсруулах хэрэгтэй л дээ. Цөөрүүлж  татах хугацааг хол болгох гэхээсээ илүүтэй шууд хаях нь хамгийн үр дүнтэй. Тамхи стресс тайлдаг гэж хүмүүс эндүүрдэг. Стрессийг тайлахгүйн дээр эхний янжуурыг татах үед дараагийн янжуурыг татах сэдлийг өгч донтуулдгийг анхаарах хэрэгтэй. -Тамхинаас татгалзсанаар хэдий хугацаанд хүний биед эерэг өөрчлөлт гарах вэ? -Таталгүй найман цаг болоход цусны хүчилтөрөгчийн тэжээл хэвийн хэмжээнд очно. 48 цагийн дараа  цусан дахь никотин алга болж, уушгийг бүрхсэн жижиг үснүүд хэвийн ажиллаж эхэлнэ. Нэг жилийн дараа зүрхний өвчин тусах магадлал 50 хувь буурна. Арван жилийн дараа  уушгины хорт хавдар тусах магадлал 50 хувь, 15 жил болоход  эрүүл хүнийхтэй ижил түвшинд очно. Тиймээс тамхийг цаг алдалгүй хаях хэрэгтэй.  -Эрдэнэт үйлдвэрийн ажилчдын дунд тамхины хэрэглээ хэр байна. Энэ төрлийн судалгаа бий юу? -2020 оны 5 сард түүврийн аргаар ажилчдын 10 хувийг хамруулсан судалгаа авч дүгнэсэн байгаа. Судалгаанд хамрагдагсдын 76 хувь нь татдаг гэж хариулсан.  Үүнээс 10-аас дээш жил татсан нь 50-иас илүү хувийг эзэлдэг нь тамхины хэрэглээ манай үйлдвэрийн ажилчдын дунд өндөр байна. Тамхинаас гарах гэж оролдсон боловч одоо хэр нь татдаг гэсэн хувь их байгаа нь ажиглагдсан. Мөн 26-39 насны залуучууд ихэнх хувийг эзэлж байгаа нь харамсалтай. Тиймээс тамхины хор хөнөөлийг таниулах, хэрэглээг багасгах үр нөлөөтэй төсөл хөтөлбөрүүд хэрэгжүүлэн ажиллах шаардлагатай байна. Тамхидалт нь ажилчдын эрүүл мэндэд сөргөөр нөлөөлснөөр тэдний ажлын бүтээмж буурдаг, эрүүл мэндийн зардал, мөн ажил таслалт ихсэх талтай. Т.Батчулуун Дэлгэрэнгүй...
  • Т.БАТМӨНХ: Нэмэлт бүтээгдэхүүн үйлдвэрлэж зардал хэмнэнэ

    “Эрдэнэт үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер Т.Батмөнхтэй уулзаж, үйлдвэрийн өргөтгөл шинэчлэлийн ажил болон цаг үеийн асуудлыг хөндөн ярилцлаа. -Ярилцлагынхаа эхэнд та, Онцгой дэглэмийн үед шат дараатай авч хэрэгжүүлж буй үйл ажиллагааны талаар манай уншигчдад мэдээлэл өгнө үү? -Цаг үеийн нөхцөл байдалтай холбоотойгоор үйлдвэрлэлийн тасралтгүй ажиллагааг хангахын тулд үйлдвэрийн Ерөнхий захирлын А/139 тоот тушаал гарсан. Уг тушаалын дагуу тасралтгүй ажиллагаатай дөрвөн чиглэлийн штаб байгуулсан. Миний хариуцсан штаб үйлдвэрлэлийн тасралтгүй үйл ажиллагааг ханган ажиллана. Тус штаб нь гурван багц ажил хариуцан хийж байна. Нэгдүгээрт, нэмэлт бүтээгдэхүүн үйлдвэрлэн нэмэлт орлого олох даалгавартай. Зах зээл дээр зэсийн ханш унаж байна. Дэлхий нийтийг хамарсан цар тахлын үед харилцагч орнуудад үйлдвэрлэлийн үйл ажиллагаа доголдсон. Тухайлбал, Эрдэнэт үйлдвэр нийт 120-иод нэр төрлийн бүтээгдэхүүн авч үйлдвэрлэлийнхээ технологид ашигладаг. Үүний 50-иад нэр төрлийн бүтээг-дэхүүнийг өмнөд хөршийн үйлдвэрүүдээс шууд авдаг. Энэ бүтээг-дэхүүнийг үйлдвэрлэдэг үйлд-вэрүүдийн үйл ажиллагаа зогссон. Иймээс үйлдвэрлэлийн тасралтгүй үйл ажиллагааг хангах манай штаб нөөц бүрдүүлэх ажлыг хийж эхэлснээр харьцангуй энэ цаг үед бэлтгэлтэй орсон. Тухайлбал, үйлдвэр маань гадна, дотнын байгууллагад өр төлбөргүй байгаа. Өөрсдийн хэмжээнд хэрэгцээтэй бараа, материалаа нөөцөлж чадсан нь бидэнд давуу тал олгосон. Нэмэлт бүтээгдэхүүн үйлдвэрлэх даалгаврын хүрээнд бид 300 мянган тонн хүдрийг жилд төлөвлөгөөнөөс илүү боловсруулах болсон. Зэсийн металл авалтыг 0,4 хувиар, молибдены металл авалтыг 3,5 хувиар өсгөнө. Өөрөөр хэлбэл металл авалтаа өсгөн нэмэлт бүтээгдэхүүн үйлдвэрлэн, орлого нэмж олох зорилготой ажиллаж байна. Одоогийн байдлаар бид үйлдвэрлэлийн төлөвлөгөө болон нэмэлт даалгавраа биелүүлээд явж байна. -Танай штаб гурван цогц асуудал хариуцан ажиллана гэж дурдлаа. Нөгөө хоёр нь ямар ажил хийхээр төлөвлөөд байна? -Хоёрдугаарх нь, томоохон төслүүдээ хөдөлгөн үйлдвэрлэлд нэвтрүүлэх ажил байгаа. Ингэснээр ирээдүйд үйлдвэрийнхээ найдвартай ажиллагааг хангана. Жишээ нь: Баяжуулах үйлдвэрийн Өөрөө нунтаглах хэсгийн дөрөвдүгээр шугамыг барина. Энэ ажлын гэрээ байгуулагдаад явж байна. Үндсэн тоног төхөөрөмжүүдийн үйлдвэрлэл эхэлчихсэн. Зураг, төсвийн ажил хийгдсэн. Барилга байгууламж, суурийн ажлын зургийг цахимаар хүлээж аваад хөндлөнгийн хяналтаар оруулах шатанд явж байна. Энэ ажлыг бид төлөвлөгөөгөөр 2021 оны наймдугаар сард дуусгаж, залгах ёстой. Одоогийн байдлаар гаднын мэргэжилтнүүд ирэх боломжгүй ч бид энэ ажлыг цахимаар хийж байна. Мөн ЗМЗ-ын Цутгуурын цехийн хэвний технологид хүйтнээр хатуурах холимгоор хэв барих хагас автомат шугам нэвтрүүлэх ажлыг бид гүйцэтгэсэн. Ингэхдээ, Цутгуурын цехийн үйл ажиллагааг зургаан сар зогсоож технологийн шинэчлэлийн ажлыг хугацаандаа дуусгалаа. Герман улсын мэргэжилтнүүд ирж тохируулга, залгалтын ажил хийх байсан нь коронавирусээс шалтгаалан ирж чадаагүй. Манай инженер, техникийн ажилтнууд Германы мэргэжилтнүүдээс цахимаар зөвлөмж авсны дагуу тохируулга, залгалтын ажлыг амжилттай гүйцэтгэлээ. Одоо бид бүтээгдэхүүнээ үйлдвэрлэж эхлээд байна. Түүнчлэн Нунтаглан баяжуулах хэсгийн тавдугаар секцийг 12 сая тонн хүдэр хүлээн авах хүчин чадалд хүргэн өргөтгөх ажил байгаа. Уг ажлын тендерийг шалгаруулах үнэлгээний хороо байгуулагдаад явж байна. Гурав дахь нь, Эмульсний тэсрэх бодисын үйлдвэр барьж байгуулах ажил байна. Манай тэсрэх бодисын үйлдвэрийн үйл ажиллагааг Мэргэжлийн хяналтын байгууллагаас хориглочихсон. Энэ нь тэсэрч дэлбэрэх бодис үйлдвэрлэдэг онцгой объект. Тэгэхээр үйл ажиллагаагаа хэвийн явуулахын тулд энэ үйлдвэрийг шинээр барих ёстой. Уг үйлдвэр барих ажлын гүйцэтгэгчийг сонгон шалгаруулаад явж байна.  -Үйлдвэрлэлийн шинэчлэлийн бодлогын хүрээнд өөр ямар ажил хийхээр төлөвлөөд байна вэ? -Химийн төв лаборатори барьж ашиглалтад оруулах зорилготой ажиллаж байна. Зураг төслийн тендерийн шалгаруулалт явагдаж байна. Гүйцэтгэгчийг шалгаруулах тендерийг явуулж, уг ажлыг энэ онд эхлүүлнэ. Дараагийн ажил нь Цэвэр усны гуравдугаар шугамыг барьж байгуулна. 2021 он гэхэд бид үйлдвэрлэлийнхээ хүчин чадлыг өргөтгөн жилд  35 сая тонн хүдэр боловсруулах хэмжээнд хүрэх ёстой. 2023 онд манай хүдэр дэх зэсийн агуулга  эрс буурна. Иймээс 2021 оны 8-р сард Өөрөө нунтаглах хэсгийн дөрөвдүгээр шугамыг нэмж барихаар төлөвлөөд байна. Ингэснээр зургаан сая тонн хүдэр нэмж боловсруулна. Энэ ажил эхэлсэн. Нунтаглан баяжуулах хэсгийн тавдугаар секцийг өргөтгөх ажил  явагдаж байна. Үүнтэй уялдаж цахилгаан хангамжийн асуудал гарч ирдэг. Хуучин 63 МВт-ийн трансформатор ашиглан цахилгаанаар хангадаг байсан. Энэ хүчин чадлаа 80 МВт хүргэн өргөтгөх шинэчлэлийн ажил 2020 онд хийгдэнэ.                     -Таны дурдсан шинэчлэлийн ажлуудыг хийхэд хүндрэлтэй асуудал бий юу? -Ус хангамжийн асуудал байна. Манай үйлдвэрлэлийн хүчин чадал нэмэгдсэнээр технологид шаардлагатай усан хангамж хүрэлцэхгүйд хүрнэ. Тэгэхээр бид цэвэр усны гуравдугаар шугамыг зайлшгүй барьж байгуулах ёстой. Уг ажлын гүйцэтгэгчийг сонгон шалгаруулахаар Ерөнхий эрчим зүйчээр ахлуулсан ажлын хэсэг ажиллаж байгаа. Тэгэхээр Хятадын компани шалгарууллаа гэх юм уу, тендерт оролцогчдоос ямар нэгэн гомдол гардаг учраас үүнийг би дахин тодруулж хэлж байна.                  -Дэлхийн зах зээл дээр зэсийн ханш унасан, нийтийг хамарсан цар тахлаас шалтгаалан улс орон даяар эдийн засгийн хэмнэлтийн бодлого барьж байна. Манай үйлдвэрийн бүтцийн нэгжүүд өртөг зардлаа бууруулах зорилт тавьсан. Энэ талаар жаахан тодруулна уу?  -Зардал хэмнэх ажил явагдаж байна. Үйлдвэрийн бүтцийн нэгжүүд нэгдсэн төлөвлөгөө боловсруулсан. Нэг талаас нэмэлт бүтээгдэхүүн үйлдвэрлэнэ. Нөгөө талаас зардал хэмнэнэ гэсэн үг. Тэгэхээр сайн зохион байгуулалт, сахилга дэг журам, мэргэжилтнүүдээс ур чадвар шаардана. Энэ ажлыг хэрэгжүүлснээр оны төгсгөлд  25,9 тэрбум төгрөгийн зардал хэмнэж 17,6 тэрбум төгрөгийн нэмэлт бүтээгдэхүүн үйлдвэрлэхээр төлөвлөсөн. Оны эхний дөрвөн сард бид үйлдвэрийн төлөвлөгөөнөөс илүү 6,9 тэрбум төгрөгийн нэмэлт орлого олсон. 1,9 тэрбум төгрөгийн зардал хэмнэлээ. Ийм байдлаар явбал оны төгсгөлд бидний зардлын болон нэмэлт бүтээгдэхүүн үйлдвэрлэлийн төлөвлөгөө хангалттай биелнэ. Энэ ажилд манай штаб хяналт тавьж, зохион байгуулалтын ажлыг гүйцэтгэж байна.   -Тасралтгүй үйл ажиллагаатай үйлдвэрийн нөөцгүй ажилладаг, тоног төхөөрөмжийг жилд нэг удаа зогсоож, дараагийн жил найдвартай ажиллах боломжийг хангах зорилгоор их засвар хийдэг. Энэ онд тоног төхөөрөмжүүдийн их засварын ажил хэдийд хийгдэх вэ? -Жил бүр 7-р сарын эхэнд 48 цаг зогсоод тоног төхөөрөмжөө залгадаг. Энэ жил сонгууль давхацсан учраас 7-р сарын 31-ээс 8-р сарын 2-ны өдрүүдэд байнгын ажиллагаатай тоног төхөөрөмжөө зогсоох төлөвлөгөө гарсан. Ерөнхий захирлын А/56 тоот тушаалын дагуу их зогсолт хийх, бэлтгэл ажлыг хангана. Үүнтэй уялдуулан Ерөнхий захирлын нэгдүгээр орлогч бөгөөд Ерөнхий инженерийн 52-р шийдвэр гарсан. Ингэснээр их зогсолт хийх, бэлтгэл ажлыг хангах штаб байгуулагдаад ажиллаж байна. Өнөөдрийн байдлаар дөрөв дэх удаагаа штаб хуралдлаа. Хүн хүч, тоо хэмжээ, хийх ажлын цар хүрээ гарсан. Их зогсолттой холбоотой сэлбэг, хэрэгсэл материалын худалдан авалтын ажиллагаа ид явагдаж байна. Одоогийн байдлаар их засварын ажилд хэрэгцээтэй тоног төхөөрөмж, сэлбэг материалын 20 хувийг үйлдвэртээ хүлээж аваад байна. Үлдсэн хувийг нь 7-р сарын сүүлч хүртэл хүлээн авна. Манай үйлдвэрийн Худалдан авах бодлогын газар тодорхой төлөвлөгөө гарган долоо хоног бүр штабын хурлаар биелэлтээ танилцуулж байгаа. -Дэлхий нийтэд тархсан коронавирусээс урьдчилан сэргийлэх талаар ямар арга хэмжээ авч ажиллаж байна? -Дэлхий нийтэд цар тахлын дэгдэлт тархсанаас Монгол улсын хэмжээнд өндөржүүлсэн бэлэн байдалд ажиллаж байна. Тэр дундаа Эрдэнэт үйлдвэр онцгой дэглэмтэй, өндөржүүлсэн бэлэн байдалд үйл ажиллагаа явуулж буйг та бүхэн мэднэ. Үйлдвэрийн дүүрэгт гамшгаас хамгаалах 24 цагийн тасралтгүй үүрэг бүхий штаб Ерөнхий захирлын нэгдүгээр орлогч бөгөөд Ерөнхий инженерээр ахлуулан ажиллаж байна. Улс, орон нутгийн Онцгой комиссоос өгсөн шийдвэрүүдийг Эрдэнэт үйлдвэр маш өндөр зохион байгуулалттай хэрэгжүүлэх ёстой. Яагаад гэвэл хамгийн их хүний урсгал бий болж буй газар Эрдэнэт үйлдвэр. Нэг ээлжинд 30 гаруй автобус дүүрэн хүн ирдэг. Тэгэхээр улсын Онцгой комиссоос нэг дор олон хүн бөөгнөрүүлэхгүй байх чиглэл өгсөн. Иймд ариутгал халдваргүйтгэлийн ажлыг өндөр түвшинд хийж байна. Нийгмийн цехүүдэд хөдөлмөр зохион байгуулалтын арга хэмжээг авч хэрэгжүүлэн ажиллагчдынхаа цалинг бүтэн өгч ажиллуулж байна. Иймээс энэ цехийн хүмүүсийг ариутгал халдваргүйтгэлийн ажилд хяналт тавин ажиллуулж байгаа. Нөгөө талаар, ариутгал халдваргүйтгэлийн ажлыг өдөрт гурван удаа хийж байна. Энд онцгой комисс ажиллаж, орж гарсан хүмүүсийн биеийн халууныг үзэж байна. Гаднын байгууллагуудын хүмүүсийн хөдөлгөөнийг хориглосон. Ажиллагчдын нэг автобус хүнээ буулгасны хойно дараагийн автобус зорчигчдоо буулгах жишээтэй. Нөгөө талаар, “Эрдэнэт” сувиллын цогцолборт тусгаарлалтын бүс бий болгоод орж ирсэн хүмүүсийг тусгаарлах арга хэмжээ авч байна. Тэнд ажиллаж буй эмнэлгийн хүмүүсээ аюулгүй ажиллах хувцас, хамгаалах хэрэгсэл, ариутгалын бодис, хяналтын камер бусад хэрэгцээтэй зүйлсээр хангаад явж байна. -Үйлдвэрлэлийн технологит ашигладаг бодис, сэлбэг хэрэгсэл, бараа материалын хүрэлцээ хэр байна вэ? Хангалттай байна. Бид аваарын нөөц бүрдүүлж ажилладаг. Өөрөөр хэлбэл үйлдвэр тасралтгүй хоёр сар ажиллах нөөц бүрдүүлж явдаг. Технологийн материалууд дээр нөөц бүрдүүлж ашиглаад, нөхөж бүрдүүлээд явж байгаа. Үйлдвэрлэлийн хувьд хэцүүдэж тасалдах юм алга. Манай үйлдвэрийн уурхайчид хагас цэрэгжилтийн байдлаар ажилладаг. Дэлхий нийтийг хамарсан эдийн засгийн хямралд бид бэлтгэлтэй ажиллаад сурчихсан. Эрдэнэт үйлдвэр дансандаа мөнгөтэй байна. Үйлдвэрлэлийн үйл ажиллагаа явуулахад шаардлагатай бараа материалаа худалдаж аваад нөөцөлсөн байна. Дэлхийн зах зээл дээр зэсийн ханш төлөвлөснөөс унасан ч нэмэлт бүтээгдэхүүн үйлдвэрлэх үүрэг авсан штабууд үйлдвэрлэлээ хэвийн явуулж байна даа. -Цаг зав гарган ярилцсанд баярлалаа. Т.Батчулуун Дэлгэрэнгүй...
  • “ТОП”-ууд Эрдэнэт үйлдвэрт зочилж, улсын хөгжлийг эрчимжүүлэх талаар хэлэлцлээ

    Монгол Улсын эдийн засгийн гол ачааг нуруундаа үүрч, ажлын байр олноор бий болгон улсын хөгжил, иргэдийн амьжиргааг сайжруулахад жинтэй хувь нэмэр оруулж, “ТОП-100” аж ахуйн нэгжийн тэргүүн эгнээнд эрэмбэлэгдсэн Эрдэнэс Таван толгой, Оюутолгой, Хаан банк, Голомт банк, Улаанбаатар төмөр зам, MCS, Петровис, МАК, Шунхлай компанийн захирлууд өнгөрсөн баасан гарагт Эрдэнэт үйлдвэрт зочилж, улс орны эдийн засгийг бэхжүүлж, хөгжлийг эрчимжүүлэх талаар хэлэлцлээ. Монголын Үндэсний худалдаа аж үйлдвэрийн танхим, “Эрдэнэт үйлдвэр” ТӨҮГ хамтран анх удаа зохион байгуулсан уг уулзалтад оролцогч магнатууд ТОП-100 аж ахуйн нэгжийг 18 дахь удаагаа тэргүүлсэн манлай үйлдвэрийн Ил уурхайн тэсэлгээ, Баяжуулах үйлдвэр, Белазын гарааш, Засвар механикийн заводын Цутгуурын цехийн үйлдвэрлэлтэй танилцсан юм. Тэд Эрдэнэт үйлдвэрт зочилж, Монголын эдийн засгийн хөгжилд тэргүүлэх 10 компанийн үүрэг оролцоог тодорхойлж, цаашид хэрхэн хамтран ажиллах талаар санал солилцон “Эрдэнэтийн тунхаг” гаргалаа. Сонгуулийн үр дүнгээр байгуулагдах шинэ УИХ, Засгийн газарт энэхүү тунхаг бичгээ өргөн барина гэж МҮХАҮТ-ын Ерөнхийлөгч О.Амартүвшин ярилаа.                         М.Одгэрэл Фото: Б.Баттөгс   Дэлгэрэнгүй...
  • Уурхайчид улс, орон нутгийн төсөвт 230 тэрбум төгрөг төвлөрүүлэв

    “Он гарсаар, Эрдэнэт үйлдвэрийн уурхайчид улс, орон нутгийн төсөвт 230 тэрбум төгрөг төвлөрүүлэн, хэвийн жигд ажиллаж байна. Энэ хугацаанд үйлдвэрлэлийн төлөвлөгөөт бүх үзүүлэлт 100-121,5 хувийн биелэлттэй байв. Үүнийг дагаад санхүү, эдийн засгийн үзүүлэлтүүд ч эдийн засгийн хямралтай энэ цаг үед эерэг сайн байлаа” гэж Үйлдвэрийн газрын Ерөнхий захирал мэдээллээ. Дэлхийн зах зээл дээр зэсийн ханш огцом унасан ч хэмнэлтийн бодлогыг тууштай хэрэгжүүлж ажлын байрыг хадгалах, цалин орлогыг нэмэгдүүлэх, үйлдвэрлэлийн хэмжээг өсгөх, хүрсэн түвшнээ алдахгүй байхын төлөө уурхайчид ажиллаж байна.  Дэлгэрэнгүй...
  • Өнөөдөр 06 дугаар сарын 03

    Мэдүүштэй... 1. Өнөөдөр жилийн 154 дэх өдөр. Он дуусахад 211 хоног үлдлээ.          2. Эрдэнэт хотод агаарын хэм өдөртөө +20 градус, шөнөдөө +4 градус дулаан, ялимгүй хур тунадастай, салхины хурд 6-7 м/сек байна. 3. Аргын тооллын 6 дугаар сарын 03. Буд гараг. Билгийн тооллын шинийн 12. Улаагчин үхэр өдөр. Өдрийн наран 4 цаг 56 минутад мандан, 20 цаг 45 минутад жаргана. Энэ өдөр тахиа жилтнээ аливаа үйлийг хийхэд эерэг сайн. Харин могой, морь жилтнээ сөрөг муу тул элдэв үйлд хянамгай хандаж, биеэ энхрийлүүштэй. Эл өдөр элдэв үйлд хянуур хандах хэрэгтэй ба ан гөрөө хийх, мал адгуус муулах, лус тахих, мал арилжих, гэр бүрэхэд сайн. Харин цөөрөм байгуулахад муу.Өдрийн сайн цаг нь  бар (03:40-05:40), туулай (05:40-07:40), могой (09:40-11:40), бич (15:40-17:40), нохой (19:40-21:40), гахай (21:40-23:40) болой. Хол замд явах хүн баруун хойш зүгт мөрөө гаргавал зохистой.Үс шинээр үргээлгэх буюу засуулахад өвчин эмгэг ирнэ.          4.Дэлхийн зах зээл дээр нэг тонн зэс 5463 ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2805, евро 3115, БНХАУ-ын юань 392, ОХУ-ын рубль 39, Японы иен 26, БНСУ-ын вон 2.2 төгрөгтэй тэнцэж байна. (Эх сурвалж: www.gogo.mn)     Эрдэнэт үйлдвэрийн түүхэнд энэ сард... 1969 оны 06 дугаар сар Зөвлөлт Узбекстаны Ташкент хотноо Монгол-Зөвлөлтийн залуучуудын III их наадам болов. МХЗЭ, БХЛКЗЭ-ийн хамтын ажиллагааны 1969-1979 оны хэтийн төлөвлөгөө батлагдав. Москва хотноо коммунист, ажилчны намуудын ээлжит зөвлөгөөн болов. Чехословак, Зөвлөлтийн мэргэжилтнүүд “Эрдэнэтийн-Овоо”-ны зэс, молибдены ордыг ашиглах талаар техник эдийн засгийн анхны тооцоог хийж, БНМАУ-ын Түлш, эрчим хүчний үйлдвэр, геологийн яамны коллегийн хурлаар хэлэлцүүлжээ.         Дэлгэрэнгүй...
  • Өнөөдөр 06дугаар сарын 02

    Мэдүүштэй... 1. Өнөөдөр жилийн 153дахь өдөр. Он дуусахад 212хоног үлдлээ. 2. Эрдэнэт хотод агаарын хэм өдөртөө +16градус, шөнөдөө +4 градус дулаан, ялимгүй хур тунадастай, салхины хурд 6-8м/сек байна. 3. Аргын тооллын 6 дугаар сарын 02.Ангараг гараг. Билгийн тооллын шинийн 11.Улаан хулгана өдөр. Өдрийн наран 4 цаг 56 минутад мандан, 20цаг 44 минутад жаргана. Энэ өдөр луужилтнээ аливаа үйлийг хийхэд эерэг сайн. Харин бич, тахиажилтнээ сөрөг муу тул элдэв үйлд хянамгай хандаж, биеэ энхрийлүүштэй. Буян номын үйлийг эхлэх, дээдсээс халамж хүсэх, лам хувраг болох, багш шавьд барилдах, номын авшиг авах, шинэ гэр байр авах, лусыг тахих, хүүхэд үрчлэн авах, хур оруулах, дархны үйлд сайн. Улааны үйл, төлгө тавих, морь уралдах, сэтгэлд сэвтэй газар очиход муу болой. Өдрийн сайн цагнь  нохой(19:40-21:40), хулгана(23:40-01:40), үхэр(01:40-03:40), туулай (05:40-07:40), морь(11:40-13:40), бич (15:40-17:40), тахиа(17:40-19:40)болой.Хол замд явах хүн зүүн урд зүгт мөрөө гаргавал зохистой.Үс шинээр үргээлгэх буюу засуулахад эрхтэн хурц болно. 4.Дэлхийн зах зээл дээр нэг тонн зэсийн үнэ 5376ам.долларын ханштай байна. (Эх сурвалж: www.lme.com) 5.Монгол банкны энэ өдрийн нэрлэсэн ханшаар АНУ-ын доллар 2806, евро 3089, БНХАУ-ын юань 392, ОХУ-ын рубль 39, Японы иен 26, БНСУ-ын вон 2.2 төгрөгтэй тэнцэж байна. (Эх сурвалж: www.gogo.mn)   Эрдэнэт үйлдвэрийн түүхэнд энэ сар... 1963 оны 06 дугаар сар Монгол-Чехословакийн хамтарсан геологийн 1-р экспедиц байгуулах хэлэлцээрт гарын үсэг зурав. 1965 оны 06 дугаар сар БНМАУ-ын Сайд нарын Зөвлөлийн дарга Ю.Цэдэнбал БНСЧСУ-д айлчлав. 1966 оны 06 дугаар сар МАХН-ын XVих хурал БНМАУ-д социализмыг бүрэн байгуулах зорилт дэвшүүлсэн МАХН-ын IVпрограммыг баталж, 1966-1970 онд улс ардын аж ахуйг хөгжүүлэх IVтаван жилийн төлөвлөгөөний удирдамжийг гаргажээ. 1967 оны 06 дугаар сар Дархан хотод Монгол Зөвлөлтийн залуучуудын IIих наадам болов.   Дэлгэрэнгүй...
  • “Миний мөрөөдөл” цахим уралдааны дүн гарлаа

    Хүүхдийн баярыг угтан Баяжуулах үйлдвэрээс Эрдэнэт үйлдвэрийн нийт ажиллагчдын хүүхдүүдийн дунд зарласан “Миний мөрөөдөл” зохион бичлэгийн цахим уралдааны шилдгүүд тодорлоо. Зургаан насны ангиллаар бүтэн сарын хугацаанд үргэлжилсэн уг уралдаанд хүүхдүүдийн 90 гаруй бүтээл иржээ. 1-3-р ангийн насны ангилалд Цахилгаан цехийн цахилгаанчин Орхоны охин, XIV сургуулийн 3б ангийн сурагч О.Мөнгөнтуул түрүүлж, Баяжуулах үйлдвэрийн НБХ-ийн баяжуулагч Золжаргалын охин, XIV сургуулийн 2б ангийн сурагч Б.Хулан удаалж, “Сэлэнгэ” амралт, аялал жуулчлалын цогцолборын үйлчлэгч Очмаагийн хүү, V сургуулийн 3д ангийн сурагч Б.Сүлд-Эрдэнэ гуравдугаар байрт шалгарсан байна. Харин 4-5-р ангийн насны ангиллын нэгдүгээр байрыг Баяжуулах үйлдвэрийн ӨНХ-ийн засварчин Будаевийн охин, IV сургуулийн 5-р ангийн сурагч Б.Энхжин, хоёрдугаар байрыг “Сэлэнгэ” амралт, аялал жуулчлалын цогцолборын Нийтийн хоолны хэсгийн нярав Сугарын охин, XIII сургуулийн 5г ангийн сурагч С.Очгэрэл, гуравдугаар байрыг Засвар механикийн заводын ЗУХ-ийн дарга Мэндбаярын охин, М.Анужин эзэлжээ. 6-7-р ангийн насны ангилалд Ил уурхайн экскаваторын туслах машинч Мягмарбулганы охин, XIX сургуулийн 7-р ангийн сурагч М.Хулан түрүүлж, Засвар механикийн заводын токарьчин Буджавын хүү, V сургуулийн 6г ангийн сурагч Б.Энх-Амгалан, Автотэээврийн цехийн гагнуурчин Амгалан-Эрдэнийн хүү, V сургуулийн 7г сурагч А.Түвшинтөгс нар удааллаа. 8-9-р ангийн насны ангилалд тэргүүн байрыг Дулааны цахилгаан станцын мастер Болдбаатарын охин, Орхон Эмпати сургуулийн 9б ангийн сурагч Б.Энхжин эзэлж, дэд байрт Ус хангамжийн цехийн лабораторийн эрхлэгч Өнөрийн хүү, XIV сургуулийн 8-р ангийн сурагч Тулга, гутгаар байрт Ус хангамжийн цехийн оператор Одгэрэлийн хүүхэд, “Билэгт-Өргөө” сургуулийн 8-р ангийн сурагч А.Нэрзэм нар шалгарчээ. Харин 10-12-р ангийн насны ангилалд Аж ахуй, үйлчилгээний цехийн Хүний нөөцийн мэргэжилтэн Болормаагийн охин, V сургуулийн 12в ангийн сурагч Э.Солонго түрүүлж, Авто тээврийн цехийн гагнуурчин Батжаргалын хүү, “Эрдмийн сан” сургуулийн 11-р ангийн сурагч Б.Баттулга, Ус хангамжийн цехийн лабораторийн эрхлэгч Өнөрийн хүү, 14-р сургуулийн 11-р ангийн сурагч Г.Намхай нар удаалав.  М.Одгэрэл Дэлгэрэнгүй...
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
Бидний тухай
Баасан, 31 1-р сар 2020 00:00

МЭДЭГДЭЛ

МЭДЭГДЭЛ

      2020 оны 01 дүгээр сарын 30-ны өдөр urug.mn сайтын сэтгүүлч У.Болортуяагийн “Эрдэнэт үйлдвэрийн мөнгө ёолдоггүй ба дураараа дургигчид”нэртэй нийгмийн цахим сүлжээгээр түгээж байгаа нэвтрүүлэгтэй холбоотойгоор дараах МЭДЭГДЭЛ-ийг гаргаж байна.

     “Эрдэнэт үйлдвэр” ТӨҮГ нь 2019 онд үйлдвэрлэл, санхүү, эдийн засгийн үзүүлэлтээрээ түүхэн дээд амжилт тогтоож, 37 сая тонн хүдэр олборлож, 32 сая тонн хүдэр боловсруулан, 2.2 их наяд төгрөгийн борлуулалт хийж, улс болон орон нутгийн төсөвт нэг их наяд шахам төгрөг төвлөрүүллээ.

     Уул уурхайн олборлох, боловсруулах салбарт технологийн тасралтгүй ажиллагаатай горимоор ажиллаж, хоногт 6 орчим тэрбум төгрөгийн борлуулалт хийдэг, дэлхийн хэмжээний томоохон үйлдвэрийн хувьд орчин үеийн дэвшилтэт найдвартай техник, тоног төхөөрөмж болон сэлбэг, материалын худалдан авалтыг холбогдох хууль, тогтоомжийн хүрээнд зохион байгуулж байна.

      Улс орны нийгэм, эдийн засгийн бүхий л салбарт гол түших багана, тулах хүч болж ирсэн Эрдэнэт үйлдвэрийн 6600 гаруй баялаг бүтээгч уурхайчид, хамт олон улс эх орныхоо өмнө хүлээсэн үүргээ нэр төртэй биелүүлж байна.

     “Эрдэнэт үйлдвэр” ТӨҮГ нь 2019 онд хөрөнгө оруулалтаа эрчимтэй нэмэгдүүлж түүхэндээ хамгийн их бүтээн байгуулалт хийсэн жил боллоо. Үйлдвэрлэлийн үйл ажиллагааг үр ашигтай, өртөг зардал багатай, тасралтгүй хэвийн явуулах зорилгоор 2020 онд өнгөрсөн оноос 2 дахин их хөрөнгө оруулалт хийхээр төлөвлөн цаг наргүй хөдөлмөрлөж байна.

      Өнөөдрийн байдлаар Эрдэнэт үйлдвэрийн бүхий л үйл ажиллагаа хэвийн жигд, тасралтгүй үргэлжилж байгаа билээ.

      Эрдэнэт үйлдвэр 2019 онд 41 жилийн түүхэндээ хамгийн өндөр үр ашигтай ажиллалаа.  

     Монгол Улсын Засгийн газраас Эрдэнэт үйлдвэрт тогтоосон онцгой дэглэмийн үед төрийн өмчит үйлдвэрийн газрын статустайгаар ажиллахдаа үйлдвэрлэл эдийн засгийн түүхэн дээд амжилтуудыг гарган, улс төрөөс ангид байж “шахааны томилгоогүй” болсон, “бараа таваарын шахаагүй” болохын төлөө зорьж байгаа нь тодорхой зорилго бүхий  бүлэг хүмүүсийн дургүйг хүргэж, захиалгат дайралтуудыг зохион байгуулж, улсын үйлдвэрийг тасралтгүй гүтгэлгийн бай талбар болгож байна.

     "Эрдэнэт үйлдвэр" ТӨҮГ нь ийм бусармаг асуудлыг шалгуулахаар хууль хяналтын холбогдох байгууллагуудад хандсан болно.

    Мэдээллийн үнэн зөв, бодитой байдлыг хангаагүй, эх сурвалж нь тодорхойгүй мэдээллийг гүтгэлэг, таамаг хэлбэрээр олон нийтэд түгээж байгаа нь Монгол Улсын Эрүүгийн хуулийн 14.3 дугаар зүйлийн 1 дэх хэсэг, Зөрчлийн тухай хуулийн 6.21 дүгээр зүйлийн 1 дэх хэсэг, Хэвлэл мэдээллийн эрх чөлөөний тухай хуулийн 3 дугаар зүйлийн 3.1 дэх заалтыг тус тус зөрчиж байна.

     Иймд хэвлэл мэдээллийн ажилтны ЁС ЗҮЙ-г эрхэмлэж, МЭРГЭЖИЛ-ийн түвшинд ажиллахыг хүсье.

 “ЭРДЭНЭТ ҮЙЛДВЭР” ТӨҮГ-ЫН

ХУУЛИЙН ХЭЛТЭС, МАРКЕТИНГИЙН ХЭЛТЭС

    Шинэ төрлийн коронавирусын халдвараас урьдчилан сэргийлэх ажлын хүрээнд “Эрдэнэт үйлдвэр” ТӨҮГ-ын Ерөнхий захирлын “Урьдчилан сэргийлэх арга хэмжээ авах тухай” А/47 тоот тушаал гарсантай холбогдуулан үйлдвэрийн цех нэгжүүд ажлын байранд баримтлах арга зааварчилгааг хэрэгжүүлж байна.

     Энэрэл төвд сурч хүмүүжиж буй хүүхдүүдийг урьдчилан сэргийлэх зорилгоор төвийн байранд гадны хүн нэвтрүүлэхгүй байх хорио тогтоож, ариутгал цэвэрлэгээ, халдваргүйжүүлэлтийг мэргэжлийн байгууллагуудтай хамтран тогтмол хийж буйг эмч Б.Бямбасүрэн онцлов. Ариутгал халдваргүйжүүлэлтийг Мэргэжлийн хяналтын газрын зөвлөмжийн дагуу баталгаат бодис ашиглан хийж байгаа аж. Төвийн хүүхдүүдэд хувийн ариун цэврийг чандлан сахих зөвлөмж, гараа байнга зөв угаах, амны хаалт зүүх зэрэг зааварчилгаа хэвшүүлэхийн зэрэгцээ сайн чанарын хоол хүнсээр хангах зорилгоор хөл хорио тогтоосон нэг сарын хугацаанд хоолны орц, найрлага цэсийг өөрчилсөн байна. Илүү тэжээллэг хоол, жимс жимсгэний цэвэр шүүс зэрэг ханиад томууны эсрэг үйлчилгээтэй эрүүл органик хүнс өгч байгааг төвийн эмч нэмж хэллээ. Мөн Эрдэнэт сувиллын цогцолборын эмч нартай хамтран эрүүл мэнд, урьдчилан сэргийлэх чиглэлээр сургалт зөвлөгөө зохион байгуулж байна.

М.Балжинням

     Эрдэнэт үйлдвэрийн Ус хангамжийн цехийнхэн өнгөрсөн онд Сайн саналын систем дэх ажилтнуудын идэвх санаачилгыг 50 гаруй хувиар нэмэгдүүлэн ажиллажээ. Тус цехийн ажилтнуудын санал гаргалт 2018 оны үзүүлэлттэй харьцуулахад 53.2%, саналын хэрэгжилт 50%-иар нэмэгдэж, ажилчдын оролцоо 14.4 хувиар дээшилсэн байна. Ингэснээр цехийн 14 ажилтан 2019 онд Эрдэнэт үйлдвэрийн Сайн саналын системийн санал гаргагч 200 манлайлагч ажилтны жагсаалтад багтжээ.  

     Тус цехийн ажилтнуудын санал гаргалт жил бүр ахиж, ажилтнуудын оролцоо нэмэгдэн, чанар үнэлгээ сайжирч, ажлын байрны тав тух, эмх цэгц дээшлэн, аюул эрсдлийг илрүүлж, арилган ажилласнаар хөдөлмөрийн аюулгүй байдал бүрэн хангагдах боломжтой болжээ. Мөн үйлдвэрлэлийн технологийн процесст тодорхой ахиц гарч, зардал бууруулах замаар ажил хөнгөвчилж, ажилчдын сэтгэл ханамж дээшилсэн хандлага харагдаж байна” гэж өнгөрсөн оны ажлын үр дүн, үнэлэлт дүгнэлтийн талаар тус цехийн Бүтээмж инновацийн мэргэжилтэн А.Долгормаа ярилаа.

     Түүнчлэн бүтээмж чанарын дугуйлангаар дамжуулан хэрэгжүүлсэн төслүүдийн  үр өгөөж, ашигт байдал нэмэгдсэн нь үйлдвэрлэлийн процесст тодорхой эерэг нөлөө үзүүлжээ. 2018 онд тус цехийн Бүтээмж чанарын 9 дугуйлан хамтран 6 төсөл, 40жижиг сайжруулалтын ажил гүйцэтгэсэн бол 2019 онд 15 төсөл, 26 жижиг сайжруулалтын ажил хэрэгжүүлсэн байна. Үйлдвэрлэлийн үйл явц руу чиглэсэн томоохон төслүүд нэмэгдэж, хэрэгжсэн нь цехийн бүтээмжийн үйл ажиллагааны чанар дээшлэхэд нөлөөлж буйг мэргэжилтнүүд онцолсон.

     Ус хангамжийн цехэд хэрэгжиж буй томоохон төслүүдээс дурьдахад, цэвэрлэх байгууламжийн хэсэгт Монгол Улсын Шинжлэх ухааны академи, “Эрдэнэт үйлдвэр” ТӨҮГ-ын Хөгжлийн хэлтсийн хамтарсан "Цэвэрлэх байгууламжийн түүхий лагийг үнэргүйжүүлэх” инновацын төсөл 100%-ийн гүйцэтгэлтэй байна. Мөн Цэвэр ус хангамжийн хэсгийн хэрэгжүүлж буй “Ус хангамжийн цехэд тоног төхөөрөмжийн ашиглалт, засвар үйлчилгээний бүртгэлийн программыг нэвтрүүлэх” инновацын төсөл үргэлжилж байгаа аж. Цэвэр ус хангамжийн хэсгийн инженер техникийн ажилтнуудаас бүрдсэн “Манлайлагчид” дугуйлангийнхан Төв усан сангийн 1, 26-р гар хаалтыг бүрэн автоматжуулж, технологийн горимд шилжүүлснээр эрсдэлийг бууруулж, эрчим хүч хэмнэх өндөр өгөөжтэй ажил болжээ.  

М.Балжинням

Фото: Б.Баттөгс

Төгссөн сургууль:

2002 онд БНХАУ-ын Театр урлагийн академид Тайз, дэлгэцийн нүүр хувиргагчаар, 2010 онд “Энх орчлон” дээд сургуулийг Нийгмийн ажилтан, сэтгэл зүйчээр төгссөн.

Мэргэжил:

Тайз, дэлгэцийн нүүр хувиргагч, нийгмийн ажилтан

Ажилласан туршлага:

2004-2006 Орхон аймгийн Хүүхэлдэйн театрт жүжигчин, 2006 оноос одоог хүртэл “Эрдэнэт үйлдвэр” ТӨҮГ-ын “Энэрэл төв”-д арга зүйч

Мэргэжил дээшлүүлсэн байдал:

1998 онд БНХАУ-ын Хөх хотын Багшийн их сургуулийн хятад хэлний бэлтгэл, 2017, 2018 онд Монгол Улсын Засгийн газраас хүүхдийн хөгжлийг дэмжих чиглэлээр баримталж буй бодлогын хүрээнд зохион байгуулагдсан “Хүүхдийн зуслангийн хөгжлийн хөтөлбөр боловсруулах” зуслангийн удирдах ажилтны сургалт,  2017 онд Багийн ажил, багийн тоглоом 16 цагийн сургалт,  Монголын Скаутын холбооны анхан болон дунд шатны сургалт, ХАБЭА-н модуль 1,2 сургалт, Эрүүл мэндий хөгжлийн төв, Сэтгэцийн эрүүл мэндийн үндэсний төвөөс зохион байгуулсан сургалтуудад суралцаж, амжилттай төгссөн.

Чин хүсэл:

Эрдэнэт үйлдвэрийн бүтцийн нэгж болох “Энэрэл төв” 2017 оноос жил дараалан Монгол Улсын “Жишиг асрамж халамжийн төв”-өөр нэрлэгдэж байна. Нийгмийн хариуцлагын хүрээнд хэрэгжүүлсэн энэ томоохон ажил хүүхдийн гэрэлт ирээдүйд хөрөнгө оруулалт хийснээрээ онцлогтой. Бүтээлч сэтгэлгээ, хамт олны халуун дулаан уур амьсгал, эерэг хандлага, ажлын зөв зохион байгуулалт шаардсан арга зүйчийн ажил хариуцлага өндөр ч тэр өөрийн сонгосон ажил мэргэжилдээ үнэнчээр зүтгэж өнөөдрийг хүрсэн. Аавынхаа эхлүүлсэн ажлыг үргэлжлүүлж, 14 жил амжилттай ажиллахдаа Эрдэнэт үйлдвэрийн “Сайн саналын системийн шилдэг 100 манлайлагч”-ийн нэгээр тодорсон тэрээр хамгаалал хэрэгтэй хүүхэд бүрт туслахыг хүсдэг.

Та өглөөг хэрхэн эхлүүлдэг вэ?

-Өглөө бүр 06:00 цагт босож хүүхдүүдийнхээ өглөөний хоол, цайг бэлтгээд 07:00 цагт ажилдаа гардаг.

-Таны амьдралын сэргээш юу вэ? Хэнээс юунаас урам зориг, эрч хүч авдаг вэ?

-Хүн бүр өөрийн гэсэн сэргээштэй байх. Амьдралын сэргээш гэж намайг ямар ч үед сэргээж чадах тэр хүчин зүйлийг хэлэх байх. Миний хувьд хөгжим, кино, гэр бүлээсээ эрч хүчийг авдаг. Би хаана ч  явсан үргэлж хөгжим сонсдог.

-Хийж байгаа ажлын тань онцлог юу вэ?

-Манай төв эцэг, эхийн хайр халамжаас гадуур байгаа хүүхдүүдэд урт болон богино хугацаагаар асрамж, халамжийн үйлчилгээ үзүүлэх цогц арга хэмжээг хэрэгжүүлэн  ажилладаг. Бидний ажлын үр дүн маш олон жилийн дараа гардаг. Тиймээс ч өнөөдрийн байгаа цаг хугацаандаа тэдгээр бяцхан зүрхийг Зөв Монгол хүн болгон төлөвшүүлэхээр ажиллаж байгаа нь бидний ажлын онцлог гэж хэлж болох юм.

-Яг одоо ямар ажил дээр төвлөрч байна?

-2020 онд хэрэгжүүлэх Хүүхэд хөгжлийн төлөвлөгөөг боловсруулахаар нийгмийн ажилтнуудын хамт ажиллаж байна.

-Ажлаа илүү сайн хийхийн тулд та өөртөө ямар зорилго тавьж, хувь хүнийхээ хөгжилд анхаардаг вэ?

-Би ер нь хийж чадахгүй ч хамаагүй, хийхийг хүссэн л бол тэр зүйлээ хийх гэж оролддог. Бага зэргийн сахилгагүй гэх юм уу даа. Надад хийж үзэхийг, сурахыг хүссэн маш олон зүйл бий. Би бусад шиг их ном уншдаггүй. Харин үзэж байгаа кино, алдартнуудын яриаг сонсож, эргэцүүлэн бодож, түүнээсээ суралцдаг. Цаашдаа ч ажлаа сайн хийхийн тулд аливааг шинээр, өөрөөр сэтгэж, тасралтгүй суралцахад чиглэх болно.

-Өөртөө хэвшүүлэхээр зорьж буй шинэ зүйлсээсээ хуваалцаач?

-Эрүүл мэнддээ анхаарч дасгал хөдөлгөөн, спортоор хичээллэх талаа хэвшүүлэхээр зорьж байна.

-Таны хобби?

-Бага байхаас аав минь хүүхэлдэйн урлагт дуртай болгосон болоод ч тэрүү, жижиг хүүхэлдэй, тоглоом цуглуулах дуртай.

-Үеийнхэндээ ямар байдлаар үлгэрлэхийг хичээдэг вэ?

-Өнөөгийн залуучууд мундаг аав, ээжүүд болцгоосон ч дийлэнх нь ид залуу насан дээрээ сэтгэл зүйгээрээ хөгшрөөд байгаа санагддаг. Миний хувьд нас бол тоо. Тиймээс эрч хүчтэй байдлаараа үлгэрлэхийг хичээдэг юм болов уу.

-Эрдэнэт үйлдвэр таны харах өнцөг үзэл бодол итгэл үнэмшилд хэрхэн нөлөөлж байна вэ?

-Эрдэнэт үйлдвэр олон хүний амьдралд баялаг бүтээж, ирээдүйд хөрөнгө оруулалт хийсний нэг хэсэг нь манай “Энэрэл төв”-ийн хүүхдүүд гэдгийг хэлмээр байна. Би 2006 онд Эрдэнэт үйлдвэр ажилд орж, тэр цагаас өнөөдрийг хүртэл ажлаасаа урам зориг, эрч хүч авсаар ирсэн. Цаашид ч энэ эрчээрээ үйлдвэртээ ажиллах болно. Эрдэнэт үйлдвэр бол миний бахархал.

     Эрдэнэт үйлдвэрийн Ил уурхайн техникийн шинэчлэлийн хүрээнд Өрөмдлөг, тэсэлгээний хэсэгт СБШ-250МНА-32 маркийн өрмийн машин шинээр угсрах ажил эхэллээ. ОХУ-д үйлдвэрлэгдсэн уг машиныг угсрах ажил 4 хоногийн өмнө эхэлсэн бөгөөд ирэх сарын 17-19-ний хооронд ашиглалтад хүлээж авахаар төлөвлөж буй аж. Угсралтын ажлыг Ил уурхайн Уулын тоног төхөөрөмжийн засварын хэсэг, Өрмийн засварын хэсгийн механик болон эрчим зүйчийн удирдлага дор нийт 14 хүний бүрэлдэхүүнтэй засварын бригад гүйцэтгэж байна. Ил уурхайнхан 2016 оноос хойш угсарч буй 3 дахь өрмийн машин нь энэхүү СБШ-250МНА-32 машин юм.

     “Энэ жил уурхайд 19,20 дугаартай хоёр ширхэг өрмийн машин шинээр угсарч ажилд гаргана. Эхний ээлжинд 20 дугаартай өрмийн машины угсралтыг эхлүүлээд байна. Дараагийн машин угсралт 3 дугаар улиралд хийгдэнэ” гэж Ил уурхайн Өрөмдлөг, тэсэлгээний хэсгийн орлогч Б.Барсбаатар ярилаа.

    Шинээр угсарч буй машин нь хүчин чадлын хувьд өмнөх суурилагдсан машинуудтай адил боловч цахилгаан хангамжийн найдвартай ажиллагаа, жолоочийн ажлын байрны орчин нөхцөл сайжирч, удирдлага хяналтын самбарын систем илүү боловсронгуй, нарийвчлан хянах боломж бүрдсэн зэрэг олон давуу үзүүлэлттэй юм. Мөн уг машин нь нэгдсэн тосолгооны системтэй. Өөрөөр хэлбэл, техник тосолгоо, үйлчилгээний гар ажиллагааг халж, төвлөрсөн цэгээс бүх тосолгоог автоматаар хийх боломжтой аж. Ингэснээр хөдөлмөрийн аюулгүй байдал, ажлын байрны нөхцөл дээшлэх, бүтээмж нэмэгдүүлэхэд эерэг нөлөө үзүүлнэ.

     Өрөмдлөг тэсэлгээний хэсгийнхэн 2020 онд 473100 уртааш метр өрмийн ажил гүйцэтгэх төлөвлөгөөтэй бол эхний сард 41500 уртааш метр өрөмдөн сарын төлөвлөгөөгөө биелүүлэн ажиллаж байна.

М.Балжинням

Фото: Б.Баттөгс

     Шинэ оны эхний 28 хоногт зэсийн үнэ дунджаар 6115,35 ам доллар тонн байгаа нь өнгөрсөн сарын дундаж үнэтэй харьцуулахад 91,32 ам доллараар өссөн үзүүлэлттэй байна. Он гарсаар АНУ болон Хятад улс худалдааны анхан шатны хэлэлцээрийн асуудлаар тохиролцоонд хүрч гарын үсэг зурсантай холбоотойгоор зэсийн үнэ харьцангуй тогтвортой байв. Харин сүүлийн өдрүүдэд Хятад улс болон дэлхийн бусад орнуудад дэгдээд буй халдварт өвчин, хөл хорионоос шалтгаалан ханш буурах хандлагатай болсон тухай эх сурвалжууд мэдээлж байна. 
      Тухайлбал, 2018 оны 12-р сарын 10-ны өдрөөс 2020 оны 1-р сарын 24-ны өдрийг хүртэл зэсийн үнэ 6000 ам доллараас буурсан тохиолдол гараагүй бол 2020 оны 1-р сарын 28-ний өдрийн байдлаар 5715 ам доллар тонн болж буураад байна. 2002-2003 онд гарсан SARS халдварт өвчний үед Хятадын дотоодын нийт бүтээгдэхүүн /ДНБ/ 1 % - иар, Зүүн Өмнөд Азийн орнуудын ДНБ 0,5 - иар буурсан байжээ.  Тухайн үед Хятад улс дэлхийн нийт зэсийн эрэлтийн 20 орчим хувийг бүрдүүлж байв. Харин одоо бол Хятад улс дэлхийн 2 дахь том эдийн засагтай зах зээлд үзүүлэх нөлөө нь тухайн үетэй харьцуулахад эрс өссөн учир зах зээлд сөргөөр нөлөөлөх эрсдэл ихтэй байгааг судлаачид онцолж байна. Ухань хотоос гаралтай шинэ титэмт  вирус тархсанаас  хойш Хятадын Засгийн газраас авч хэрэгжүүлж буй арга хэмжээ SARS-ын үетэй харьцуулахад өндөр  үр дүнтэй байгаа юм. Гэсэн хэдий ч энэ  вирусын тархалтаас шалтгаалан гол таваарын үнэ эрс буурч байна. 
       Судалгааны байгууллагуудын гаргасан 2020 оны 1-р улирлын үнийн прогноз 5512-6300 ам долларын хооронд хэлбэлзэж,  дунджаар 6034 ам доллар тонн байна. Харин 2020 оны 2-4 улирлын зэсийн үнийн прогнозын дундаж 6117-6213 ам доллар тонн буюу 1-р улирлынхтай харьцуулахад өссөн үзүүлэлттэй байна. Тэгвэл 2020 оны зэсийн үнийн прогноз 5506-6472 ам долларын хооронд хэлбэлзэж 6131 ам доллар байна. Өнгөрсөн оны сүүлчээр 2020 оны зэсийн үнийн таамаглалыг нийт 28 судалгааны байгууллага гаргаснаас 18 нь зэсийн үнийн прогнозоо өөрчлөөгүй хэвээр үлдээсэн бол 9 нь өсгөж, 1 байгууллага нь бууруулах зэргээр  өөрчилжээ. Зэсийн үнийн прогнозоо өсгөн өөрчилсөн байгууллагууд АНУ болон Хятадын худалдааны маргааны асуудал цаашид нааштайгаар шийдэгдэнэ гэдэгт итгэлтэй байгаа бол зарим судалгааны байгууллага 2020 онд нийлүүлэлтийн хүндрэл гарах эрсдэл өндөр байх талаар судалгаандаа тодотгосон байна. АНУ болон Хятадын худалдааны хэлэлцээрийн хэрэгжилт, зах зээлд нөлөөлж буй бусад хүчин зүйлсээс шалтгаалан үнэ судлаачдын таамаглалаас буурах эрсдэл хэвээр байна.
Экспорт борлуулалтын хэлтсийн Тэргүүлэх мэргэжилтэн Х.Мөнхцэцэг
 
 
    Дэлхийн олон оронд тархаад буй корона хэмээх шинэ төрлийн вирусын халдвараас урьдчилан сэргийлэх хөдөлгөөн өвчний голомт улстай хил залгаа Монголд эрчтэй өрнөж буй нь зүйн хэрэг. Тэр дундаа 6600 гаруй ажилтантай өнөр бүл Эрдэнэт үйлдвэрийн хувьд вирусын халдвараас урьдчилан сэргийлэх ажлыг нэгдсэн зохион байгуулалттай хэрэгжүүлж байна. Энэ талаар Эрдэнэт сувиллын цогцолборын Ерөнхий эмч Ж.Ганчимэгээс тодрууллаа.                   
    -Корона вирусын халдвараас урьдчилан сэргийлэх чиглэлээр Эрдэнэт сувиллын цогцолбор ямар ажил эхлүүлээд байна? 
    -Дэлхийн эрүүл мэндийн байгууллага болон манай Эрүүл мэндийн яам, Орхон аймгийн Онцгой комиссын шийдвэрээр өгсөн үүрэг даалгавар, чиглэлийн дагуу вирусын халдвараас урьдчилан сэргийлэх ажлыг зохион байгуулж байна. Өнгөрөгч даваа гарагт Эрдэнэт үйлдвэрийн удирдлагуудын түвшинд шинэ халдварт өвчнөөс хэрхэн сэргийлэх талаар хэлэлцэж, ойрын өдрүүдэд болох томоохон үйл ажиллагааг хойшлуулж, нэгдсэн зохион байгуулалттай ажиллах талаар Ерөнхий захирлын тушаал гарсан. Энэ хугацаанд 600 гаруй ажилтанд вирусын халдварын тархалт, түүнээс урьдчилан сэргийлэх талаар мэдээлэл хүргэлээ. 
    -Үйлдвэрийн газрын ажилчдад анхааруулж буй гол зөвлөмж юу байна?  
    -Дархлаагаа хамгаалах, ядрахгүй байх, бие, сэтгэлээ ажилд зөв бэлдэх, амин дэмтэй эрүүл хооллох, гараа савандаж угаах, амны хаалт тогтмол хэрэглэх талаар зөвлөмж мэдээлэл өгч байна. Мөн ажилчдад насанд хүрсэн гэлтгүй гар угаах аргачлалыг бүтцийн нэгжийн мастерууд, ахлахууд, эмч нартайгаа хамтраад хэсэгчлэн зохион байгуулж байна. Ер нь цэцэрлэгийн хүүхдүүд гар угаах аргачлалыг сайн мэддэг. Харин томчууд тоомжиргүй, буруу угаадаг талтай. Дэлхийн эрүүл мэндийн байгууллага гурван төрлийн амны хаалт хэрэглэхийг зөвлөж байгааг танилцуулж, тэдгээр маскны бүтэц, онцлогийн талаар дэлгэрэнгүй мэдээлэл хүргэж байна. Өвчнөөс урьдчилан сэргийлэхэд хувь хүний хандлага, гэр бүлийн дотоод зохион байгуулалт их чухал. Олуулаа амьдардаг бол нэг нь гарч хүнсээ цуглуулах, олон нийтийн газраар явахдаа зөв маск хэрэглэх, гэрийн хязгаарлалт тогтоох, худал мэдээлэл, сурталчилгаанд автахгүй байх хэрэгтэй. Халдвар бүртгэгдсэн улс орнуудад зорчихгүй байхыг ажилчдадаа, үйлдвэрийн бүтцийн нэгжийн дарга нарт анхааруулсан. 
    -Ташаа мэдээллийн тухайд...?
    -Олон нийтийн сүлжээгээр спирт хэрэглэх, өрөөндөө цацах, хөвөнд шингээгээд гараа, ширээгээ арчих зөвлөмж явж байгааг хүмүүс их дагаж байна. Бидэнд ийм зөвлөмж ирээгүй. Тэгэхээр албан ёсны эх сурвалжтай, мэргэжлийн байгууллагуудын мэдээлэл, зөвлөмжийг л дагаарай.  
    -Эм, эмнэлгийн хэрэгслийн нөөцийн бүрдүүлэлт хэр хийгдэж байна? 
    -Энэ үед эмнэлгийн тусламж үйлчилгээний бэлэн байдал хамгийн чухал. Халдварт өвчин тархлаа гэхэд бэлэн байдлаа бүрэн хангасан байх ёстой. Бид ХАБЭА-н хэлтэс, холбогдох цех, нэгжүүдийн хамтарсан шийдвэрээр эм, эмнэлгийн хэрэгслийн нөөцийн бүрдүүлэлтийн жагсаалт гаргаад, тооцооллуудаа хийгээд өчигдөр хангалтын нэгдсэн захиалгаа өгсөн. Үүнд шаардлагатай ариутгалын бодисууд, нэг удаагийн хамгаалах хэрэгслүүд, эмнэлгийн багаж, тоног төхөөрөмжүүд багтсан.
     -Томуугийн ид дэгдэлтийн үе тохиож байгаа нь эрсдэлийг нэмэгдүүлж байна уу?
     -Шинэ төрлийн корона вирусын халдвар тархаж байгаа энэ үе нь манай улсад төдийгүй дэлхий нийтэд томуу, томуу төст өвчний дэгдэлт идэвхтэй цаг үе тохиож байна. Түүнээс гадна В вирусын халдвар, мөн амьсгалын замын Н3 N2 зэрэг зургаан төрлийн вирусээр хүмүүс өвчилж байгаа тохиолдол давхцаж байгаа нь эрсдэлийг нэмэгдүүлж байна. Тиймээс ард иргэд зөвхөн мэргэжлийн байгууллагуудын зөвлөмжийг чанд мөрдөх хэрэгтэй.
    -Баярлалаа. 
М.Одгэрэл
Фото: Б.Баттөгс
Мягмар, 28 1-р сар 2020 00:00

Цахилгаан шат шинэчлэгдэв

    Баяжуулах үйлдвэрийн Өргөн тээвэрлэх машин, механизмын хэсгийн хариуцдаг хоёр цахилгаан шат саяхан шинэчлэгджээ. Нунтаглан баяжуулах хэсэг болон Өөрөө нунтаглах хэсэгт 20 гаруй жил тасралтгүй ажилласан, технологийн болон их засварын ажилчдыг зөөвөрлөдөг цахилгаан шатыг Солонгос улсын Хандок фирмийн орчин үеийн электрон тохиргоотой, 500 кг буюу зургаан хүний нормтой, тав тух хангасан лифтээр сольжээ. Цахилгаан шатны угсралт, тохируулгын ажлыг Улаанбаатар хотын “Хандок инженеринг” компани гүйцэтгэсэн байна. Саяхан, Мэргэжлийн хяналтын Улсын байцаагч Нийслэлээс ирж суурилуулсан цахилгаан шатанд үзлэг шалгалт хийсэн бөгөөд дүгнэлт нь ирэх долоо хоногт гарахаар ашиглаж эхлэх аж.

    Баяжуулах үйлдвэрийн кран, хүн зөөврийн цахилгаан шатнуудын засвар үйлчилгээ хариуцдаг Өргөн тээвэрлэх машин, механизмын хэсэг нь өөрийн цехийн хүн тээврийн 10 цахилгаан шатаас гадна Дулааны цахилгаан станц, Аж ахуй, үйлчилгээний цехийн лифтүүдийг давхар хариуцан ажиллаж байна. Дулааны цахилгаан станцын цахилгаан шатыг нэн даруй солих шаардлагатай тул хүсэлт гаргасан гэж тус хэсгийн дарга П.Лхагвасүрэн ярилаа.

М.Одгэрэл

Фото: Б.Баттөгс

    Энэ онд хийгдэх ажлынх нь талаар “Эрдэнэт үйлдвэр” ТӨҮГ-ын Зураг төслийн хүрээлэнгийн захирал Инженерийн зураг төслийн хүрээлэнгийн захирал Д.Тамираас тодрууллаа.

     -Танай хүрээлэн 2019 онд хэчнээн хэмжээний ажил хийв. Энэ талаар товч мэдээлэл өгнө үү?

     -Өнгөрсөн онд бид 1090 зураг төсөл боловсруулах ажлын даалгавар хүлээн авсан. Үүний 490 нь 2020 онд хийгдэх ажлын зураг төсөл. 2019 оныхоо хөрөнгө оруулалтын ажлыг эхний хоёр улиралд дуусган хүлээлгэж өгсөн. Бүтцийн өөрчлөлтөөр “Эрдэнэт үйлдвэр” ТӨҮГ болсноор зураг төсөл боловсруулах ажил түрүүлж явах шаардлага гарсан. Энэ чиглэлийн дагуу бид өнгөрсөн оны ажлаа эрт дуусгаж 2020 оны зураг төсөл боловсруулах ажилдаа орсон. Бид энэ оны хөрөнгө оруулалтын ажлын 60 хувийг гүйцэтгэсэн. Урсгал засварын ажлыг ондоо багтаан хийхээр төлөвлөөд байна.

     -Эдийн засгийн хувьд ямар үр ашигтай ажил хийгээд байна вэ?

     -Барилга байгууламж,хяналт төлөвлөлтийн хэлтсээс манай хүрээлэнд зураг төсөл боловс-руулах даалгавраар захиалга ирүүлдэг. Тухайн ажлын зураг төсөл хэдий хэмжээний өртөг, зардалтай гарах нь бидний гаргасан тооцоогоор явна. Харин Барилга байгууламж, хяналт төлөвлөлтийн хэлтэс дээр тодорхой өртөг зардал, эдийн засагтай холбоотой мөнгөн дүнг үйлдвэрийн газрын төлөвлөгөөнд батлуулан ажиллаж байгаа.

    -Танай хүрээлэнд зураг төсөл хийдэг хэдэн хүн байна. Мэргэжил боловсролын хувьд хэр өөрчлөлт хийгдэж байна вэ?

    -Манай хүрээлэн бүтэц орон тооны хувьд 56 хүнтэй. Үүний 47 нь инженер техникийн  ажилчид. Манайх зураг төсөл боловсруулах тусгай зөвшөөрөл авч ажилладаг. Тусгай зөвшөөрлийн хүрээнд тавигдах шаардлагын дагуу мэргэшсэн инженер 15, зөвлөх найман инженер байх ёстой. Одоогоор 30 гаруй мэргэшсэн инженер ажиллаж байна.

    -Танай бүтэц өөрчлөгдөж үйл ажиллагааны хувьд өргөжиж байгаа гэж сонслоо. 2020 онд ямар зорилт тавин ажиллаж байна вэ?

    -Манай инженерийн зураг төслийн төв Зураг төслийн хүрээлэн болон өргөжиж байгаа. Ингэснээр бүтэц орон тоонд өөрчлөлт гарахгүй. Хэтийн зорилгоо тодорхойлсон. Цаашид ямар үйл ажиллагаа явуулах талаар төлөвлөсөн ажлууд бий. 2020 оны хоёрдугаар сарын нэгний дотор энэ оны хөрөнгө оруулалтын ажлыг 100 хувь дуусгах үүрэгтэй. Гэвч биднээс шалтгаалахгүй Баяжуулах үйлдвэрийн бутлуур, тээрмүүдийн худалдан авалт хийгдээгүй, шинээр суурилагдах тоног төхөөрөмжүүд тодорхой болоогүй, техникийн паспортууд нь манайд ирээгүй учраас энэ ажлууд хойшилж болзошгүй байна.

    -Энэ онд томоохон ямар ажлууд хийх вэ?

    -Өнгөрсөн онд Ган бөөрөнцгийн цехийн индукцын хос шугам болон Баяжуулах үйлдвэрийн молибдены баяжмалын шинэ шугам, бутлуур, тээрмүүдийн зураг төслийн ажлыг голлон гүйцэтгэсэн. 2020 онд Баяжуулах үйлдвэрийн Хаягдлын аж ахуйн нэг, дөрөв, тавдугаар насосыг шинэчлэх, шилжүүлэн суурилуулах ажил хийгдэнэ. Бутлан тээвэрлэх хэсэгт тээрмүүд болон бутлууруудыг шинэчлэх ажил, Спорт цогцолборын усан бассейны иж бүрэн засварыг олон улсын стандартад нийцүүлэн хийх юм. Ил уурхайн галын насосны станцуудын шахах системийг бүрэн шинэчлэх ажил хийнэ. Засвар механикийн заводын Цутгуурын цехийн технологийн шинэчлэлийн ажил үргэлжилнэ. үйлдвэрийн бүсийг тойрсон Гэрээт цагдаагийн газрын 13 харуулын постыг стандартад нийцүүлж шинэчлэх ажил гэх мэт бүтээн байгуулалтын их хугацаа, хөдөлмөр шаардсан ажлууд хийхээр төлөвлөөд байна.

    -Баярлалаа.

Т.Батчулуун

Фото: Б.Баттөгс

Бүлэг Ярилцлага

   Засвар механикийн заводын Цутгуурын цехийн шинэчлэлийн ажил он дамжин хийгдэж байна. Өнгөрсөн лхагва гарагт тоног төхөөрөмж үйлдвэрлэгч ХБНГУ-ын “FAT” компанийн хяналтын угсралт, суурилуулалтын гурван мэргэжилтэн Эрдэнэт үйлдвэрт ирснээр, хүйтнээр хатууруулах холимгоор хэв барих технологийн шинэ тоног төхөөрөмжүүдийн угсралт эхэллээ. Өнгөрсөн оны турш бэлтгэл ажил нь хийгдсэн уг шинэчлэлийн тоног төхөөрөмжийн суурийн ажил бүрэн дууссан байна. Харин тоног төхөөрөмжийн угсралт, холболтын ажил дөрөвдүгээр сарын эхэн болтол үргэлжилж, туршилт, тохируулга, зүгшрүүлэлт тавдугаар сарын нэгэн хүртэл явагдаж ашиглалтад хүлээн авах төлөвлөгөөтэй. Цутгуурын цехийн шинэчлэлийн тоног төхөөрөмж 100 хувь ирсэн, сэлбэг материал бүрэн хангагдсан тул ажил хийхэд саадгүй гэж Механикийн хэлтсийн дарга Б.Чинзориг мэдээллээ.

    Тоног төхөөрөмжийн угсралтын ажлыг Герман мэргэжилтнүүдтэй хамт Засвар угсралтын цех, Барилга, угсралтын цех, Холбоо мэдээллийн технологи,  автоматжуулалтын цех, Засвар механикийн заводын ажилчид гүйцэтгэж байна. 

М.Одгэрэл

Фото: Б.Баттөгс

Мэдээний төрөл

Календарь

« 1-р сар 2020 »
Да Мя Лх Пү Ба Бя Ня
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Зургийн цомог